وفي الجزء الثاني عشر ماذا برأيك سوف يحدث مع ابطال حكايتنا ؟ هل ستكون الامور علي ما يرام ام سيحدث مالا يحمد عقباه ؟ هذا كله واكثر سوف نعرفه في السطور التالية من رواية بقايا امرأة .
الجزء الثاني عشر من رواية بقايا امرأة
مريم … << مع انهيار وبكى >> جيتووووووو جيتووووو باش تشمتو فيا … باش تشوفونى كيف نتقطع ونبكى … اختك الا قتلتلها حسبى الله ونعم الوكيل فيها … شن شافت من امى الا كل خير … قتلتها واليوم انى بندفنها باايدى … بس قسما بالله قسما بالله … الا ماندفعها تمن … الامن نخليها تتمنى تموت الف موته … الاماناخد منها كل شى واى شى … زى ماخدت منى امى … نسرررررين الا كانت فى يوم اعز اصدقائى … من اليوم عدوتى … ورح ندفن اى شى فى قلبى ليها … مع امى تحت تراب … برااااااااااااااااا برااااااااااااااااا ..
وهنا نوره قعدة تشوف وهيا مصدومه … لاعرفت ترد ولاعرفت تسكت وجيران يتفرجو … وصدمة ام مريم الطيبه والحنونه مع الكل … هيا الا خلت نوره تسكت وتطلع …
روحت نووره واول ماوصلت للحوش .. خدت صغار نسرين من جارتهم وخشت للحوش وكانت ساعه 9 بزبط … واول ماخشت دخلت صغار للحمام دوشتلهم .. وبدلتلهم وخشت للمطبخ ووتت الفطور وبعدين خشت على نسرين ..
نوره … نسرين .. نسرين .. قاعده راقده حبيبتى ؟؟ خيرك تبكى ؟؟
نسرين … انى قتلتها .. انى جبتلها المصيبه .. بس انى والله مانقصد …
نوره … كيف عرفتى من قالك ؟؟ انى خليتك راقده ؟؟
وهنا نسرين قعدة تشبحلها وتبكى ولوحت تلفون جيهتها … واوا ماخدت نوره تلفون شافت رساله … تهديد من مريم باعتتها لنسرين .. وكان نفس الكلام الا قالته لنوره بزبط …
نسرين … خلينى فى دار بروحى وسكرى دار .. انى محتاجه نقعد بروحى …
نوره … حبيبتى انتى ماليك دنب فى شى ..
نسرين .. خليبنى بروحى نوره وراس امك …
طلعت نوره من دار … وكانت نسرين حالتها تقطع القلب … لانا حست ان احيانا فى الحرب لازم ماتموت ناس هما ماليهمش اى دنب سوا انهم كانت دنيا رابطتهم بااشخاص هما ماكانوش يستاهلو انا يكونو معاهم … بس هالحرب هيا حرب نسرين ومريم … واعلنو الحرب من اليوم الا مريم تخلت فيه على مبدائها بسبب رجل … وام مريم هيا حد ضحايا هالحرب .. بس هل فى ضحايا غيرها ؟؟ اكيد رح نعرفو كل شى فى وقته …
….
بعد مرور شهر…
ام نسرين … من موتت ام مريم واختك عندك … مشيت لتونس اسبوعين باش نعالج وامس روحت ولا اتصلت بيا ولا حتى طمنت عليا … ومده الا فاتت كل مانتصل ونكلم فيكم تقولى نسرين عندى راجلها مسافر قولنا ماشى .. قولتى مضايقه وماتبى تشوف حد درت فرزعه وسكتت الله غالب كيف ماتتطمنش على امها .. بس انها ليها اسبوعين عندك ولاتتصل ولاتكلمنى وتتطلبى منى مانتكلمش معاها هلبببه … هيا وينها ؟؟ تكلمى خير مانلم عليكم ناس .. شن فى ؟؟
نوره … للاسف ليها شهر عندى وانتى ماتعرفيش شن صار لانا خفنا عليك تأجلى سفرية علاجك بسببها … وهيا حاليا فى دار ضيوف … نفسيتها تعبانه … لاتاكل لاتحط حاجه فى فمها عدا الا يخليها تعيش بس .. وحتى صغارها دوب ماتشوف فيهم .. امى نسرين خليها بروحها … راهو ربى عالم بيها ..
وفجأه طلعت نسرين من دار وقالتلها …
نسرين … << طلعت وقعدة تشبحلهم وقالتلهم >> … انى طلبت طلاق من وائل … وانتهى موضوع بالنسبه ليا ..
امها …. وووووووووووووووووووووووووووه ياكبدى … شن فى ؟؟ نمشى اسبوعين لتونس مع خوك ونجى نلقى دنيا مقلوبه ؟؟
نوره … امى مافيش داعى للعياط ناس يسمعو فينا ..
امها … هدا الا قولتى نبيه ونموت فيه .. وووووين مشى هدا كله .. تكللللللمى .. توا طلع كخاااااا
نسرين … لا مش كخا .. بس جديد الا انتى ماتعرفيشى والا مااهتميتى تحسى بيه .. ان راجلى شديته يخون فيا … ومع منى .. ومع اقرب ناس ليا مريم …. شن متوقعه منى .. تكللللللللللللللللمى ؟؟ انتى اتصلتى وانتى مش هامك لو متت او لا … انى المد هالا فاتت حست روحى موتت .. ولللحظه هيا الشى الا خلانى ناخد هالقرار هما صغارى بس … صغارى هما الا خلونى من هاللحظه قسما بالله الا يحاول يوقف فى طريقى الامايشوف منى شخص تانى .. انى خلاااااااص تعبت .. تعببببببت … انتى ربيتنى على انى انسانه ضعيفه مكسوره تحت راجلها مهما يدير فيها … خديت كلامك فى كل شى … يانسرين احملى ماتعدليش عليه اربطيه … ماشى ياامى … يانسرين كولى عندك زوز صغار وياويلك من ربى … حاضر ياامى … وفى الاخير شن خديت من كلامك .. راجلى واب ولادى خانى مع اقرب شخص ليا .. صديقة دربى … ومارؤفوش بحالتى … وبسبب الا صار … ماتت ام ماليهاش دن بالا انها جابت بنت عاقه .. وكانت مصاحبه زوجه مغفله ضحكت عليها ولبستلها قرون وخدت راجلها منها …. بس قسما بالله الا مانخليها تبوس رجليا وتترجانى نرضى عليها بس ..
امها … وووووووووووووووووووووووووووووووووووووووووووووه علياااااااااااااااا قلبببببببببببببببى قلبببببببببببببببى … طاسه ميه قلبى قلبى بنمووووووووت خلااااااااص …
وبعد ماسمعت امها الخبر انهارت بالعياط والبكى .. وقعدة فى وسط الحوش ونوره تحاول تهدى فيها … اما نسرين فاخدت صغارها وخشت لدار … وفتحت روشن باش تخش نور ربى ليها … وخدت صغارها فى حضنها وقعمزة على سرير تقلب وتعيد فى اخر حسباتها ومافاقتش على روحها الا بتلفونها يرن برقم وائل …
وائل … تبى تطلقى ؟؟ وصلت بيك لحد هنا صح ؟؟
نسرين … ايه خلاااااص انى عفتك وكرهتك …
وائل … ماشى … بس صغارى نبيهم … تتنازلى عليهم …
نسرين … بعددددددك قسما بالله مارح تحلم بيهم …
وائل … اوووك معناها حطى فى بالك .. مش رح نطلقك .. ولارح نحط على صغارى قرش … لحد ماتتنازلى عليهم …
نسرين … انت حقير وندل وقسما بالله ياخسارة كل يوم حبيتك فيه .. فلوسك انى مانبيهمش … وطلقتى رح ناخدها فى الوقت مناسب … بس معاش نبى نشوفك فى حياتى بعد اليوم … انسانا وبرا عيش حياتك … << وسكرت عليه >>
ومن لحظه هيا .. اعتبرت نفسها شخص جديد .. شخص رح يقدر يتحدى كل حد استهان بيه فى يوم .. وفجاه .. ناضت .. وفتحت شنطتها وطلعت حوايجها بعد قرار جى مفاجى منها انها تمشى للعياده الاسنان الا كان يخدم فيها دكتورها سابقا فى الجامعه والا بعد ماهيا تخرجت … سيب دراسه وفتح عياده …
فالبست سروالها .. لبست حوايجها … وشافت للمرايه واول ماقعدت تشوف لروحها فى مرايه … قعدت تركز وتشوف لحوايجها ونفسها .. الا من كبر المصيب هالا جت على راسها … ماتلفتتش او قدرة تشوف للمرايه ولنفسها قبل اليوم … بس بمجرد ماشافت روحها .. انصدمت … شافت وجهها كيف ضاعف ودابل من كتر الهم .. وشافت حوايجها الا كانو جاين عليها واسعات مش زى قبل … وهنا طلعت تجرى لوسط الحوش وقالت …
نسرين .. نوره .. اى فى حمام ؟؟ علاش ؟؟
مشت نسرين وسيبت نوره تتكلم ووقفت على ميزان .. وهنا صدمه … من كان وزنها 107 وهالوزن وزناته بعد ماروح وائل بيوم … وحاليا وزنها 99 كيلو … ااااااااااه 
نوررررررررررره .. تعااااااااااااااااااااالى انتى مش عارررررررررررفه تعاااااااااااااااالى
نوره .. شن فى خلعتنييينى .. خيرررررررك ؟؟
نسرين … انى وزنى 99 كيلو … انى مش مصدقه … واخيرررااا شفت شى ممكن بالنسبه ليك تافه .. بس شى يخلينى يقول انى رح نتغير اكيد … نوره انى كنت 107 .. توا 99 … انى اسعد انسسسانه .. برغم مصائبى كلها .. بس شى زى هوا خلانى نفرح … انى نبى نفرح .. نبى نضعف نبى نتغير .. رح نخدم ونشوق ونضعف وندير كل شى … رح نتبت للكل انى قادره نعيش من غير اى حد << وطبتت اختها وقعدة تبكى >>
نوره << مسحتلها دموعها وقتلها >> هوا انتى تفرحى تبكى تضايقى تبكى ؟؟
نسرين .. الله غالب مكتوبلى نبكى فى اسواء حالاتى …
وهنا تلفتت نسرين لقت امها تشوفلها وتبكى … فاسيبت نوره وطبت امها وقعدة تبكى …
نسرين … سامحينى ياامى … والله لو تعصبت عليك عضبن عنى .. انتى عارفه انى مش هكى ..
امها .. انى مسامحاتك حبيبتى … بس هاتى حوايجك وروحى معانا والا بينا بيك …
نوره .. خليها ماما معاى .. انى راجلى 24 ساعه مسافر .. مايقعدش فى بلاد … ولو قعد يروح ساعه 12 فى الليل ويطلع 7 صبح للخدمه .. والله مونستنى ياامى .. خليها معاى ..
نسرين … حتى انى مرتاحه ياماما .. خلينى هنا وانتى تعالى كل يوم .. وانى مش رح نطول عندها ورح نجى عندكم .. بس خلينى نسوى امورى بس …
وطلعو وقعمزو مع بعض فى صاله …
امها .. على شنى ناويه يابنتى ؟؟
نسرين .. عندى دكتورى والا ناقشت معاه مشروعى … فتح عياده خاصه بيه .. وتلاقيت معاه بعد الزواج .. واعطانى كرته وقالى لو حابه تخدمى عندى تفضلى بعد ماتولدى بسلامه … وماكنتش متوقعه انى رح نستفيد من هالكرت .. بس اكيد جى وقته توا ..
نوره … رح تمشيله فى عياده ؟؟
نسرين .. اى رح نتقابل معاه وجه لوجه ورح نوافق على العرض الا قدمهولى … ورح نخدم ..
امها .. باهى من بيرفعك ؟؟
نسرين .. رح ناخد سيارة نوره الشهر هوا وبعدبن يحلها الحلال … عندى شوية دهب رح نبيعه وناخد بيه سياره على قدى لين نخدم ونطلع فلوس …
امها … معقوله يابنتى بتبيعى دهبك ؟؟
نسرين .. ياما دهب لى وقت ضيق … لو انى مابعتاش باش ندير سياره ونسوق ونوقف على رجلى فامعناها ماليشى قيمه …
امها .. باهى صغارك شن بتديرلهم ؟؟ يابنتى قاعدين صغار ؟؟
نوره … يقعدو عندى طالما انى مزينى فى الحوش … وعندنا جارتنا مره كبيره فى سن وكباره .. تخدم اى خدمه … نجيبها عندى فى مزين … ترد بالها عليهم لحد ماتروح نسرين .. بس بالله خليها ياامى وماتوقفيش ضدها .. خليها توقف لنفسها وترد حقها الا اتخد منها غصبن عنها
امها … الا تشوفوفه مناسب ديروه ..
ونسرين … نوره انى طالعه … عارفه رح نتعبك بس بالله عليك ردى بالك منهم …
نوره … ولايهمك واهى امى معاى …
نسرين … اوك حبيبتى … سلام توا ..
وخدت شنطتها وولعت سياره وطلعت … ووهيا ماشيه فى طريق وتفكر كيف بتقوله وشن بتقوله … جت قدامها لافته صالة سلطان رياضيه .. فاقعدت تشوفلها شوى بعدين … كملت طريقها … وخشت للعياده … واول ماخشت لقت ريسبشن وسألت على دكتور زيد … فاخشت للمكتب وقابلها بحراره كبيره …
دكتور زيد … اهلن اهلن نسرين شن اخبارك وشن مدايره .. معقوله من لما جيتى وكشفتى على سنونك عندنا وانتى حامل معاش فكرتى ترجعى ..
نسرين … هههههههه نصيب .. بس اهو رجعت فى الاخير … ونبي حضرتك فى موضوع ..
دكتور زيد … ان شالله خير .. تفضلى …
نسرين … من غير لف ودوران .. انت قبلقدمتلى عرض .. وانى جيتك اليوم وقبلت بيه .. لو فى حالة مازال قائم
دكتور زيد … انك تخدمى عندى ؟؟ اكييييييد … هوا انى نلقى طالبه متوفقه افضل منك . تى انتى كنتى الاوله على دفعتك …
نسرين .. شكرا دكتور … باهى كيف بيكون وضعى ؟؟
دكتور زيد … اااه وضعك .. بيكون متدربه لمدة 3 شهورمن ساعه 9 لحد ساعه 2 ظهر … وبعدين انتى وشطارتك .. لو قدرتى تتبتى قدرتك وفرصتك … فارح نساعدك ونوقف معاك …
نسرين … اووك دكتور … باهى امتى نبدا ان شالله ؟؟
دكتور زيد … من بكرا لو حابه ماعنديش مشكله …
نسرين … اوك دكتور تماااام وبارك الله فيك وان شالله نكون قد المسئوليه يارب مانعطلش عليك حاليا لانا شكله عياده ماشالله مليانه …
دكتور زيد …. اااااى والله يانسرين وانتى جيتى فى وقتك باش تريحنى شوى
نسرين .. ليا شرف اكيد دكتور فى امان الله ..
دكتور زيد … فى امان الله
وهنا طلعت نسرين من العياده وحاسه ولى اول مره انها صح … ومشوارها صح .. ورح تجرى وتاخدى دنيا كلها فى ايدها وتدير كل شى … واول ماركبت سيارتها … خدت شنطتها وفتحتها … وطلعت منها باكو دهب .. وشافت لصالة رياضه الا كانت جنب العياده الا رح تخدم فيها … وبعدين ولعت سيارتها وقعدت تلود فى شوارع لحد ماقابلت اول صفت محلات … واول ماوصلت للمطلوب … درست سيارتها وخدت شنطتها ونزلت …
يتبع……….
لقراءة الجزء التالي : الجزء الثالث عشر من رواية بقايا امرأة
لقراءة الجزء السابق : الجزء الحادي عشر من رواية بقايا امرأة
للإطلاع علي فهرس اجزاء الرواية : جميع اجزاء رواية بقايا امرأة كاملة للكاتبة كيندا
جميع الحقوق محفوظة للكاتبة كيندا من ليبيا .
