الجزء
الجزء الحادي عشر من رواية قلبي ملكي ولكن أنت من
الجزء الحادي عشر من رواية قلبي ملكي ولكن أنت من
وفي الجزء الحادي عشر من الرواية الليبية الجميلة رواية قلبي ملكي ولكن أنت من للكاتبة الموهوبة كيندا دعونا نري ماذا سيحدث مع أبطال الرواية وهل سنري حدوث مواقف مفاجئة معهم يا تري أم ستسير الأمور بشكل طبيعي ؟ كل هذا وأكثر سوف نعرفه سوياً في السطور التالية بإذن الله .
الجزء الحادي عشر من رواية قلبي ملكي ولكن أنت من
وهنا مالقتش نفسها ريحانا الا فتحت الباب وقربت منه وقعدة تشبحله شوي وهوا مصدوم وبعدين قالتله …
ريحانا … (( بوجه متغصب وملامح مصدومه )) اخر شي كنت نتوقع انك ممكن تديرها …
ليت … استني … اعطيني فرصه نشرحلك … ريحااااااانا استني …
ريحانا ….(( عيونها معبيات دموع )) انت كنت مخطط ومنفد انت وصديقك كل شي … شن نستني بزبط .. يجي صديقك في وسطنا هنا في دار وخلاص … اصلا لو انت رااااجل ماتخليش صديقك يعرف ااااي شي علي حياتك الخاصه …
وفي اللحظه هيا قرب منها ومدلها كف ريحاي وقاللها …
ليت … اخر مره نسمحلك فيها تنطقي كلمة مش راجل فهمتتتتتي …
وهنا دموع بدو يصبو من عيونها وقالتله …
ريحانا … طلقني ليت … اني معاش طايقه نسمع او نقعد معاك لحظه … طلقني تواااا واني الا نطلب فيها منك ..وهنا ليت قعد يشبحلها وبعدين عض علي شاربه بعصبيه ومشي وسيبها …
وطلع وسيب شقه … واول مانزل وامه شافاته قعدة تنادي فيه وتقول …
مريم … ليت … ليييييت … خيره الولد هوا انطرش ولا شني ..لاحول ولاقوة الا بالله … ملاااااك ملااااااك … بري شوفي مرة خوك خيرها عطلت فوق مش قولتيلي ركبت شوي وبتنزل … خيرها عطلت قولها انزلي وانتي معاها وقت علي الفطور …
ملاك … لحظه بس … توا نتصل بيها طول لاش اني نركبلها ونشحط روحي .
وغسلت ايدها من عجينه ووخدت تلفونها واتصلت بي ريحانا … واول مابدي يضبح … شافت ريحانا لتلفونها شوي وبعدي مسحت دموعها وفتحت الخط وقالت …
ريحانا … ايوا حبيبتي … شوي ونازاله بس غير ليت قبل مايطلع طلب مني حاجه ودرتهاله … تمام ..ّ اهو نازاله توا …. وطلعت من دار … ومشت للحمام غسلت وجهها كويس وواست وشاحها ونزلت … للمطبخ ولا كأن في شي …
وكملو العشي … ووتو كل شي … وقالت لملاك …
ريحانا … ملاك احنا كملنا خلاص واني مخنوقه شوي بنطلع نقعمز في جنان شوي نشم الهوا …
ملاك … تمام حبيبتي … حتي اني بنخش نهدرز داخل مع حناي … شمي هواك وتعالي ههههه …
ريحانا … ماشي ههههه .
وطلعت ريحانا قعمزة جنب الغرس وتحديدا بجانب الورد العربي مزروع في جيهه من جنان متعهم .. وقعدة تتلمس فيهم وسرحانه … لحد ماحست حاجه قريبه منها فاتلفتت … وانصدمت لما لقت ليت مقعمز وراها … وهنا قاللها …
ليت … (( بنظرة حب )) … ماشفتش ورد يلمس في ورد … بس تصوري انتي احلي منها … (( مع ابتسامة لؤم )) .
واول ماجت بتنوض شدها من ايدها بالقوه ردها مقعمزه ولاصقه فيه … فا بعدت عليه علي طول .. ولكن هوا ماخلالهاش فرصه وزاد في جنبها وقاللها …
ليت (( بغمزة عين )) .. حتي عيب راهو .. شن يقولو علينا عرسان وبيناتهم متر ريحانا … (( شبحتله مع مدة وجه مترين )) … يقولو رمضان كريم … وبعدين كانك اتجاهلت طلبي ليك مبكري .
ليت … ههههه ماسمعتش طلبك اصلاااا …. اي ورددددي بالك تقولي مش راجل .. لتشوفي تصرف انتي مش قده هههه وبعدين ديري روحك اغمي عليك …
ريحانا … انت قليل ادب تعرف … وببببعد … (( وبعدة عليه )) . بس هوا رد طول وقاللها ..
ليت …. اااااايه وفينا علي الغلط … قولنا غلط لا (( مع تفنيصة عين تخوف وبعدها ضحكه بريئه وقاللها )) … ومانبيش مبعد … وماتعبيش نفسك وتبعدي لانك تبعيده تانيه بتلقي روحك وصلتي للباب خلاص ههه ..
ريحانا … (( مع تأفأيفه )) .. شن مطلوب ليت مني تاني … عندك حد تاني حابب تحكيلها قصتنا .. بالك يعطيك افكار احلي …
ليت … انتي نكديه تصووووري … انتي متااااال للمرأه الليبيه النكديه … بس برغم هدا اني مازالت صااابر … لاني غالط وحقك علي راسي ..
ريحانا … يعني ؟
ليت … (( بعيون يلمعو مع نظرة عطف )) .. اني اسف بجد … اني والله مش قصدي بي انتي تعصبي فيا وتطلعي فيا علي هدوائي .. ومن نصيبك السئ انك تقولي في الكلمات الا اني مستحيل نتهاون فيها زي كلمتك مبكري … بس برغم هدا اني غالط وماكانش في داعي لمدت الايد .. بس اني ندل وتافه وسكرجي ونسونجي .. شن قولتي انتي مره الا فاتت دكريني ؟
ريحانا … هههه (( ضحكة استهزاء)) علي شني ليت اني اسف .. علي انك دمرتلي حياتي ولا انك عطيتي لقب المطلقه بعد شهر ولا انك خطط ونفدت انت وصحابك وحركتوني زي الشطرنج مجبررره ولا لااانك مديت ايدك عليا واحنا ماسكرناش شهر مع بعض …
ليت … اسف علي كل شي … ماكنتش نبي هكي يصير … بس والله اني لقيت نفسي زيك مجبر واهلي هما الل حطوني في موقف هوا … واني كنت معاك صريح من اول يوم …
ريحانا … اي صح كنت صريح وقولتلي راهو اني وصحابي كنت مخطط لكل اللعبه الا بتلعبها علي مني .. علي بنت عمك .. انت بس كيف رضيتها لروحك ..
ليت … والله ماصارت هكي ولا لعبه ولا شي … اتصل بيا عرف اني مضايق وحكيتله ان اهلي فارضين عليا نتزوج بااختيارهم وهوا عارفني اني نحب لارا … وهوا مجرد بس قدملي نصيحه وقالي ماتخسرش اهلك وفي نفس الوقت خلي صريح معاها وفهمها موقفك قبل قبل …..
وهنا معاش عرف كيف يكمل جمله .. فاهيا وفرت عليه وكملتها منه وقالتله …
ريحانا … قبل ماتورط نفسك معاها … واك طبقت كلامه بالحرف … والحمد لله وصلنا لنهاية مشوار …
ليت … خلاص ريحانا …
ريحانا … تمام خلاص … وناضت …
بس هوا مسكها من ايدها وقاللها استني … وناض وطلع باكو من جيبه … وفتحه ومدهولها … وقاللها …
ليت … كااعتدر مني علي مدة ايدي ليك ..
ريحانا …. هههههه نحسابه هدا نسبتي من العمليه الا خطتها انت وصديقك … علي عموم ..ّ اسفك نقبل بدون هدايا .. الخاتم هوا وفره لي لارا لما تروحلها بسلامه ..
ومشت وسيباته وهوا يشبحلها بدون اي تعليق … واول ماخشت للحوش ادان المغرب بدي ياادن … فا تنهد وحط ايديه علي راسه ونفض شعره وخش للحوش … والتمو مع بعضهم علي صفره التمر والبسيسه … وضحكات والاحاديت ضجت مكان بالكامل … واصطفت صفوف .. وصلو المغرب مع بعضهم … والكل في دعوات في قلبه … ماعالم بيها الا ربك بس … وبعد دقايق … تمو صلاه … وكل وحده جت خدت من زوجها الصلايه باش تقيمها … واول مامدت ريحانا ايدها باش تاخد الصلايه … مسك ليت ايده معاها واكتفي بالصمت …. فا شدة الصلايه بسرعه منه وخدتها ومشت رفعتها لمكانها في القجر … وبعدها … قعمزو علي صفرة الاكل كلهم مع بعض وبدو يتسامرو ويحكو زي اي عيله ملتمه مع بعض … وبرغم كل الا مر علي ريحانا … الا انها كانت تحاول انها ماتبينش ضعفها او مشاكلها لحد .. فاكانت علي راس العيله ناقشا وجدلا لااي موضوع …
ريحانا ….. ههههههه لا لا مش شرط .. مش كل رجاله زي بعض …
حناها …. كللللللهم زي بعض والله مايهدهم يابنيتي الا العمر والفلس بس .
ريحانا … حرام عليك ياحناي بس بابا مش هكي .. عمري ماريته حتي صوته ارتفع علي ماما
حميده …. هههههه نسكت ولا نتكلم ياعبد السلام .
عبد السلام … ههههه اسكتي خير خلي حتي البنت لو موتت تتفكرني بحاجات كويسه …
ريحانا … بعيد السوا عليك بابا … وناضت وحضناته وهيا تضحك …
واول ما حركت عيونها بصدفه … لقت ليت يشبحلها مبتسم .. وكانه يعرف فيها من اول وجديد … فانزلت عيونها وكاانها ماشفت شاي
مريم … ليت …غريبه ريحانا قالت بابا ماقالتش ليت … شكلك محشمنا من اول شهر ياوليدي … غير شديت روحك شوي لحد سنه .. ههههه
وهنا شبح لريحانا شوي بعدين قال …
ليت … الله غالب ياامي شكلي حظي معاها قليل …
ملاك … هههههه بالعكس والله ريحانا تحلف بيك ماتحنت ياكبدي … حتي انت الحب والفارس الا تحلم بيه من ايام المراهقه .. ههههههه
وهنا ريحانا اختفت الابتسامه من فمها وزي من رشق فيها سكين … وليت ابتسم ابتسامة صدمة تعجب وقعدو عيونه معلقات بين ملاك وريحانه … بينما ريحانه … قعدة تشبح لي ملاك وكان لقت طلعت رشاش وفرغاته فيها … ولكن ملاك كان رد فعلها …
ملاك … خيركم مصدومين هكي قصدكم ماتعرفوش ههههههه …
بعدين شبحت لريحانا وقالت ..
ملاك … ماتشبحيليش هكي .. خلاص عاد تزوجتو توا ماعندك علاش بتدسي عليهم …
ريحانه … خلااااص ملاك …
ملاك …. ههههههههه حي عليك مازلتي تتحشمي حتي بعد تزوجتو …
ام ملاك … مالا شني مش انتي ياقليلة الحشم … غير قولي قدامي حد كبير … هيا من حقها تتحشم …
ملاك …. عقبالي يارررررب نتزوج زوجها ونووووعدك نوووووعدك اني رح نتحشم بعدها هههههه
بوها … غالي وطلب رخيص بنتي من بكرا رح نخطبلك عريس …. بتتحشمي علي وجهك ولا لا … كملي ماكلتك وانتي ساكته خير …
ملاك … هههههههه خلاص سكتنا ها …
واستمر الحديت بين العيله .. والكل لاهي الا ليت الا كان طول الوقت يشبح لريحانا …. بينما ريحانا ماكانتش قادره ترفع عينها من صونيه … واكتفت بالاكل بدون اي مشاركه في الحديت معاهم ..ّ وبعد دقايق … تمت العيله الاكل … فااكتفت ريحانا باانها تنوض اول وحده وتقول …
ريحانا … خليهم رح نقيمهم اني هادم ونبدا نغسل المعايين وانتي جيبي الباقي (( بتفنيصه في ملاك حاده ))
ومشت وسيبت الطاوله بسرعه وخشت لامطبخ وكان لقت المعايين مايكملوش … وحتي وهيا تغسل … كانو ايديها هما بس الا يخدمو … بس عقلها في مكان تاني … في مكان صعب جدااا نحطت فيه بدون ماكانت حاسبتله حساب .. بعد كلام ملاك … والموقف الا نحطت … فيه .. هل تقدر بعدها تنكر مشاعرها … او لا …. كل هالاسئله والحوارت كانت تدور في عقل ريحانا الا مافيقهاش من كل افكارها الا صوت امها تقوللها …
حميده … ريحانا … ريحانا … بسم الله الراحمان الرحيم … وين مشيتي بنيتي … الا واخد عقلك يتهني … خيرك سمله من بكري نادي فيك ..
ريحانا … اه … سامحيني ماما سرحت شوي … في حاجه ؟
امها… لامافي شي بس حسيت وجهك نخطف لما تكلمت ملاك … وحسيت بعدها انك مش مزبوطه .. ومش علي طبيعتك … هوا في شي بينك وبين ليت ؟ طمنيني بنيتي .
ريحانا (( مع ابتسامه صفره )). … لا لا ماما ماتخافيش اني طبعي نتحشم بس ويعني طاوله مليانه كبار وصغار يعني بايخه تندوا الدوا هيا في وسط العيله بس …
امها … اي والله بنيتي … عندك الحق حتي اني تضايقت منها بس هيا ربي يهديها .. خفيفه ونيه البنت هيا … لهدا سكرت دماغي لما قالي وائل نبي نخطبها … ووصلت الفكره مع امها ان وائل يبي بنت حليمه … وامس سكرت معاه موضوع بكلللل وقولتله امها قالت متكلمين فيها بنت
وهنا ريحانه نست كل همومها وانصدمت من كلام امها ونطت فيها وقالتلها …
ريحانا … حررررام عليك ماما … علاش درتي هكي اني بجد انصدمت فيك .. البنت حتي هيا تحبه … وهوا يحبها علاش انتم تحبو تفرقو بين الا يحبو بعض وهما يدفعو تمن … والا بيتزوجوهم يدفعو معاهم تمن اكترر … انتي بي الا درتيه توا بتلقطي دعي منها ومن الا بيتزوجها لما يكتشفها تحب غيره وماتبيشي ومن ولدك ومرته … علاااااااااش هكي ياماما ..
ووبينما ريحانا كانت تتكلم بكل اعصابها لانها بسبب غلطه زي هيا دفعت تمن غالي جدااا وهالشي خلاها تنفجر في وجهه امها زي البركان وعيونها تعبو دموع … لدرجة امها فتحت فمها من صدمه وقالتلها …
امها …. حيلك حيلك … وانتي خيرك يابنت عبد السلام دمك محروق هكي … ريحانا …. مافيا شي … مافيا شي ..
امها … لاااااا انتي موالك كبير … قسما بالله ماك علي بعضك … تعالي معاي توااا لدار تانيه …
ريحانا … ماما خليني … قوتلك مافي شي …
امها … قوووووووووتلك تعالي … قسما بالله لو ماتجي توا قدامي الا نرفع صوتي ونلم الا في صاله كلها تعااااالي …
وهنا مشت ريحانا مع امها لدار وسكرت امها دار وقالتلها …
امها … شن في .. ملامحك مبكري وتوا دموعك وانفعالك اهو فيه حاجه … والله الا في شي .. اني امك ونعرفك من عيونك …
ريحانا … مافي شي ماما خلاص .
امها … احللللللفي … هاك المصحف … ترا احلفي عليه …
وخدت مصحف من علي متلت الا جنب الكرسي وحطاته قدامها وقالتلها اااااحلفي … عيونك يقولو كلام غير الا لسانك يقول فيه … تكلللللمي ماتخلنيش نعيط … شن في ..
وهنا ريحانه تحت ضغط امها انهارات بالبكي وقالت لامها …
ريحانا … اعطيني عشره ايام بس ونقولك شن في … بالله عليك امي ماتصريش … اني بجد تعبانه …
امها … (( بوجه متعصب )) … علاش مش توا علااااااش ؟
ريحانا … لو تحبي ربي اعفيني توا من اي كلام … ونوعدك اني بعد عشره ايام رح نحكيلك كل شي … خليني توا بس .. بالله عليك (( ودموع يصبو وتتوسل لامها )) .
امها …. اني زح نعطيك فرصه تراجعي فيها نفسك وتجي تحكيلي قبل العشره ايام بروحك … بس قسما بالله لو ماجيتي تكلمتي قبل العشره ايام … الا مانجيك اني ولحد فم العتبه متع حوشك … ومش اني بروحي لا … اني وبوك وخوك …
ريحانا … خلاص اتفاهمنا بس توا هليني بروحي واطلعي بس …
امها … وراك كارته ياريحانا … لكن ياخبر اليوم بفلوس بكرا ببلاش …
وطلعت وسيبتها وقربعت الباب وراها … وقعدة ريحانا مقعمزه ودموع علي عيونها وملامه في قلبها … علاش الكروت انفضحت ونكشفت في مره وحده … ووربك شن الا كاتبه من ورا هالا صار … وبين كل هالافكار حست ريحانا اسئلتها رح تخليها توصل لمرحله تعصي فيها ربها ّ.. فاناضت وطلعت من دار … ومن دار تسحبت لجنان ومنها لشقة حوش عمها وتحديدا لغرفتها هيا وليت طول … ومافاتتش ساعه من غيابها … لين الكل سأل عليها واولهم …
مريم … ملاك .. ريحانا في مطبخ ؟
ملاك … لا لا لقيته فاضي مطبخ فاخشيت كملت باقي المعايين اني وسيقت مطبخ …
حميده … اي اي ريحانا حست بدوخه تعرفوها انتم من قبل مريضه وشكله صايرلها هبوط توا …فاقولتلها اركبي ارتاحي وتوا تكمل ملاك بدلك المعايين …
مريم … ليت وين باهي يعرف ؟ بالك البنت فيها حاجه … بري كلمي خوك قوليله ريحانا تعبانه خلي يركب يشوف خيرها ..
ملاك … في جنان هوا مقعمز مع جدي وعمي وبوي … كيف بيصلو العشا وتروايح مع بعض …
بس رح نطلع نشوف كانا مابدوش توا نقوله …
حناها …. وانتي طالعه لجنان … لقطيلي معاك وريقات نعناع لشاهي بنيتي … وبعدها تعالي حمصيلي الكاكاويه ونفضيها ووتيها
ملاك … حاضر
وطلعت ملاك … ولقتهم مصطفين وكيف بادين يصلو …. فامشت جيهت الزرع وطبست تلقط في وريقات النعناع …. وكيف كملت تلقيط ووقفت … سمعت صوت بلطه … فاتلفتت وهنا صدمه … جدهم طاح من طوله وهوا يصلي ونبلط وطاح في جنان … وهنا ملاك بدت تعيط … ورجاله سيبو صاله وتفركسو والا يقيم فيه والا يطلب في الاسعاف وملاك تعيط ونساوين كلهم طلعو في جنان .. يتعايطو …. ومافاتتش دقايق ليت قاموه وحطوه في سياره وتسقدو بيه … والحوش تفركس فوقي لوطي … واول ماسمعت ريحانا اصوات العياطات … نزلت بسرعخ تجري وتسال فيهم ..
ريحانا (( بوجه مخضوض )). … شن في خيرررررركم … تكلموووووو
امها …. (( منهاره من الخوف وتصب علي عزوزتها في زهر باش مايرقالهاش ضغط وقالتلها )) جدك … جدك وهوا يصلي طاح من طوله …
ريحانا … كيف طاح … ماكان فيه شي … مريم …. والله يابنيتي مانعرف … فجاه سمعنا ملاك تعيط … بس توا ادعو بس … ادعو تكون حاجه بسيطه ويروحو بيه بس … ادعووووووو احنا في هالشهر المبارك وربي ما يلوح دعوة حد …. ياررررربي الفرج من عندك يارررررب …
وفجاه العيله كلها انقلبت .والجو كله غيم عليه النكد والانتظار ….
النساوين … كانو في جنان مقعمزين يستنو … والرجاله معاه في مستشفي ويستنو في دكتور امتي يطلع … وبمجرد ماطلع دكتور …. وقف لي اولاده وقاللهم ….
الدكتور …. الشيباني جاته دبحه صدريه حاده والباين انها مش اول مره … حاليا دخلناه للعنايه … ومانقدوش نطمنوكم بشي … بس كل الا نقدرو نقولوه .. ادعوله بس … لان موضوع معاش باايدينا … لان هوا توا عنده 24 ساعه يابيها طلع من مرحلة الخطر يابيها ربك يتواله ….
واول ماسمعو ولاده وليت الكلام .. انصدمو وانهارو … ومعاش عرفو حتي كيف يتصرفو … او حتي كيف يطمنوهم …. لان الوضع كان خطير جداااا ….
بس ياتري … هل الجد رح يعيش …. وهل زواج ريحانه رح يستمر والحب يتغلب علي العقل ومصالح … وهل ملاك رح يكون من نصيبها وائل وتقدر تتبت لحميده انها قد انها تكون زوجه لي ولدها …. هدا كله رح نعرفوه في الحلقات الجايه بعون الله … وليلتكم سعيده يارب …
يتبع…….
لقراءة الجزء التالي : الجزء الثاني عشر من رواية قلبي ملكي ولكن أنت من
لقراءة الجزء السابق : الجزء العاشر من رواية قلبي ملكي ولكن أنت من
للإطلاع علي فهرس أجزاء الرواية : جميع اجزاء رواية قلبي ملكي ولكن أنت من للكاتبة كيندا
جميع الحقوق محفوظة للكاتبة كيندا .
