وفي الجزء الثالث من رواية طبيبة قلبي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة اسماء محمد .
الجزء الثالث من رواية طبيبة قلبي
دكتور وليام بعد رحب بي ، هو بتكلم هندي وإنجليزي قال لي
You are avery successful and excellent doctor and lam glad that you will replace me when l travel
(إنتا دكتور ناجح جدا وممتاز ويسعدني إنك تحل محلي في وقت سفري)
وبعديها وراني كل حاجة محتاجة متابعة أو كدا وهو طوالي طلع لموضوع سفرو ، كان معاي دكتور تاني إسمو ماهر وبرضو بتكلم هندي وإنجليزي لكن هو سوداني عشان كدا كنا مع بعض في نفس المحل وبقينا نمسك الحالات البتجينا والمرضى لحدي ما مر شهر كااامل فيهو جاتنا حالات كتيرة ، وحوادث أغلبها كان ضربات في الرأس وضرر في العمود الفقري أو حصول كسور في الفقرات ودا البعمل خلل في الأعصاب وبضعف التحكم في العضلات وفقدان الإحساس والآم شديدة ودا بتوقف علي حجم الإصابة ، ، ، يعني لو الإصابة في الحبل الشوكي في العنق المريض بفقد الحركة في الزراعين والساقين ودا بقود لشلل جزئي أو كامل وممكن يتعافى ويىجع الإنسان يمشي تاني في البيأخد شهور وفي سنين وللأسف إحتمال يكون شلل دائم
والعمود الفقري والحبال الشوكية بنشخص إصاباتهم بالفحوصات التصويرية ، الأشعة السينية ، التصوير المقطعي المحوسب ، التصوير بالرنين المغنطيسي ودا أفضل واحد في الدقة لكن بكون ما ممكن لو في أجهزة مزروعة زي ناظمات القلب….
المهم الحالات كانت بتتحول بيني وبين دكتور ماهر وعملنا عمليات كتيرة مع بعض وهو ناوي يفتح مستشفاهو الخاصة بشراكة مع كم دكتور وقال لي إنتا لازم تنضم لينا لأنك شاطر جدااا وبتدرس الحالات بدقة وتركيز بس أنا رفضتا لأنو كنتا مزحوم شديد وبكون منتظر متين بس أطلع من دوام المستشفى دا وأصل ارتاااح وأبعد من جوها ، ، قال لي طيب يا أنور ممكن نعمل شراكة بين المستشفى حقتي وحقتك الهناك في السودان يعني لو محتاجين لأجهزة او كدا ، ، قلتا ليهو في موضوع الأجهزة دا ممكن لأنها بتكون في صالح المرضى وبتخفف عليهم بدل يمشو برا لأنو عندنا أجهزة ناقصة لسا لكن أعفيني من الإنضمام ليك ، ،بس هو أصر شديد وكل يوم يفتح معاي الموضوع دا في النهاية وافقتا مع إني بس مشكلتي كان ما داير مسؤليات زيادة ، لكن قلتا ليهو بعد فترة الشهرين دي تعدي عشان دكتور وليام بكون رجع لمحلو وأنا بكون إتفرقتا أصلا فضل كان إسبوع واحد بس عشان الشهرين يتمو، ، ، ، ،
كنتا بتصل علي ناس بيتنا كل جمعة واسلم عليهم كلهم واليوم داك إتصلتا عليهم في تلفون أبوي كم مرة بس ما ردا قلتا غريبة أبوي دا تلفونو دايما جمبو ومن اول تاني جرس برد قمتا إتصلتا في تلفون أمي برضو إلا بعد كم محاولة في النهاية الخط فتح وجاني صوت علي (ولد عمي صغير في الأساس) وكان ببكي إفتكرتا إنو زعلان من حاجة أو شاكلوهو لأنو دايما لمن يحصل كدا ويكونو معانا أمي بتديهو تلفونها يلعب بيهو قلتا ليهو أبو علوة مالك!؟؟ قال لي عمتو منال حصل ليها حادث وساقوها المستشفى حقتك، إتنفضتا من سريىي زي الضربتني عقرب وبقيت أسأل فيهو متين!؟ وهسا هي كيف!؟ وأديني أي زول جمبك!؟ قال لي كلهم فاتو المستشفى وخلوني مع الجيران من قبيل قلتا ليهو طيب ما تبكي بجو راجعين قفلتا منو وأنا قلبي بقى بضرب شدييد وكل ما أتصل في تلفوناتهم ما برفعو وأيمن جاء علي صوتي يا زول قول بسم الله إن شاء الله بخير ومافي طريقة طيارة حاليا ما قدرتا أنوم طول باقي الليل دا أصلي حبة وأدعي وأقرأ قرآن وأمشي وأجي في الغرفة وأقعد في السرير وأيمن دا غتر عديل من الكلام معاي ما عارف متين الصباح أصبح أول طيارة قلتا لأيمن حأمشي بيها وإنتا إتصرف مع دكتور ماهر ووليام ما فهمتا أي حاجة للرجعة دي ومتين وصلتا السودان لحدي ما حصلتا المستشفى ومشيت قسم الحوادث ، وهم طبعا لمن لقوني في المستشفى إتفاجؤ دخلتا لأمي وشكلها ياداب كان صحت من الضربة الفي رأسها مشيت عليها بكل الخوف الفيني دا سلمتا عليها وبقيت أسأل فيها ولو في حاجة بتوجعها قالت لي كدي روق يا ولدي أنا كويسة الحمدلله إنتا هسا متين جيت والكلمك منو ، قلنا ليها يا أمي يعني كنتو ما حتكلموني ولاا شنو ودايرني أقعد كيف وأنا بتصل عليكم وماف زول برد علي لا حبوبة لا أبوي ولا عمي، ، المهم بعد إطمنتا عليها قلتا للممرضة تجيب لي تقارير فحوصات أمي كلهااا
_____________________________________________
__آلو ، ، ، أيوا يا أمل م…….
يا بت جادعة تلفونك دا وين يااخ من أمبارح!!؟؟؟؟
__والله يا أمول عمي مصطفى جابوهو من البلد تعبان ومرقدنو فب المستشفى هسا وأمبارح مشيت مع ناس أمي وأبوي لأنو معاهو عمي منتصر بس ونسيت تلفوني عشان كدا
لا حول ولا قوة إلا بالله العلي العظيم مالو يا بت؟ الحاصل عليهو شنو؟
__ما عارفة بس هو عندو مشكلة في القلب وعملوا ليهو فحوصات ورسم قلب المهم غايتو هسا أمي سبقتني المستشفى عشان رجعنا بالليل جابنا أخوي هيثم وأنا زاتي لاحقاها
ألف سلامة ليهو ربنا يشفيهو إن شاء الله خلاص كدي لبعدين بضرب ليك
__الله يسلمك خلاص كويس
جهزتا سريع وطلعتا حصلتا المستشفى ومشيت علي ناس أخي وأبوي وعمي سلمتا عليهم وقلت ليهو عمو مصطفى الليلة بقيت كيف؟ قال لي الحمدلله كويس يا بتي ، قلتا لأبوي أخوي هيثم وينو؟ قال لي فات مع عمك منتصر علي الدكتور انا ماشي أجيب موية وبشوفهم معاي ، قلتا ليهو خليك أنا بمشي بجيبها ليكم وبشوفهم معاي طلعتا جبتا الموية ولمن جيت راجعة في بت سايقة ليها مرأة كدا وشايلة ورق شكلهم دايرين يدخلوا علي الدكتور وقفتني سألتني من محلو والمرأة الكبيرة تعبانة كدا سندها معاها ومشيت معاها عشان أوصلها لمحلو قالت لي دي أمي في الحلة هناك في عيادة وديناها ليها وأدوها ادوية لكن ما إتحسنت وفي زول وصف لينا المستشفى دي عشان كدا هسا جبناها قلتا ليها بكون عندها مشكلة في الشرايين أو القلب أو كدا لكن محلولة بإذن الله ما تخافي ، سكتت حبة وقالت لي إن شاء بعد حصلنا محل الإنتظار قالت لي شكرا ليك كتير أنا إسمي شادية قلتا ليها العفو إتشرفنا وأنا سومة وبعديها مشيت شفتا أخوي وعمي ماشين علي المعمل مشيت وديت الموية لناس أمي وقلتا ليهم جاية إتحركتا علي المعمل دخلتو كان كبير كدا وفي أثناء انا ماشة وبعاين فيهو إصطدمتا بواحدة من الممرضات كان شايلة ورق ودفاتر قلتا ليها آسفة وقعدتا في الأرض ألملم في الورق إبتسمت ببشاشة كدا وقالت لي ما مشكلة وقعدت هي زاتها تلم في الورق معاي قالت لي الحمدلله ما كنتا شايلة تلفوني كان إتكسر وضحكت ، ضحكتا وقلتا ليها ما إنتبهتا والله المعمل حلو ومنظم عشان كدا كنتا بعاين فيهو قالت لي ااي رهيب والله أنا زاتي عاجبني بعد خلصنا وقفنا إبتسمت وقالت لي شكرا قلتا ليها ما عملتا حاج…..قاطعني صوت زول بجي عليها وبنده عليها سوسن! لمن حصلنا سكت وعاين لي مسافة وقال ليها بجدية مالك إتأخرتي بالتقارير يا سوسن!!؟؟؟…………..
في مكان ما بين تفاصيل حياتك المملة ،،،
سيأتي الفرح
يتبع ……..
لقراءة الجزء التالي : الجزء الرابع من رواية طبيبة قلبي
لقراءة الجزء السابق : الجزء الثاني من رواية طبيبة قلبي
للإطلاع علي فهرس اجزاء الرواية : رواية طبيبة قلبي ( جميع الاجزاء كاملة ) للكاتبة اسماء محمد
جميع الحقوق محفوظة للكاتبة اسماء محمد .
