الجزء الثاني من رواية طبيبة قلبي

وفي الجزء الثاني من رواية طبيبة قلبي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة اسماء محمد .

الجزء الثاني من رواية طبيبة قلبي

صحيت الصباح صبحتا علي ناس أمي وشربتا معاهم الشاي وعلي المستشفى لنفس الروتين وصلتا وسلمتا علي الدكاترة اللاقيتهم وعمال النضافة والطاقم الطبي المهم يعني أي زول بلقاهو من الصباح وأنا ماشي علي محلي كالعادة بسلم عليهو دخلتا وفي إنتظار أول مريض واللليلة اليوم معظمو مقابلات للمرضى ، مريض ورا مريض و حالتهم إتحسنت بكتييير من المرة الفاتت ومعظمهم عملتا ليهم عملية كان وفي الكان ما قادر يمشي او يركزمن الألم وفي الكان شايلنو والليلة جاء ماشي برجلينو ومبسوط والإبتسامة في وشو ونظرات الحب والإمتنان والحب من أهلو لي وفي البجيب لي هدية معاهو نسبة لإنو دي آخر مقابلة ليهو معاي ودخل حاليا عبودي(عبد الرحمن) مريضي المتابع معاهو طفل عمرو 8 سنوات حصل معاهو حادث كان والحمدلله بعد عملتين عملتهم ليهو واحدة في الرأس والتانية في الرجل إتحسن وجسمو شدا حبة لأنو عمرو صغير جاء داخل جاري سابق أبوهو قال لي عموووو دكتور أنور وجاء سلم علي وأبوهو الجاء بضحك وراهو قال لي كيفك يا دكتور أنور ، بعد سلمتا عليهوقلتا ليهو الحمدلله يا عم أحمد إنتا كيفك قال لي تمام يا ولدي كيف ما أكون كويس وشوف عبودي بقى يأكل و يجري عديل ماشاء الله قلتا ليهو الحمدلله علي سلامتو (قعد في الكرسي الجمب الطاولة قصادي وعبودي في التاني) قلتا ليهو أها يا بطل الليلة بقيت كيف؟ وشاعر بشنو هسا؟
قال لي يا عمو دكتور …قلتا ليهو مش قلتا ليك قول لي عمو أنور بس قال لي طيب يا عمو أنور شوف رجلي بقت قوية كيف؟ وجاء جمبي كان لابس شورت جينز رفعو فوق ركبتو قال لي شوف ركبتي بقت كويسة وما بتوجعني (وبقى يحركها يوديها قدام ويرجعها لوراء) ضحكتا وقلتا ليهو يا سلام عليك يااخ ، ، وكان لابس كاب طلعو من رأسو وقال لي وشوف رأسي محل العملية لمن بقى مافي وشعري تاني داير يقوم فيهو ، ، بعد إتفحصتو كويس كدا قلتا ليهو إنتا عشان بطل وبتسمع الكلام وأخدتا كل الأدوية في وقتها لحدي بقيت كويس حأديك هدية ، قال لي بفرحة صاح!؟؟ ، قلتا ليهو أيوا قال لي شكرا يا عمو أنور ، وفعلا فتحتا الدرج القدامي وكنتا أصلا مجهز ليهو هدية من المرة الفاتت عشان وعدتو حأديها ليهو بعد يبقى كويس ، فرح شديد وقال لأبوهو شوف يا بابا حأفتحها في البيت
أبوهو كان مبتسم وقال ليهو خلاص يا ولدي وقال لي أها يا دكتور!؟
__ملامح جدية___
هو تمام هسا الحمدلله بس نعمل ليهو الصور النهائية دي عشان نطمن للنهاية وبإذن الله دي حتكون آخر مقابلة وكتبتا ليهو ورقة أديتو ، ليها قال لي جزاك الله خير يا دكتور ربنا يقويك ويوفقك ياارب و…. قاطعتو وقلتا ليهو دا الواجب يا عمي تسلم كتير وطلع فات يعمل ليهو الفحوصات
بعد فترة جاء سلمني الفحوصات وكانت كلها سليمة ونضيفة بعد فترة طالت شهر كامل من المقابلات والأدوية لعبودي دا غير الإسبوعين الكان مرقد فيهم في المستشفى وكنتا مسرف علي حالتو ،،،،،،، قلتا ليهو هسا حاليا كل الأدوية حنوقفها منو خلاص وأنا هسا مسافر فترة شهرين كدا لكن لو في أي حاجة بتابع معاكم بالتلفون إطمن يا عم ، قال لي مطمن يا ولدي نحنا كنا وين وبقينا وين !! مشكور كتير والله يا دكتور ما عارفين نرد ليك الجميل دا كيف ،،،،، عبودي كان بعاين بتركيز لمجسم في المكتب بالطرف كدا لجسم الإنسان قال لي عمو أنور أدونا في المدرسة الدورة الدموية الكبرى والصغرى البتوصل الأكسجين للجسم ، لكن الأستاذة حقتنا الجديدة قالت لينا الدم بصل للجسم كلو ما عدا تلاتة محلات ورتنا ليها لكن أنا نسيتها صاح!؟؟
، ، ، قلتا ليهو بتفاجؤ أيوا صاح ، ، ، قال لي هي شنو؟؟
قلتا ليهو أولا ، ، ، ،
__ قرنيةالعين__ ودي البنشوف بيها يعني الجزء الأسود الدم ما بصلها عشان الأكسجين البتحتاج ليهو بتحصل عليهو من الهواء الخارجي البلامس العين ، ، ، وتاني
__الشعر ___مش بتعرف بصيلة الشعر ؟ ، قال لي ااي ، قلتا ليهو يلا هي موجودة في داخل جيب في البشرة وبتتغذى بالدم لكن ساق الشعرة مستحيل الدم يصلها بقولوا عليها خلايا كيراتينية ميتة
قال لي ااي الأستاذة قالت لينا لو الشعرة كانت بتتغذى بالدم والأعصاب ما كان بنقدر نقص شعرنا ونشكلو
وإتذكرتا تالت واحدة ___الأظافر __الدم ما بصلها عشان برضو هي خلايا كرتونية ميتة بتنشأ من البشرة بتحمى نهاية الأصابع صاح
قعدتا أضحك وأبوهو برضو قلتا ليهو إسمها خلايا كيراتينية ميتة

قال لي انا بعد أكبر داير أبقى دكتور زيك وأعالج الناس قلتا ليهو بإذن الله طوالي تبقى دكتور ، ، ، ، المهم بعديها طلعو فاتو
___________________________________________
******
1__لازم ننفذ كل الخططنا ليهو دا وما نخليهو يضيع علي الفاضي أبدا وحنلقى الزول المناسب أكييد وقريبا كمان

2__من الناحية دي ما تقلقو لأنو في مفاجأة حارساكمإنتا فاهمنا يا جون صاح!؟

3__Yes , Yes , Ok
___________________________________________

قريب للمغرب طلعتا تميت باقي إجراءات سفري أصلا هي جاهزة ورجعتا البيت رتبتا شنطتي والقعدة المسائية مع ناس أبوي وأمي وحبوبة والصباح أصريت إني أمشي براي ماف داعي ناس أمي يمشو معاي لحدي المطار وكالعادة وصايا أمي وحبوبة والدعوات ربنا يغطي عليك ويحميك و….. ودعتهم وطلعتا وكنتا متصل لصحبي يوسف عشان حيرجع لي العربية البيت إتلاقيت معاهو وبعد نص ساعة كدا موعد مغادرة الطيارة وعلي الهند ، ، ،
وإبتدت الرحلة لحدي حصلتا لقيت أيمن منتظرني أووو دكتور أنور وموال السلام الطويل وبعديها مشيت معاهو لأنو لمن جينا هنا كنا قاعدين سوا في السكن عملنا برنامج أكل وسهرة ظريفة وونسة وبعدين حتى نمنا ، ، ، والصباح مشينا طوالي علي المستشفى (كانت كبيرة وفيها كل الأجهزة البنحتاجها وأقسام كتيرة ، حوادث، بصريات ، قلب،……….الخ ، ، وأيمن صاحبي دا كان ماسك قسم العظام ومعاهو دكتورين هنود) لمن وصلنا كان حارسنا دكتور وليام رحب بي وكل الطاقم المعاهو وبدينا…….

يتبع ………

لقراءة الجزء التالي : الجزء الثالث من رواية طبيبة قلبي

لقراءة الجزء السابق : الجزء الأول من رواية طبيبة قلبي

للإطلاع علي فهرس اجزاء الرواية : رواية طبيبة قلبي ( جميع الاجزاء كاملة ) للكاتبة اسماء محمد

جميع الحقوق محفوظة للكاتبة اسماء محمد .