الجزء الثالث من رواية محظوظ ولكن

وفي الجزء الثالث من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الثالث من رواية محظوظ ولكن

في الجزء السابق
لمياء:عارفة ان اختي غلطت ب ارتباطها مع خوك لكن الكﻻم اللي سمعاته ماما من اماليك وجعها وجاها السكر وقعدت فترة خانقتها العبرة حكيتلك تقريبا
عمر:عارف والله عارف لكن..
قاطعاته لمياء وقتله:عمر بنقولك حاجة ونتمنى ماتفهمنيش غلط
عمر:قولي
لمياء:انا …انا…انا عرسي السبوع هذا
عمر :ش ش شنو
وفصل الرصيد …
عمر فاتح عيونه زي الحوتة وفكه السفلي طايح وايد شاد بيها تليفون واﻻيد التانية مسكرة وحاطها على ركبته …للحظات لو تشوفوه اتقولوا هدا تمثال او شخص محنط ..
فرج:عمر خيرك … وئ عمر
حط ايده فرج قدام عيون عمر يبيه يفيق من سرحته بس ﻻ حياة لمن تنادي …
فرج :ياعمر خيرك !
هزه فرج وعمر حتى كلمة… قاعد فاتح عيونه …. وشوي
دمعوا عيونه دمعات الم..
فرج:خيرها لمياء شن قتلك
عمر لوح التلفون جي ع الحيط طرف طرف
فرج:عمر !
عمر شد شعره ويريش ف روحه وهدا كله مازال ماتكلمش وﻻ كلمة
فرج خاف ع عمر وحار فيه …
عمر: ا ا ا ك ك ك
…واجهش بالبكااااااء
فرج:غير هدي بالك …مافهمت منك شي راهو
وقف عمر قبالت فرج وشده من كتافه وايهز فيه وفرج يتلقلق يمين ويسار فقال عمر بنبرة يملئوها الحزن واﻻلم والخيبة :لمياء لمياء عرسها السبوع هدا
فرج:حقققق ؟؟؟؟
عمر:ههه هههه هههه حسها تتسهوك عليا واﻻه ههههه اكيد تتسهوك تتسهوك ك تتسهو وك …
وتﻻشت اﻻبتسامة المزيفة من على وجه عمر وقعمز على حاشية السرير
ونزل راسه ويشوف ل اﻻرض
فرج:ايه بالك تتسهوك عليك
عمر ماسمعش فرج شن قال و سرح بينه وبين نفسه ادكر شريط حياته معاها… من اول ماتعرف عليها
2-2-2013
عمر: تعرف مازال اتجي جيهتها البنت هادي نقتلك فاهم…
شخص:خﻻص خونا سامحنا
لمياء: مبرده… كل يوم وهوا مقلقني من اول مانوصل لجامعة لين انروح
عمر:كان مازال دارلك حاجة قوليلي
لمياء:شكرا بارك الله فيك … انا لمياء
عمر:عاشت اﻻسامي وانا عمر ….
سكيروتي الجامعة الجديد …

10-6-2014
لمياء:عمر
عمر:نعم
لمياء:عندي دراسة حول تحول اسعار العمﻻت الدكتور طالبهم عليا بس مس قادرة نمشي المصرف
عمر:تم تو نمشي انا ونجيبهملك شن رايك
لمياء:ههههه تسلملي ربي ايخليك

5-7-2013
عمر:عﻻش تبكي بس قوليلي
لمياء:قاعدة ف الحوش بروحي وقدام الحوش فيه سكارى
عمر:وين اماليك
لمياء:طلعوا حالة وفاة ف الزاوية
عمر:وكيف يخلوك بروحك
لمياء:تأخرت ف الجامعة فامشو وخلوني
عمر:به دقايق ونجيك مش بعيد ع شارعكم سكري الباب بالقفل و حتى الرواشن سكريهم

17-9-2013
لمياء:عمر …
عمر:نعم لولو
لمياء:مضايقة
عمر:شن مضايقك سنفورة
لمياء:متعاركة انا وماما
عمر:عﻻش
لمياء:عندي عرس بنت خالي وانا نبي قفطان مابتش تاخدهولي قتلي غالي
عمر:اها بكم
لمياء:ب 285
عمر:خﻻص شن رايك نمشوا انا وياك وناخدوه
لمياء:مانبيش نتقل عليك
عمر:معش اتقولي هكي ماتعرفيش معزتك عندي قداش كبرها
لمياء:ربي ايخليك ليا بجد انت منقدي ههههه
10-11-2013
لمياء:عمررررر
عمر:نعم سموووحتي
لمياء:كندرتي اتمزقت وانا ف الجامعة عليك عمممملة
عمر:هههههههه روحي حفيانة
لمياء:ههههه ايه هدا اللي بيصير
عمر:كم مقاسك يامهبولة
لميا:36
عمر:ياوخيتي ع رجل الفلوسة … اهو شوية ناخد اذن من الشركة ونجيك

21-12-2013
عمر:بصدق …نقولك حاجة لولو
لمياء:قول عموري
عمر:بس خايفك تزعلي مني
لمياء:ﻻﻻ مانزعلش احكي
عمر:انحبك 

فرج:عمر وئ…وين سرحت ياراجل !
وقف عمر ومشي للحمام وماردش على فرج ب وﻻ كلمة
خش وسكر الباب ووقف قدام المراية …
محرها … محرها يالمياء محرها …برغم ان اختك اللي لعبت ع خوي ومع هذا سكتت وقلت مالياش عﻻقة ف خوي وتصرفاته… وحتى بعد الموقف هذا كنت مازلت شاريك بس بعتيني …ايه باعتني باعتني قدام اول فرصة زواج وانا الكلب الغبي طول الوقت نفكر كيف انقرب المسافات بين العيلتين …. تي ماستنتش حتى نديروا محاولة تانية وثالتة زي اي اتنين يحبوا بعض
~~~طق طق طق ~~~
فرج:ياعمر اطلع واحكيلي وفضفض مش باهي تقعد ف الحمام وانت مضايق !
بس عمر ماعدلش عليه وماردش يمكن حتى ماسمعاش اصﻻ …
خدي النقال فرج متع عمر ودور بتارية وركبها وعبى كرت واتصل ب اخر رقم اللي هو لمياء
فرج:الو … انسة لمياء
لمياء:نعم ..
فرج:انا فرج خال عمر
لمياء:ايه عرفتك
فرج:قوليلي حق عرسك السبوع هذا لمياء:ايه
فرج:باهي كيف صار بش تحبي عمر كيف تقدري تتجوزي غيره
لمياء:مش بيدي امي بتجوزنا ل وﻻد خالي انا واختي رنا
فرج:لكن حتى صوتك مش باين عليك انك متحسرة
لميا:انا وعمر عﻻقتنا شبه مستحيلة … امي مش حتوافق وامه مش حتوافق
فرج:وعﻻش ظن السوء انتي ماتدريش مرات ربيك يسخر الحال
لمياء:خﻻص يافرج ماتزيدش عليا عمر يستاهل عيلة احسن مننا على قولت امه
فرج:وهوا كذلك
لمياء:شن قصدك !
فرج: هي سﻻم
وسكر فرج الخط حسها محادثة عقيمة جدا مع لمياء …

فتح عمر شيشمة الدوش اميا المصقعة سمممم ….باجواء تركيا الباردة
ووقف تحتها … يرتعش يبي يفيق من سرحته ب لمياء وحب وسنين لمياء
وقعد فترة تحت الدوش يتمرعش
وفرج يطقطق عليه فاتت نص ساعة وعمر مايجاوبش
لين فتح عليه وطلعه من تحت الدوش المصقع
عمر زي المسبوه …
مرض عمر مرضة قوية قوية قريب روحه طلعت ورجع بيه فرج ل ليبيا
وقعد اسبوع مريض وكل مايدكر كلمات لمياء عرسي السبوع هدا هدا هدااا هدا …. يبدى يصيح زي المهبول بصوت عالي..

(*ماتستغربوش ان الشباب يصيرلهم هكي لو سيباته واحدة ايحبها من قلبه.. فيه يلي يصيرلهم احرف من هكي *)

نازك :كيف نديروله ياخالي حتى الماكلة ماياكلش
خ وداد:والله قريب نطير دبرو معاي ولدي بيريح مني
فرج:مش عارف والله جربت معاه كل الطرق و الوسائل ديما سارح ومسبوه هكي
خ وداد:زعما نخطبله بنية بالك تفرحه طشيشة
فرج:والنبي ريحيني من افكارك سلم وخيتي
خ وداد:عﻻش اللطف
فرج:تو تشبحي فيه منتكس وحالته حالة وتقولي نخطبله وانجوزه !
خش حاتم للحوش ولقاهم متجمعين ف المطبخ …فمشالهم
حاتم:هاه كيف حاله عمر توا
فرج:ياودي حالته ماتسرش
حاتم نزل راسه حس بذنب باللي صاير لخوه الصغير
خ وداد:شن الدبارة يافرج …
فرج:مش عارف بجديات مش عارف

وفاتت ايام وتحسنت حالت عمر وبعد اسابيع بدي يداوم في عمله وديما غاطص تحت الميا مايطلعش اﻻ في ساعة متاخرة من الليل وفاتوا اسابيع تانيات وشهر ورا شهر لين فات عام تام عاللي صار لعميرو وهوا مش مفكر في حاجة اسمها بنات بكل….
ساعة 2:15 صباحا…
طلع عمر من البحر وركب للقارب متعه قعمز
ياراقدين وانا واعي..فيكمش من يفزع يقيس اوجاعي ؟؟
الحمدلله على كل حال
ياربي امتى بيولي عندي حظ زي الناس امتى بس … امنيتي بسيطة اني نتجوز عن عﻻقة حب وتكون تحبني بصدق مش حب مزيف
سعد:يالحوووووت حويتاااااا
عمر:اها نسمع
سعد:فيه بﻻغ عن هجرة غير شرعية افتح عيونك باهي
عمر:اماﻻ ﻻش راكب ع برج المراقبة كان انا بنفتح عيوني
سعد:هههه ناعس بناخد غفطة
عمر:تاخد طياح سعدك ومزالك حتى انا متملح زي زيك صبح عمل ف شركة وليل عمل اهنا مانلحقش نرقد اﻻ ف عشية
سعد:باهي وين علي
عمر:مانسمعش فيك !
سعد:علي علي
عمر:خيره
سعد:وينه
عمر:ماندريش انا كيف طلعت م البحر ياسعودة
سعد:سادك م الغطس
عمر:وقت نغطس ننسى همومي
…مشي بالقارب لين وصل لليابسة وخش للمركز متع العمل بدل حوايجه وقعمز ع الكرسي…
سعد:فاتت ساعة ومافي شي الباين انه بﻻغ كادب
عمر:اي ممكن
سعد:وين فرج اماﻻ
عمر:واخد اذن
سعد:اها اوكي …
قعدو يهدرزو هما الزوز لين صبح الصبح … بدل عمر لبسته من
لبس عمر لبس السكيروتي وحط لبسة عمل اليلي ف ساكو صغير متعه ولوحه ف سيارة
وركب وهوا ناعس … وطلع من مكان العمل
شوي شوي يثاوب و يثاوب
وكيف عينه غلباته غفي وهو يسوق
بنت بتقص الطريق شد فرينو البنت من الخلعة طاح منها نقالها وتشنجت ف مكانها نقالها جي تحت عجلة سيارة عمر وتفترش
البنت:ير يرزيني فيك ياهمي
طلع عمر راسه من روشن وقالها :تي عﻻش يرزيك فيا  ماك مش حتبكي عليا كان صارت فيا حاجة
البنت:النقال
عمر:اما نقال
البنت:نقالي تحت عجلتك فترشته !
نزل عمر من السيارة ولقي طرف نن نقال باين من تحت العجلة ركب سيارته تاني ووخر شوي ونزل تاتي قام النقال
البنت:يرزيني ف الهم
عمر:اسف …بصدق اسف
البنت:ياعليك حظ ازفت من حظي ماريتش
عمر:ﻻ فيه ازفت من حظك اطمني
البنت بتبكي :ﻻ مافيش …عندي مقابلة عمل ماحصلتها اﻻ بعد شياط ريق ووقت بيقولولي ع مكان المقابلة جيت انت تجري فقط بش موبايلي يتكسر ومانعرفش المكان بش هذا حظ مزفت
عمر:اسف مرة تانية … خﻻص هدي بالك ومعش تبكي … خودي نقالي حطي فيه شفرتك …
البنت:حتى ولو مانعرفاش الرقم اللي اتصل بيا
عمر:اكيد حيعاودو …هاتي شفرتك …
خدي منها عمر الشفرة وركبها ف جهازه
وكمل كﻻمه … بجد معليشي ماكانش قصدي ناعس هلبا وكل شي نشوف فيه اتنين اتنين
البنت:ههههه احول
عمر:هههه اي اضحكي وانتي من بكري شادتها بكي …
البنت:مش مني فرصة العمل نستنى فيها قداش ليا …
عمر:وان شاء الله تحصليها … اسمي عمر
البنت:عاشت اﻻسامي وانا ندى
عمر:عاشت اﻻسامي …
ندى:تسلم…ياربي خيرهم معش اتصلوا تحشمت هكي واقفة معاك ف الشارع
عمر:به خﻻص خوديه نقالي وقت اتمي بيه اتصلي بيا ع رقمي حتى غدوة عادي بش نجيك وناخده منم
ندى:بجد تتكلم ؟؟
عمر …وووه البنات كلهم نفس الطبع ووه اعليها ماصدقت ياكليمتي وليلي …
عمر:ايه بجد
ندى:مئمنلي لهدرجة
عمر:انا كسرتلك نقالك ﻻزم ندير معاك الواجب
ندى:معقولة ياربي مازال فيه شباب هكي بنداق ! .. انا يستحيل ناخده منك بس فرحت ان فيه مزال هكي نوعية ههههه معناها انت نادر
عمر:هههه انا عمر
نقال عمر ايرن >>>اه من ظلم ليام
عمر:اهو فيه رقم .. خودي ردي
ندى خدت منه النقال … وردت
الو ….اي انا …. ايه ايه عرفته تمام بإذن الله حنكون ف الموعد…تمام سﻻم
عمر:شنو صار
ندى:تمام… خﻻص عرفت المكان والساعة
شكرا
عمر:عفوا
نحت ندى شفرتها ومدتله النقال
عمر:بالله شن بنقولك … انا نعتبر كسرتلك نقالك خليني ناخده لصيانة واﻻ ناخدلك غيره
ندى:ﻻﻻ مشكور
عمر:بصدق انا مصر عالموضوع
ندى:مانحبش ناخد غرامة من حد نقالي تكسر مكتوبله بيتكسر بيك واﻻ بﻻك وانا مسامحاتك ياعمر .
عمر :بجد
ندى:والله بجد .
عمر:بس حنحس بالذنب
ندى:صار خير وبجد مسامحاتك يكفي انك وقفتلي كان حد تاني راهو كمل طريقه
عمر:تسلمي هدا من طيب اصلك وفرصة سعيدة يا انسة ندى
ندى:فرصة سعيدة
مشت ندى …وعمر ركب سيارته
سبحان الله معقولة هكي كسرتلها نقالها وسكتت وماقالت شي ! ويخي مابتش حتى تاخد نقالي واﻻ حتى انها مابتش تخليني ناخدلها نقالها لصيانة واﻻ ناخدلها واحد جديد …فيه بنات هكي سبحان الله قاعد مستغرب ….ياريتني خديت رقمها…ياعليك حظ فاتتني لقطة ماخدة الرقم…كمل طريقه عمر
ووصل ل العمل ف شركة واسى سوريته ونزل من سيارته
تﻻقى مع فرج قدام الباب
فرج:صباح الخير ياحبها
عمر:صباح الورد …
فرج:خيرك تأخرت !
عمر:صارلي موقف غريب ((حكاله كل اللي صار ))
والمشكلة البنت مابتش تاخد شي ﻻ فلوس وﻻ خلتني نرفع نقالها لصيانة
فرج:شن قتلي اسمها البنت
عمر:ندى
فرج:قصيرة شوية !
عمر:ايه
فرج:بيضاء هلبا واﻻه
عمر:ايه
فرج:نقالها نوكيا احمر واﻻه ؟
عمر:صح …شنو تعرفها
فرج:ايه ندى هادي صديقتي بنت ماشاء الله الحق
عمر:بجديات !
فرج:ايه وتعرف برغم ظروفها القاسية اللي اتمر بيها ماتحببش تاخد حاجة من حد قداش ليا نحاول نسعدها لكن محاوﻻت فاشلة الحق هكي بنت ب مئة راجل
عمر:شن ظروفها
فرج:امها مريضة طريحة ف الفراش وبوها متوفي وماعندهمش باش يصرفوا
عمر:باهي عﻻش ماداروش الحافظة فرج:مش عارف
عمر:لكن تعتبر عايشة بروحها معقولة ماصاعتش هكي واﻻ هكي
فرج:ﻻ نعرفها قريب ليا 4 سنين البنت ع ادب ع اخﻻق ع رزانة ماتفهم شي ياسعد امها بيها .. كان مش مكبد راني تجوزتها
عمر:امممم
فرج:تتفكر مرة لما قتلك نعرفك ع واحدة وقتلي ﻻ
عمر:ماتقوليش هيا هادي
فرج:ايه هيا
عمر:يانهارك اغبر ع دماغك
فرج:انت مابيتش حتى تسمعني

عمر:به اسمع….. انت كلمها قولها نعرفك بشاب كويس وديرلها بهارات خلي الموضوع وكأنه صدفة تامة وقت اتشوفني حتقولي انت ! ! وحتستغرب
شن رايك
فرج:به تم … ان شاء الله غير ماتطلعش مرتبطة بس ﻻن لينا شهر ماتكلمناش
عمر:ياودي كان ع حظي عارفها بتطلع مرتبطة…

وتموا دوامهم ف الشركة مع ساعة 2 الظهر خطموا ع قهوة خدوا نفاص تغدوا وركب سيارته فرج ….وروح عمر وعيونه حمر ناعس قريب يطيح ع وجهه وصل للحوش وطول لداره تلوح ع سريره ورقددددد لساعة 11 ف ليل…فتح عيونه 
شورني ارقدت هلبا… اتقول قتيل حسني بنسيب عمل السكيروتي متع الصبح جهد هلبا معش فضيت حتى نمشي لصالة الحديد احييييه ياراسي احيييه…خلي انوض ناخد دوش وناكل حاجة ونمشي للعمل …

وبعد شوي ..تم اموره عمر وتعشى وطلع للعمل ووقت وصل لقي فرج يتكلم ف النقال فاشرله فرج تعال… جي عمر قعمز بحداه
فرج:المهم ياندى عندي ليك شاب من اﻻخير ان شاء الله مارتبطيش عاد 
ندى:والله شن بنقولك يافرج انا ….
((شن بيصير في عمر وهل ندى بيكون عندها حبيب او ﻻ حتعرفوا في الجزء القادم من رواية محظوظ ولكن))
يتبع…..

لقراءة الجزء التالي : الجزء الرابع من رواية محظوظ ولكن

لقراءة الجزء السابق : الجزء الثاني من رواية محظوظ ولكن

للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .