من الجميل أن تحب قراءة الروايات والقصص الرائعة والأجمل أن تجد رواية منها في قمة الحلاوة والخيال الذي لا حدود له، هذا بالظبط هو الوصف الدقيق لرواية حالة حب للكاتبة لوزة، حيث تقدم لنا قطعة من الجمال الذي لا مثيل له في اجزاء رواياتها، وهذا بالظبط ما يجعل المتابع يكمل الرواية ويقرأها من جديد مرات ومرات وهذا من حبه الكبير لأعمالها، لذلك هيا بنا سوياً لنبدأ قراءة الجزء الثالث من الرواية .
الجزء الثالث من رواية حالة حب للكاتبة لوزة ليبية
معليشي امس الضي كان هارب
شده معتز اضبطه وقاله- عظم الله اجرك معليشي هد حد يومها الله غالب …
شمسي فتح فمه بيتكلم ماقدرش … حاول مرة ثانية ماقدرش … انزاد صدمة على صدمته وفتح عيونه زي الحوتة المخنوقة وهوا مش فاهم شي
رخي معتز شمسي ولقاه مسبوه
معتز – اياح عاد سرحت تاني … شمسي … وحد الله ياراجل
شمسي شاف لمعتز حاول يتكلم مافيش صوت … شد رقيته وكح كحتين وحاول يتكلم مافيش فايدة … مشي جري ل الة الميا
معتز – وحد الله ياشمسي
صب شمسي اميا وشرب وتنحنح
بيقول الحمدلله ماطلعش صوت …
مشي للكرسي ورجليه يكر فيهم كران… قعمز وجاه معتز وقاله – استهدى بالله يا شمسي ونوض ديرلها اجرائات الوفاة والدفن نوض
… وبري قول ل اماليها
شمسي – ا ا ا ا
{ياريتني انا متت بدالها }
معتز – غير شن اتقول
شمسي – ااا او او او
معتز – غير شن تخرط ياشمسي استهدى بالله
{والله تمنيت ربي ياخدني بدالها تمنيت}
* سكت شمسي *
{كله مني كله مني …. كان مازعلتهاش راه ماصار اللي صار … … ياريتني ماروحت من السفر وﻻ قتلها نتﻻقوا وﻻ شي … والله صعبة صعبة ياربي…استغفر الله العلي العظيم استغفر الله }
~~~
منيرة – ووووه عليا ريفاء ياحاتم ريفاء وخيييتي وووووه ووووه
حاتم – وحدي الله يامنيرة ماديريش في روحك هكي
منيرة – ياحليلي وخيتي ياكبدي هيييييه يا ونس ليا وووك عليا وووك
حاتم – اصبري ياودي بالك اللي اتصل لقي تلفون اختك طايح ويجرو بينا
منيرة – ﻻﻻﻻﻻ قلبي قابضني من كنت معاك في المطعم وصبع رجلي اليسار قرصني معناها فيه حاجة سوووو ووووه علياااااا
(هادي لقطة عزايز طبعا … الصبع او الرجل اليسار كان حكت معناها شخص ما يعزوه صارتله حاجة )
حاتم – تي اما صبع واما كراع يامنيرة ريحينا اختك مافيها شي
منيرة – اجري ياحاتم خيرك تمشي بشوية اجري
حاتم – اهو وصلنا … تي اصبري وين نازلة خلي نخش من بوابة
منيرة – البوابة زحمة وتبيلها بش نخشوا ووووووه خلي ننزل والحقني وووه … وووك عليا وخيتي وووووووه
حاتم – به بري بري ياودي عبيتيني وووه
~~~
شمسي وضح ل معتز ان صوته هرب وانه معش يتكلم طبعا باﻻشارات
معتز – ﻻ حول وﻻ قوة اﻻ بالله العلي العظيم …. ماتفكرش فيه هلبا بإذن الله يرجع
{مش هامني صوتي بقد هامتني ريفاء}
معتز – هي نوض معاي نوض … ماتشبحليش هكي هيا نوض قعدتك اهنا ماليهاش داعي…
شمسي – o_O
معتز – قصدي نوض معاي هيا اقلها تروح اتقول ل اماليها
هز راسه شمسي وناض معاه …
مشي خطوتين وتﻻقاته منيرة وطول هبت فيه
منيرة – ووووووه شن درت في اختي يا سمسي شن درت
شمسي – 
{اعود بالله منها اسمي شمسي مش سمسي }
منيرة – اتكلم كيف صار هكي
ووووه اتكلم خيرك ساكت وخيتي كانت زي النسمة
خنقاته العبرة شمسي واشرلها مادرت شي واشرلها بصبعه فوق …حكمت ربي
معتز – عظم الله اجرك في اختك
منيرة ماعدلتش عليه وتلفتت ل شمسي وقتله بصوت عالي – اتكلم شن صارلها
معتز – تي بشوية عالشاب اللي يسمع يقول خدي كﻻشن وفرغ فيها اكيدة عركة وجت فيها رصاصة طايشة
منيرة – كانت معاه موعد عﻻش ماحماهاش واﻻ لبد وراها
معتز – شن اتقولي انتي ؟ هدا حد يومها اختك ولو وقف قدامها شمسي والف شخص الرصاصة بتجي فيها … مسمية باسمها رصاصة لريفاء
منيرة – وانت منو اصﻻ واﻻ حاطك دفاع خليه يتكلم بروح
معتز – صوته هارب مايتكلمش فهمتي توا
طبطب شمسي ع كتف معتز
{ياسر يامعتز ماتقعدش انت وياها ناقر ونقير }
فهمه معتز فسكت …
شمسي مد ايده ل منيرة بش ايعزيها مشت عليهم وخلتهم خخشت للحجرة ادور في الدكتور
معتز – تقريبا قتلي عندهم خال في الزاوية واﻻه ….
شمسي … ايه
معتز – خﻻص خليه يكلموه وهوا يجي يدير اجرائات الوفاة الحق من معاملة اختها طارت النية
شمسي ..ﻻﻻ انا بنديرهم
*راهو ياشر تأشير مش يتكلم*
~~~
نورة – حي علمهااااا تعالي شوفي تعالي….. تي نوضي ياكلبة
عفاف – شن فيه شنو
نورة – خﻻص فاتاتك اللقطة
عفاف – شن فيه
(الموقف التالي واقعي معش ندكر هل حكيته في رواية قبل هكي ام ﻻ بس حتى حكيته بنعاوده هههه بش الشباب معش يتعرضوا لكمين زي هدا )
نورة – سيارة الكحلة اهياه
عفاف – وينها
نورة – اهي تحتنا
عفاف – خيرها ؟
نورة -تشبحي فيها اللي فوسطها
عفاف – وجها مش واضح لكن فيه واحدة ف سيارة ايه
نورة – كان معاها صاحبها شوره المهم عطاته شكارة وخﻻته ينزل للمحل بيردلها قطعة واﻻ مش عارفة شن بيدير
عفاف – به وشن فيها
نورة – طلعت من شنطتها بخاخ زي شيشة ملمع مرش وبخاته وين ماكان مقعمز رشت كرسيه كله ودست البخاخ
عفاف – صنة قصدك
نورة – صنة حويلتك ياغبية سحر هدا
(طبعا لو ماشفتش بعيوني ماكنتش حنصدق انا واختي كنا واقفين ف بلكونة وشفنا هالشوفة)
عفاف – اللهم استرنا يارب … خيرهم ولو هكي البنات متع خودني بسيف
نورة – ياويلهم من ربي …. اهواه طلع
عفاف – انكلمه اناديه ؟؟؟
نورة – مصحك اهفتي خير ماتصير مشكلة شن تحسابيه بيصدقك انتي اكيدة بيصدقها
عفاف – ياناري والله وجعني … ركب لسيارة
نورة – ربي ايكون في عونه وخﻻص وحسبي الله ونعم الوكيل فيها
خشت عليهم جمانة ف بلكونة وقالت – خيركم تتحسبنوا
عفاف ونور حكوا لجمانة
جمانة – بالك معطر جو واﻻ ملمع مرش
نورة – معطر راسك … كان معطر بتبخه فوق في الهواء وكان ملمع مرش عﻻش بديره على الكرسي رشاته كله اتصوري جيهة الراس والظهر والمقعد
جمانة – محقرها كانها تخاف ربي ماتسترجاش ادير هكي …
عفاف – والله بطني وجعتني من الموقف … تو انجيكم
نورة – هههه بري بري
* قعمزت حمانة عالكرسي وبربشت تلفونها مالقتش اغنية حلوة في الراديو فحطاته بحدى الغرسة …
جمانة – تعرفي نورة
نورة – هاه
جمانة – كنت نفكر توا ….من بداية خطوبتنا انا وحاتم لتوا …على قد مانبعت في مسجات ل حاتم شي مايعدلش عليا … ﻻ يرد بمسج وﻻ يعبرني من اﻻساس
نورة – معليشي اغلببيتهم هكي الشباب
جمانة – يﻻ قولتك … حقا نبيك تطلعي معاي محﻻت غدوة الصبح
نورة -اوكي عادي … تعرفي كان بابا يخليني نتصرف في الورث اللي حصلناه من محمد
(خوهم المتوفي)
جمانة – عﻻش شن بديري بيه
نورة – امممم بما انهم خمسة ﻻف بناخد بيهم سيارة وانتي
جمانة – انا مازال مافكرتش الحق وﻻ فكرت اني نقرب دفتر شيكات
نورة – باهي اللي مافكرتيش انا يوميا نفكر ونبي ناخد منهم لكن .. تخافي يصيرلي زي عفاف يوم ماجي يختبر فيها هل غلوس قاعدات واﻻ ﻻ … تتفكري فيها
جمانة – ايه نتفكر لما قالها سلفيني المبلغ كلها ومشي مصرف وطلعوا ناقصين اربع مية
نورة – ههههههه نتفكر فيه بهدلها ياناري ماخلى ماقلها وسحب منها دفترها …هههه تعرفي لدرجة بديت نخاف ناخد منهم خمسة اجني هههه
جمانة – ههههه باهي اللي خفتي كان هدا نلقوك طاقا في حدود تونس
نورة – هههههه ياريت
نورة – تره اعطيني نقالك… خلي انقل منك مسجات
جمانة – اه… اونه محطوط بحدى الغرسة خوديه …
نورة – به ……….. عندك مكالمتين فايتات …
جمانة – اللطف مصرع …هاتيه هاتيه حي عليا كان يطلع حاتم
نورة – ناسيتيه صامت واﻻ شنو
جمانة – ايه … حييييي هوا … خلي انعاود
نورة – خلي انوض نرفع الصواني للمبطخ اصﻻ مش خاطري نسمع الموشحات متعه …
جمانة – به ….. السﻻم عليكم
حاتم – وعليكم السﻻم
جمانة – كيف حالك حبيبي
حاتم – باهي
جمانة – معليشي حتومي مانندريش عالنقال
حاتم – شن ماتندريش عليه شن فايدته هوا بش اتلوحيه وتمشي
جمانة – معليشي
حاتم – مافيش حاجة اسمها معليشي …. مش مرة مش اتنين هكي اديري… قتلك كدة مرة معش تلوحي تلفونك
جمانة – خﻻص حتومي مشيها هالمرة ..
حاتم – مانمشيهاش كل مرة هكي اتقولي
جمانة – اسفة … خﻻص حتوم … حتوووومييييي
حاتم – نعم
جمانة – وعد يبدى تلفون معاي 24 عال24 زي الصيدلية هههه
حاتم – هههه
جمانة – باهي اللي ضحكت … اه قبل ماننسى غدوة الصبح احتمال احتمال نمشي للمحلات انا ونورة
حاتم – عﻻش شن بتاخدي
جمانة – شوي مﻻبس حوش
حاتم – باهي لكن ماعنديش فلوس راه فصة المرتبات معش نولوا كان كان هدا راه قتلك ناخدلك انا
جمانة – ﻻﻻ عندي الحمدلله
حاتم – اوكي سﻻم جوني الشباب … جمانة – باهي حبيبب باي …
~~~
منيرة – معليشي مارديتش عليك حاتم
حاتم – فداك انا ياعمري
منيرة – والله قاعدة مصدومة من خبر اختي
حاتم – ربي ايصبرك ياروحي
منيرة – روح بيا روح خلي
حاتم – سكري الباب باهي قاعد مفتوح
منيرة – باهي هي …
حاتم فتح تيزتانه وطلعلها مبلغ وقدره 250 دينار – خودي منوش بالك ينقصوا عليك الفلوس واﻻ حاجة
منيرة – ياوخيتي والله تريس انت ياحاتم مش عارفة شن كنت بندير من غيرك …
حاتم – كان ماوقفتش مع منوش حبيبي مع من بنوقف
منيرة – اممم لكن مانبيش نتقل عليك بالك المعاشات ماينزلوش
حاتم – ﻻﻻ اﻻمور طيبة ينزل معاشي واموره طيبة
منيرة – ربي يحفظك ويزيدك من خيره
حاتم – ان شاء الله … ومع غدوة الصبح بكري تو نجيبلك مونة وحاجات الغدي ان شاء الله…
منيرة – باهي تم غير روح بيا خلي نقول ل امي ع وخيتي وووووه عليا وووووه
حاتم – هيا اهو بنروح بيك معش اتوهوهي
منيرة – كيف مانوهوهش ياكبدي هييييه وخيتي هادي وخيتي
حاتم – اهو نوصلك لحوشك وبعدين شديها ووهات دركت
منيرة – حسك مش حازن ع اختي
حاتم – غير احزني عليها انتي قبل
منيرة – عينك قصدك مايبانش عليا حازنة
حاتم – ﻻﻻ قصدي كلنا ليها ماتحزنيش
منيرة – ياااااااااا وووووك عليا وك حاتم مسح ع وجهه وقال – الصبر
* الساعة 5 عشية
خ نعيمة – وين الكعيكات جمنو
جمانة – هيا تو نجيبهم هي … وين بوي اماﻻ
خ نعيمة – سؤالك مش بﻻش …
نورة – طلع بوي مع صﻻة العصر
جمانة – به شن صار يمة
خ نعيمة – قالك اجليه موضوع لبعد مايروح من دبي ماتكسريش الراس نوضي جيبي الكعك نوضي …
جمانة – احححح باهي
عفاف – اه حبيبي كيف بنطلع من داري … ايه ايه استناني يﻻ باي
خ نعيمة – نويرة …
نورة – نعم
خ نعيمة – زود اضربي ل حنان (جارتهم ) خلي اتجي تهدرز وتشرب شويهية
نورة – تو اتجي من غير مانضرب
عفاف – ماتوصي بشي يمى طالعة انا
خ نعيمة – وين بيها
عفاف – ماشية للعيادة
خ نعيمة – وﻻ تشاوري وﻻ تناوري هكي طالعة زي العزري..
عفاف – قتلك يمة غير انتي تنسي …
خ نعيمة – له ماقتيليش !
عفاف – هيا وقت وقت يمى خلي نمشي فيسع قبل مايفوت دوري ويمغرب المغرب
خ نعيمة – ماتعطليش وعارفاته موعد راه … الحاجات هادي ماتفوتش عليا
عفاف – ههه ﻻ شن بنكدب عليك انا ماشية لعيادة بندير حشو سن
خ نعيمة – ايه ايه بندير روحي مصدقاتك الله غالب بري زينة
عفاف – سﻻم سﻻم
خ نعيمة – نوضي هاتي تلفون خلي نضرب لحنان خلي اتجي تهدرز
جمانة – مش خاطري انوض خودي تلفوني اتصلي منه
خ نعيمة – عادي هاتي …
*مر الوقت بائس على شمسي… رائع على عفاف … بطيئ على نورة … مزعج على جمانة … اختصارا تم شمسي اجرائات الوفاة بمساعدة معتز …وروح بيه للحوش
خ بدرية – اهلن جيتوو ^^
معتز – شن حالك خالتي
خ بدرية – الحمدلله ئه سمله … خيرك ياشمسي شن فيه وليدي خيره عيونك منفخات
معتز – خليه يخش يرتاح ياخالتي تو نحكيلك انا
خ بدرية – به خش خش شمسي … خش شمسي لداره وسكر الباب … ومعتز حكي ل ام شمسي اللي صار
خ بدرية – ياناااااري رويفة صغيرة يامينتي عليها … هلكنا هالرصاص الطايش ياكبدي … قريب كل حوش فيه حد متوفيله برصلصة
معتز – مش غير هلكنا ربي يهدي البﻻد والعباد
خ بدرية – اي والله
معتز – وبنقولك حاجة ياخالتي لكن ماترعشيش روحك
حطت صوابعها ع دقنها وقتله – هاه قول شن فيه تاني
معتز – راهو شمسي معش يتكلم يعني اتبكش
خ بدرية حطت يديها ع راسها وقالت – انهااااااااار والله احرررش وووك عليا وحيدي
معتز – استهدي بالله باخالتي هادي من الصدمة بس تﻻتة ايام اربعة وتو يولي يتكلم
خ بدرية دمعوا عيونها
معتز – امسحي دموعك ياخالتي…ماتخليشي يشوفك هكي عاد …هوني عليه همه وصبريه
مسحت دميعاتها بشاربتها وردت عليه – ان شاء الله خير ربي يردله صوته يارب
معتز – اللهم امين …خلي نروح انا تو بعدين مع المغرب نرجعله نطمن عليه
خ بدرية – باهي به … بسﻻمة
معتز – سﻻمات ….
*سكرت الباب بدرية وهيا تتكلم مع نفسها وراسهل يرفع ويجيب
خ بدرية – ياناري عليا شمسي القنين اتبكش في جراير هالبلوة ريفاء … اححح استغفر الله هيا في دار الحق وانا في دار الباطل ربي يرحمها … خلي نخش نشوف هالولد … مايدير في روحه حاجة
~~~
ومن ثاني يوم تم دفن ريفاء والكل روح من المقبرة اﻻ شمسي… ومعتز قاعد بعيد عليه ..
قعد مقعمز شمسي جنب قبر ريفاء ويبكي
[اخ ياريفاء اخ …مشيتي وخليتيني …لمن خليتيني لمن … ياربي صبرني على فراقها صبرني يارب ..كانت عمري كانت روحي كانت كل شي … كانت بسمتي ونظر عيني وكل شي …. ياربي خودني حتى انا خودني مش طايق نقعد في دنيا من غير ريفاء … مش متخيلها دنيا من غير ريفاء … ]
شمسي انفعل وقف وشد سوريته من بدايتها ومزقها طارو كل البطم و بمرارة والم بصوووت عاااالييي قال – ااااااا اااااااااااااااااااااا
معتز – خلعتني ياودي
شمسي يضرب ع صدره وكرر الصيحة – ااااااااااااااا
معتز – تسكت ياهمي قاعدين فجبانة راهو ماينط فينا عفريت واﻻ حاجة …
نزل راسه شمسي يبي يتكلم يبي ؤ ايفضفض لكن شي شي … بعد ساعة وربع من الدفن روح بيه معتز وخطم على امه في عزاء حوش ريفاء وروح بيهم للحوش …. قعدت امه تبي اتهديه ماخلى قطعة في الحوش اﻻ وكسرها … على جية خواته الزوز… حاولو يهدوه ماباش يهدى اتصلوا بأختهم الدكتورة … جت وجابت معاها يبرا مهدئ دفتهاله هديكا يبرة المنوم في يده ادروخ وارقد ….
~~~
ساعة 9:30 مساء
عفاف – تو نحكيلكم بعدين
نورة – اﻻﻻﻻ توا احكي شن صار في الموعد
عفاف – ﻻ توا كيف حطيت العشي هيا نوضي انتي ويها
جمانة – برو تو نلحقكم
عفاف – به
[خلي نتصل بحاتم ونقوله على مبلغ الفلوس … ]
جمانة – السﻻم عليكم
حاتم – وعليكم السﻻم … مش فاصي انا توا
جمانة – باهي بنقولك حاجة عسريع
حاتم – نعم قولي
جمانة –
يتبع ………..
لقراءة الجزء التالي : الجزء الرابع من رواية حالة حب للكاتبة لوزة ليبية
لقراءة الجزء السابق : الجزء الثاني من رواية حالة حب للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية
جميع الحقوق محفوظة للكاتبة لوزة ليبية .
