الأحداث تتسارع قليلاً في رواية حالة حب، حيث تأخذنا الكاتبة لعالم جميل من الرومانسية والتشويق في نفس الوقت، جهز نفسك لأحداث رائعة قد لا تخطر أبداً علي بالك وهذا اجمل ما يمكن أن تراه في روايات الكاتبة لوزة، لذا هل أنت جاهز لقراءة الجزء الثاني سوياً ؟ إذا هيا بنا .
الجزء الثاني من رواية حالة حب للكاتبة لوزة ليبية
شمسي شدلها يدها فلتت يدها ريفاء من يده وقتله – معليشي شمسي …. مش قادرة نتكلم كلمتين ع بعض
ومشت وخﻻته شمسي مصدوم من ريفاء حسها شخص اخر …ناض وبيلحقها شمسي لكن ادكر انه ماخلصش حق العصير فارجع نزلت من المطعم ريفاء و
كانت فيه عركة قدام المطعم ماان وصلت ريفاء قدام الباب الرئيسي
صارت رماية ..وفي نفس اللحظة اللي وصل فيها شمسي قدام الباب كانت رصاصة استقرت في راس ريفاء وطاحت طول وعرض… وقف شمسي مسبوه مش فاهم شي وتلقطت عليه الناس
طاح ع ركبيه وعيونه ايدمعوا زي المطر ويرمش في عيونه ويديه يرعشوا …. شد ريفاء بين يديه وقام راسها فوق وبصوت عالي قال – ريفااااااااااء
نوضي ياريفاء ماتخلينيش بروحي نوضي انا مازعلتكش وﻻ حنزعلك بس نوضي
خداه واحد من شباب شده ع جنب ومشوا بيها للمستشفى هيا ميتة وهما عارفين هالشي ….بس شمسي مش مصدق ان ريفاء اتوفت … لين قاله الدكتور خبر وفاتها … قعمز شمسي ع اول كرسي صادفه من شدة صدمة الخبر …. وقتها شمسي اصبح ابكم تماما ..
* انتهت الساعة ونص وهداا كل اللي صار من قبل لما تحكي عفاف لخواتها انها سمعت شخص ينادي ريفاء … ركزوا كويس مش تقولولي معقولة الرواية كلها صارت في ساعة ونص ههههه
~~~
نورة – تعبانة مدقدقةةةة
عمك علي – ديما واانتي تاعبة يابنت… حسك اعزوز
خ نعيمة – نوضي نوضي نعرفوهم جو الوضاعات بش معش تحطي الغدي
عفاف – ههههه زابطينك
نورة – هههه جمينو خودي انتي اليوم حطان غدي
جمانة – عينك شن اليوم شن غدوة نوضي بالكي
ع علي – ﻻزم منه موشح الغدي انتي وياها شوي تاني تقولو نوض يابوي حط الغدي
عفاف – ههههههه ياودي مﻻ انا مانقولهاش لكن هادو الزوز اتوقع
جمانة – ههه ﻻﻻ مانديرهاش انت تنجاب الماكلة لعندك لكن نورة مرات اديرها
نورة – ههه اللطف هزلت انخلي اوبي يخش للمطبخ وانا قاعدة
خ نعيمة – ياميمتي مافيكم من دوة ياميمتي فزي واحدة منكم اتحط هالقمة خلي بوكم ياكل يخش يرتاح
نورة – هيا اهو بنخش … زودي عفاف معاي هدرزي عليا في المطبخ
عفاف – بري اهو ﻻحقاتك ..
جمانة – بابيتوووو
ع علي – مادلعتيني هكي اﻻ ماتبي حاجة
جمانة – هههه ممكن
ع علي – هاتي ماعندك
جمانة – نبي نقدم ع عمل
خ نعيمة – بش قدمتي
جمانة – ماقدمتش قلت نبي انقدم
خ نعيمة – اماﻻ شن دايرة العراك مع خوك امبكري بش ع اساس قدمتي
جمانة – يمى خيري يدخل في كل شي انا قلت بنقدم هوا عنكش
ع علي – به وين وشن هيا الخدمة
جمانة – م م مضيفة طيران
ع علي – ههههه تي سقدينا يانورة خلي نتغدوا
نورة – شوية بوي اندير ف سﻻطة
جمانة – ها شن قلت يابوي
ع علي – تحسابيها ساهلة نخليك هكي بروحك من بﻻد لبﻻد
جمانة نزلت راسها وخدت نفس عميق وقالت – يابوي اكيد حيكون فيه زميﻻت عمل وطاقم الطايرة ماعتقدش حتصيرلي حاجة
ع علي – ولو نفرض اي شي وﻻد الحرام كاثرين
جمانة – ﻻﻻ نمشي تحت الحيط ونقول ياربي الستر …و انت مربيني احسن رباية والحمدلله لو بين 100 راجل مش حنغلط بإذن الله
ع علي مسح ع وجه بيده وقال – انا لو عليك انتي نبصم ب 10 انك مش حتغلطي يابنتي
جمانة – باهي اماﻻ وين المشكلة
ع علي – صعب يابنتي صعب
جمانة – عﻻش صعب يابوي
خ نعيمة – ياسر يابنت وانتي تناقشي واتحطي
ع علي – خليها تناقش بش نقنعها
جمانة -انا نعرفك متفتح يابوي وعايش طول عمرك برا يعني مفروض موضوع هدا تنظرله نظرة كأن الفتاة تسعى لتحقيق طموحها
ع علي – عﻻش ماكانش طموحك تاخدي ماجستير في تخصصك وقريتي برا ماكنتش حنمنعك
جمانة زعلت وقالت – يابوي والله خاطري نكون مضيفة وافق
ع علي – حتى انا وافقت الدين يمنع ان البنت او المراة تسافر بروحهل هدا من غير ان الناس بتاكل وجوهنا بنته تسافر بروحها المجتمع اللي عايشين فيه مايرحمش
عفاف – مادورهمش الناس يابوي
ع علي – شن عايشين بروحنا احنا
جمانة – ايه هكي كنت نحساب
ع علي – ايه ﻻن من وقت قلتي بتاخديه تقريبا ف دبي واﻻه
جمانة – ايه
ع علي – من وقتها قتلك تعلم واترك مش بش تشتغلي بيها شهادة
جمانة – ماكنتش نحساب هكي بيصير ….ارجوك يابوي بالله عليك وافق نشتغل حتى شوية بس
ع علي – استغفر الله العلي العظيم
باهي يستر الله
جمانة – يعني موافق
ع علي – ان شاء الله خير خلي نسافر سفرتي لدبي عندي عمل سبعة شهور غادي وبعدين وقت نرجع ساهل
عفاف – عﻻش 7 شهور هلبه
نورة – ياريت والله
خ نعيمة – طيب فيك جبتي هاللقمة
نورة – هههههه
عفاف – هلبا يابوي خليني اهنا وسافر بروحك
ع علي – اصﻻ السفرة هادي بنسافر بروحي … تو يجيكم عمكم واﻻ خالكم يقعد معاكم كالعادة
خ نعيمة – ان شاء الله خير
~~~
طبعا حالة شمسي تأزمت …حاس نفسه هوا اللي عصبها فصار اللي صار مقعمز عالكرسي ﻻ يتكلم وﻻ شي..واحد من شباب اللي وصله للمستشفى سخف عليه فخداله نقاله وفتح سجل مكالمات واتصل ﻻكثر شخص متواجد في السجل اللي هوا معتز …
معتز – ها ياراجل … بنركب طايرة عندي رحلة هههه شن ماصارش من الموعد اماﻻ
الشاب – غير خليني نتكلم
معتز – اه مني معاي
الشاب – صاحب الرقم هدا قاعد في مستشفى ال…
معتز – شمسي .؟؟؟؟ شن صارله شن صارله اتكلم
الشاب – ماصارله شي مرته اللي كانت معاه جتها رصاصة فراسها واتوفت وهوا من بكري مسبوه اتعالاله
معتز – ﻻ حول وﻻ قوة اﻻ بالله …خطيبته مش مرته
الشاب – اللي هوا
معتز – باه اما مستشفى
الشاب – الطبي ياخونا
معتز – بالله خليك معاه لوقت مانجي مش معطل
الشاب – اوكي تمام ..
بعد تلث ساعة بتمام وصل معتز للطبي… شكر الشاب اللي اتصل بيه … وقعمز بحدى شمسي وهوا مش عارف شن يقول يشوف في شمسي مطبس ومربع يديه ويشوف للوطا و الوطا معبية نقط دموع … وكعه معتز الموقف وحسه في نص كبيدته
~~~
نورة – جمانة ياقردة بعد ماتغسلي يديك معش تقطري عالوطا
جمانة – باهي وانتي ديما نفس اﻻصطوانة … خلي نمشي انقيل
عفاف – تعالي اهنا خودي الفاكهة لبوي و امي
جمانة – به هاتي …
خ نعيمة – احنا نستنو وانتي تلوقني اهنا…
جمانة – غير كان صبرتي شوية نعوم خانم … كيف بنجيبهالك
نعيمة – هاتي اهنا تو ناخدها بروحي
جمانة شد في كتف امها وقالت – يمى يمى
نعيمة – شنو ؟
جمانة – زيدي زني ع بوي باش ايوافق
خ نعيمة هزت كتفها بش جمانة اتنحي ايدها وقالت – حولي بالكي من عليا خصنيش فيك طيشتيلي ولدي اونه هج من جرايرك انتي وهالكبيلوات خواتك
عفاف – خيرنا يمى اللطف
خ نعيمة – وجهي اتقشر قدام الولد تتكلموا وتتميعدوا يلي ماتتحشموش
نورة – هههه باهي وهوا شدهانا مستكة
عفاف – مرة بس شافني ف موعد بعدها خﻻص
خ نعيمة – قصدك بتوهميني بعدها خﻻص معش تﻻقيتي معاه
(مع شبحة وتقرديحة راس اكيدة زبطوها )
عفاف – ههههه الحق غيرنا مكان الموعد
خ نعيمة – والله ماتتحشموا انتي وياها …الحق فيا انا رخيتلكم الحبل
كان ضبط وربط ماهدا حالكم
ع علي ينادي من وسط الحوش – ياهوووو هاتو الفاكهة واﻻ خلي نخش نرقد وخﻻص !
خ نعيمة – هيا جاية هي
جمانة – بالله عليك زيدي زني عليه قوليله يمى… عارفاتك قدها وقدود
خ نعيمة – يصير خير خلي نمشي توا …
نورة ل عفاف – استحشت سامي
عفاف – كلميه
نورة – قال عنده ظروف
جمانة – وباهي من ظروفه مايحصلش خمسة دقايق يتكلم
نورة – ايه حتى انا هكي انقول ..
ع علي – اسمعي سكريه الموضوع يانعيمة بيني وبينك واﻻه … قتلها سبعة شهور كله كله بش نسكتها
ﻻ اكثر وﻻ اقل … بش حتى تنسى الموضوع
خ نعيمة – اللي تشوفه ياعليوة
~~~
جمانة لخواتها – بنمشي لدار بنتكلم وكان بتجوا لدار ماديروش دوشة
عفاف – اطمني بنقعمزوا في بلكونة بناكلوا دجيﻻتي لحقينا غادي
جمانة – به …. الو
حاتم خطيبها مواليد(87) – (ساكت )
جمانة – الوووو
حاتم – (صمت تام )
جمانة – اه نسيت السﻻم عليكم
حاتم – وعليكم السﻻم …. شن قلنا عليها كلمة الو
جمانة – ماهو ننسى ومتعودة بيها تو شوي شوي نتعود نقول السﻻم عليكم … شن الجو
حاتم – باهي
جمانة – خﻻص حبيبي عاد نسيت قلنا
حاتم – باهي به
جمانة – اسمع انا في المطبخ خليك عالخط لين نمشي لداري
حاتم – اوكي …
* طلعت من المطبخ وخطمت من جنب امها وبوها وغمزت ل امها ادكر فيها … وخشت لدارها وسكرت الباب وامتدت عالسرير وقالت – ها حبيبي
حاتم – اهلين بيك شن الجو
جمانة – تمام وانت
حاتم – اهو ماشية ..شن مدايرة انتي
جمانة – مكسدة … كنا نتغدوا وتوا متكية
حاتم – باهي كويس
جمانة – استحشتك حتومي
حاتم – حتى انا استحشتك ….
جمانة – غير امتى حبيبي نكونوا مع بعض بس وفي حوش واحد
حاتم – ان شاء الله غير انتم هالحوش وقصة المرتبات اللي معش يبوا ينزلوا
جمانة – ان شاء الله خير
حاتم – كانك عليا من اليوم
جمانة – هههه باهي ربي يسهلك ان شاء الله ….
حاتم – ان شاء الله
جمانة – شن رايك نتﻻقوا في مطعم ونهدرزوا والله مستاحشاتك
حاتم – هه مطعم ! مانحباش انا الجو هدا … جو المطاعم..
جمانة – اممم والله عادية نشوف فيها مطاعم عائلية عايلات بصغارهم يتغدوا فيه
حاتم – ﻻﻻ فوتيه موضوع
جمانة بنبرة زعل – باهي به ..
حاتم – شوية جوني الشباب تو نكلمك بعدين
جمانة – اوك سﻻم
~~~
منيرة – عطلت عليك سنفوري
حاتم حط نقاله عطاولة وبإبتسامة قال – اكيد ياعمري الدقيقة في بعدك سنة …
منيرة – هههه ياحبي انت …غير اتصلت بيا اختي قعدت نهدرز معاها
حاتم – هاه ريفائووو …به شن نطلبوا جعان بنموت من جوعي
منيرة – امممم خاطري في وجبة حوت مشوي وراثة
حاتم – تم ياروحي … وحناخد معاه حرايمي ومكرونة فواكه البحر
منيرة – اوك بتاخد وراثة حتى انت
حاتم – اكيد اللي بتاخديه بناخده
منيرة – ههههه … بس يعطيهالك حلو المطعم مش عااادي
حاتم – اها اماﻻ شنو بش تعرفي ذوقي بس
منيرة – هه مايكون تاخد ف خطيبتك كل يوم لمطعم من وراي
حاتم – ﻻ ﻻ
منيرة – والله نزعل منك كان هدا
حاتم – وحق ربي اهو ليا 7 شهور خاطبها والله ماخديتها لي وﻻ مطعم
منيرة – اه به فرحتني ^^
حاتم – عيب عاد ماندير اﻻ اللي يرضي حبيبتي منيروو
منيرة – خسارة والله تمنيت انا نكون بدالها
حاتم – ماه انتي اللي مشيتي تجوزتي وخليتيني
منيرة – ماه تعرف ان امي سكرت راسها وجوزتني لقريبي … ودرت زوبعة بش اطلقت
حاتم – ايه وانا حكيتلك اونه قتلك حالتي نفسية كانت صعبة … لقيت البنت اهياه هدرزت معاها استريحتلها فضفضتلها تعلقت بيها فخطبتها
منيرة – ياناري ماتندريش على روحها انخطبت لشخص كان عنده فراغ عاطفي
حاتم – هههههههه
منيرة – شنو تضحك واﻻ تحبها اكثر مني
حاتم – اكيد ﻻ حبيبي … انتي حبي اﻻول واﻻخير ومن بعدك قلبي اتسكر ♡
منيرة – رقم غريب يتصل
حاتم – هاتي انرد
منيرة – هاك اه …
حاتم – ايوه نعم
فتاة – ايوه اﻻخت منيرة ؟؟؟
حاتم – لحظة هي ……. ..منيرة واحدة تبيك
* خدت منه تلفون وقالت – الو
فتاة – انتي منيرة ؟
منيرة – اي ان شاء الله
فتاة – سامحيني راهو وخيتك جابوها للمستشفى
منيرة – ريفاء؟؟؟ خيرهاااا
فتاة – متعرضة لطلق ناري في الراس وعظم الله اجرك …
منيرة – و و …
* ساخت منيرة عالطولة وطاح منها النقال*
حاتم انخلع ويهز فيها – منيرة منيرة
ويضرب فيها ع خدها – منيرة شن فيه …
* خدي تلفون وتكلم وقال – ايوه مني
الفتاة – في مستشفة الطبي
حاتم – تي غير شن فيه
فتاة – جابونا بنت للمساشفى اسمها ريفاء متعرضة لطلق ناري في راسها ولقيت في تليفونها اختي منيرووو فاحبيت نساعد ونتصل
حاتم – تم تم شوي ونجو
~~~~
عفاف – اجمينو … اجمينو ياكلبة عارفاتك فايقة
جمانة – شن تبي
عفاف – تعالي هدرزي معانا قاعدين في بلكونة هواء طلق
جمانة – مش خاطري
عفاف – تعالي عارفاتك حرجانة ﻻن ماقلتيش سﻻم عليكم لحاتم
جمانة – ايه … مش عارفة عﻻش ايديرلي هكي ياعفاف … كل شي يبيه زي المسطرة وتمام التمام … انا انسان واﻻنسان يسهى وينسى ﻻزم ينكد عليا ﻻزم
عفاف – فوتي فوتي وتعالي غيري جوو اهو حطيت هلبا حاجات دجيﻻتي ودﻻع وعصير هيا تعالي
جمانة – باهي خلي ندور سماعاتي ونجي
عفاف – شن بتقعدي بحدانا وحاطة سماعات مصحك
جمانة – تي ﻻ بش نفتحوا الراديو ع قناة غناوي علم
عفاف – ها هكي باهي … نستنو فيك ..
~~~
معتز ايهز ف شمسي – شمسي … شمسي …. وحد الله ياراجل … ﻻ حول وﻻ قوة اﻻ بالله … به نوض ديرلهم اجرائات متع الدفن انت عارف مافيش غيرك اماليها ماعندهمش حد مافيش تريس ف حوشهم… شمسي تي رد ياراجل.. الصبر ياربي الصبر
*شمسي سكوت تام …هوا اصﻻ معش يتكلم لكن مازال مايندريش ع روحه انه ولى ابكم … راكبه الهم ومش منتبه ل معتز وﻻ اللي يقول فيه من اﻻساس …صورة ريفاء مقتولة وهيا في حجره ….
وقف شمسي وسكر يده وضربها عالحيط ..
شده معتز اضبطه وقاله- عظم الله اجرك معليشي هد حد يومها الله غالب …
شمسي فتح فمه بيتكلم ماقدرش … حاول مرة ثانية ماقدرش … انزاد صدمة على صدمته وفتح عيونه زي الحوتة المخنوقة وهوا مش فاهم شي
يتبع ……..
لقراءة الجزء التالي : الجزء الثالث من رواية حالة حب للكاتبة لوزة ليبية
لقراءة الجزء السابق : الجزء الأول من رواية حالة حب للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية
جميع الحقوق محفوظة للكاتبة لوزة ليبية .
