الجزء الخامس من رواية بقايا امرأة

وفي الجزء الخامس هل يا تري سيحدث شيء لأبطالنا يقلب موازين الامور كلها رأساً علي عقب ام ستسير الامور كما خطط لها ؟ كل هذا سنعرفه سوياً في السطور التالية من الرواية .

الجزء الخامس من رواية بقايا امرأة

امها … شنى يعنى ؟؟ ماتشكى من شى … تكلمى يانسرين … قوووووليلها واطبقيلها ودنها وقوليلها مافى شى ..
وهنا نسرين قعدة تشوف لى نوره وبعدين شبحت لامها وقالتلها …
نسرين … معليشى غيرولى سيره هيا لو سمحتو … انى مخنوقه وجايه بنوسع خلقى …
نوره … انتى انتى سلبيه ومش قادره توجهى حتى نفسك ..
نسرين … يعنى شن تبينى نقولك ؟؟ اى انى عندى مشاكل وزى كل ناس … ومايأستش انها تنحل ويوم مانيأيس رح يكون ليا شرف انى نطلق …
امها … ليك شرف ؟؟
نسرين … اى ليا شرف … وصدقينى حتى انى يوم مانحس انى معاش قادره نكمل مش رح نتردد هلبه … وعيبك يانوره انك جايه تشوارى … بينما انى .. يوم مانوصله القرار هوا نتخده بروحى .. ونكون مسؤوله علبه لحد اخر لحظه من قرارى .. وبالله خلاص .. انى مش حابه نكد .. قسما بالله انى جايه باش نغير جوى .. وكانا بتنكدو خلى نقوله يروح بيا …
امها .. انى طالعه ومسيبتهالكم … اقعدو فيها يابناويت المهدى اصلا انى تحفه فى مكان وعلى قولتكم انى اصلا معاش ننفع لى شى ولا نتشاور فى شى .. انى اصلا مكانى زى خيل الحكومه بعد يكبر . حقه 3 طلقات بس ويسقدوه .. بس عندكم صغار وان شالله تلقوه فى صغاركم ويورونى فيكم يوم … وانتم لباقادرين تتكلمو ولاتنطقو حرف …
وطلعت ولبست عبايتها ووشاحها ومشت لخالتى منيبه جارتهم وطلعت وخلتهم …
وهنا نوره قعدة تشوف لنسرين .. وبعدين نسرين قعدة تشوف لى نوره …
نوره .. ههههههههههههههه والله انك فى فيها طقه مش طبيعيه هههههههههه
نسرين …. واحنى نقول طالعين لى منى … وينك مانقولو كلمه ماتعجبهاش .. تاخد شبشبها والباب لخالتى مهيبه .. تقول راجلها تانى هههههههههه …
نوره … ونبى فكينا من ضحك .. احنا اياماتنا سوده .. ولا زينا لو ضحك معناها اعرفى وراها شى مبلغم ياكبدى … مهم خيرك انتى جايه ونحس عقاريت دنيا فوق راسك …
نسرين .. تعالى نقعمزو فى جنان وتوا نحكيلك .. اصلا قلبى نحس فيه مغموم لو مانحكى ..
نوره … معناها تعالى نديرو سزوة قهوه .. وعلى الجنان عدل …
نسرين … هيا اصلا بجد راسى بيتفجر …
وهنا خشو للمطبخ … وبدت نسرين تحكى لنوره فى مصائب حياتها جديده من يوم الا رجعت فيه … وهنا كانت اجابة نوره ليها …
نوره … نصبلك توا القهوه ؟؟
نسرين .. لا لا خلى ترتاح قبل …
نوره .. نقولك شى ماتزعلى منى … نحس راجل كفى حد فى حياته …
نسرين .. علاش تقزلى هكى …
نوره … راجل لما يتكبر على مرته ويبدا تقول بتوحم عليها .. ويفتعل معاها فى مشاكل … معناها فى حد فى حياته مكرهته فيه …
نسرين … تعرفى شى .. انى عندى احساس .. بس فى نفس الوقت .. ماشديتش عليه اى موقف …
نوره … ماهو اصلا .. انتى مفروض قبل ماتشدى عليه دليل … لازم ماتوقفى لنفسك .. باش يوم ماتشدى عليه دليل … تكونى ماناقصك شى .. بس بى حالتك هادى .. هوا بروحه بيقولك انى عندى الحق …
نسرين .. بالله عليك اسكتى .. انتى شن تبررى لخيانته … شن قصتك انتى تقولى هكى ؟؟ ومريم تقولى هكى …
نوره … ههههههههه شن جوها معفنه .. قاعده ماتزوجتش ؟؟
نسرين … لا لا .. والكارته الجسم وشكل والجمال .. قسما بالله هيفا وهبى قدامما ماتجى شى … وفى نفس الوقت مسكره دماغها وكارهه رجاله وماتبى تتزوج .. وعلى مانجيبولها فى خطاب .. تقول لا مانبيش نتزوج …
نوره … عندها الحق ياحنه هادى حسبتها صح .. مش زينا احنا .. تم تمشيط عقولنا واستباحتها فى غفله من زمن هههههههه احنا على فكره من ناس الا امى ودرة بى افكارنا … وجت على راسنا …
نسرين …لكن انى لا .. انى امى لطالما تقولى فوتيه واماليه باين عليهم وعرين وهوا وعر .. بس انى ماكنتش نسمع الا لى هوا ولى قلبى …
نوره .. اسمعى نقولك شى .. بطلى دموع وضعف … وصدقينى صدقينى … المرأه الفالحه هيا الا تقدر ترد راجلها ليها … حتى ولو وحده واطيه جت تلعب عليه … يعنى مرأه دكيه هيا الا ماتخليش راجلها يضيع قدامها وهيا واقفه تتفرج …
نسرين … يعنى شنى ؟؟ احيانا حاسه روحى غشيمه …
نوره … ماهو جايتك يابنتى … عندى شوى طلبيات من الطلبيات الا نبيع فيهم على بيج متعى ووصلونى … وبصدفه .. طلعو عندى حاجات يسخطو طريفات مقاستهم xxl … جلاباب مصرى متع رقص … وشوية طريفات تانيه … يقتلووووو  وتعالى نقصلك هالشعر ونديرلك نيولوك فى دار .. وروحى وخليه يشوفك هكى .. وبعدين قولى ماقالتهاش نوره ..
نسرين … انى مكحته توا ولله ماعندى فلوس …
نوره … ياودى مايجو بينا امتى ماتحصلى انى قاعده .. غير تعالى نوريلك طالما انى جايبتهم
وهنا جابت نسرين شنطه وبدت تورى فيها ويفتحو ويشوفو … وبدت تقلب وتقلب .. ورست على جلباب مصرى اسود بى تسمال متعه وبيجامة نوم حرير زوجيه …
نوره … شن رايك فى دوق اختك ؟؟
نسرين … اااااه ياكبدى … غير كانا ضعيفه بس …
نوره … تعالى لدار نوم تعالى … ماختك فاتحه مزين فى حوشها ومازال حتى تخممى هههههههه 
نسرين … والله لولا انك سكنتك بعيده عليا … لكنت كل يوم عندك بس الله غالب حتى سواقه مانسوقش …
نوره … هيا غير تعالى خلى ندخلك لمكبنة زمن هههههههههه 
نسرين .. عندى بدلة جينز .. هيا جايتنى لكن انى مارتحتش هكى … نبيك تشوفيلى بيعتها …
نسرين … قسيهالى بعدين نقرر هيا ليك او لا …
نوره … اوك
وخشو لدار نون امهم .. وفتحو الاغانى وقوها … وبعدين بدت نوره فى نسرين …
نوره … نسرين .. من الاصابغلك شعرك نهار اسود .. وصبغه دوق منى ؟؟ منى الا مقترح عليك لون هوا بس .. خلى نطبق عليه الاعدام فى الميدان …
نسرين … هههههههههه امبحى ياحماره … انى ههههههههههههههه 
نوره … استعدى لمحاكمه عادله وويتفد وقتى فيك الاعدام .. مش سلاط فى الميدان … انى مستعجله حتى فى دار نوم تمام ههههههههههههه 
نسرين … امبحى هههههههههههههههه 
وبعد ماقعدة تضحك ويشوفو لبعض .. سكتت نسرين شوى .. وبدت تشوف نوره وبعدين تغيور ملامحها وبدو دموع ينزلو منها وقالتلها …
نسرين … انى استاحشت وائل منى … امتى يروح من سفر ؟؟
نوره … غبارتك سوده … مالا راجل الا فى الحوش منو ؟؟ وتستغفلى فينا وتقولى روح ياوطيه … باهى اقلها قوليلى غيرتى جوك ولا لا هههههههههههههههههه
نسرين .. تتسهوكى .. مصح وجهك … والله انتى تافهه انى نبكى وانتى تضحكى ؟؟
نوره … لانك تافهه انتى … تى فى مرأه عاقله رزينه .. تنزل دموعها على خاطر رجل ؟؟ تى وحق ربى .. انى لما طاح تاكم المكياح الا واخدته بى 200 جنى .. بكيت عليه لين عيت .. ولما طلعت حرجانه .. مانزلت دمعه … لاه عليك عليك ياوخيتى … تبكى لو سمنتى اااااايه ومعاااااك بقوه … لو وحده طلع قفطانك الا طاحو رجليك باش لقيته .. توام من قفطانها .. نقولك اااااايه واول ماتشوفيها .. حطى فى ايدك طويسة وركينه وبق طول .. ماتشبحيليش هكى ياحنا البقاء للاقوى هههههههههههههه  وانتى ماشالله غير وزنك يسد  .. بس انك تبكى باش يرجعلك راجل .. فاصدقينى الا يمشى معاش يرجع زى قبل الا بالحنكه ودهاء .. مش بى دموع والعبط الا تديرى فيه .. جاتك وكسه فى خبتك تقيله .. وماتقوليلش كيف لنهبدك .. اضعفى يعطيم مرض فى هالبطن .. اضعفى واهتمى بنفسك … وهوا يبدا تحتك زى برغوت
نسرين .. عارفه … ونبى شوية وقت بس لين نفطم صغارى .. بعدين توا تشوفينى
نوره .. مالا ضمى فمك ومعاش تبكى … وقولى لراجلك … باللله استنى انت وموزه الا معاك ماتتزوجوش لين نفطم صغارى .. مش على حاجه .. غير نبى نلقى قفطان مقاسى نضر بيه عرسكم بس .. ولو مستعجلين .. الله غالب عاد . مافيش داعى تمشى … وانتى تفهمى فى الواجب .. برى حتى تانى يوم باركى …
نسرين … بطللللللللللللللى نوره .. والله نمشى ونسيبك .. علاش كلها حياتك كلها هزال ..
نوره … انتى الا بطلى … ياريتك تاخدى حياتك بشكل هزلى .. بس يوم ماتقررى تكونى جديه .. تتخدى موقف صح فى حياتك .. بس كارته .. انك هدا الواقع الجدى فى حياتك .. تجى وبلا بلا بلا وتفضى شكاره وترتاحى … وخلاص .. وتستمر الحياه …
نسرين .. باهى شن تبينى ندير …
نوره … معاااااااااااااش تسألينى يابنتى … اضعففففففففففى …
نسرين … باهى اوك … والله والله من اليوم الا مانخطم على صيدليه … وناخد حبوب الفطم واجعلهم مارضعو .. حتى شيشه كويسه ..
نوره .. نقولك شى … انتى عندك سبب تفطمى عليه .. انتى مش قادره تنقصى وزن وانتى ترضى .. وبيتك بينخرب وصغارك بيتشردو … فاصدقينى لو خيرتيهم لو كبرو .. لكانو قالولك صح ياماما الا درتيه … وبعدين انتى مريضه وتاعبه .. وشعرك بدى يهر هر من طياح .. ياكبدى وين ماشيه بيه …

نسرين .. خلاص .. اعطينى 10 ايام هما نفطهم بيهم وبعدين توا تشوفينى ..
نوره .. واهم شى غيرى تفكيرك معاه الواطى هوا … استكرديه .. وعامليه مش كويس ..
نسرين .. شن اللانحطاط الا انتى فيه ؟؟ نهار ابيض تتكلم وتقول نصائح حكى لاختها ؟؟؟
نوره … خودى منى الكلام رسمى .. راجلك يبى وحده توريه العين الحرفه .. لانه شافك مسكسكه وحاضر ونعم بدى مستقوى عليك … ويعامل فيك دليله ليه .. ويقول انى اصلا نلف ونلف ونهزبها ومرجوعها ليا …
نسرين … بس انى ماتعودتش نعامله هكى …
نوره … مالا خليك هكى وبعدين تعالى اندبى وقولى شن ندير لما تبدى ملقطه سكاوتك وصغارك فوق راسك وجايه تهزى بيهم …
نسرين … والله انتى لسانك متبرى منك .. حولى حولى بنخش توليت …
ومشت وسيبتها .. بس فى قرارة نفسها حست انا كلام نوره صح .. وقررت تطبقه لعل وعسى … يتغير الحال ..
نوره … خفى يابلى تعالى نكملك قبل ماعتريس يوصل ..
اسمعى بايته انتى ؟؟
نوره … لا لا ماخطرليش حطينى فى حوشى على طريقك .. امك اليوم ناصبه الشوشو على خشمها طلعت وسيبت الحوش .. فاخلينى نروح لحوشى ..
نوره .. باهى مالا هيا خلى نكملك … قبل مايجى … اسمعى انى فتحتلك صبغتك شوى .. وفى نوع سيرم .. ممتاز لشعر .. توا نبعتلك اسمه توا على نقالك وخوديه .. لانا شعرتك تعبانه هلببببببه … قوليلى تاخدى انتى فى مكملات غدائه ؟؟
.. نسرين .. مانكبدش عليك مش مداومه عليهم …
نوره .. لو تحصلى كيف .. برى لدكتور طارق او مريم بيرون .. لانا شعرك وبشرتك تاعبه هلبه .. نصيحتى ليك …
نسرين … ان شالله .. اول مايتوفرو عندى فلوس …
نوره .. والله كارته .. توا معقوله دكتورة اسنان زيك ماعندهاش قرش .. وانى مزينه جيبى مليان ههههههههههه تى والله الا هزلت .. شن رايك تخدمى معاى ..
نسرين … اااااه اولا بيا انى نخدم فى مجالى .. قداش كان خاطرى نحضر سنه فى مصر … ونفتح عياده خاصه بيا .. بس الله غالب .. تخليت على كل شى .. ومشيت وراق لبى .. وشهادتى علقتها فى مطبخ جنب صورتى سمينه ..
نوره .. فى هادى جبتى فيها ههههههههههههههه خلاص كملتلك .. نوضى وتى قشيك لانا رمزى دارلى رنه … مصح فيسه … علاش مزينات كلهم طامعين فى فلوسهم ؟؟ حتى رجالتهم يحسابوهم راقدين على بنك ههههههههههههه قطيعه ماحدش بياخدها بساهل …. اى باه الحساب 55 جنى … هههههههههههه 
نسرين .. غبرتك سوووووود يتبزنسى فى اختك على ريحة فتله وحواجب وقص شعر وتفتيح شعره ؟؟
نوره .. مالا شنى ياكبدى … تى باهى الا مصارلى نهيار عصبى انى …تى انتى مخليه روحك هزء … معاش تمسى روحك .. وكل مانتلاقو توا نقعمز ونديرلك لفه .. الله غالب شرك وجى فى شلامه ماعندنا وين بنهربو منه هههههههههه
نسرين …. الله اشرك مصارينك ياررررررررب … وانتى تقول متربيه مع عزوزه …
باهى اسمعى استنى وين ماشيه بنقيسلك اللبسه الجينز وقوليلى رايك
نوره … باهى بسرعه وقت رمزى قريب يجى ..
نسرين … اووووووك
وهنا خشت نسرين وقاست لبسه مع نيولو جديد وطلعتلها …
نوره … تى تهببببببل يا#@#@ طالعه عليك ..
نسرين … الاصفر الا فيها مش حلو ..
نوره والله طالع عليك خليها .. واستنى ناخدلك لقطه وشوفى نفسك مع نيولوك جديد كيف طالعه عليك ..
نسرين … نروحله بيها ؟؟
نوره … تى لا ياغبيه البستى حتت جلباب مصرى وروحى بيه طول مافيك مابدلتى هههههههههه 
نسرين باهى مالا خالى نبمش نبدلها … هيا بسرعه صورى يادعوه 

نوره … تمااااااااااام  وهادى لقطه  والله حلوه يامعفنه  مهم …. انى لبست عبايتى ووتيت قشيشى … خفى روحك شكله وصل … خلى ندير لامى رنه ونقولها احنا روحنا ..
نسرين … شكلها واخده بخاطرها هلبه …
نوره … بكرا توا نجى ونجيبلها صفيرة حلو  توا ترضى علينا نبع الحنان ههههههههههههههههههههه
نسرين … واطيه واطيه … كل ناس ناس تبيعى وتشرى فيهم …
نوره … ههههههههههه مالا شنى ياكبدى .. وحتى رمزى ضفته فى لسته غير ماحصلت فيه سعر هههههههههه سوق راقد هاليومين 
نسرين .. اطلعى اطلعى والله خراب بيتك ماجاى الا من لسانك نهارك ابيض على راسك هههههههههههههه
وخدو بعضهم وسكرو الحوش وراهم وطلعو .. وخلو خوهم مقعمز فى المربوعه يتفرج على مباره الا يستنى فيها قداش ليه …
واول ماوصلت نسرين للحوش القت الاضواء كلها مطفيه … فااستغربت .. وفكرة بينها وبين نفسها انا فى مفاجأه حلوه ورا هالظلام المفاجى … بس اول مافتحت الباب وخشت بشوووووى … لقاته فاتح سهره وفتح موسيقى فى داره وفاتح روشن وريحة دخان من داره … فابدون ماتدير اى صوت … نحت عبايتها بشووووى ووشاحها … وهفهفت شعرها … وبخت برفان على رقبتها … وكانت تحتها لابسه جلباب الا خداته من اختها ….
وبعدين ابتمست وشبحت شبحه مليئه بالحب وتوجهت لدار نوم …. وكل ماقربت اكتر … كل ماكانت تسمع صوت صوته يضحك وحكى وصوته كان مختلط مع صوت الاغانى … متع سيلنديون والا كان فى الاساس مايحبش يسمعلها … بس ولى اول مره لقت بعد سفرته انه غير حتى الاشياء الا كانت يحبها ويكرهها … وبدت خطوتها تقرب شوى شوى لحد ماوصلت لدار واول ماوصلت … حطت ايدها على فمها وكتمت عيطتها بقوه وقعدة تسمع فى نفس الكلام الا كان ليها … والا كانت مستحيل تتقبل انا تسمعه الا من شخص غيره … بس تعرفو شن معنى يكون ليها … يعنى فى نغمات معينه بى ابسامه معينه … بى نظرات معينه .. ماينفعش تنعطى الا لشخص واحد بس … ويوم ماانت تقرر تعطيه لشخص غيره … معناها زى لما تاخد كأس كان عاجبك وتشريه … ومش تشريه بس لا … تتعب باش تلقاه … واول مايجى فى ايدك … تحس انك فرحان ودنيا مش سيعاك ..وتحس انك مستحيل تفرط فيه … وكل يوم تنوض صبح لازم تشرب فيه شاهى .. وماتحلاش الميه الا فيه … وحتى لو وفت حد يشرب منه … تاخده منه وتقوله هدا ليا بس …. وفجأه ؟؟ تخش لى محل … وتلقى شى احلى منه .. وتقرر تاخده بمنتهى سهوله وتفرح فيه … ومن غير قصد منك .. واحيانا تكون متعمد .. ووانت مقعمز على رخامتك … وانت مستمتع بشرب فى كأسك جديد … تضرب كأسك القديم باايدك … ويطيح وينكسر … بس الغريب انك ماتكلفش نفسك تتلفت وتشوفه … وكل الا تقدر عليه .. تجيب مكنسه وباله .. وتلمه وتحطه فى كناسه … اكيييييد ماهو خلاص . انت عندك كأس جديد عوضك على الا نكسر … بس يوم ماتمل من كأسك الجديد ؟؟؟ هل رح تقدرى ترجع الكاس الا انت كسرته ورميته فى زباله ؟؟ من غير مايوجعك خاطرك .. حتى على شى كان فى يوم هوا مصدر سعادتك … ..
وائل … انتى حبيبتى يامعفنه … اى استاحشتك … اى مرتى بايته برا … عارف حبيبتى انى قصر معاك من لما روحت بس والله والله مافيها كيف ناخد راحتى الا مانطلع من الحوش …
وفى لحظه هيا … صدمتها .. خلتها مش قادره توقف ولا قادره تقدم ولاقادره توخر … ولاعارفه اى شى … وقعدة ممصدومه وتسمع فى وائل الا هيا تعرفه والا استاحشته … والا كانت متوقعه انه مازال ماروحش بس اكتشفت انا هوا لما روح كان راجع للعنون الغلط ..  

يتبع …….

لقراءة الجزء التالي : الجزء السادس من رواية بقايا امرأة

لقراءة الجزء السابق : الجزء الرابع من رواية بقايا امرأة

للإطلاع علي فهرس اجزاء الرواية : جميع اجزاء رواية بقايا امرأة كاملة للكاتبة كيندا

جميع الحقوق محفوظة للكاتبة كيندا من ليبيا .