الجزء الثامن من رواية حكاية دعاء

دعاء وجها احمر ومزالت ماتحكيش واجد لانها ثرثاره

طلع منتصر من الحمام ولقاها في الصاله ابتسم : كنك

دعاء بحتت فيه : لا ابدا مافيش شي

منتصر : بس حالتك حاله كنك متحشمه مني ؟

دعاء بتهرب : لالا انا مانتحشم بكل بكل

منتصر ضحك : لا واضح ما شاء الله

دعاء : كنك معايا ليش تضحك عليا

منتصر نضرتها سحراته : انا لاني نحبك نضحك علي تصرفاتك وخجلك وكل شي فيكي لاني نحبك والله

دعاء ارتبكت وحالتها حاله لان هالمره منتصر معاها تحت سقف واحد عكس ايام الخطبه كانت لما تسمعها تقرح بيها لكن قدامها وبصفته زوجها مش خطيبها حادوخ تدريجياا

منتصر يبتسم وهو يبحت فيها : كنك للهدرجه يعني

دعاء مابتش تحكي ودايره روحها ما تتحشم المشكله ان الراجل يحب البنت يلي تتحشم مش يلي ما تتحشم هي فاهمه بالمقلوب وان الحشم ضعف للبنت وهي تبي تكون قويه مش ضعيفه هالبنت غريبه لكن منتصر فاهمها كويس وبمكر : علي فكره مانسيتش شنو درتي فيا زمان

دغري بحتت فيه وشيرت علي نفسها : ليش شنو درت

منتصر : معقوله نسيتي الملح يلي في العصير

دعاء بلعت ريقها : لا ما درتها ومستحيل نديرها

منتصر هههه : معناها متلخبطه بين الملح والسكر عشان هكي حطيتي في العصير الطبيعي ملح صح ؟

دعاء صبت : لا لا وانا مانحبش يلي يحكي ع طفولتي

منتصر ضحك : ليش ما طفولتك هي يلي حببتني فيك خاصة اول لقاء بيني وبينك كنتي جالطه بكل

دعاء رقيتلها : انا بديت نعصب ماعش تحكي ع ماضي

منتصر يستفز فيها : واه قبل ما ننسى عصبتي عشان ركبت علي حصان باتك مع ان سمحلي نركب عليه بس انتي لا لان خايف عليكي وغرتي ركبتي بس ساعدتك

دعاء بعصبيه : لا عاد انت تزوجتني عشان تحكيلي علي طفولتي شنو تحق فيا عندي زاهيمر وأنا مانسيتش شي بس نحب هالذكريات نحتفظ بيها لنفسي مش تحكيها ليا توا وكأنك تحقق معايا بجديات عصبتني

منتصر ضحك : ما شاء الله يلي قدامي توا هذي دعاء يلي زمان لسانها طويل ادير الحاجه وتختفي

دعاء : لا انا ما اختفيت بس نطلع للضروره

منتصر : ياخيتي عالضروره يلي تخليك تطلعي عشان اطيحيني في المصيده امتعك قوليلي ليش كرهتيني

دعاء : انا ما نكرهك بس تعقدت منك وخلاص حبيتك

منتصر فرح لان قالتها بدون ما تفطن انها قالتها : باهي كويس المهم انك حبتيني في الأخير هالشي فرحني

دعاء فطنت لكلمتها يلي حكتها بلعت ريقها ووجها احمر قعد عدت لغرفتها وسكرت الباب علي روحها : غبيه هضا يستفز فيا عشان نقولها وقلتها والمشكله ماركزتش بكل

منتصر بخبث لحقها وربع يديه : المهم انك قلتيها

دعاء تهربت تبحت فيه : اه بس لو نقدر نحطم غرورك

منتصر ضحك : حطميه انا قدامك توا وحلالك اخرااا

دعاء بحركه سريعه منها خدت مخده وعزقتها علي وجه وبخبث : مش قلت حلالي خلاص اندير يلي نبيها فيك

منتصر في البدايه انصدم ماتوقعش تعزق مخده فيه بس ضحك علي باقي الكلام : تمام ديري يلي تبيه اهم شي اللطافه مش الضرب يا مدام وين عايشين نحنا

دعاء : وتتسهوك اخرا وانت يلي جبرتني انمد من تصرفاتك وكلامك وتحقيقك معايا يقهر فيا قسما بالله

منتصر : باه كويس هالشي يخليني نزيد نقهرك

دعاء : اه ياربي صبرني شنو درت في روحي انا شنو يلي خلاني نوافق عليه قسما بالله قهرتني في وسط قلبي

منتصر : يعني ندمانه انك وافقتي عليا قولي الحق

دعاء بحتت فيه ونضرته جمدتها بس قالت الحقيقه وبصوت سحره : لا انا ما ندمت بس كان المفروض تحكيلي شنو حادير فيا بعد الزواج لانك قهرتني والله

منتصر : ما عاش يلي يقهرك حتى لو كنت انا

دعاء وجها احمر قعد : باهي توعدني ماعش تعصبني

منتصر : لا مانقدرش نوعدك لان نحب عصبيتك والله

دعاء تأففت وهو ضحك عليها ويموت عليها

فرحت قمر هي وعيلتها بالشغل هضا فرحه لا توصف وقعدت تمشي للكليه في الصبح وتحقق في حلمها المستقبلي لكن غيرة شذى منها غيره لا توصف خاصة انها متأكده 100 في الميه ان اللبس يلي لابسته قمر الجديد من فلوس معتصم لان شافتهم يحكو مع بعضهم ويوم بعد يوم سعادة قمر خلت شذى شبه منهاره لان معتصم فعلا عجبها بس تبي دكتور غرورها حطم كل شي والراجل ما يعيبه شي ابدااا بس حاليا ألتهت بعرس خوها الدكتور طارق وسجى يلي فرحانه بس زعلانه علي خوها معتصم واجد عشان شذى بحت فيها : قتلك الف مره ماتزعليش وشذى خلاص طلعتها من راسي وعشان تتأكدي بأذن الله قريبا حانخطب بصراحه في بنت ما شاء الله عليهاا

سجى : ومن هالبنت انا خايفه ترفضك زي شذى

معتصم : لا هذي خير منها قوتها عاجبتني هامله نفسها وكل شي يخصها عشان عيلتها ليا شهر نعرفها

سجى : شهر وتوا كيف حكيت عليها اه منك وشن اسمها

معتصم بأبتسامه : قمر اسم علي مسمى فعلا قمر

سجى ابتسمت : ان شاء الله اتكون من نصيبك يارب

معتصم : ادعيلي وربي يوفقك ان شاء الله الف مبروك

سجى وجها احمر لان زفتها بكرا خشت دعاء وشافتهم ربعت يديها : انت شنو ادير جوا اقعد برا خيرلك

معتصم : وانتي شنو دخلك نحكي مع اختي

دعاء : اه يعني الكلام لأختك ليش عندك اخت وحده ؟

معتصم ضحك : لا اختين بس سجى واجد قريبه مني

دعاء زعلت : باهي تمام واسفه عالأزعاج سلامات وطلعت

سجى : ليش هكي زعلتها والله قريب تبكي اخرااا

معتصم : عارفها بس انا ما قلتش شي غلط

سجى : بس دعاء بعد تزعل صدقني ماعش تبتسم

معتصم : توا نشوفها هالدلوعه وعدا لعندها لقاها برا تتفرج عالحصان صبا جنبها : خيرات يا عروسه

طنشاته دعاء وماردتش عليه حست ان خوتها تغيرو من فترة خطوبة سجى لعند توا هي حكمت بدون ماتعرف السبب وبحتت فيه : امشي احكي وفضفض لسجو

معتصم تنهد : للهدرجه زعلانه وهو فعلا لنا فتره نحكو وبروحنا بس في سبب معين وانا طلبت يكون بيناا

دعاء : باهي تمام وانا مانبيش نعرفه وماعش نضايقكم

معتصم : بلاش هبال كنك هكي انتي شنو تبيني انقولك ان شذى اخت الدكتور طارق شايفه روحها ويوم زفتك سجى حكت معاها اني نبيها وطلبت اني نقابلها وسعقتني بكلامها لان قالت انا نقرا في كلية الطب وأنت عندك محل ملابس ومتخرج بتخصص غير التخصص يلي نتمناه في شريكي يعني واضح انا مش هو فارس احلامهاااا

دعاء انصدمت : وانت شنو رديت عليها الوقحه هذي

معتصم : قتلها فهمتك توا تمام بس مافيش داعي تطلبي تشوفيني وفي الاخير تكسري بخاطري ومنوره واجد ونتمنه يجيك يلي في بالك ودكتور زيك سلامات بس تأكدي انك انتي يلي خسرتي مش انا وعديت

دعاء : لا هذي وقحه وحياتك حاتندم نوعدك والله

معتصم : لا فوتيها وطلعتها من راسي خلاص

دعاء : قتلك حاتندم وانا لما نحط حد في راسي نحرقه

معتصم : هضا السبب يلي يخلي فيا نتهرب نحكيلك لانك متهوره وتخشي بأندفاع شنو ناويه تضربيها وتهزبيها

دعاء ماتوقعت يقول هكي وردت : لا انا مش هكي انت فاهمني غلط هو صح نحكي بأندفاع لكن لما قتلك حاتندم قصدي كان شريف وهو حانخطبولك ونزوجك من وحده خير منها بألف مره ونديرولك اجمل عرس

معتصم ندم علي كلمته : انا اسف لاني حكيت معاك هكي

دعاء : لا عادي ولا يهمك بس حاتندم لما تشوفك فرحان

معتصم : وانا فرحان اصلا لان حانتزوج من دكتوره

دعاء فرحت : ومن هذي احكيلي عليها وتوا اخرا

معتصم ضحك وحكالها علي قمر يلي كانت مميزه واجد

يوم زفة سجى وطارق يلي طاير عقله اول ما خش كانت كل العيون عليه قرب من جهتها وبحت فيها بأبتسامه : ان شاء الله الف مبروك ربي يحفظك ليا يا قليبي

سجى وجها احمر قعد وقلبها يدق : الله يبارك فيك

طارق رفع الطرحه وبحت في اعيونها : ما شاء الله

سجى تهربت تبحت فيه وحالتها حاله وهو ما شال اعيونه من عليها والاقارب باركولهم شخصيا وهو ماسك يدها وما طلقهااا كان فرحان واجد بيها واجمل يوم في حياته مش اليوم لا كان اول ما شافها اول مره

قمر لا اردايا خشت علي صفحة المحل مره تانيه كل اشويه اتخش وتبحت في صورته منزل صورته ببدلة عرس وفرحه باينه في وجه وكاتب / اليوم زفة اختي الصغيره ان شاء الله ربي يسعدها ويوفقها واما انا في طريقي للزواج بأذن الله

حست بأحساس شين وهمست اكيد يبي وحده تانيه بس ليش مضايقه وبحتت فيه مره تانيه وهي تتأمل فيه نزلو دموعها تخايلت ان حايتزوج فعلا من وحده تانيه مش حاتقدر تستمر وتشتغل في المحل واتشوفه خاصة ان الفتره يلي فاتت في وقت دوامها يقعد حوالي ساعتين عالمكتب ماتندريش ان سبب قعدته هو تأمله فيها وما يخليش فيها اتشوف فيه لكن المجهول ذابحهااا في اليوم التاني وقت عملها لقاته يرجا فيها صبا من الكرسي : اهلين ومرحبتين نورتي وقرب عطاها حفاظات : هضا حلو العرس وموالح نتمنه انك تاخديهم معاك للحوش وتوا اليوم عندك عطله مافيش داعي اداومي لان نبي انقولك كلمتين فكري فيهم لو في امل اتصلي علي رقم المحل وردي عليا هي مصدومه مش فاهمه شي وقعدت تبحت فيه ابتسم : انا بصراحه معجب بيكي ونبي نخطبك لو موافقه عليا حاندز امي وخواتي لعندكم نهاية الاسبوع هضا اهم شي لو موافقين ردي عليا وحتى لو رفضتي ردي عليا وحانعتبر اني ماحكيتش شي وانسي تمام

قمر مصدومه قلبها يدق قعدت مصبيه وتبحت فيه حاسه روحها في حلم كانت حادوخ عزق الحفاظات ومسكها بسرعه : كنك بسم الله وخلاها تقمعز عالكرسي

قمر حالتها حاله وقلبها يدق بسرعه مش مصدقه يلي سمعاته يعني هو حايخطبها ويبيها فعلا بحتت فيه مره تانيه كان خايف واجد عليها لكن بسمه وحده منها خلاته يبتسم ويبانو غمازاته يلي اول ما شافتهم نزلت راسهاا

معتصم ارتبك وشير عالحفاظات : شوفي طاحو هدينا

قمر : عادي ما تكسرت الحفاظه وتوا انلمهم

معتصم : لا والله ما صارت حانلمهم انا لاني طيحتهم وطبس لمهم ومدهم لها بأبتسامه : تفضلي واليوم راحه تريحي في الحوش وفكري كويس انا مناسب لكي ومابش يقول انه متخرج من ادارة اعمال ولا يقول ان باته عنده مزرعه كبيره فيها مواشي وابقار يبيها ترضى فيه لان مصيرها حاتقعد دكتوره هل الدكتور حتوافق علي صاحب محل ملابس وما تتحشم من شغله او حتوافق عليه لكن تفاجئ لان جوباته بدون اي تفكير صبت وبحتت فيه وبأرتباك : انا لو لفيت العالم كله مستحيل نلاقي زيك انت محترم وطيب وبخجل قالت واتخش القلب بسرعه وانا راضيه وحانكون اسعد انسانه في العالم وعدت سيباته مصدوم حاسس روحه يحلم بحت فيها وهي تمشي لالا مش حلم هي فعلا حكت ووافقت علياا وسكر المحل دغري ولحقها شافها ركبت في حافله ركب في سيارته وقعد وراه الحافله ويبتسم وطاير عقله شافها نزلت بعد وقت وخشت للحوش يلي فتحاته بالمفتاح كان واضح ان قديم زعل علي وضعهم ولكن فرحان بيها واجد وباته يوسف مارفضش ابدا ولا عدل انهم فقراء بالعكس فرح لولده واجد شافه فرحان وطاير عقله فرحله وعدت امه وخواته وخطبوله قمر يلي فعلا قمر والخجل احلى شي فيهاا وسجى ودعاء شهدرو الموضوع هضا عشان يقهرو شذى خاصة انها زميلتها في نفس الكليه ومعتصم جابلها هدايه واجد من ملابس وتليفون جديد لان شاف تليفونها قديم وسجل رقمه فيه كان فرحان واجد وبعد موافقتها عليه وكل شي وجاه اول مسج من رقمها واخيرا من امبدري يراجي تعبره وادزله اي حاجه ( شكرا عالهدايا يلي بالنسبه ليا ولا شي لان الهديه الثمينه هي أنت )

ابتسم واتصل دغري بيها ردت عليه : مساء الورد والفل

قمر بخجل : مساءو كيف حالك

معتصم : انا اسعد انسان في العالم كله والله

قمر : واضح من صوتك انك فرحان وحتى عيلتك ما شاء الله عليهم ذوق ولطافه ربي يحفظهم

معتصم : ويحفظك يا دنيتي كلها ونبي انقولك شي انا مستعجل عالعرس لاني واتي الحمدلله وعشان عيلتك مش حانخليهم بروحهم لان هما بفضلك عايشين عشان هكي انا وباتي قررنا نقعدو عيله وحده وانا خواتي تزوجن والحوش فاضي انا وانتي نسكنو مع باتي وامي الحوش كبير ولكن امك وخوتك الصغار حايقعدو في الدور التاني هو علي اساس انا حانقعد فيه بس خواتي تزوجو وحانقعد تحت وعيلتك فوق اقريب منك شنو قلتي ؟؟

قمر : انا مش عارفه شنو انقول بس امي مستحيل توافق ولا انا حنوافق عالشي هضا وانا مش حانخليهم حانزورهم ديما ولو عالحوش لان قديم مش مشكله توا نتخرج مزالي سنتين ونشتغل ونبيعو الحوش ونجيبلهم حوش ملك لهم وشكرا وبارك الله فيكم بس عيلتي بذات انا المسؤله عليهم وهي مستحيل تطلع من هنا عارفتها

معتصم سكت وفي نفس الوقت كبرت بعينه واجد وقوتها وردها وكل شي عاجبه : يعني انتي يا قمر تبي تشيرلهم حوش جديد بس انا حانكون زوجك انا وياك واحد

قمر : انت مسؤل عن عيلتك وانا عن عيلتي والواجب لعيلتك وواجبك لعيلتي وبحدود مش انهم يسكنو في حوشكم

معتصم : لا نقصد انا وياك واحد شنو رايك نشرولهم حوش توا اعتبريه دين وبعد تتخرجي رديه

قمر : انت تبيني ندين منك مبلغ كبير واجد عليا افرض متت ؟

معتصم صبا دغري : بعيد الشر عليك فيا ولا فيكي

قمر : انا نحكي جديات المبلغ كبير مش حايجبلنا حوش

معتصم خطرة علي باله فكره : باهي شنو رايك اعرضي حوشكم للبيع وانا حانجيبلك زبون نعرفه يشريه منك الحوش بمبلغ كويس وفوقها حايشوفلك حوشك بنفس المبلغ يعني لا انتي ادينتي مني ولا اي شي

قمر وافقت : تمام انا راضيه هكي وموافقه

معتصم ابتسم : بكرا ارجي مني رد وسكر الخط

وهكي حانضرب عصفورين بحجر واحد وعدا يجري لعند باته واتفق معاه عالزبون يلي حايدفعوله فلوس عشان يشري الحوش من قمر بمبلغ كبير ويوسف وافق وعجباته قمر واجد لان ماتبيش المساعده ولا اي شي لكن زعل لان هضا غش بس عشان امها وخوتها يعيشو في مكان اكويس لان حوشهم كله رطوبه وحالته حاله هما خايفين عليهم وهي عنيده بس قرر معتصم يقول الحقيقه لكن مش توا بعد تتخرج وفعلا جابو زبون وشراه الحوش الصغير ب140 الف وحصل لعيلة قمر حوش بنفس السعر وقريب واجد من مزرعة يوسف طبعا دافعين وزايدين من عندهم الحوش يلي سعرهم اكتر من 140 لكن قمر شكت ومستغربه ليش نفس السعر وهضا اجمل ومافيش رطوبه وفوقها بالاتاث امتعه وكله جديد بحتت في معتصم يلي ينزل في شناطيهم من القلع وقالت : مش معقوله هكي ليش 140 وبالاتاث يلي واضح انه جديد اصلا

معتصم بلع ريقه : لان مستعجل الراجل يبي يسافر

قمر هزت راسها وبحتت في امها يلي فرحت بالحوش واجد هي والعويله الصغار هالشي شال حمل كبير عليها لكن الشك مستمر وبعد تفكير طويل لحقاته برا الحوش وهو ينزل في الشناطي وربعت يديها : انا متأكده ان الحوش هضا سعره اكتر من 140 الف وانت زدته صح

معتصم نزل راسه وماقدرش يرد عليها ولا يكذب اخرا

قمر هزت راسها وبدموع : عشان فرحة امي وخوتي مش حانحكي شي لكن صدقني كل قرش دفعته حايجيك حتى لو كنت زوجي حايجيك وخشت جوا وزعلت لان كذب عليها مسحت دموعها ومابتش ترد عليه

معتصم تنهد : اسف لاني كذبت وعدا للسياره

يتبع …….

لقراءة الجزء التالي : الجزء التاسع من رواية حكاية دعاء

لقراءة الجزء السابق : الجزء السابع من رواية حكاية دعاء

للإطلاع علي فهرس أجزاء الرواية : جميع روابط اجزاء رواية حكاية دعاء للكاتبة سلطانة كوكي

جميع الحقوق محفوظة للكاتبة سلطانة كوكي