وفي الجزء الثالث عشر من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الثالث عشر من رواية محظوظ ولكن
عمر : السلام عليكم
ليال : وعليكم السﻻم
عمر : كيف الحال
ليال : الحمدلله كيف حالك انت
عمر : بخير الله يسلمك … شوفي يابنت الناس انا عندي موضوع هكي وﻻزم نحكي فيه معاك
ليال : تفضل
عمر : انا نبيك تلبسي عبايات
ليال : السترة واجبة
{يا دراه الكبد اغلب البنات مايحبوشش العبايات اشمعنى انتي }
عمر : مش العبابات المخصرات ﻻﻻ الواسعات تبدى فضفاضة وكانك ﻻبسة عباية امك
ليال : اكيد الواحدة لما بتستر روحها ياتستر مزبوط يابﻻش منها السترة
{سحيقة الملح كلمتك ديما واتية}
عمر : باه تمام وطلوع هلبا هلبا مافيش داعي منه …وحوش اماليك مريرة في الشهر مانحبش كثر المشي والجي
ليال : حاضر
{تي قولي ﻻ .. حطي ايديك ف نصك وقولي ﻻ يابابا هدا ماناقص ديري اي لقدة بش نتعارؤكوا }
عمر : ايحضرلك الخير … وبالنسبة للماكلة انحب الغليض راه كسكسي رز رشتة بازين امبطن محشي عصبان اااايوه التفتف الرقيق مايمشيش معاي جو بيتسا نصاص دحي عقاب الليل
ليال : ان شاء الله
عمر : موافقة واﻻ ﻻ… عادي ادوي
ليال : حاضر بإذن الله
{بالله شن متوقع انا …ادا كان خوتها لصقة لوح اكيدة هيا لصقة ﻻميرا }
عمر : باهي المهم ﻻ طلعة ﻻ خشة ايوه حتى العمل مانبيكش تشتغلي
ليال : شغلي مش رسمي مانمشيش ديما نمشي وقت يطلبوني كورسات لصغار بس
عمر : حتى هوا بﻻش منه
ليال : ان شاء الله
عمر : مافيش حاجة فبالك بتقوليها
ليال : ﻻﻻ مافي شي فبالي
عمر : باه … هي سﻻم
ليال : سﻻم
{نباهاهاهاعععع اكيدة توا مقعمزة تندب ف حظها وتقول اعﻻش اعﻻش ياربي بعتلي واحد متعقد زي هدا ههههههه }
قعمزت ليال اتفكر بينها وبين نفسها
الله ياربي الحمد لله بعتلي شخص رجولي وعنده شخصية قوية وعنده غيرية مش زي ولد عمي الدلدول باهي اللي رفضته الحمد لله خلي اندير سجدة شكر
عمر : ها فروووجة …
فرج : راقد انا راقد
عمر : ومن اللي يرد
فرج : تنسم نعسان راه سﻻم سﻻم
سكر عمر الخط ومعش عرف وين يمشي !
فرجع للمكان عمله وقعد فيه ل الليل
مع ساعة 8 بعد صﻻة العشاء عمر وخالد مقعمزين قدام البحر ..
عمر : والله كان نلقى نسافر ياخلودة
خالد : وسافر عﻻش ﻻ
عمر : تي باش بنسافر بشعر راسي تشبح فيها الحالة المعاشات مانزلوش
خالد : اي والله مشكلة المعاشات
ترررررن تررررن
{شن تبي هادي ماصدقت حصلت الرقم شوره ! … شريني انفلقي ماني راد عليك }
خالد : سمعنا شعر احبيبي عميرو
عمر : كبدت وجيت بنفرح بيها لقيتها لفعة فعفست عليها
خالد : تي ﻻﻻ هات شعر حلو بنبعته للكبيدة
عمر : فاقد الشئ ﻻ يعطيه … انا نشعر على حسب حالتي النفسية… وقت انحب تو نقولك شعر حب اما توا متليع قلبي معبي جروح ومش ﻻقي طب.. صبرني سيدي ربي عالوعة واﻷهات ..(شاف لسمي عمر وتنهد اااااه وكمل اﻻغنية )).. متليع ضايق مر كأس الغية مامره مالقيت معاه مسرة بكاني بدمعات
خالد : واضح عليك اتغني وصوتك خانقاته العبرة ربي ايفرج عليك ان شاء الله
فرج : سمعت فرج انا
عمر : مافيش في السوق
خالد : غير مرزوق
فرج : ريتوا ربي كاشفكم تقرموا فيا وكنتوا تدعو عليا… اشبح شنو فرج ان شاء الله…اممم اكيدة ان شاء الله ايموت فرج ان شاء الله صح واﻻه
خالد تلفت ل عمر وقاله : بكل خالك ياعمر
عمر : مادوراش وهوا احرف من العزايز .
في اليوم اللي بعده
طالع عمر بعد صﻻة المغرب …ففكر انه يتصل ب اياد
عمر : ها اياد شن الجوو
اياد : تمام شن امورك
عمر : ماشية … امس متفاهمين نتﻻقوا ف البحر بتجي واﻻ شنو
اياد : عندي دورية تعالالي ف مقر عملي نهدرزوا
عمر : مقرك بحدا مركز البحوث النووية واﻻه … لحظة لحظة عندي انتظار ..خليك ماتسكرش …
وسرح اياد في نورس ايام الحب الجميل…وقت كان ايبيت عليها من مقر عمله بحكم انهم قراب على بعض …. وادكر هداك اليوم المؤلم …يوم اختطفوا نورس
اياد : نووووووررررررررس نوووووررررررررس …
فرفش وطلع نقاله من جيبه واتصل ب نورس ولقاه مقفل زدات نفسيته اطحطمت
فاتصل بصﻻح
اياد : ص صﻻح صﻻح سيارتي فيها المرا
صﻻح : بشوية خلي نفهم منك شن اتقول
اياد : ياصﻻااااح خنبولي سيارتي وفيها مرتي
صﻻح : ﻻ اله اﻻ الله … وين وين خنبوها
اياد : زناتة
صﻻح : باهي به تو نبعت دورية قاعد ف العمل انا تمام سﻻم ..
يا ايمن ايممممن
ايمن : نعم
صﻻح : طلع دورية فيسع سيارة اياد مخنوبة وفيها عياله اجري بالله عليك
ايمن : ان شاء الله هي وين المكان
صﻻح :زناتة … اسمع قسموا روكم على اتنين رقم سيارة اياد تعرفها واﻻه
ايمن : نعرفها
صﻻح : خﻻص اطلع بالله عليك فيسع..
ايمن : تمام
قعد صﻻح يفرفش مش عارف كيف يتصرف … فاخدي نقاله واتصل ب اياد تاني …
اياد : شنو شنو صﻻح لقيتوها
صﻻح : ﻻﻻ انت وين بنجي ناخدك
اياد : زناتة بحدا محل الاتات واﻻغدية متع الفرجاني
صﻻح : تمام تمام دقايق وجايك
بعد شوي.. وصل صﻻح ف اياد
ولقاه في حالة يرثى لها يصيح في الشارع زي المجنون
صﻻح : اياد اياد
اياد بكل حسرة والم وخوف : نورس ياصﻻح نورس
صﻻح : غير اركب ان شاء الله نلقوها اياد : ان شاء الله يارب
صﻻح : شن نوعها السيارة اللي خطفت
اياد : ا الشارع كان فاضي مافيش اﻻ عيل قالي جت سيارة عالية وخنبتلك سيارتك
صﻻح : عندك علم ان هما مايبوش يخنبوا سيارتك
اياد : كيف شن قصدك
صﻻح : سيارتك اللي خنبوها تعتبر عادية ومافيهاش طميعة تو كانك طلعت بالتندرا نقولوا لكن هادي سيارة هوندا
اياد : ماتقوليش قاصدين يخطفوا نورس
صﻻح : حسيت هكي وان شاء الله ﻻ … ﻻن سيارة عالية بتخنب سيارة هوندا مستحيل
اياد : يانهاري اﻻحرف
صﻻح عبر ﻻسلكي : ايمن … مواصفات السيارة اللي خنبت عالية واللون ماعنديش بيه علم
ايمن : تمام …
صﻻح : اتصل بخوك عمار خلي يطلع ايدور
وقعدوا ايدوروا الليل كله وﻻ اثر لسيارة و اياد ولى وجهه اصفر وتعب ويبكي
صﻻح : وحد الله يا اياد… اﻻ مانلقوها بإذن الله تعالى
ايمن عبر ﻻسلكي : صﻻح لقينا سيارة اياد ملوحة في الفرناج وفاضية مافيها حد
عمر : ها اياد سامحنا خليتك انتظار
اياد : اه ﻻ عادي وﻻ ايهمك
عمر : ومعليشي مانقدرش انجي اتصلوا بيا ف العمل وقالولي تعال ضروري وقعدت نتناقش معاهم
اياد : باهي ياطيري ربي ايعاونك
عمر :وايعاونك يااحبيبي سﻻم ..
{اخ يا اياد ياريته حياتي زيك لاقي حب حياتك وتزوحت عن حب يﻻ ان شاء الله ربي ايهنيه يستاهل والله}
فاتوا اسبوعين وعمر يحاول انه يخلي ليال تكرهه وليال متحملة وساكتة من منطلق خوديه تو بعد الزواج يتغير وتتصل بيه مايردش عليها تبتعت مسجات وﻻ معبرها …. الى ان ..
خ وداد : عمر ياعمر
عمر : نعم
خ وداد : ام ليال مريضة
عمر : وبه ؟؟ ربي يشفي
خ وداد : وتبي تتهنى على بنتها قبل ما ادير عملية
عمر : تمشي ادير عمليتها اللي كاتبه ربي بيصير بﻻ دوة عزايز تره
خ وداد : تي خلي نديروا العرس ونتهنوا عليك
عمر : درتوا فضانية بالدرقة وفوتناها لكن بدبسيني ف زواجة وانا مش مهيئ نفسيتي ﻻ مانقدرش سامحيني
خ وداد : اماﻻ بين عالبنت
عمر : بري بينيلها اونه والله ماطالع وﻻ شاري حاجة وﻻ مختارلها حااجة وﻻ ماد زويلي غادي اخت الجيش اهياه تي حد يخطب لولده عيلة معبيا وﻻد .. يوم خوي مريض بنمشيله.. يوم خوي رجله مقصوصة… يوم خوي مضروب برصاص… يوم خوي عرسه… يوم خوي بيسافر… يوم خوي خطفوه داعش… نقعد غير تاكسي المدام انا ماشي جاي على حوشهم
خ وداد : اخﻻص اخﻻااااص
عمر : ﻻ اخﻻص وﻻ وفاء دبستيني يمى في هالزواجة ظلمتيني وظلمتي بنت الناس
خ وداد : غير تو تتزوج وتلقى كل شي امستف تو ترتاحلها
عمر : دوة عزايز … تو بالله يمى بوي اتزوجك من خﻻل نظرات واﻻه.يعني تبوا بعضكم.. عام تام اتبيتي عليه من الروشن وهوا يخطم من شارعكم خصيصا بش ايشوفك وانا بتزوجيني قطوس فشكارة
خ وداد : نوض نوض من اهني فيسع.. الحق فيا خاطبتلك بنت ناس
عمر : نايض نايض ها … ربي يسامحك يمى ربي ايساااامحك ..
وفعﻻ خ وداد درات اللي ف راسها وشرت الحاجات هيا وحاتم ونازك واختارت يوم بش اديرهل تلبيسة بسيطة رفعت نازك وسماح معاها وفي يوم التلبيسة حدث ماﻻ يتوقع …
محمد ل حاتم : والله الوالدة تبي تتهنى على بنتها ومرضها خطير ياريت اتخلوا العرس نهاية الشهر هدا
حاتم : مازال بكري واصﻻ مش واتيين
محمد : مش حنطلبوا عليكم حاجة ..ﻻ حق مزين وﻻ حق فيلو وﻻ شي احنا نتكفلوا بكل شي
فايز : وبالنسبة لذهب عاد مادورش .. بونا كان تاجر ذهب الله يرحمه وواخدين الصنعة منه بنتنا وبنعبوها ذهب من فوق ل لوطى
محمد : كل ليلة الوالدة تبكي على هالموضوع تبي تحضر عرس بنتها قبل ماربك ياخد امانته
حاتم : بعد عمر طويل … والله شن بنقول
محمد : معقولة عاد نقولك اﻻم تبي تفرح ب بنتها اتقولي مش عارف شن بنقول
خ امنة تبكي : والله هيا هادي بنتي وحيدتي نووور عيوني ياوداد كل بطن انقول بالك تطلعلي بنت لكن ربي ماسخرش اﻻ بعد 12 الولد
خ وداد : بش وﻻدك عشرة بس ماشاء الله
خ امنة : زوز اتوفوا في اﻻحداث
خ وداد : والله الحق الولد مش مجهز روحه توا وقتله وقالي مازال
خ امنة : مانبو شي احنا مش طامعين في حد غير نبي نشوف بنتي عروسة بش نرتاح
حاتم ل محمد : يستر الله
فايز : ياريت تخلوه نهاية شهر 2
حاتم : ان شاء الله خير
خ وداد : امسحي دميعاتك ياامنة …اللي فيه الخير ربي يقدمه وان شاء الله مايكون خاطرك اﻻ طيب .
خالد : بجديات اليوم بيانك !
عمر : بيان اجباري
خالد : كيف ؟؟وعﻻش انت اهنا واﻻ ماتبيش اتلبسها
عمر : مش رايدها ياخالد مش رايدها
فرج : مايبيهاش البنت امه خطبتهاله بسيف
خالد : اه محرها اللقطة به وكيف بدير
عمر :مش عارف نبي نخليها تكرهني والبنت شي درتلها كل العراقيل واﻻزمات وهيا شي كله باهي ان شاء الله تم
خالد : باهي بالك البنت كويسة اهو تقول حاضر وتم
فرج : يبي يتزوج عن طريق حب
خالد : الحب ماقدرته ياناس الحب ماقدرته … فوتها الدوة هادي ياعمر … الحب بعد الزواج احﻻ
عمر : هه قالها … تي انت هداك النهار تبي شعر للكبيدة متاعك … شن اتهدرز
خالد : ان لم تستطع تغيير الواقع فحاول التعايش معه
عمر : نوض من اهنا نوض فكني منك
فرج : اممتى نزل عليك العقل ياخلودة ؟؟
خالد : اهو نهدوو في الولد
ترررن … وصل مسج لفرج
نازك >> فرج راهو عيلة ليال يبو العرس نهاية شهر 2 حاول اتقول المعلومة هادي لعمر بهداوة قبل ماتقوله امي بعركة ..
عمر : خيرك حال عيونك في النقال شن فيه
فرج : اه … شن بنقولك .. اكيد كل شي قسمة ونصيب صح
عمر : ايه
فرج : وانت ياعمر شخص راضي باللي كاتبه ربي
عمر : من اتوفى ؟؟؟ من اتوفى ماترعشنيش
فرج : مش وفايات ﻻﻻ … عرسك نهاية شهر 2 .
وقف عمر وبتوتر قال : تتسهوك ؟؟
فرج : ﻻ والله نازك هكي قتلي شوف ها
خدي عمر النقال قري المسج وفلت منه النقال وعيونه تشقلبوا لفوق وطاح طول وعرض …
فرج و خالد : عمر عمررر
قاموه ورفعوه للمستشفى … وخدوه منهم المسعفين ودخلوه لحجرة …
بعد شوي طلعلهم الدكتور
فرج : شن صار يادكتور ؟؟
الدكتور : المريض عنده غيبوبة سكر
يتبع………
لقراءة الجزء التالي : الجزء الرابع عشر من رواية محظوظ ولكن
لقراءة الجزء السابق :الجزء الثاني عشر من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
