الجزء الثاني من رواية حبيبتي لا تنسيني

وفي الجزء الثاني هل تري من رأيك ستبدأ المفاجآت مع أبطال حكايتنا أم ان الوضع سيكون هاديء قليلاً لأننا في البداية ؟ كل هذا وأكثر سوف نعرفه في السطور التالية من الرواية .

الجزء الثاني من رواية حبيبتي لا تنسيني

وهنا ملاك فتحت المرش وشبحتله باش ترد عليه وتطلب منه المساعده واول ماقامت عينها وشفاته جتها صدمه وقالتله ….
ملاك …. هوا انت ؟؟؟
الولد …. ماتقوليلش انتى ؟؟
ملاك … انت لحقتنى من الجامعه قصدك ؟؟
الولد …. واتقه من نفسك والله … انى هدا حوشى .. انتى الا شن جابك هنا …
ملاك … وانى جايه لحوش اختى فرح …
الولد … اختك فرح ؟؟؟ اها اها هههههههه  عمرى ماتوقعت انا دنيا صغيره هكى … الباين كان مكتوبلنا انا نتلاقو توا وصبح … على عموم … انى متأسف جدااااا على الا صار صبح  …. وانى اسمى احمد ونكون سلف اختك 
ملاك …. انت سلف اختى ؟؟
احمد … اى علاش فى شى ؟؟
ملاك … لا لا لاشى .. اوك خلاص
احمد … خلاص انتى اركبى وهاتى المفاتيح منك وانى رح ندرسلك سيارتك ونجيبلك مفاتيح …
ملاك … شكراااا …. مش مشكله نستناك حتى هنا ..
احمد …. اووووك …
ركب احمد لسياره ودرسها وبعدين نزل ومدلها مفاتيح وقاللها …..
احمد … اى خدمه تانيه 
ملاك << وجهها احمر وابتسمتله وقالتله >> شكرا …
وخدت مفاتيح ومشت … بينما احمد قعد يشبحلها … وعيونه كلهم كانو يعبرو على اعجابه القوى بى ملاك ….
امها … اه واخيرا وصلتى … خيرك عطلتى ؟؟
ملاك …. هوا هدكا ياماما … وبعدين ولدك الفالح مجدى طلع هوا الا مزقها العجله … اليوم روحى وتفاهمى معاه لانى بجد تعبت منه ..
امها … نقصى صوتك ناس تسمع فيك .. توا مش وقته مواضيع هيا … برى هونى اختك تلقيها فى دارها مع صغارها … سلمى عليها وارجعى فيسع باش تحطى معاى العشى على نار …
ملاك … ماشى ماما ..
مشت ملاك لدار اختها واول مافتحت الباب وخشت وجت عينها فى عين اختها تطبتها وقعدو يبكو …
ملاك … معاش تبكى ياشفشه ربى عطاك احلى زوز ولاد زى عسل وانتى مازال تبكى ؟؟ اهو قتلك من توا كانا جبت بنات ولادك بيدبسو فيهم وبيتزوجوهم …
فرح << مسحت دموعها وقالتلها >> ههههههههه اكيد هما وين يلقوا حلى واحسن من بناتك  والله استاحشتك يا&*$ معقوله شهر ماتكلمنيش ؟؟
ملاك …. والله كنت امتحانات واليوم اخر يوم … بس اهو فضيتلك وبنربخ فى حوشك .. وبينى وبينك جايبه بيجامتى وبنبات 
فرح … خلاص انى نكلم امى تباتى معاى كل ليله 
ملاك … خيره نحس جوك مش اوى ؟؟؟
فرح … توا نقولك بعدين … بس انتى قوليلى شن هالابتسامه المشرقه هيا ؟؟
ملاك … هههههههه باينه ؟؟؟ توا نحكيلك حتى انى فى الليل  مهم بنمشى لامى توا .. بس قبل خلى نكبه على عسولاتى الزوز  ياوووووووخيتى عسل يهبلوووووو  مشالله تبارك الرحمن عليهم … شن سميتيهم ؟؟
فرح … مش عارفه محمد قالى انتى سميهم وانى لحد توا حايره …
ملاك … خلاص انى بنسميهم … اسمهم من اليوم  ايهم وقصى 
فرح … ههههههه خلاص تم …. 
ملاك … ياوووووخيتى محلاكم  هاتو بوسه امووووووه … بنمشى لماما لا احتمال لا نلحق نتزوج ولانجيب صغار ولا نسميهم بعد الضربه القاضيه الا بتعطيهالى توا كانا زدت تعطلت ..
فرح … ماشى خلاص برى هههههه 
ام ملاك وفرح …. ياملااااااااااااااااااااااااااك
ملاك … اها قتلك اسمعى اسمى كيف يلعلع من بعيد ههههههه
فرح … خلاص برى اطلعى وفى الليل لنا لقاء  
طلعت ملاك لدار وسكرتها وراها وبعدين مشت لامها بسرعه للمطيخ ..
امها .. سنه باش تكملى دوتك .. قتلك انى بروحى فى المطبخ …. بدلى حوايجك تعالى بسرعه عاونينى ..
ملاك … اوك نخش توليت بس 5 دقايق ونجيك …
امها .. ماتعطليش …
طلعت ملاك بسرعه للتوليت .. ولبست لبسه بسيطه عباره عن سروال جينز ازرق وتيشرت ميكى ابيض واحمر كم كامل وحطت وشاح احمر هادى على شعرها بطريقه عشوئيه وطلعت ومشت للمطبخ باش تعاون امها .
امها .. بسرعه اغسلى طواسى عالة شاهى وحطيهم قدام عزوزتها … وتعالى بسرعه ..
ملاك … ماشى ماما …
غسلت ملاك طاوسى العاله وورفعتهم وبعدين رجعت للمطبخ وهنا قالتلها امها ….
امها …. اسمعى نبعتك لصاله الا جنب اختك تجيبيلى قفطان حوش وتجى خمسه دقايق ؟؟
ملاك … لا لا ماما فوتى موضوع … انى سياره ماعرفتش ندرسها فى هالشارع المخنوق .. فكيف بنطلع بيها ونجى ..
امها … مالا كيف درتى ؟؟ خليتيها فى شارع ؟؟
ملاك … لا لا فى ولد خداها منى ودرسهالى …
امها … وووووووولد ؟؟ منى الولد يامنجهوهه ياعطيك مايجيك .. افرض قامها منك ؟؟
ملاك .. امى امى وووووه خيرك تتفرجى على الاكشن هلببببببه … الولد سلف اختى فرح .. خدها ودرسهالى لما لقانى حاصله ..
امها … << سكتت شوى بعدين قالتلها >> معاش نبيك تاخدى معاه وتعطى الولد حتى خير لا ..
ملاك .. تى شن ناخد ونعطى معاه .. هوا بارك الله فيه ساعدنى بس لما لقانى معاش عرفت ندرسها وبعدين علاش ؟؟
امها … الولد باين عليه ملعب ومتع بنات سمعت وحده من الاقارب هكى تقوول … واماليه شايفين روحهم بيه .. لدلك بعدى على مشاكل ..
ملاك .. اوووووف الا يسمعك يقول توا فى بينى وبينه شى … تى الولد حتى اسمه مانعرفه ..
امها … انى الاعندى قولتهولك ملاك .. انى بنروح ليله ومرات نخليك تباتى هنا جنبها وتعاونيهم صبح لدلك حاولى ماتشوفيشى حتى شوف … ياسرنا مشاكل مش ناقصين مع خوتك الولاد ..
ملاك … ماما خيرك تتكلمى هكى ؟؟ انتى تعرفى اصلا انى لا نبى نختلط ولا عندى على دوة الولاد ولانبى نتزوج ولا بالى فى دوه فارغه هيا .. فامش ظرورى الوصايا سبعه هيا …
امها … باه يافرحتى بيك حسك فرحتينى بنتى بتقعد جنبى وبتظفر شيب … خودى اغسلى معايين الا فى لودينو وامسحى صفر باش نحطو فيهم العشى … وبرى اسألى خالتك مهيبه << عزوزة فرح >> قوليلها طنجرة العصيدة الكبيره ومغرف تعصيد وينهم قالتلك امى …
ملاك … خلى نغسل معايين وبعدين نكلمها …
وقفت ملاك على الحوض وبدت تغسل فى معايين وبالها كان كله فى الشيت والاسئله ومنين بتقرا وكيف بتبدا وفى شن بتقسم وقتها لنهائى وماقطعش على تفكيرها الا صوت امها تقوللها …
امها .. خيرك يابنت وين عقلك ؟؟
ملاك … خيرك ماما خلعتينى ؟؟ شن فى ؟؟
امها .. سنه نكلم فيك ؟؟ المرأه خشت وتكلمت وانتى ولا هنا ..
ملاك .. شن فى ؟؟
امها … انزلى لوطه جنان من تالى تلقى دار خزين فيها طنجره وفيها مغرف هاتيه … وخودى طنجرة دهان هيا تلقى لوندينو بزعيها فيه وصبى فيها ميه وتديرلها تمصميصه باش مايقعدش دهان فيها …
ملاك … اوووووف يعنى لازم ماتكسريلى ظهرى ياماما بزعطيها هنا ..
امها .. هنا تنغلق مجارى اختك يادكيه .. صبيها فى لوندينو جنان لوطى حتى ينغلق هما يسرحوه لوطه … وجيبى الحاجات وتعالى .. ومش تموتى غادى ..
ملاك …. ماشى ماشى
نزلت ملاك وردت الباب ورها وطلعت للجنان وكانت العين شبه بدت تتظلم … يعنى وقت مغربيه … خشت لدار الخزين وخدت طنجره ومغرف .. وبعدين خدت طنجره بزعتها فى الحوض وفتحت عليها الشيشمه وخدت تلفونها واتصلت بى سمر …
ملاك .. الووووو
سمر .. ايوا يابلوه .. خيره نتصل بيك من بكرى ماترديش ؟
ملاك .. مش فاضيه يابلى ماهو قتلك بنمشى لحوش اختى .. بس غير اااااص وقوليلى من لقيت قووووولى بسرعه ههههه
سمر .. منى يعنى ؟؟ الرجل الغامض بسلامتو  
ملاك … اى والله الرجل الغامص بسلامتو هههههههههه …
سمر….. كدااااااااااااااااااااااابه .. قولى والله …
ملاك … قسما بالله مانكدب عليك …
سمر .. امتى وين كيف ؟؟؟؟ بسرعه ردى قوووووووووولى ….

ملاك …. اهدى يامهبوله اهدى .. انتى خليتلى فرصه نتكلم ….
سمر ….. اااااااه ياقلبى ااااه الانيق قصدك الجنتل مان ؟؟ الا غنت عليه سعاد حسنى << ياود ياتقيل ؟؟  وين لقيتيه ؟؟
ملاك … هههههههه طلع سلف اختى … لا والكارته كانا تشوفى كيف تلاقينا وكل واحد مصدوم ..
سمر … مازال بتشوقينى قصدك . احكيلى احكيلى وننننننننبى 
ملاك .. كنت نبى ندرس فى شارعهم بس زحمه ماقدرتش ندرس .. فا فجأه حد طق على مرشى وكلمنى .. وخلاص ههههه
سمر … ملاك اعطينى نعتت حوش اختك ونبى .. نبى نجى نبارك بس وراس صاحبتى 
ملاك ….. ههههههههههههههههه والله انتى مهبلوه لدرجه هادى معجبه بيه ؟؟
سمر … كيف طالع حلو ؟؟ شن لابس ؟؟ كيف ابتسملك ؟؟ شن قالك ؟؟ والله بنبكى .. انتى مش عارفه انا هالشخص فتى احلامى …
ملاك …. هههههه شوفى هوا بغض النظر انى مانحبش الولاد … ومانحبش نعطى رأى فيهم بس الحق الحق طالع طرف اغبر ههههههههه 
سمر … شن لابس قولللللليلى ؟؟
ملاك … مبردك انتى .. شنى شن لابس هادى .. عادى يعنى تيشرت وشورت …
سمر .. وشن تانى ؟؟
ملاك … هههههههههههه الباقى مالحقتش نشوفه الحق كان داسه ههههههه مبرررررررردك والله انتى وقحه باهى ..
سمر … باهى كانا شوفتيه بالله عليك مش لازم وجه الكاغط الاحرش تبينهوله .. يعنى ماتسكريهاش فى وجهى … بالك عن طريقك يصير نصيب ويكون ليا ههههههه 
ملاك .. اى حاضر يخى من اول مانشوفه رح نقوله على قولة نجوى كرم  خلينى شوفك بالليل .. الليل الا بعد الغروبى  مش عيب الملقى بالليل … الليل بيسترلى عيوووبى ررررررررا  هههههههه
سمر .. مصحك هادى انى بس نغنيهاله 
ملاك …. ههههههههههه باهى برى برى خلاص 
وفجأه وبينما ملاك تتكلم مع صاحبتها … سمعت صوت حد يبتسم بشوووى وهنا مع وجه مصدوم تلفتت وشبحت نص شبحه …
احمد … << معضحكه مكتومه >> احم احم .. اهلين       
وهنا ملاك من صدمه جمدت فى مكانها وماقدرتش حتى تتلفت .. والتلفون طاح منها فى طنجرة الميه …
احمد … تلفونك تلفونك مشى …. ومشى يجرى وطلع تلفون وقضه وقعد يمسح فيه .. وهيا تشبحله بس ..
احمد … اركبى فوق بسرعه وحطيه فى شكارة رز وخليه حتى ساعه بسرعه …
وهنا خدت تلفون من ايديه بتلكميسه وخدت طنجره ومغرف وسيباته ومشت بسرعه …
احمد … احم احم .. باهى يعنى مافيش شكرا … باهى وبالنسبه لموعدنا بعد مغرب شن صار فيه ؟؟
وهنا وقف ملاك وولى وجهها احمر وتلفتت وقالتله ..
ملاك … انت وقح وقليل ادب … وياريت مره الجايه تبطل تخدمنى اصلا لانى مش محتاجه … << ومشت وسيباته >>
وهنا احمد شاف لى تيشرته الا تلبز دهان وشبحلها ووتدكر كلامها مع صحابتها وضحك وخش للحوش باش يبدل حوايجه … بينما ملاك ركبت بسرعه فوق وهيا تتدكر وتتخايل انا سمع كل مكالمه …
ملاك …. ااااااااااااااااااااااااه لااااااااا ياربى لاااااااا … والله الاما يفضح بيا فى الجامعه … لااااااااا ياررررررربى .. هوا شن جيبه هنا بس .. الله لاتربحك ياسمر …
وفتحت الباب الفوقى وخشت للمطبخ …
امها … كيف كنت نازله بنادى عليك …. سنه لوطه ؟؟ شن كنتى تديرى ؟؟
ملاك … ونبى خلينى ترا ياامى … وانى نغسل فى طنجره طاح تلفونى فى طنجرة ميه … وانى مالقط حقه لين قريب روحى طلعت …
امها .. برى ابلطيه فى شكارة الرز هونى …. وقرضى سلاطه خلى نحط طنجرة العصيده على نار … لقيتى حد لوطه ؟؟
ملاك … لا لا مافى حد لوطه … باه ..
حطت ملاك تلفونها فى شكارة رز وفتحت تلاجه وخدت سلة الخضره وحطتها فى لوندينو وبدت تمصمص وتقرض وتبتسم زى مهبوله وتتدكر شن قالت … وكيف لقاته مبتسم … ولما راجعت تصرفاته تأكدت انه سمع مكالمه اكيييييد …
ملاك … اكييييييد سمعها والله انى غبيه ..
امها … من هوا نهارك اسود ؟؟
ملاك … تدكرت انى سميت لصاحبتى سمر اليوم وحسيت كأن دكتور سمعنى ..
امها … نهارك اسود .. انتى سميلها الحيط هاديكا وانتى اسقطى وهيا تنجح .. وخليها تدقن منك الاجوبه …
ملاك … هههههههههههه .. اى اى صح ياماما << وبالها فى شى تانى مره وحده >>
عصدو العصيده ووتو العشى وتعشو … وبعد ماتمت سهريه … باتت عزوزتها وحماوتها وشوى من معرفين فى دار العربيه … اما راجل فرح فابات مع خوه احمد وبوه فى مربوعه لوطيه .. وملاك باتت مع اختها فرح فى دار نوم فرح باش تعانى معها صغار فى الليل …
ملاك … ااااااه نهد حيلى من امك هادى 
فرح …. سامحينى حبيبتى  والله حاسه بيك من بكرى نشوف فيك متقطعه ..
ملاك … ولايهمك قداش عندى فروحه انى  بس قوليلى خيرك منكده ؟؟ شن فى ؟؟
فرح .. موضوع طووووويل ياملاك .. وقلبى مكسور منه …
ملاك << اتكت على سرير وقالتلها >> شن فى خيرك ؟؟ اول مره نشوفك هكى ؟؟
فرح …. تدكرى فى عرسى فى وحده قتيلى خيرها تشبحلك هكى لما جت سلمت علينا ؟؟؟ وهونى لما محمد خ شفى تدريجه انى وياه .. جت سلمت وباركتله بقفطانها حفله $# هادى وبدون حتى ماتستر نفسها ؟؟
ملاك … اى تدكرتها .. مرض يرفعها ان شالله .. خيرها ؟؟
فرح … هادى قصتها طويله … هادى كانت هيا ومحمد راجلى علاقه ويحبو بعض 5 سنين وهيا بنت خاله …
ملاك .. اها .. والله حسيت بيها واخده راحتها هالراحه مش فى سليم … باه …
فرح … مهم ولما تقدملها واحد مريش وعنيده واقفت عليه وفاتت احمد وتزوجت … وهوا لما دارت هكى اهله هونى شافوك فى العرس وجو تقدمو وهونى طلعت انى وهكى … مهم …من مده بعد ماتزوجنا سمعت بيها ببتطلق وحامل .. وكنت ندعى من ربى انها ماتتطلقش وتشد بلاها عليا … واتطلقت وهيا فى شهرها فى حمل .. وجابت ولد … وبعدها بى مده لاحظتها تتصل بى تلفون محمد … وهوا مايبيش يرد … وعرفت انها رجعت ترمل عليه … وفى يوم لما زودتها وبدت تتصل بيه بالمفضوح وتبعتله فى رسائل $#& وعلى اساس انه مش رح يقولى … مهم درت مشكله كبيره وحرشت فيها عزوزتى وحلفت لو مازال تكلم راجلى او تقرب جيهتنا الا مانقلب دنيا عليها … ومن بعدها خلاص جبدت روحها بعد ماكلمتها عزوزتى … بس اليوم نصدمت بيها فى مستشفى جايه تباركلى .. والا صدمنى عزوزتى قالتلى معليشى وبيضى نيتك وبنت فتحت صفحه جديده وجايه تباركلك ونست ماضى فاانسى حتى انتى وفى الاخير هادى بنت خاله وماتقدريش تقطعى العيله من بعض .. قصدى والله وجعنى خاطرى … انى والله مانبى نفرق العيله على بعض .. بس هيا واضحه انها راجعه لى محمد وتبيه يتزوجها وماعندهاش مشكله نوعيه هيا تسكن حتى لوطه مع عزوزتى … باهى قوليلى كيف نتصرف ؟؟ انى قبل مابيتش نقول لحد من حوشنا حتى انتى .. لانى مابيتش نكبر الموضوع .. بس والله والله لو رجعت عادى تمشى وتجى هنا لحوش عزوزتى وتركبلى وتدير روحها من عيله ونشوف اى حركه تديرها لمحمد .. والله ياانى ياهيا ..
ملاك … حبييتى اولا هدى روحك انتى نافس .. وتانى شى نبى ننصحك نصيحه .. مفروض مش انتى الا تاكلى بعضك عليها .. هيا مفروض الا تااااكل بعضها … فاخليك واتقه من نفسك وخلى راجلك ديما كاسبتيه وماتنقصى عليه شى .. وطالما انك مريحتيه فامستحيل رح يفكر يرجعلها … ويخى بالعكس لما تشوفيها جت هنا .. تكمى والبسى واجبدى شعر ومكيجى وتدلعى ولما تشوفى راجلك غيضيها وديرى قدامها الجو كله .. بس عمرك ماتديرى راسك برأسها وتعطيها قيمه اكبر منها وتحسسيها انك مكيوده منها … لانا هكى تصدق روحها …
فرح … صح كلامك والله … بس انى مش عارفه خيرنى المده هيا .. والله دموعى كل يوم ينزلو بدون سبب .. برغم انا محمد والله مامنقص عليا حاجه وحنين وطيب وغير شن تبى بس وحتى عزوزتى وحماوتى .. بس برغم هدا دموعى كل يوم على خدى …
ملاك … لا لا بالعكس .. معروفه اصلا مرأه حامل ديما تصيرلها هكى لانا يصير تغيير فى هرمونات .. وبعدين توا اكيد بيصيرلك سترس << ضغط >> على خاطر صغار واكتئاب مابعد الحمل وهكىى .. بس نصيحتى … حاولى تتجاوى همومك وخليها على ربى والله والله كل ماتقربتى لى ربى اكتر .. كل ماتلقى روحك ترتاحى اكتر  ..
فرح .. ماتتصوريش لما حكيت معاك قداش ارتحت  والله مانبدلك بالف صاحبه ف دنيا هيا  اى حق قوليلى شفتى ؟؟
ملاك … شنى شفت ؟؟
فرح …. هههههههههه من عيونك واضح شفتيه … كان واقف فى شارع لما انتى جيتى 
ملاك … منى قصدك ؟؟ سلفك ؟؟
فرح … هوا فى غيره ؟؟ ااااااااه ياملاك كان يكون من نصيبك بس  تعرفى الولد متقف ويهبل زى غزال  وهدكا اليوم يحكى لامه قاللها انى الا بناخدها رح نخليها تقرا وتخدم وتسوق وتلبس مهم فى حدود الاحترام والدين … وقال لى امه بنكمل حوشى ونبيك تدوريلى عروسه …
ملاك … هوا مواليد شنى ؟؟
فرح …. اعتقد مواليد 86 هوا اصغر من محمد بى سنتين …
ملاك … ان شالله تلقوله بنت الحلال يارب 
فرح … ان شالله تكونى من نصيبه يارب  لاش ندوروله هههههه .. اووووو بدى نق شكلهم جعانين … ترا خودى واحد هزى بيه وهاتيلى تانى ..
ملاك .. حاضر هيا … بسم الله 
فاتت الليله على ملاك وفرح بضحكها وتهدريزها وبرغم انا قعدو ماتطوفين لصبح فى تجغنين صغار الا انا فاتت هالليله عليهم بضحك بس  … وكالعاده مافاقتش ملاك الا على تلفونها يرن …
ملاك … نعم ياماما صباح الخير ..
امها .. قاعده مانوضتيش ؟ ساعه 9 يانهارك الاسود والناس اكيد يستنو فيك باش تنوضى توتى فطور نوضى بسرعه …
ملاك .. اهو نضت خلاص … والله ياماما امس رقدت ساعه 5 فجر … خلاص سكرى خلى نوض .. سلام …
وهنا تلفتت ملاك لقت فرح نايضه قبلها ومابتش تنوضها وتخلعها … فاناضت بسرعه ومشت للمطبخ وهنا لقت توتى فى صفره …
ملاك … سامحينى والله مشت عليا نومه … خلى كل شى وارجعى ارتاحى … رح نوتى كل شى انى ..
فرح … لا لا عادى انتى امس سهرتى معاى .. وانى خلاص كملت …
ملاك …. نخش للتوليت بس ونجى 
فرح …. اوك …
خشت ملاك لتوليت .. نظفت سونها وغسلت وجهها ورتبت شعرها ورجعت للمطبخ … واول ماخشت للمطبخ قالتلها فرح …
فرح … ملاك حبيبتى ونبى فى أكل فاضل من امس ممكن تحطيه فى جنان الخلفى فوق الرخامه .. باش يلقه احمد ويصبه لكلبه بعدين …
ملاك .. هوا انتم عندكم كلب ؟؟
فرح .. اى احمد جابه معاه لما روح ..
ملاك … متاكده الكلب مش موجود ؟؟
فرح … لا لا مربوط ..
ملاك .. اوك دقيقه بس نجيب وشاحى …
حطت ملاك وشاحها على رأسها وخدت مأكله ونزلت لوطه .. وفتحت الباب وطلعت للجنان … ووأول ماوصلت للرخامه الا قالتلها عليها سمعت باب القدامى الا طلعت منه تسكر …
ملاك … اوووووووف يارررررربى … الباب تسكر توا شن الحل ؟؟ زعمك الباب الخلفى مفتوح ؟؟ نشوفه وخلاص ..
وكيف مشت باش تشوف الباب الخلفى بالك مفتوح .. وبدون مقدمات قامت عيونها ولقت قدامها … حاجه طويله عريضه وباختصار وحش طوله زى حمار ومايبانش من وجهه الا خدوده الكبار ويشبحلها شبحة سم ويدغمر فيها  …
ملاك … اااااااااااااااااااااااااااااااااااااااااااااااااااااااااااااااااااااااااااااااااااااااااااااااااااه … كلب …. يامااااااااااااااااااااااااااااااااااااااااااااااااااااااااااااااااااااااااامااااااااااااااااااااااااااااااااااااااااااااااااااااااااااااا
وشبشبها فى الهواء وشدتها الخط هيا وكلب …. وتقريبا فى دقيقه الواحد دارت هيا وياه 20 لفه … ومافاقتش على روحها الا على طلوع احمد قدامها … وفجأه ومن غير اى مقدمات كرشت فى رقبته وغمضت عيونها   

يتبع  

لقراءة الجزء التالي : الجزء الثالث من رواية حبيبتي لا تنسيني

لقراءة الجزء السابق : الجزء الأول من رواية حبيبتي لا تنسيني

للإطلاع علي فهرس اجزاء الرواية : جميع أجزاء رواية حبيبتي لا تنسيني كاملة للكاتبة كيندا

جميع الحقوق محفوظة للكاتبة كيندا من ليبيا .