الجزء الثاني من رواية حنين الماضي للكاتبة لوزة ليبية

تبدأ احداث الرواية بالإتضاح قليلاً حيث نبدأ بمعرفة بعض الملامح أكثر عن الشخصيات وتعاملهم مع بعضهم البعض، لكن من رأيك ماذا سيحدث ضمن السطور القادمة ضمن الاحداث ؟ هل سيبرز دور شخصية علي الاخري أم سيحدث شيء مفاجيء غير متوقع ؟ كل هذا سنعرفه فلا تستعجل .

الجزء الثاني من رواية حنين الماضي للكاتبة لوزة ليبية

عبدالرحيم قرن حواجبه وقال لعقيل :شنو معاكسها واﻻ جيت جيهتها ؟؟؟
عقيل:تي شن تهدرز انت هادي بنت سيدي كنك ياراجل وكيف هكي ترتبط بيها عﻻقة ؟؟؟
عبدو اتلكمس وقال:غير هدي اعصابك وافهمني بس .. كﻻم هكي من تريس ل تريس انا والله مانلعب عليها ورايدها بالحﻻل يشهد عليا ربي غير الوالدة تعبانة بس كنهدا راني جيت وتقدمتلها
عقيل:اها هكي تمام … انا عارفك شاب كويس ياعبدالرحيم ولو اني زابطك متع وجيج فاضي كنت عرفت شغلي معاك … و الحق سالمة بنت كويسة تستاهلو بعضكن ماﻻخير
عبدالرحيم:الحمد لله انك فهمتني
عقيل:عيب ياراجل شن تحسابني مانفهم ف اﻻمور هذينا
عبدالرحيم:ﻻ مش هكي بس قلت بالك يقول بنت عمي وكيف يكلمها وجو هدا
عقيل:ﻻ انت قتلي رايدها بالحﻻل
ولو ماكات قد كلمته نعرفو كيف. نتفاهمو معاك  وتو نستأذنك يابو النسيب
عبد الرحيم :خود رقمي ياعقيل
غير انا نقالي فاصل شحن
عقيل: وانا نقالي مش معاي ههههه خود رقمي مانحفطش ف اﻻرقام عندي عقدة منهن ههههه
عبد الرحيم: هههه هدا غير محاسب قول هي
عقيل:**09263606
عبدالرحيم:تم وين ماشي تو
عقيل :توا بوجهي للمطار عندي سفرة لتركيا..
عبدالرحيم :توصل بالسﻻمة

نادية نزلت من اللعبة
سلمى ل نادية:حي عليا والله كان عقيل قال ل بابا والله يدبحني من غير قبلة
نادية:عليك عملة
سلمى:خيره نقاله خارج تغطية عبدو اسمعي بري غطي عليا بنمشي نكلم عبدو وكان سألوك قولهم مشت تشري حلوة صوف
نادية:باهي ردي بالك
مشت سالمة خطوات للقدام وقعدت تمشي وتتمرعش وتمشي وتتلفت لين قريب انضبت ف راجل فجبدها عبدو
عبدو:خيرك تمشي من غير عيون قريب خشيتي ف الراجل
سلمى:خايفة بابا واﻻ ماما يشوفوني..حق شفت ولد عمي واقف عليك تعرفه؟؟
عبدو:ايه نعرفه من مدة عرفتنا الظروف
سلمى:قصدي بيقول لبابا
عبدو:ﻻﻻ شن تحسابيه عيل اماﻻ
سلمى:اوووف ريحتني والله قلبي طاح
عبدو:حبيبي ولي بحدا عيلتك ومعش تمشي بروحك هكي
سلمى:اوكي بيبي
رجعت سلمى بحدا عيلتها ولعبو وكملو ….

عبدو ل مهند:وهدا اللي صار يا مهند وبعدها معش سمعت عليها شي
مهند:ااها بالك عقيل دارها من وراك وكلم عمه وقاله
عبدو:ماعتقدش عقيل تريس مايديرش لقطات المفرخ
مهند: جرب اتصل بيه عقيل
عبدو: رقمه ماحفظتش منه غير 636 بس 
مهند:مطربقة من كل جيهة ها بنروح انا…. شنو نخطمو ع ضيافة ناخدونا سكالوب
عبدو:ﻻﻻ بنحطك ف الحوش وبنمشي ندور عليها
مهند:وين بدور …
عبدو:ندور وخﻻص

الساعة 10 مساء ..مستشفى الطبي يوم الخميس..
الخالة زهرة:السﻻم عليكم
ندى تبكي:وعليكم السﻻم
خ زهرة:شن صار فاقت ؟؟
ندى:ﻻﻻ قاعدة ف الغيبوبة نحساب يومين واﻻ تﻻتة وتفيق اهو احنا ف الخامس
خ زهرة:ﻻ حول وﻻ قوة اﻻ بالله مسكينة والله خايفة عليها شن بنقولها من اول ماتفيق عيلتك كلها توفت ف الحادث ؟؟؟
ندى:اسكتي ياماما قالو اللي ف الغيبوبة يسمع
خ زهرة:والله وجعتني وخيتي امنة ووووك عليا رحتي وخليتيني ياامنة ياكبدي هيييه قريب نهبل ووووك عليا مشو كلهم مع بعضهم ياحسرتي ونادية ياناري وحسن و حسين مساكين مالقو مايلمو فيهم كلهم سحنتهم هديكا الطانطا حسبي الله ونعم الوكيل فيه
ندى تبكي :وووك عليا معش تزيديني ماما والله خﻻص كبيدتي انمرجت ……مسكينة خ امنة ياما وقفت جنبي ونادية وجعتني كانت بتجي تبات عندنا الجمعة وراجل خالتي الطيب وحسن وحسين ووووك …. صدقتي ماما والله شن بنقولولها وقت اتفيق كيف بتتقبل هالصدمة
خ زهرة:ربي يصبرنا وان شاء الله ربي يرحمهم كلهم….مسحت دموعها وقالت:
حيه نسيت شنطتي ف الحوش بنمشي نجيبها شنو بتروحي ندى واﻻ بتقعدي
ندى:ﻻﻻ خليني بري عالسريع وتعالي
خ زهرة:به
طلعت خ زهرة وركبت سيارتها ومشت
على وصلت عقيل درس سيارته وخش لطبي
وقف الريسبشن
عقيل:بالله خونا وين غرفة سلمى صالح
الشاب:زيارة ممنوعة توا
عقيل:نا من طرف خالد العاتي
الشاب:اوكي الغرفة تلقاها ف دور التاني تالت غرفة ع اليمين
ركب عقيل وخش غرفة ولقي ندى تبكي
طق طق السﻻم عليكم
ندى تبكي:وعليكم السﻻم … عقيييييييييل
عقيل:الصبر ياندى الصبر الله غالب كلنا ليها
ندى خشت ف حضن عقيل وهيا تبكي
عقيل حط ايديه ع خصرها وقالها:خﻻص ندوش الله غالب الصبر على قضاء الله
ومعش قدر عقيل ايشد دمعته وقعد يبكي وهيا تبكي
عقيل:خﻻص ندوش بالله عليك امسحي دموعك ماترعشيش روحك خﻻص بيبي
ندى:ياااااه قداش ماستحشتها الكلمة هادي نحسابك حتى نسيتني
عقيل:حد ينسى روحه وعقله وعيونه
خﻻص يﻻ ارخيني خير مايخشو علينا ممرضاات يفهمونا غلط
ندى طلعت من حضنه وقتله والله واجعتني سلمى مسكينة
عقيل:شنو قاعدة ف الغيبوبة ؟
ندى:ايه .. ليها خمس ايام…. امتى وصلت انت
عقيل:توا قبل شوي وصلت مطار بنينا جاني مسج من مازن خوي عاودتله فخبرني ان سلمى عايشة وقاعدة ف الطبي فجيت هنا طول
ندى:حمد لله ع سﻻمتك
عقيل:الله يسلمك … تعرفي برغم ان ف حالة حزن اﻻ ان شوفتك اتهون عليا
ندى:حتى انا فرحت بشوفتك
عقيل:لكن زعﻻن منك بجديات ع اخر موقف صار
ندى:مش مني حبيبي انت عارف بابا رفضك ﻻن مايبينيش نمشي الشرق بس اهو ماما قاعدة تحاول تقنع فيه
عقيل:تحكي جديات ؟
ندى:ايييه بس وحتى ولو بابا رفض معقولة تنقطع عليا 3 شهور ؟؟
عقيل:انجرحت من كﻻم بوك وقعدت نحاول كل يوم نبي ننساك بس ماقدرت؟؟
ندى:حبيبي
عقيل: والله زاد فيا النص بعد سمعت كلمة هدي …
ندى:ههههه
عقيل:حتى انا انحبك ياعويناتي.. هاتي حبيبا((ببوسة))
ندى:هههههه اكيد ﻻ بعد مانتجوزو تو نعطيك …اسمع ماما جت نشوف فيها من بداية الممر

بعد شوي خشت خ زهرة … السﻻم عليكم
عقيل:وعليكم السﻻم …
خ زهرة:ياسﻻااام عقيل اهنا وانا نقول خيرها ندى مبتسمة سنونها 32 سن باينة ﻻن وقت خليتها كانت قاتلة روحها بكي وتوا نحسابها فرحانة اني جيت هههه وهيا تاريتها هههه
ندى::هههه اكيد فرحانة بيك ماما
خ زهرة:اسكتي يابلعوطة كان تلقيني زدت طولت ف الحوش شوية …. كيف حالك عقيل
عقيل:اهو ماشية عظم الله اجرك ف خ امنه
خ زهرة:لنا ولكم اﻻجر … وعظم الله اجركم ف عمك والعيلة كلها
امتى جيت اماﻻ
عقيل:اليوم بس
خ زهرة:حمد لله ع سﻻمة … شنو مشيت لبوك وخوتك ف الحوش
عقيل:ﻻ من اول ماخشيت طرابلس جيت هنا
خ زهرة:اماﻻ امشي توا روح و ارتاح وغدوة تعال
عقيل:ان شاء الله ماتوصي بشي ؟؟ خ زهرة:ﻻﻻ سﻻمتك
عقيل:اوكين تمسن ع خير سﻻم تو
طلع عقيل من باب الغرفة
ندى ل خ زهرة:حي نسيت نقوله حاجة
خ زهرة:كدابة ماشية بتتمعشقي ف الممر ياكلبة
ندى:ﻻﻻ بجديات شوية ماما بس بالله عليك
خ زهرة:باهي بري وماتعطليش.
طلعت ندى للممر وتنادي عقيل عقيل
عقيل تلفتلها:نعم نعم
ندى قربت منه وقتله:انحبك عقيل
عقيل:خدي ايدها وباسها وقاله:ينعلي منك نموت فيكي ياسمحة بس تو هدا وقته نحنا ف حالة وفاة يالهبلة
ندى:عارفة بس مش قادرة نبعد عنك
عقيل:وﻻ انا ياعمري … شدها من خصرها وقربها ليه بقوة
ندى:يامجنون والله كان يشوفنا حد توا يديرنا مشكلة
عقيل:اللي يبي ايبحث ايبحث واحد وحبيبته وبتولي خطيبته شن يبن فينا هاتي حبيبا هاتي
ندى:عقيل ماما ماما شافتنا
رخاها عقيل وتلفت يمين ويسار
ندى:هههههه ضحكت علييييك
عقيل:باهي يالمكارة ياشينة تو انوريك … يﻻ عدي جوا حدا امك خلي نروح انا لحوش سيدي… باتي وخوتي يستنو فيا غادي
ندى:اوكي رد بالك ع روحك … سﻻم
نزل عقيل من دروج وركب سيارته
ومشي لحوش عمه اللي هوا بو سلمى وطق طق فتحتله اخته سوسن وهي تبكي
سلم عليها وباسلها راسها وقاله: الله غالب وخيتي كلنا ليها
لقي عقيل بوه مقعمز ومهموم سلم عليه … وحكي معاه شوي
وخش لحمام خدي دوش عالسريع وطلع..
عقيل ل خوه مازن:كيف قادرين تباتو هنا والعيلة كلها متوفية والله لحمي كله ناض شوك شوك لم ناخد ف دوش
مازن:كيف بنديرو وين بنعدو مافيش اﻻ اهنا
بو عقيل:عديت لمستشفى ..
عقيل:اي ياباتي ولقيت خ زهرة وبنتها غادي
بو عقيل:اي اﻻربع ايام اللي فاتن قعد مازن واختك سوسن مع سلمى لين كملت خالتها العزاء وجت خدت مكانهن بارك الله فيها داراته ف بيتها العزاء
عقيل:اهااااا والله انا انفجعت وصلت مطار بنينا حطيت شفرتي وصلني رسالة من مازن مكتوب فيها من اول ماتوصل لبنغازي اطلع طول لطرابلس عيت سيدك صارلهم حادث وتوفو
بو عقيل:قتلك انا مش وقت سفرك لتركيا
عقيل:الله غالب شغل ياباتي المهم ماتهمش روحك بس.. ماتنسش عندك القلب معش تفكر واجد
بو عقيل:يستر الله
عقيل:هو الستار حق كيف صار الحادث .؟
مازن :تعال تو نحكيلك نا خلي باتك يتريح
عقيل:اوكين هاني جاي … تتمسى ع خير ياباتي
……..

عبد الرحيم خلوقه ف تل روح ومش عارف شي ع سلمى
خش داره قعمز شوي ويتكلم بصوت واضح … وين مشيتي ياسلمى عيب عليك مشيتي وخليتيني باهي قلتي معش نبيك اهون من انك تختفي هكي زعما انتقلو حوش تاني وتجوزت لكن ﻻﻻ ماديرهاش باهي وينها ويييين ….وقام المزهرية وكسرها على الحيط وحدف تلفونه على روشن فتكسر المرش
امه سمعت دوشة جاته تجري خشت لدار
خ سميرة:خيرك سمله شن فيه
عبدو:ااااااااااه يمى اااااه مضايق وقريب نموت
خ سميرة:سمله شن فيه فضفضلي انا امك
اتكى عبدو على كتف امه وقالها :البنت اللي حكيتلك عليها اللي بنخطبوها
خ سميرة:ايه ايه خيرها
عبدو:معش لقيتها يمى
خ سميرة:كيف معش لقيتها بش تعرف حوشهم
عبدو:ايه نعرفه
خ سميرة :خﻻص اماﻻ
عبدو:خشو ناس تانيين وفتحو بمفتاح
خ سميرة :قصدك باعو حوشهم؟
عبدو:مش عارف يمى مش عارف
خ سميرة:باهي غير انت اصبر توا لين يولي حالي باهي السكر قاعد راقي وبمجرد مانبرا تو نمشي لحوشهم ونفهم شن موضوع
عبدو:ان شاء الله

يتبع …….

لقراءة الجزء التالي : الجزء الثالث من رواية حنين الماضي للكاتبة لوزة ليبية

لقراءة الجزء السابق : الجزء الأول من رواية حنين الماضي للكاتبة لوزة ليبية

للإطلاع علي فهرس الاجزاء كاملة : جميع اجزاء رواية حنين الماضي للكاتبة لوزة ليبية

جميع الحقوق محفوظة للكاتبة لوزة ليبية .