الجزء الثالث من رواية إمرأة بلا هوية

مهند أدهميوليو 7, 2022

0 348 6 دقائق

وفي الجزء الثالث من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .

الجزء الثالث من رواية إمرأة بلا هوية

فتح الباب ولقي مروان هايج ومسكو من قميصه وبقي يكورك في هيستريا : وين رهف ؟ اذا م سلمتني ليها والله بضيعك انت م قدري،،، احسن ليك تبعد عن الشر وتغني ليه البت دي حقتي انا،،، وانا م بخلي حقي فاهم الكلام دا ؟ انا منتظر شهور تجي انت وتلقاها بالجاهز؟ تبقي م عرفتني كويس،،،
اي مزه تجي هناك تصطادها؟؟ مافي داعي للانانيه اذا انت بتدي احسان قروش انا صاحب البيت ،،،،
زحا خطاب من طريقه وعايز يدخل الڤيلا بس خطاب بقي يقول ليه احترم نفسك يا زول انت مجنون ولا شنو ؟ اطلع من بيتي والا ح اخليك تعدي باقي عمرك في السجن ،، رهف بقت تصرخ في هستريا ابعد عني  سيبني في حالي انت عايز مني شنو ؟؟؟ مروان عاين ليها وقال في غضب : فاكره نفسك في أمان مع خطاب؟؟ هاهاهاها عارفه انتي عامله زي شنو ؟؟ زي الغزاله الهربت من الاسد وادست في حضن النمر!!! لكن انا ما بخليك،،، انتي حقتي و… قطع كلامه بعد سمع صوت عربيه الطاره وهرب بسرعه لخارج الڤيلا وبعدها ب لحظات جو رجال الشرطه لكن بعد فوات الأوان ،،، فتشو كل المحلات المجاوره بدون فايده ،،،،،
وبعدها جو داخلين البيت وسألو عن الشخص المتهجم عليهم وصلته بيهم شنو؟ خطاب جاوب : هيلين الشغاله طلعت السوبر ماركت ونست الباب مفتوح،، الحرامي افتكر الڤيلا م فيها ناس،،، دخل عشان يسرق طبعا لقانا موجودين،، وحاول يضربني بس الحمد لله م حصل شي ونشكركم جدا…
رهف بقت تعاين لي خطاب في دهشه واستغراب وسكتت ،،
روضه والده خطاب جاتها كومه سكر من الخلعه وبعد اسعفوها قالت موجهة كلامها لي خطاب : اسمع ي ولدي نحن عمرنا العامر الشرطه م زارت بيتنا وانت عارف غلاوتك عندي قدر شنو ؟ بس انا ام وخايفه عليكم اسي المجنون دا لو طعنك انا كان البحصل لي شنو ؟ ومرتك وولدك الصغير واختك ذنبهم شنو يشوفو المناظر دي وانت عارف خوله عيانه وامكن الموضوع دا يأثر عليها  بأختصار البت دي م عايزاها في البيت دا ،،، م عندي استعداد اخسرك يا نور عيوني بسبب وحده م معروف ليها اصل من فصل انا آسفه حبيبي……
خطاب في حزن : معليش ي امي بس هي ضحيه صدقيني .

خطاب طلع فوق عشان يشوف رهف وحزن جدا لمن لقاها بتبكي وطبطب عليها وقال في حنان : معليش م تزعلي من امي هي م بتفهم الحاجات زي فهمنا و
قاطعتو رهف في هدوء : انا م زعلانه منها انا زعلانه لاني جبت ليك مشاكل وكمان امك مرضت بي سببي  وكمان المزعلني اكتر انت ليه اتسترت علي واحد مجرم زي دا ؟؟؟
خطاب ارتبك و بعد تفكير طويل قال ليها : انا عايز احاسب مروان بي طريقتي بدون تدخل الشرطه ودا كلو من الغبيه هيلين  هي البلغت الشرطه ،،،،،
سكت مسافه وقال ليها تقبلي تتزوجيني ؟ لمن تبقي مرتي مافي زول يقدر يقول كلمه وتحت اي ظرف انتي معاي ،،، المعتوه الاسمو مروان دا م يستطيع يقرب منك ،،،
رهف ابتسمت وقالت : بشكرك علي وقفتك معاي بس مستحيل اقبل تضحيتك دي…… انا بمشي من هنا وبفتش شغل وبعتمد علي نفسي م تخاف علي وبكمل علاجي  بعدين انا ما معروف شي عن الماضي تبعي…احتمال اكون متزوجه ،،، واحتمال اكون صاحبه ماضي سيئ،،،، وبرضو في الحاله دي كمان م بناسبك ،،،، والاهم من دا كله انت متزوج ست البنات وعندك احلي ولد في الدنيا دي ،،،
خطاب مسك يدها وقال : اولا موضوع انك تكوني متزوجه ،،، دا احتمال نآخدو في عين الاعتبار ،،،، اما حكايه ماضي سيئ دي م وارد خالص ،،، البت البتضرب زول لما الدم يسيل منو دفاعا عن شرفها م بتكون خاطئه وحتي لو كنتي انا بحاسبك من يوم عرفتك ،،، اما موضوع التضحيه م وارد لانو اي شخص يشوفك لازم يغرم بيك لانك امنيه اي راجل ،،،،،،،، وبالنسبه ل زوجتي وولدي الراجل محلل ليه اربعه ،،، وانا مستطيع والحمد لله
رهف : بشكرك علي ثقتك فيني بس لازم نصبر عشانك وعشاني ومعليش لازم امشي.
مشت رهف لي روضه في غرفتها وشكرتها ونزلت وفي الهول لقت ميناس وودعتا وطلعت من البيت ،،،
خطاب غير هدومه بسرعه ولحق رهف،،،، وفي الطريق قابل عمو اخو ابوه داخل علي البيت وبعد سلم عليه سألو وهو بعاين جهة رهف : والله ي ولدي لمن شفت البت دي قدام البيت قلت اكيد التهيئات رجعت لي تاني  دي منو دي؟ تبارك الخالق ……
خطاب : هههههه والله ي عمي تاريك لسه بتعرف تميز الجمال  النظر 100%
العم : وين واديها ؟ دي مفروض تعقد عليها وتجيبا البيت دا اسي ……
خطاب : ياريت يا عمي بس عندها ظروف بحكيها ليك مره تانيه ……
رهف ركبت في العربيه وقالت لي خطاب : ح نمشي وين ؟ انا شايفه انو لحدي هنا وانت م قصرت ،،، خليني اعتمد علي نفسي واشوف مصيري ..
خطاب في حنان : صدقي اني اتعودت عليك وحاسي مصيرك مرتبط بي مصيري
رهف ابتسمت وقالت : انا م عايزه ادخلك في مشاكل ليه انت م عايز تفهمني
خطاب : الزول عشان يحصل علي بت زيك لازم يحارب ،،، منو البشوفك وم يتعلق بيك ؟ او يتمني انك تكوني ملكه ،،،،،حتي عمي عجبتيهو  ورده بيضاء حسناء ميساء ابداع كيف ما تشاء يا وجه الاشراق والضياء ،،،،
رهف : ههههه ،،،، القابلني في البوابه دا عمك يعني ؟ باين عليه لذيذ  ،،،
خطاب : ايوه عمي ،، يلا حاليا بوديك الشقه حقتي وبوصي ليك عمو طه الغفير ومرته،، ساكنين في الملحق حارسين العماره لانو م عايزين نأجرها !!
رهف : خطاب انا م عايزاك تشيل همي كفايه السببتو ليك لحدي اسي…
خطاب : اسمعي !!!! اقعدي علي الاقل لحدي م تشتغلي واطمن عليك ،
رهف : م عارفه ارد جميلك دا كيف  شكرا علي كل شي ……
خطاب : طيب ادخلي الشقه وانا بمشي السوبر ماركت واجيك
رهف مسكت يده في خوف وقالت : لا لا بمشي معاك  ،،،،،،،
خطاب ابتسم وعاين ليها في حنان وساق العربيه ومشي علي السوبر ماركت ،،،، عدي فتره وبعدها جا شايل اكياس كتيره وختاها في الضهريه وركب،،، رهف قالت ليه : دي مونه السنه ولا شنو ؟
خطاب : هههه ولسه فضل نمشي البوتيك الفي شارع ……
رهف في ضيق: خطاب ارجوك م ممكن تشتري لي اي حاجه…… دا اسمو استغلال وانا م بحب الاستغلال
خطاب : اسمعي انا م عملت غير الواجب واي راجل في محلي بعمل كدا… ويلا اختاري كم لبسه قبل اغير رايي
رهف : علي شرط بسدد ليك اي حاجه… ان شاء الله لو بالتقسيط واضح ؟
خطاب ابتسم وقال : عليك الله قولي واضح دي تاني…
رهف : ههههه
اختارت عبايه وطرحه وجزمه ولبسه تاني وخطاب بعد تحنيس حتي خلتو يشيل ليها عطور وكريمات ومستلزمات البنات زي فرش وامشاط وادوات تجميل وزيوت شعر واكسسوارات ،،،،،
رهف في ضيق : يعني في داعي للحاجات دي كلها ؟
خطاب : اووووف
سكت وفكر شويه وبعدها اضاف : والله فعلا في حاجه من الحاجات دي م ليها لازمه
رهف في حيره : كلها م ليها لازمه بس القاصدو شنو انت بالضبط ؟
خطاب ابتسم وقال : ادوات التجميل دي… والله انتي لو غسلتي وشك بي مويه قمر قمر
رهف ابتسمت وحركت وشها شمال يمين وقالت : طيب يلا نمشي مافي فايده
دخل الحاجات التلاجه ومشي المطبخ عشان يجهز اكل وسأل رهف : تحبي تآكلي حاجه معينه ؟ ولا تآكلي علي مزاجي ؟
رهف بتضحك : خليها بمزاجك والله المستعان
خطاب قطع سلطه وقلي بيض وعمل مكرونه باللحمه وسلطه فواكه
رهف مشت استحمت ولبست فستان اسود طويل وسرحت شعرها وختت الطرحه علي راسها وجات قعدت في السفره……
فجأه تلفون خطاب ضرب فتح الخط وكانت ميناس وقالت في ضيق : يعني طلعتها من البيت برضو م ارتحت،،،، معاها طول الوقت حتي الشغل اهملتو  بعدين الزول الاسمو مروان دا جا تاني وفضحنا عند الجيران ،،،موش شايف انك دخلت نفسك في ورطه ودخلتنا معاك ؟ عمرك م كنت ضعيف قدام انثي اشمعني دي ؟ عارفه عندك علاقات مع نسوان وبنات لكن رهف حاسه انها بالنسبه ليك غير ……
خطاب وشو اتغير وقال : خلاص خير يا ميناس بحاول اتصرف يلا سلام ……
قفل الخط وكست وشو ملامح حزن رهيبه وقال موجه الكلام لي رهف : انا لازم امشي البيت ،،، جهزت السفره ،،، اكلي وارتاحي ،،، المساء بمر عليك…
رهف سكتت وم سألته عن المكالمه ووصلته لحدي الباب ومشت المطبخ رجعت الاكل محله وعملت كبايه قهوه ورقدت في الهول وبقت تفكر لازم تلقي شغل … لازم تفتش اهلها لازم تعرف اي شي كل البتعرفو عن نفسها اسمها ودا بفضل بطاقه امتحان الشهاده ،،،، فجأه اتذكرت البطاقه دي وبالتاريخ دا معناه هي تكون امتحنت الشهاده ،،،، ايوه بس لازم تتأكد لازم تمشي الوزاره والحمد لله رقم الجلوس موجود ،،،،،
اسي المكاتب بتكون قفلت ،،، بكره من الصباح ح تمشي ،،،، ولما تجهز حق تذكره بورتسودان،،،، ح تسافر اكيد،،،،،، دي البلد العاشت فيها،،، لو سافرت ح تعرف الكتير عن حياتها ،،،،،
خطاب زول وقف معاها مستحيل تبقي ليه سبب مشاكل مع زوجته واهله….
خطاب وصل البيت ولقي ميناس واقفه ومحقبه يديها وقالت : زولتك الجديده دي لو خايف عليها فعلا ابعد عنها لاني ح ادمرها دمار شامل ،،،، ميناس القاضي م بتخسر حرب!!! اكيد م بقعد واعاين في بيتي وهو بتخرب من نكره حثاله زي دي
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*