وفي الجزء الخامس عشر من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء الخامس عشر من رواية قد كفاني
رئبال الأيام الأولى كلها ما مستوعب حاجة ووقت كلو نايم في مكتبة امو الله يرحمها بلسان رئبال بعد خمسه ايام من العزاء والناس مشو انا هنا وعيت واتذكرتا ريتال وآمال. غيث كان قاعد معاي سألتو منهم قال لي قاعدين مع امي قومتا مشيت على بيتهم لقيت خالتي مهاد قاعدة تحت الشجرة البقعدو فيها هي وامي وخالتي مثاني وبشربوا شاي المغرب
رجعتا سريع قبل تشوفي
انا ما قادر اتقبل الحقيقة واي مكان امشي عليهو بشوف صورة امي
دخلتا المكتبة ورقدتا فيها ودموعي ابت تجف من يوم ما اتوفت امي وحتى الآن جاتني ريتال وقعدت جنبي وقالت لي رئبال انت عارف البتعمل فيهو دا كلو غلط هي صح اتوفت وصح قلبنا موجوع عليها لك اسألك سؤال انت هسي قاعد تنفعها بي شنو؟ غافل على نفسك الليل والنهار ؟ انت كدا بضيع هسي من يوم اتوفت ما حصل شفتك صليت ولا حصل قريت قرآن
عارف امي دي كان حلمها شنو في حياتا كنت بتتمنى ابسط حاجة اننا نكون حفظة قرآن
وكانت بتبكي لمن وشها بقى احمر انا كنت ساكت لكن في قلبي كلامها أثر فيني شديد حضنتها وبكينا وبعدو انا قمت استحميت ومشيت لي غيث في بيتهم وشلتا آمال اختي من خالتي وحصنتها وقولتا لي غيث ارح المسجد غيث فرح شديد ومشى اتوضأ لانو طول الفترة الفاتت كان بحاول معاي وانا ما شغال بيهو بعد مرقنا سألتو عن ليث قال لي تاني يوم من وفاة خالتي مهجة الله يرحمها جا عمي احمد اخد ليث ورهف وقال تاني ما راجعين الجزيرة وح يستقر في الخرطوم ورابع يوم جا دفار واخد كل اغراضهم انا وصلت المسجد وحيلي مهدود كان الظهر يداب بأذن قعدتا في المسجد وقريت قرآن وصليت مع اني ما عارف بضبط قاعد اصلي في أي صلاة بس البعرفوا انو قلبي اشتاق لي انو يصلي اشتاق لي انو يدعوا ربنا لانو ما في شئ بنفع اكتر من الدعاء بعد انتهيت اقاموا صلاة الظهر وصلينا ورجعنا البيت فجأة كدا نسيت انو امي ماتت كنت في الصالون سمعت في حركة في المطبخ قولتا من غير ما أشعر امي دي انا مش قولتا ليها ما تشتغل
رفعتا عيني لقيت ريتال دموعها بتقول لي رئبال ابقى صدق انو امنا ماتت شوية خالتي مهاد طلعت من المطبخ وقالت لينا اشربوا العصير دا انا جهزتو ليكم انا العبرة خنقتني طوالي طلعت منهم وجريت على المكتبة وبكيت فيها خالتي لحقتني طوالي دسيت دموعي وعملت نفسي بقرا في كتاب لانو امي علمتني انو الزول ما يبقى ضعيف الإ قدام ربنا خالتي قعدت جنبي وقالت لي رئبال انت قوي اصبر وربنا ح ينصرك اصلو الحياة دي كلها ماشة لي زول الدوام لله واحده ابوك ما كان بحكي لك كيف امك كانت انسانة صابرة وكل حاجة بتحصل ليها بتقول قدر الله ما شاء فعل كانت طبيعي مبتسمة بتحب الخير لي كل الناس هي غالية علي شديد وكانت اكتر من اختي انا هسي بس عاوزك تكون زيها انا اتعجبت شديد وقولتا مافي زول بجي يخفف عني الإ هو بكون ببكي امي كانت مكانتا كبيرة في قلب أي زول عرفتوا أو اتعاملت معاهو حبيت اغير الجو شوية لاني لو اتكلمت كلمه تانية دموعي ح تفضحني قولتا ليها خالتي مثاني كيف حالا؟ فجأة كدا بقى ظاهر عليها التوتر وقالت لي وهي بتقطع في الكلام كويسة كويسة ما عندها عوجة قولتا ليها خالتي ما تكذبي علي انا عارف انها ما كويسة الحاصل عليها شنو ؟؟ قالت لي والله مثاني اختي دي تعبانة شديد وحالتا النفسية كلو يوم ماشه في ترجع ومحتاجة يومي تقابل طبيب نفسي والدكتور قال لازم تبعد عن أي توتر لانو العواقب ح تكون وخيمة عشان كدا اضر احمد انو يسكن في الخرطوم انا قلبي وجعني شديد على خالتي واتذكر اليوم الكانت فيهو امي تعبانة لمن ودوها في غيبوبة المستشفى خالتي كانت بتبكي وقالت كانت خايفة انها تفقدها والليلة وقت الجد ما خدت الموت في بالها واتخعلت شديد فيها والله ما عارف البحصل في بيتنا دا شنو؟ بين يوم وليلة فقدنا قلب العائلة واتبدل حالنا بين يوم وليلة افترقنا انا وليث مع عني ما متخيل في يوم ليث يمشي الدكان ساي من غير ما اكون انا معاهو بس حاليا تحت الظروف القاسية ووقت احتاج لي واحتجت ليهو ما لقيتو وما لقاني خالتي قالت لي عن اذنك ماشه اشوف آمال لو صحت قولتا ليها خلاص تمام ومرقت وانا مشيت لي ريتال لقيتا شايلة كباية العصير وقالت لي هسي كنت جاية عليك اتفضل اشرب كباية العصير دي قولتا ليها دخليها التلاجة وقت اكون محتاج ليها بشربها قالت لي انت لك زمن بتقول نفس الكلام ولا بتاكل زي الناس رئبال كفاية كدا على نفسك سكتا منها ودخلت غرفتي ونومتا بعدو في زول دق الباب صحيت ملهوف كنت قايلوا ابوي
فتحتا لقيتو عمي انس شويه الفرح الكان دخل قلبي اتلاشى بعد شوفتو ما بنكر اني بريد عمي بس في الوقت دا انا محتاج لي ابوي شديد عمي كان معاهو صينية أكل قال لي ما بتقول لي عمك اتفضل قولتا ليهو اتفضل يا عمي دخل وقال لي افتح خشمك قولتا ليهو ماشي الحمام قال لي رئبال ولا كلمة افتح خشمك بدا يأكل فيني وانا دموعي تنزل وامسحها تاني تنزل وامسحها بالجد اشتقتا لي ابوي سألتا منو عمي قال لي كويس بس محتاج وقت عشان يتجاوب مع الحقيقة قولتا ليهو قاعد وين ؟ قال لي قاعد في مكان آمن ما تشيل هم ما اقتنعت بي كلامو لكن قلتا بسأك غيث. عمي قال لي ارح المسجد العصر إذن اتوضينا ونادينا غيث وطلعنا على المسجد وإتفأجاة انو بيت ناس خالتي مثاني رحلوا فيهو ناس جداد قولتا لي عمي وانا كلي غضب لية تخلو ناس تانية تسكن في بيت خالتي!!
انا هسي بخليهم يمشو من هنا دا انا ما بسمح زول يسكن في بيت خالتي ابدا
وكنت متجه عليهم عمي مسكني قال لي يا ولدي إهدا الأمور ما بتتعالج كدا لازم عشان تتحصل على شئ لازم تفقد شئ وعمك احمد عشان يعالج خالتك باع كل حاجة بمتلكها حتى بيتو
انا زعلت شديد على حال خالتي وعمي وسكتا ومشيت المسجد صليت ودعيت ليها ولي امي من كل قلبي
ورجعنا البيت كنت شايل هم خالتي وانو بكرة المدرسة وريتال ما جهزت ليها حاجاتا عمي انس قال لي بكره المدرسة انتو لازم تنزلو وانا جهزت لكم أي حاجة انا سكتا وفي سري قولتا ما ح انزل أي مدرسة انا ح اقعد اهتم بي اختي آمال عمي قال لي سرحت وين؟ قولتا ليهو انا ما ح انزل المدرسة عاين لي بستغراب كدا وقال لي لشنو؟ قولتا ليهو منو بهتم بي اختي؟ ما تقول لي خالتي مهاد لانو عندها مهند براهو صغير ما عاوز اكون ثقيل على زول انا بهتم بأخواتي براي عمي زعل مني وقال لي انت ما تحسبها كدا وانا زي ابوك ومهاد زي امك قولتا ليهو خلاص يا عمي بعد آمال تبقى عمرها تلاتة شهور انا بشيلا منها قال لي خلاص ما مشكلة تاني يوم نزلنا المدرسة كنت اول ما اصحى بعد اصلي بجهز الشاي وبنضف البيت وبسرح ريتال واستحمى ونطلع وبعد نجي بلقى خالتي جهزت الأكل بناكل وبنقرا وعمتي جمان تعملها اتغير شديد وبقت حنينة علينا بتجينا الصباح قبل نمشي بتلقاني جهزت كل حاجة وبتذاكر مع ريتال اما انا ماخد في قلبي منها وكل ما اشوفها بتذكر تعاملها مع امي صح اني ما بسمعها كلمة شينة بس بتحاشى اني اتعامل معاها ريتال كانت يومي بتسألني من ابوي وانا ما عارف اقول ليها شنو؟ لاني انا زاتي ما عارف حاجة عن ابوي كنت دايما بقول ليها كويس في يوم هي قالت لي ارح نمشي ناس حبوبة اشتقت ليهم شديد قولتا ليها كويس اصلي اجيك بعد الصلاة شلتا آمال وريتال ومشينا مع دخلتا كدا شفت ابوي طالع من الحمام ريتال جرت عليهو وحضنتو بس إتفاجأت انو قال ليها انتي بت منو يا السمحة ريتال اخلعت شديد وقالت ليهو وهي بتبكي ابوي انا بتك قال ليها وهو ببوس في راسها معليش يأخ بتكوني مشبهاني انا ما متزوج من الأساس ريتال قالت ليهو ابوي عليك الله ما تهظر ردد لها كلامو ودخل منها الديوان انا استغربت شديد من طريقة كلامو دخلتا لي حبوبة وقولتا ليها ابوي قاعد معاكم من متين؟ وليه انا ما عندي خبر؟ قالت لي والله يا ولدي انا ما عارفة اقول لك شنو؟ قلبي مقطوع عليكم وعلى ولدي بعد ٣ أيام من وفاة مهجة عمل حادث خطير وفقد القدرة على المشي وكان ما متذكر أي حاجة حتى نحنا ما متذكرنا شويه شويه اتجاوب مع العلاج وبقى بمشي بس كمان ما متذكر حتى انا ما متذكرني سكتا منها ريتال ما كانت قادرة تتكلم اخدنا نص ساعة ورجعنا البيت ريتال قالت لي ابوي تعبان يا رئبال نحنا لازم نساعدو سكتا منها قالت لي انت مالك ساكت كدا انا بتكلم معاك برضو ما اتكلمت انا الكلام دا ما داخل لي في راسي شلتا آمال نومتها ودخلتا غرفتي تاني مشيت مكتبة امي وقعدتا اقرا فيها صليت وانا في قلبي تايه شديد عندي احساس قوي ابوي ما عيان بس ليه بكذب ياربي نحنا بقينا تقيلين عليهو وما قادر يصرف علينا قال احسن يقول اني ما متزوج تاني قولتا استغفر الله دا ابوي لازم ما اظن فيهو ورجعتا نومتا 
في يوم وانا قاعد في حوشنا جاني ولد كدا في العمر يكون قدري أو اصغر مني وقال لي من غير اي مقدمات معاك مؤمن السعدي قولتا ليهو اهلا وسهلا معاك رئبال بس انت جيت من وين!؟ ضحك وقال لي انا ساكن هنا في البيت دا واشر على بيت ناس خالتي مثاني قولتا ليهو ايواا انتو جيرانا الجداد مشيت جبت ليهو عصير وجيت كان بعاين لي وبضحك انا كنت ببتسم ليهو وفي سري بقول الولد دا شايف فيني شنو؟ ومرت الأيام ومؤمن كان طوالي بجني في بيتنا وبضحك وبتونس معاي وكان بريدني شديد وغيث كان بغير منو شديد لكن بحاول ما يظهر لي التلاتة شهور الكنت محددها لي خالتي تمت والليلة ح اشيل اختي واربيها براي ومشيت ليها من الصباح كلمتها رفضت نهائي تديني ليها وانا بتكلم معاها جات عمتي جمان وكالعادة بدت تكورك واتكلمت معاها وقالت ليها اسمعي هنا البنت دي ولا على كيف نحنا ح نأخدها اول شئ ربي عيالك وبعدين قابضي عيال الناس
انا قولتا ليها لا يا عمتي القصة ما كده وهي كتر خيرها ما قصرت مسكتها عندها تلاتة شهور وانا ما عاوز ازيد عليها المسؤولية كفاية عليها مهند عمتي قالت لي انا ما بنفع معاي كلام زي دا وشالت آمال وطلعت بيها انا إعتذرت من خالتي بس هي كانت زعلانة شديد ولكن معاها حق عمتي كلامها كان ما في محلو مشيت لي عمتي وقولتا ليها اعتذري من خالتي دا ما أسلوب تتكلمي بيهو معاهو خالتي ما بتستاهل كل القسوة دي
قالت لي رئبال انت دايما فهمك غلط وانا اتكلمت عشانكم انت هسي تخليني اعتذر منها غلطانة انا والله
وختت لي واختي وطلعت تاني بعد صلاة المغرب مشيت لي خالتي واعتذرت منها وقولتا ليها عمتي قلبها ابيض بس لسانها جارح ما تشتغلي بيها ولو دايرة انا برجع لك آمال تقعد معاك تاني تلاتة شهور لكن وكأنوا ما بتكلم معاها وقت تعبت من الإعتزار مشيت لي غيث عشان يحاول معاي بس إتفاجأت انو هو زعلان وقال لي ليه عمتك ترفع صوتها على امي هسي كان دي امك بترضى!؟ الكلام وجعني شديد كيف يذكر امي في مقارنة زي دي وهي اصلا ما موجودة في الحياة سكتا منو وكالعادة مشيت المكتبة والعبرة عاوزة تقتلني وقولتا هسي امي لو كانت معانا كان حلت الموضوع بأبسط الطرق وما كان في زول زعل من زول صليت ودعيت ليها ومشيت لقيت ريتال نايمة بين الكتب شكلها كانت بتذاكر وما حاسه حصنتها ورفعت منها الكتب ونومتا آمال تاني يوم صحيت وإتوضيت ونسيت انو غيث زعلان مني مشيت ليهو وضربت الباب ما في زول فتح لي عشان كدا مشيت براي صليت وقولتا بعد الشمس تتطلع تاني بمشي عليهم رجعتا البيت وجهزتا الشاي سمعت عربية عمي انس زي الكأنها عاوزة تتحرك طلعتا وسألتا عمي ان شاء الله خير مالكم طالعين من الصباح خالتي قالت لي نحنا راحلين الخرطوم والبيت عاوزين نأجرو وبعد بكرة الدفار ح يجي يشيل حاجاتنا قولتا ليها لي لشنو يا خالتي!؟ قالت لي ساي كدا قولتا ليها ونحنا ح تخلينا لي منو!؟ قالت لي في عبارة عمري كلو ما بنساها قالت خلي عمتك جمان تنفعكم ريتال جات وسمعت كلامها انا عايت لي غيث لقيتو اول واحد ركب العربية معقولة اخوي وصحبي اتخلى عني بالطريقة دي بعدو ضحكتا وقولتا في سري هو ابوي اتخلى عننا تاني فضل شنو؟ خالتي ركبت عربية عمي وانا لسه ما مصدق مشيت لي عمي وقولتا ليهو عليك الله ما تمشوا آمال ما مشكلة تقعد معاكم عليك الله اقنع خالتي قال لي انا ما بيدي شئ خالتك قالت ولا دقيقة واحدة ما بتقعد في البيت دا اعمل حساب لي أخواتك وانا بوعدك ما بنقطع منكم قولتا ليهو دا كلامك يا عمي تسلم ماقصرتا وانا ود ياسر اخواتي ما بغلبوني بربيهم احسن تربية وبكرة الزمن بوريك ومسكتا يد اختي ودخلتها وقولتا ليهم في أمان الله ودخلتا قبل ما يتحركو لاني ما بقدر اشوف فراقهم دخلتا ولقيت آمال صحت حصنتها وشربتها الحليب ريتال قالت لي نحنا هسي نقعد مع منو؟ قولتا ليها الخالقنا ما بنسانا ودعيت من كل قلبي ربنا يفرجها علينا شوية كدا جات علينا جارتنا الجديدة ومعاها ولدها الصغير قالت لينا صباح الخير قولتا ليها وعليكم السلام ورحمه الله وبركاته سلمت على ريتال وجات تسلم علي ختيت يدي على صدري وقلتا ليها وعليكم السلام نزلت يدها وقالت لي خالتك مهاد مشت وين قولتا ليها قريب لشنو بتسألني منها ؟ قالت لي لانو سمعتا انها رحلت وعندي اهلي عاوزه ليهم إجار انا اعصابي باظت وقولتا ليها مافي إجار وناس خالتي لمن يعرفوا اننا برانا قلبهم ح يحن ويرجعوا لينا انا متأكد قالت لي يا ولدي رايك شنو انت ومؤمن تنوموا مع بعض في الحوش وانا بناتي ما معاي وراجلي بجي بالليل شديد خلي اخواتك ينوموا معاي في الأول رفضت بس هي اصرت ومؤمن كان فرحان اني ح انوم معاهو حمدتا الله انو اخواتي ما ح ينومو براهم بعد صلينا العشاء مشيت معاهو بيتو مؤمن كلام وكتير مرة اسمعو ومرة اسرح منو شوية كدا وبعدو نام وانا الليل كلو صاحي سمعت ضرب في الباب ست البيت طلعت قولتا خلاص معناها دي زوجها ولعت اللمبة انا عملت نفسي نايم فتحت ليهو الباب أول شئ قال ليها بصوت منخفض رئبال نام؟ قالت ليها ادخل ادخل كلهم ناموا طوالي دخل ومشى على الديوان انا رفعتا البطانة شوية وشوفتا وشو الزول دا اصلو ما غريب لي ضغطتا نفسي نهائي راح مني بس المتأكد منو اني شوفتو قبل كدا الحكاية اتعقدت في راسي الشئ المعروف انو الناس وقت تدخل بتسلم وبتسأل عن الأخبار ليه سأل مني انا اول واحد بفكر لمن شالتني نومه صحيت صلاة الصبح اتوضيت وصحيت مؤمن قال لي ما بقدر اتوضأ البرد شديد ضحكتا فيهو
واتكلمت معاهو وقولتا ليهو الكلام دا ما صح منك واجرك بكون عظيم لمن تتوضأ في البرد سكت ومشى اتوضأ ومشينا مع بعض المسجد بعد جينا اخدتا لي غفوة لانو الليل كلو صاحي ما متعود انوم في بيت ما بيتنا وخايف على اخواتي شديد بعدو ريتال جات قالت لي خالتو مناسك قالت ليكم تعالو اشربوا الشاي مؤمن كان في الحمام قولتا ليها خالتك مناسك دي منو؟ قالت لي ام مؤمن قولتا ليها اول شئ مؤمن لمن يكون قاعد ما تجي وتاني شي انا ما بدخل بيتهم جوه قولي ليها شرب الشاي ريتال رجعت وبعد شوية جابت الشاي في الديوان شربنا الشاي وبعدو خالتو مناسك قالت عاوزة تعمل نقلية لي ولدا لانو قال ليها عاوز اقرا مع رئبال في مدرستو طلعنا بس خالتي نسيت الشهادة في البيت قالت لي مؤمن امشي جيبا من جوة مؤمن قال لي ارح معاي دخلنا البيت وطلع الشهادة وقال لي امسكها عشان اغفل الصندوق عايت لي الشهادة لقيت اسمو مؤمن عبد الكريم السعدي اتفأجات واتذكرت شخصت الزول الأمبارح دا صاحب ابوي داك الأسمو عبد الكريم اتقابلت معاهو قبل ٤ سنوات الأمور اتعقدت في راسي وقولتا ليه صاحب ابوي يسكن معانا؟ في حين انو ابوي ما متعرف علينا؟ لية زوجتو ما قالت إنها صحبت امي؟ ولية مؤمن قال لي انا مؤمن السعدي واتحاشى انو يذكر اسم ابوهو ؟
انا عندي احساس في شئ لكن ما عارف دا شنو!
ملاحظة رئبال ما حصل اتلاقى مع مناسك وعبدالكريم آخر مره شافو لمن كان في الشركة مع ابوهو
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء السادس عشر من رواية قد كفاني
لقراءة الجزء السابق : الجزء الرابع عشر من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
