وفي الجزء الخامس من رواية سر سعادتي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الخامس من رواية سر سعادتي
سمعت رويدة دوة وحطت ايدها ع
فمها
ومشت تجري خشت لدار النوم سكرت الباب و تبكي خدت النقال واتصلت بأختها سكينة
رويدة تبكي:الو سكينة لحقي عليا
سكينة:خيرك شن فيه
رويدة:ي ي يوسف ايخون فيا
سكينة:اللطف ! يوسف مايديرهاش بالك تتوهمي
رويدة:ﻻ مانتوهمش سمعته بودني يقولها معش تغيبي عليا انتي سر سعاتي ومش عارفة شنو
سكينة:عليك عملة ! وشن درتي ماتقوليش طبيتي عليه وقتيله صفتك ونعتك
رويدة:ﻻ جاية بنديرها بعدين معش تحملت جيت لداري
سكينة:باهي اللي ماكلمتيشي.. شنو انتو قااعدين نفس الوضع ؟
رويدة:ايه
سكينة:بش قتلك انا اهتمي بروحك مش عارفة خيرك مهملة كان مش اختي راني قتلك عنده الحق
رويدة:سكينة مش وقت برادتك شم مهملة انا مايجينيش خاطر انضم
سكينة: فيما فات قتلك راك وليتي مدام اشقي بروحك معادش زي لما كنتي بنت انظفو وراك انا وامي
رويدة: فكيني منك وقولي شن ندير توااااا
سكينة:غبية الله يسامحه بوي ياريته عطاهولي انا يوسف وعطاك راجلي تمشو مع بعض انتي وياه
رويدة:تو وقته الكﻻم هدا قوليلي شن اندير
سكينة:اسمعي شن نقولك ونفدي بالحرف ﻻزم تجدبيه ليك وتنسيه ف اللي ايحبها برغم انه كان بين ايديك …..اكيدة توا مشفشفة بري خودي دوش وزيني روحك وقربي منه وماتفتحيﻻش موضوع بكل فاهمة
رويدة مسحت دموعها وقتلها :باهي اوكي باي…
يوسف تم مكالمته وقعمز يتفرج ع تلفزيون حط mbc2 فلم رومنسي ويتخيل ان هو ومسرة فبعتلها مسج ..حبيبي كان مازال فايقة افتحي ع mbc2 فيها فلم حلو … حط النقال وناض بيجيب عصير.. شاف رويدة متجهة للحمام
جاب عصير وولى مكانه بش يتفرج
وتم فلم وخش لداره
مضمومة ههههه
بس من كثر تفكيره ف مسرة ماركزش ان رويدة ﻻبسة لبسة حلوة و امكيجة
يوسف فباله ..ئه ان شاء الله خير دار مضمومة
خش سريره وبيرقد
رويدة قربت منه وقتله:فوسي
يوسف راسه عﻻمات استفهام ؟؟؟؟!!!!! ¿¿¿¿¿¿¿
يوسف:نعم
رويدة:مش جايني نوم
يوسف:غمضي عيونك تو ترقدي
رويدة:ﻻﻻ مامبيش نرقد نبي نقعد معاك
طلع راسه يوسف ن اليرغان وقاله : شن فيه الليلة ؟؟
رويدة:واحدة بتهدرز مع زوجها يعني ﻻزم تكون فيه حاجة
يوسف:هههههههههههههه صباح الخيييير شنو غيرتيلي الحالة اﻻجتماعية من اخ الى زوج
رويدة:بﻻ برادة عاد
يوسف:اوكي مدام عارفتيني بارد ﻻش تنوضي فيا خليني راقد
رويدة انفعلت وماخدتش بكﻻم اختها اللي قالتهولها ان تحاول تجدب يوسف ليها بدون ماتفتحله موضوع.. وقتله :اصﻻ الكﻻم الحلو مش لينا الكﻻم الحلو لسر سعادتي بالك تحسابني راقدة ع وذاني ﻻ يابابا
بوسف:على شن تدوي انتي
رويدة: اللي اتكلم فيها وماتبيهاش تغيب عليك
يوسف:بببب ايواه ايواه ايواه تتسنطي عليا انتي
رويدة تبكي:ماتسنطتش بصدفة سمعتك اتحب وتتمعشق في خطافة الرجالة هاللي ماتستحيش ع وجها
يوسف:رويدة ماتعليش صوتك عليا واحترمي نفسك عن الغلط ..شاد روحي بسيف وبعدين شوفي نفسك كيف هاملتني وهاملة روحك ابسط حقوقي مش محصلها منك اتقول نشحت منك ف اﻻهتمام
رويدة:ماتتسبلش بامور تانية انت خاين
يوسف شدلها شفاشيفها وقالها:انا مش خاين انا انسان دم ولحم ونحس نبي اهتمام مش اهمال مش نخش للحوش نلقاه حايس مقلوب ونلقاك دايرة ثومة ف شعرك نبي نشوف ابتسامة ع وجهك ولو مرة مافيش ديما مكشرة جبنا هدايا اخدا بحديث الرسول الكريم تهادو تحابو وانتي شي وﻻ هنا.. خدينالك ارواب شكال والوان واونه الدوﻻب ﻻبسهم…وﻻ والطامة الكبرى نجي نقربك تتلفتي عليا ..وتوا تقوليلي خاين !
رويدة:كﻻمك يجرح …انتو الرجالة اصﻻ عيونكم زايغة ادورو اي سبب بش تخونو
يوسف:تره ساد نقاش من هالموضوع فددتيني النم
رويدة انفعلت :حتشوف شن ندير فيها صاحبتك وياانا ياهيا
طلع يوسف من داره وخلوقه ف تل رويدة اتصيح ياخاااااين خااااين
وفجأة شافت نقال يوسف فكرت تاخد الرقم كتباته فيسع وايدها ترعش وردااته مكانه وتكمكمت ف اليرغان تبكي
خش يوسف مربوعة يبرطم وفكر فكر وبعدين ادكر تلفونه ناض يججججررري خداه وولى للمربوعة فكر ف الموقف لين خداه النوم
ومن صباح الله خير فاق يوسف شاف اموره وطلع اتصل ب احمد وقاله انا قدام حوشكم طلع احمد وجه منفخ من النوم
احمد:صباح الخير صبح ياراجل طاب عليا من توا
يوسف:المراة عرفت ب مسرة
احمد:حي ع امك وكيف عرفت
يوسف:سمعتني نتكلم امس وصارت مشكلة بينا
احمد:جت منك ياجامع طلق البلي
يوسف:مش عارف راسي مشوش
احمد:خود فترة هكي انعزل عن العالم وفكر كويس
فاتو يومين ومسرة ماتصلتش ب يوسف اتصل بيها مافيش رد
طلع يوسف من مستشفى ومشي ل احمد
يوسف:احمد الباين المراة اتصلت ب مسرة ﻻن نتصل بيها ماتردش ومرات رقمها مقفل
احمد:به وكان اتصلت بيها خﻻص من صالحها انفقشت شكارة
يوسف:شكارة شنو ماتندريش مسرة اني متجوز
احمد:ااووووف ان شاء الله مازال ماقتلهاش
يوسف:ئه تو بش قتلي ماتقولهاش
احمد:وين نندري عليك قتلي بتقولها وانك مش حدير هكي
يوسف:الحق وقتها خفت نخسرها لكن غير اترد بس تو نصارحها بكل شي غير ان شاء الله المراة ماتصلتش بيها
احمد:ومنين بتحصل الرقم شن تخلي ف نقالك ملوح
يوسف:ﻻ مانخليش فيه بس يوم اللي تعاركت انا وياها نسيت تلفوني ف دار ومشيت لدار التانية ..
احمد:ربي يستر …برالها ف المختبر
يوسف:تقريبا واخدة اجازة
احمد:اصبر لين ترد عليك اكيدة بتتصل بيك بش اتهزبك ف وقتها حاول تفهمها كل شي
يوسف:والله خايف ياحمد خايف نخسر مسرة حبيتها من قلبي وكانت سر سعادتي واكثر ..ياريتني صارحتها من اﻻول تسمع مني خير ماتسمع من غيري
احمد: اسئل مرتك
يوسف:حتى سألتها اكيدة حتنكر لكن وديني تطلع هيا مكلمة مسرة وحق ايات الله ما نبدى اﻻ مطلقها
يتبع ……..
لقراءة الجزء التالي : الجزء السادس من رواية سر سعادتي
لقراءة الجزء السابق : الجزء الرابع من رواية سر سعادتي
للإطلاع علي فهرس اجزاء الرواية : رواية سر سعادتي ( جميع الأجزاء كاملة ) للكاتبة لوزة
جميع الحقوق محفوظة للكاتبة لوزة .
