الجزء الثامن من رواية طبيبة قلبي

مهند أدهميونيو 19, 2022

0 179 9 دقائق

وفي الجزء الثامن من رواية طبيبة قلبي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة اسماء محمد .

الجزء الثامن من رواية طبيبة قلبي

بعد عمتي خرجوها من المستشفى يوم الأربعاء وإتحسنت شديد الحمدلله تاني يوم أبوي بعد وراهم كلهم كلمني إنو في زول إتقدم لي وجاي بكرة ويا بتي هو زول سألنا منو أخلاقو كويسة وإنتي بعدين إستخيري وأيا كان قرارك أنا معاهو وإنو هو دكتور أنور لمن قال لي كدا إتفاجأتا وبقيت مخلوعة ومصدومة ، وفعلا يوم الجمعة بالمغرب جونا وكان معاها أمو وأبوهو وحبوبتو وصحبو الدكتور داك ، وأمل صحبتي وأمها جونا من الصباح ورتبو مع ناس أمي الحاجات ، بعد إستقبلوهم أنا كنتا مصدعة وحاسة نفسي محمومة لبستا فستان وما عملتا حاجة وأمل دي بعد فترة من التحنيس فيني في النهاية قالت لي أصلك زفتة حيوانة سجم خلاص وثقيلة كمان ياخ أنا بس خلي ينضمو فيني ساي بتمكيج عروس بس بعد دا أنا ماشة أضيف مع خالتو وطلعتضحكتني ضحك مع إني ما عندي ليهو حاجة بس كنتا متوترة وآخر موقف داك كمان واااي بس ، بعد مسافة كدا أبوي نادني وأمل جات معاي بعد ضيفتهم ودخلنا سوا ابوي قال ليهم دي بتي واحدة وأخوها هيثم دا أصغر منها سلمتا عليهم أمو دي قامت فوق وسلمت علي بفرح كدا كأنها بتعرفني وحبوبتو برضو طيبانة شديد، وأنا متوترة من نظراتهم الكانت علي من دخلتا لحدي قعدتا جمب أبوي وكانوا بتونسوا عادي ورأسي ما رفعتو لأنو لو رفعتو بلقا دكتور أنور بعاين لي يااخ دخل فيني تشتت عديل من التوتر بعد خلصوا قعدتهم دكتور أنور قال لأبوي داير إتكلم معاي أبوي نادني في الحوش عندنا جلسة كدا ودخل جوا قعدنا وهو قعد قصادي في الكرسي وأنا لسا ما قرة أعاين ليهو إلا لمن قال لي سومة! حتى رفعتا رأسي عاينتا ليهو كان جادي ومبتسم بفرح قال لي أنا ما بعرفك كويس واول مرة شفتك في المعمل اليوم داك وكل البعرفو حاليا إني دايرك شريكة لحياتي بس وأنا عملتا كدا خطوة جادة لأني جد متمسك بيك شديد وفي النهاية قبل كل حاجة قرارك أنا بتقبلو، ، ، وكلامو كان بطلع بإتزان وثقة المهم بعد تمو قعدتهم وطلعو فاتو وحارسين كلامنا او قراري بس
ناس أمل وخالتو هبة أمها باتو معانا تاني يوم الصباح الحمى ما خلتني وكنتا تعبانة عديل أمي قالت لي نمشي العيادة الهنا دي مشينا ومعاي أمل فحصنا وطلعت ملاريا لمن أدوني دربين وعلاجات حتى طلعنا ومن مشيت طوالي نمتا بعد صحيت علي صوت أمي بعد الضهر كدا صحتني وكانت بتتحسس في جبيني وقالت لي يا بتي بقيتي كيف هسا كفاكي نوم قومي أكلي ليك لقمة من الصباح نايمة كدا جابت أكل ختتو قدامي في التربيزة جات قعدت جمبي وحضنتني عليها وقالت لي كرر علي يا بتي مع جري المستشفى الأيام الفاتت دي تعبناكي بالمراسيل ، قلتا ليها لالا يما مافي تعب أنا كويسة هسا الحمدلله ، قالت لي سمح أكلي عشاني عليك الله إن شاء الله حبة بس قلتا ليها سمح وبقت تأكلني في خشمي ، أمل جات داخلة قالت لي أخييرا يا بت صحيتي وجات لمست جبيني برضو ورفعت الصحن مسكتو في يدها وقعدت في التربيزة محلو قالت لأمي أنا زاتي أكليني معاها من قبيل حارساك تصحي عشان أتم باقي فطوري معاك يلا سرييع قولي لي شكرا ، قلتا ليها كان تحرسيني عديل بدل تأكلي حبة مع ناس أمي وتتمي الباقي معاي ، قالت لأمي شوفتي يا خالتو سارة بتك حسنة ما فيها ، أمي قعدت تضحك وقالت ليها هسا خلن كلامكن الكتير الكتير دا وهاكي إنتي زاتك بأكلك ومدت ليها لقمة في خشمها ، خالتو هبة وعمتي مواهب برضو جو داخلين عمتي شايلة صينية فيها حاجات الجبنة وخالتو هبة شايلة الكانون بعد قالوا لي بقيتي كيف قالوا دايرين يسو الجبنة معاي هنا ، أخوي هيثم جاء داخل عاين لينا أنا وامل كدا وهزا رأسو يمين شمال وقعد يضحك قال دلع غايتو سبحان الله قال لأمي وخالتو هبة أنا مش قلتا ليكم البنات ديل ما تدلعوهم كدا ، امل قالت ليهو هي أطلع منها بس بناتهم الوحيدات لااازممشكلتك شنو إنتا هسا لو داير يأكلوك تعال أقعد بسقعدوا يضحكوا فيهم وقلبوها ونسة وجو ظريف كدا
تاني يوم عمي مصطفى المفترض عندو مقابلة في المستشفى لكن جونا ضيوف وأمي وأبوي قعدوا معاهم وهيثم اخوي طلع الجامعة وعمتي مواهب ما حنخليها تمشي طبعا لسا دايرة راحة أمل أصلا كانت الليلة راجعة بيتهم امها رجعت أمس قالت لأمي خلاص انا وسومة بنمشي معاهو ما تخافي علي سومة بقت كويسة حبة بنمشي بأمجاد ولااا ترحال وبنجي راجعين كذلك يعني من الباب للباب ، أمي اول رفضت قالت لي إنتي عيانة وما بتقدري قلتا ليها ما مشكلة بقيت احسن لأنو مافي حل بمشي وبجي وإنتو أقعدوا مع الضيوف ، وبالفعل مشينا وقابل الدكتور وقعدنا في الإنتظار أمل قالت لي عرفيني علي الممرضة الهنا القلتي طيبانة وصاحبتيها ديك ، وأنا خايفة أمشي المعمل وأتلاقى مع دكتور أنور ، في واحد جاء سأل من دكتور انور قالوا ليهو بالجناح البهناك وهسا هو دخل عملية قلتا الحمدلله دي فرصة أمشي المعمل قلتا ليها خلاص أرح سريع مشينا المعمل ولقينا سوسن فيهو وجات طوالي سلمت علي وبقت تسألني مالك يا بت سلامتك مركبة فراشة!؟ قلتا ليها الله يسلمك ملاريا بس عرفتها علي أمل ودخلوا بسرعة في بعض والإتنين وناسات فاتت كم خطوة كدا وجات شايلة علبة حلاوة مدتها لينا بعد شلنا أمل قالت ليها ألف مبروك اريتها حلاوة خطوبتي ولااا المناسبة شنو!؟ ، قعدت تضحك قالت ليها دي بمناسبة إفتتاح الجناح البهناك كانوا عاوزين يجهزوهو عشان يعملوهو خاص بأمراض الكلى لكن دكتور انور يوم الخميس الفات دا جمع الأطباء الهنا كلهم والممرضين وأطباء المختبر وسواقين الإسعافات المهم كل زول عندو علاقة بالمستشفى دي وقال إنو الجناح داك حيتخصص للمرضى الما عندهم حق علاج أو ما قادرين يدفعو رسوم للمستشفى او عملياتهم يعني جناح خيري وختا فيهو صندوق للتبرعات وكلهم رحبوا بالفكرة وطوالي بدو تبرعات وإتجمعت في الصندوق مبالغ كويسة غايتو الحمدلله بعني بالجد حاجة ظابطة شديد وإتكلم عن إنو نتعامل مع المرضى البجونا بطريقة حلوة و و …والمهم كلام كويس والليلة إفتتحوهو وطوالي حيستقبلوا فيهو المرضى ولمن في واحد من الممرضين سألوا عن الفكرة والتغيير المفاجئ دا !!؟؟ قال ليهو قدامهم كلهم دي نصيحة من إنسانة غالية علي شدييدبس أدعو لي تكون من نصيبي ، أمل قالت ليها غلا دا ووبعلي ماشاء الله تبارك الله نصيحتها عجيبة ورفعت لي حاجبها ، أنا علي قدر ما كنتا متفاجئة كنتا مبسوطة شديييد من جواي وعشان أمل ما تشغلها لي زيادة قلتا لسوسن كدي هسا يا سوسون فكي لي الفراشة دي ورمت لي يدي زاتو ( كنا واقفين جوا المعمل بالطرف كدا) ، رفعتا ليها يدي بس كان نسمع ليك صوت دكتور انور جاء داخل المعمل ولمن شافنا جاء طوالي إتجاهنا بعد سلم علينا سوسن شكلها مرسلنها ونحنا أخرناها بالونسة وهي ما صدقت ، شالت ورقها ومشت تشتغل في شغلها ، ، دكتور انور قال لي سلامتك مالك؟ ( امل الحيوانة تصبر لي طوالي إتحركت من جمبي) هو سمعني لمن قلتا دايرة أفك الفراشة وقف قصادي ومسك يدي وبدأ يفك فيها وكان جادي كدا ، قلتا ليهو وأنا متوترة وما عارفة أقول ليهو شنو عن الموقف حق اليوم داك ولااا الجناح الخيري !! ، قلتا ليهو الله يسلمك ملاريا ، بعد فكا لي الفراشة قال لي من متين؟ ولييه ما ورتيني؟ قلتا ليهو يعني كم يوم وهسا كويسة ، قال لي أخدتي علاجك كلو ؟ وادوك شنو؟ قلتا ليهو لسا بأخد فيهو ووريتو ادوني شنو ، ،المهم قعد يتكلم معاي وأنا بتربك ياخ وبتوتر قعدتا أشربك أصابعيني ومرةأطقطق فيهم لأنو هو بالرغم من جديتو مثبت نظرو علي وبعاين لي في عيوني ، قال لي طيب هسا يدك دي ما تضغطي عليها كدا لأنو حتتورم زيادة ، نزلتا يديني و لمحتا أمل كانت وراهو بمسافة وبترفع لي في حواجبينا وتعمل حركات وتشاغل فيني وتصور بالتلفون وهو تقول حسا بيها إلتفت وراهو وهي طوالي قبلت علي المجهر الكان وراها بسرعة نظام مشغولة بحاجة وقالت يا سوسن التلسكوب دا بعملوا بيهو شنو ، ضحكتنا ضحك وكل الجمبها في المعمل وهو زاتو قعد يضحك وسكت لمن عاين لي جوا عيوني وأنا لسا مواصلة ضحك طوالي غصب سكتا وإتحركتا من جمبو قلتا لأمل ارح لمن طلعنا برا كملتا ضحكي وقلتا ليها تلسكوب يا سجمالله يجازي محنك ، قعدت تضحك قالت لي إسم المجهر دا زاتو طار لي يابت راجلك يقول أنا بكاوي فيهو، بعديها تلفوني رنا وكان معاها لقيتو دا عمي قال لي مشيتو وين يا بناتي قلتا ليهو جاين عليك يا عمو قال لي خلاص تعالوا برا عشان أنا مرقتا من الدكتور بعد دا حنمشي كويس ، قلتا ليهو حاضر، بعد قفلتا أمل قالت لي شوفي شوفي أخدتا ليكم كم صورة ووقفت قدامي ووجهت علي التلفون بعد ورتني ليهم بقت تقول لي كابلز دا أصلي كيف!؟ شوفي الخوف والإهتمام واااي يا سومة وافقي يااخ خليني نقشر حبة ،يابت جاب أهلو ووصل لحدي البيت ما تكسريهو، قلتا ليها بس أنا لسا ما بحبو و…، قاطعتني وقالت لي هوووي ما بتحبيهو شنو الحب دا غيروهو ولااا شنو يابت إنتي أصبع يدك الرابع دا طقطقتيهو 12 مرة عديل والعجب الصغير يا حليلو كسرتيهو عديل وبقت تحاكي فينيقعدتا أضحك فيها وقلتا ليها أمل والله ازعل منك ، بقت راجعة لورا وقالت لي يا بت ووبعلي ووبعلي وافقي عليك الله دكتور يابت وبعدين شوفي الحلاوة المكشحة في المستشفى دي دكاترة يلخمو وووب بسأنا المرة الفاتت جيت بالليل ما شايفة حاجة لكن بالنهار تاريها كدا وووب تاني كان كحيت بجي هنا أنا دايرة دكتور هسا دا طوالي بوافق بس دكتوووور احيي يا قلبي كفاني تاني ما بستحمل شاكوش واحد كفاية لكن بس دكتووور وت… ، ، ، فجأة سمعنا صوت زول بضحك إتلفتنا الإتنين كان دا دكتور أيمن جاء علينا وقال لينا السلام عليكم بعد ردينا عليهو جاء وقف قصاد أمل وهو لسا الضحكة في وشو قال ليها مشوكش مرتين ودكتور عظام ينفع معاك؟ ، وأمل تقول جات كديسة وأكلت لسانها سكتت وبقت مصمغة في محلها ، قعد يضحك فيها وقال ليها سجلي لي رقمك طيب ومدا ليها تلفونو ، أمل شالتو وكتبت الرقم ورجعتو ليهو إتحرك خطوة وقبل عليها قال ليها جادي أنا والله وضحك وفات ، ، ، بعد فات جات علي قالت لي ووبعلي أهبشي قلبي ، ضحكتا فيها وقلتا ليها ما بسألك أقسم ، قالت لي وحات إسم الله شوفتا أولادي في عيونو لمن جاء المرة الفاتت ما لاحظتا ليهو كدا ولو ما إتذكرتا تربايتك والتقلة حقتك كان أديتو رقم أبوي عديل وقلتا ليهو موافقة أعقدبعديها طلعنا ورجعنا مع عمي وأمل نزلت في نص المسافة قالت حتمشي بيتهم عمي قال ليها خلاص بعد تصلي أضربي لينا يا بتي ورينا قالت ليهو كويس وفاتت، ، ، حبيت العملوا دكتور أنور شدييد وصاح أنا ما كان عندي ليهو مشاعر بس حاليا شكلها بدتت تتكون جواي جد وكونو يصل لحدي البيت من غير كلام كتير معناها هو جد جادي صليت صلاة إستخارة من رجعتا من المستشفى وتاني بالليل وكنتا مرتاحة للآخر وأبوي وأمي لمن سألوني قلتا ليهم لو إنتو ما عندكم مشكلة أنا كمان ما عندي أمي فرحت وزغردت وعمتي برضو وأبوي قال لي ربنا يتم ليك علي خير يابتي ابشر الجماعة ديل

سوومةمن زمان كنتي وين!!!؟؟
لمن مشينا ليهم في البيت وجات داخلة مع إنها ما عاملة حاجة لكن خلتني أسرح فيها غصب عني ولو ما أيمن صحبي دا لكزني كان كلهم لاحظو لي ، الأدب والإحترام ظاهر عليها ودا من أول مرة شفتها فيها وفي كل مرة ، ، بعترف إنو فتحت عيوني شديد علي حاجة أنا طول ما كنتا في المستشفى دي بعيد كل البعد عن الإشراف وأي حاجة فيها بس بجي الصباح بدخل وأبدأ أستقبل المرضى وشكواهم وبتجيني تقارير الفحوصات وبعمل العمليات وما عارف البحصل فيها وفي باقي أقسامها شنو حتى زمن الفطور كل البعملو بطلع أعقم يديني وأغسلهم وبكتفي بحاجة بسيطة وقهوة وأجي راجع تاني وبستمر الحال كدا لحدي أطلع علي البيت بعد أمر سريع علي مرضاي يعني ما قعد ألف وأشوف الحاصل وكبفية التعامل كيف ولااا خطرت علي بالي حاجة زي دي أبدا ، يا حسرة يا أنور حتى لو شايف عملك دا أداء واجب بس وحاجة إتفرطت عليك علي الأقل المفترض فعلا أخلص فيهو وأجرب أحبو ، عشان كدا أول خطوة عملتها نفذتا فكرة سومة لأنها دخلت وإترسخت جواي وفي عقلي شديد عشان كدا الجناح الكنتا حأعملوا لمرضى الكلى قلبتو لجناح خيري متكامل بإذن الله وبعديهو طوالي حنجهز لواحد تاني لأمراض الكلى فكلمتا دكتور ماهر بالفكرة دي وإنو حنتأخر شوية في الأول زعل وجاط لمن حيرني معاهو لكن تاني وافق قال ما مشكلة طيب
__وأنا في المستشفى خلصتا مرضاي لكن قبل أرجع البيت إتصل علي عم محمد أبو سومة وقال لي إنو هي موافقة ياخ أنا بقيت زي الأهبل عديل وتاني قعاد المستشفى زاتو غلبني مرقتا واول شيء مشيت علي المسجد وما عارف زاتو صليت كم ركعة شكر لله وبعديها طلعتا علي البيت ولقيت ناس أمي أكيد عرفوا الخبر وفرحانين ومباركات بعديها دخلتا علي غرفتي وأنا الفرحة ما سايعاني بعد صليت العشاء إتصلتا علي عم محمد تاني وطلبتا منو يديني اتكلم مع سومة بعد أداني ليها قالت لي آلو ، قلتا ليها كيفك وبقيتي كيف ، قالت لي أحسن كويسة الحمدلله ، قلتا ليها أها قرارك شنو!؟ ، سكتت حبة وقالت لي أبوي وراك ليهو ، قلتا ليها ااي عارف بس حابي أسمعها منك والله ، سكتت مسافة بعديها قالت لي بسرعة موافقة وقبل أقول ليها حاجة أدت التلفون لأبوها إتكلمتا معاهو حبة وبعد قفلتا رقدتا في سرير وأنا بتبسم براي وكلمة موافقة دي بتتردد في مسامعي لحدي نمتا …….

بعاين ليك عشان أفهم شنو البيكي
وأنا الدكتور!!! وأطلع بس أنا المرضان بعينيكي