وفي الجزء الخامس من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الخامس من رواية عاصفة الصمت
سفيان : جماعة النوبة ف راس الشارع
نزار : تمام الكل ينزل وزهير انت درس السيارة وراء خيمة العرس وانزل منها واوقف قدام المصرف وخلي اﻻسلكي شغال ونقصله صوته واي شاب يسئلك من الشارع دير الوعارة وقوله انا امن استخبارات باهي
زهير : تمام
نزار : والباقي وراي … استنوا استنوا
الكل : شنووو
نزار : ساكوات الجيش ؟؟
سفيان : تمام
نزار : حاتم عدة فتح القفال
حاتم : تمام
نزار : المنظار وشنطة عجينة المتفجر
ربحي : تمام …
نزار : تمام … ربحي خود بينسة وخليك قدام الموزع الضي متع الشارع وقت تسمع تصفيرة اقطع خيوط الضي والحقنا ف سطح العمارة المقابلة
ربحي : اوكي هي
نزار : سفيان خش للعمارة اللي مقابلة وبدون صوت … اركب لين توصل لسطح فيسع
سفيان : تم
نزار : حاتم وراي .
* وركبوا بتسلل تام ووقت وصلوا لباب السطح … اشرلهم نزار البسوا قوانتيات وحطوا شخاشير ع وجوهكم … دارو زي مادار نزار وخشو لسطح *
نزار بالهمس : وراي وراكم ادير دوووشة بشوية ع روس صوابعكم
*الكل هز راسه تمام …
ونقزوا واحد تلوا اﻻخر ع سطح المصرف …. وقبل ماتبدى النوبة صفر نزار لربحي وقطع الضي وبدت النوبة ف الظﻻم الدامس*
نزار فتح المصباح وقال : ما توقعتش زوز بيبان لسطح.. فيسع ياحاتم حاول تفتحهم
حاتم : هي
نزار : سفيان تعال درق المصباح بالك يشوفنا حد
سفيان : اهو تو نفتح الساكوا وندرق بيه …يبدى حاتم بس يشوف ف الضي
نزار : به حلو
*وعاند حاتم ف الباب اﻻول فتحه وبدي في الباب التاني وقت فتحه تمت النوبة..
نزار عبر ﻻسلكي : زهير برا لمتع النوبة وقولهم ااضربوا شوط تاني وقت نقولك 00 اضرب رصاص باهي
زهير : تم
زهير مشي لمتع النوبة وقالهم : اليوم فرحاااان وعلى فرحتي بتضرب شوط تاني ياخونا
صاحب النوبة شاف زهير ﻻبس شرطي فخاف منه وقاله : ان شاء الله هي
نزار : هي خشوا خشوا …
* خشوا ونزلوا *
نزار بالهمس : صوت حركة …
غرفة الفلوس الدور التاني ع ايدكم اليمين … انا نازل لغرفة اﻻمن نشوف من فيها وحاتم افتح الباب متع دار الخزنة
حاتم : باه
*نزل نزار لدور اﻻول … ويدكر ف مكان دار اﻻمن … غير ان الشاب اللي في وسط المصرف شلع شمعة ف غرفته … مشاله نزار بشوية بشوية وجاه من وراه ضربه ع راسه … فافقد الوعي …و ربطه ودارله لصقة ع فمه … ونحى خيوط التلفوون … وركب جري لدور التاني وخش للغرفة متع الخزنة *
سفيان : من لقيت
نزار : لقيت واحد لوطى كتفته وجيت …. هات العجينة خلي نفتح الخزنة
*مدله سفيان المتفجر وخداه نزار وحطه على الخزنة *
نزار ف ﻻسلكي : صفر صفر
زهير طلع سﻻحه طاف طاف طاف
*وكبس نزار زر التفجير * بووم بسيطة مش ار بي جي هههه
نزار : العب العب ياولد
سفيان : ياحليلي
حاتم : بنرقص انا …
نزار : هيا فيسع لموا ف ساكوات فيسع
سفيان : ئه فيه بدالي جيش ف الساكوا
نزار : طلعهم وعبوا الفلوس …
*عبوا الساكوا بالفلوس وسبائك ذهب والساكوا الثاني نصه *
نزار : هي خلي نطلعوا من اهنا
فيسع
زهير عبر ﻻسلكي … نزار جماعة السينسا اهنا
نزار : من هما هادو
زهير : جماعة عادل
نزار : شن جيبهم هادو
زهير : مش عارف …
نزار : خش بين جماعة العرس ماتخليهمش يشوفوك
زهير : تم
سفيان : كيف بنطلعوا توا
ربحي : لو طلعنا حنشتبكوا مع بعض ويصير فيها دم
نزار : استنوا بس خلوني نفكر
زهير باﻻسلكي : جماعة العرس صلحوا العطل متع الضي …
نزار : اياح عاد كنا فمشكلة ولينا فمشكلتين
سفيان : كيف الدبارة
نزار : اه جري انت وياه البسوا بدالي الجيش ﻻﻻ استنى ربحي انت يعرفوك بشكل
ربحي : من هما
نزار : جماعة عادل يقولولهم السينسا
ربحي : ﻻﻻ مايعرفونيش
نزار : اماﻻ خليك مدني . . نلبس انا وحاتم .. سفيان حتى انت خليك مدني
*لبسوا بدالي الجيش و لموا كل شي وحطوا الساكوات ع ظهورهم وركبوا ل السطح ونقزو للعمارة التانية *
حاتم : هههههه
نزار : خيرك تضحك
حاتم : شوف مناظرنا بدالي عسكرية وشباشب صبع
نزار : غير راك اتشلك بيه بس
وتخليهم يفيقوا بينا
نزار باﻻسلكي : زهير شن يديروا جماعة عادل
زهير : هئ حم
سفيان : شنو شدوه يانزار ؟؟؟
نزار : حسهم زبطوه …
زهير : ها …
نزار : شنو في
زهير : خليكم فوق السطح .. جماعة السينسا واقفين قدام المصرف
نزار : برا لسيارة …وماتشوفلهمش
زهير : به
نزار : حاتم حط العدة ف ساكوا
وسفيان البس طاقية هادي ونزلها غطي وجهك
ربحي : هي
*نزل نزار و سفيان وربحي وحاتم ولما وصلوا لوطى لقوا جماعة السينسا واقفين طلعوا وعطوا بظهر طول ولما شافوهم ﻻبسين عسكري خافوا ومازبطوهمش*
ركب نزار سيارة هوا وجماعته وعطوها الشياط
نزار : باهي تمت ع خير المهمة اوووف
حاتم : توقعت اتصير مشكلة والله
سفيان : والنبي فكنا من توقعاتك
تره
وتمت المهمة ع خير ورجع
نزار ل صﻻح ..
صﻻح : خلعتوني خيركم متجيشين
*تقدم نزار ونحى الساكو من على ظهره وحطه ع الطاولة قدام صﻻح وفتحه *
صﻻح : ماعندي مانقووول منورين شباب … وبهالمناسبة الحلوة وقدام الكل الديناري ولى دراعي اليمين واللي ماينفدش كﻻمه ياويله
سفيان : اووو ديناري مبااارك ياراس
ربحي : اقوى ديناري
زهير : نبووو الزردة عاد
*وطبعا حاتم يرحي في الملح *
صﻻح : وغدوة بتمام اتجوني حنسلم كل شخص فيكم حقه تام اشبح كم يطلعلكم عشرة ﻻف خمسطاش الف الله اعلم
الكل : تمام
صﻻح : خﻻص روحوا توا …
*الكل روح ونزار من اول ماوصل الحوش خش رقد طووول *
وعلى تاني يوم …
خ رقية : نوض نوض يانزار
نزار : ناعس يمى خليني نرقد
خ رقية : اليوم ميلود
نزار : باهي بنرقد
خ رقية : ساعة 4 قريب العصر شنو بترقد ل الليل واﻻ شنو …نوض جيب لخواتك وبنت خالتك شميعات و خميسات ودريبيكات
نزار : تي كبروا راهو اما دريبيكات
خ رقية : به نوض هي فيسع قدامي
نزار : نضت نضت خﻻص …
خ رقية : طيب فيك
نزار : حقا يمى …. خيرها خالتي امس قتيلي تو نحكيلك
خ رقية : راجلها لخبطاته واحدة قد بنته وبيتجوزها
نزار : صلي عالنبي
خ رقية : عليه الصﻻة والسﻻم
نزار : مبرد جده على شيبته بيتجوز بنت قد بنته … والله صدمتيني
خ رقية : والله هداك النهار نتفرج فبرنامج مصري قالت مهارقة واﻻ مقاهرة متاخرة هدا وين فهمتها
نزار : ههههه مراهقة يمى مراهقة
خ رقية : ايه مهم فهمت
نزار : به وشنو بدير توا … بتطلق منه
خ رقية : قالت معاد قاعدة معاه يعاير فيها جبتيلي بنت واحدة وقمتي السقالة
نزار : وووه كﻻمه زي السم
خ رقية : زي العادة …. هي فيسع نوض اغسل طريفاتك وخود تغدى ووجهك عالسوق جيب شميعات
نزار : باهي هي
حاتم : تعرف يااستاد صﻻح … بما انك حطيته دراعك اليمين صدقني حيدير مافراسه ويدير جماعة ويولي عليك
صﻻح : تحسابه زيك
حاتم : به شن اتفسر عدم جيانه اليوم … وهوا عارف ان كل يوم فيه خدمة
صﻻح : مرات صارله ظرف
حاتم : امبكري خطمت قدام حوشهم مافي شي هدوء تام
صﻻح : خليه عدره معاه
حاتم : انا نقول ماتعطيش ف شخص تقة تامة اهو مش لدرجة تامنه ع كل شي
صﻻح : نوض فيسع جيبلي ارقيلة ماناقص غير تعلمني شن اندير وشن مانديرش
*خش عليهم سفيان *
سفيان : استاد صﻻح …. الشرطة شدو جماعة عادل … يحسابوهم هما اللي خنبوا المصرف امس
صﻻح : ههههههههههه دير روحك ماتندري ع شي حتى اللي يقولك سمعت قوله ﻻ سمعني
سفيان : به تمام … وين الديناري اليوم مش باين
حاتم : ولينا دراع اليمين نديروا مانبوا
سفيان : هههه ايه شوره … وربحي وزهير جو واﻻ ﻻ
صﻻح : جو امبكري عطيتهم حصتهم .. وهادي حصتك يا سفيان
سفيان : تمام شنو مافيش مهام اليوم .؟؟
صﻻح : ﻻﻻ اليوم ميلود … قلت مانيش بايع شي …
سفيان : به اماﻻ انروح
صﻻح : روحوا ايه
سفيان : تمام
صﻻح : اسمع وكان حصلت شخص تريس يبي يخدم جيبه ياسفيان
سفيان : باه تمام …سﻻم عليكم
صﻻح : نوض روح يافار امشي حتى اﻻرقيلة ماصارليش منها
حاتم : باه استاد زيدني الفين تانيات حتى عﻻوة
صﻻح : عطيتك عشرة اﻻف … سادينك برا اتزوز بيهم
حاتم : باهي باه سﻻم عليكم
صﻻح : سﻻم
*وكيف نزار وصل السوق لقي الفرراشة وكل شخص يبيع ف العاب ونبايل واللي يبيع ف شقاقات و اللي يبيع ف زير وصواني الفخار واللي يبيع ف كروسات البنات ومسدسات الرش …والعاب بنك الحظ وتركيب …السوق معبي رجالة واطفال وجوه حلوو وريحة الخط لوح والمفرقعات مالية الدنيا *
{امممم ﻻش الدرابيك والله كبرو عليهم .. خلي ناخدلهم البنابل اهما ﻻبسين بودري هههه يشبهوا لبنى اايه هادو احﻻ ايه خير
نزار : بكم البنبلة
الفراش : بخمسطاش
نزار : اممم به عطيني تﻻتة
الفراش : باهي هي
نزار :وحطلي شمع وخميسات ماعنديش نية انلود عالسوق
الفراش : ههههه ان شاء الله الناس كلها زيك ماعندهاش نية اتلود
نزار : هههه كم مع بعضهم
الفراش : 60 دينار
نزار : تفضل هي
الفراش : ربي يحفظك
* وخدي حاجاته وروح للحوش *
لبنى : شن جبتنااااا
نزار : مدايرتيني بابا نويل شورك
لبنى : ههههه هيا شن فيه ف الشكاير
نزار : حاجات لكن مش ليك …
لبنى : اماﻻ لمنووو
نزار : لخواتي بس انتي شفشة مافيش … صفصوفة مرمورة وييينكم تعالو جبتلكم حاجات
صفاء : حقووو
نزار : اي تعالي
صفاء : مروة نوضي نزار جابنا حاجات
وقفت طول مروة وجو هما الزوز ل نزار
فتح الشكارة نزار وطلع شمعة مزينة ل مروة ومدهالها وشمعة لصفاء
نزار : استنو … شوفوا البنبلة العروسة اهياه هادي ليك ياصفاء وهادي ليك يامروة
*اغتاضت لبنى وانفعلت وقتله : تاخد لخواتك بس ! به قتلي راهو عطاتك ماما فلوس كان انت هكي نوعيتك بخيل وقفاص و اناني..بﻻش مانبي منك شي
..ومشت لدار داخل واتلوحت ع المنادير وحطت وجها عالمخدة بتبكي … ونزار وجعه كﻻم لبنى اللي قالتهوله قعد ساكت *
مروة : عﻻش ماخديتش ل لبنى
نزار : خديتلها غير كنت بنديرهالها مفجاة في الليل بعد المغرب
جتهم خ رقية وقتله : شن جبتلهم
صفاء : شوفي يمى عرايس مش عاديات
خ رقية : خديت ل لبنى او
نزار : اي خديتلها … شوية بس خلي نشوفها
خ رقية : باه
*خشلها نزار ف الدار وحطلها البنبلة بحداها والشمعة و الخميسة وطلع من الدار ومن الحوش مرة واحدة *
صفاء : انتي ياغبية
*لبنى قاعدة حاطة وجها عالمخدة ردت عليها : شنو
صفاء : قيمي راسك شوفي شن فيه بحداك
*قامت راسها لبنى وشافت بالبنبلة والحاجات جنبها *
لبنى : خوديهم ياصفاء هادو حاجاتك
مروة : جابهملك نزار يادعوة
لبنى : تتسهوكوا
ضفاء : والله بجديات
لبنى : به وعﻻش يقولي ماجبتلك شي
مروة : قال كان بيديرلك مفجأة بعد المغرب غير انتي تسرعتي
صفاء : احنين نزار تخيلي كان بيفرحك دبل فرحتنا لكن انتي غباء مركز
لبنى : حي عليا والله مانتحشم قتله كﻻم ماينقالش … ياريته ايجي
مروة : مش حيجي توا ايروح ف الليل متاخر
صﻻح : وين لتوا
نزار : سامحني والله راحت عليا نومة لساعة 4 وبعدين مشيت ناخد ف قضية للعويلة
صﻻح : اممم نحسابك شميت صنانك
نزار : ههههههه ﻻ والله ماعاش اللي يشم ههههه صنانه عليك
صﻻح : اممم عموما فيه مهمة
نزار : انموت ونفهم عﻻش مهامك كلهم وراء بعض
صﻻح : ماه وقت تخطر فبالي فكرة مادابيا تتنفد طول
نزار : به شن هيا
صﻻح : خود الفكرة وخمخمها ع راحتك … فيه محل يبيع ف غدائية لكن في الليل يتحول ل محل حشيش.. طبعا مش توا لكن خمخمها وفكر كيف بتدهم عليه
نزار : يستر الله …
*طلع صﻻح شنطة فيها فلوس وحطها قدام نزار *
صﻻح : وهادي ليك ياديناري عشرين الف كاااش
نزار : عشرين الف ! ماشاء الله
صﻻح : اماﻻ كيف قداش عندنا ديناري … خودهم توا وروح … ميلودك مبروووك وعدوك مهلوك .. هاوينه غدوة مافيش خدمة اجازة كول عصيدة واتريح
نزار : هههه بالله سؤال استاد
صﻻح : اسئل
نزار : كم عمرك
صﻻح : هههههه قداش تعطيني
نزار : اممم 40 عام هكي
صﻻح :كبرتني .. 35 عام يا غزيل
نزار : بطولت عمرك …
صﻻح : هي قريب المغرب نوض نوض خلي نروحوا
نزار : يﻻ تصبح ع خير …
*خدي شنطته نزار ومشي محل خدي زﻻبية و مشروب وحلوة شاكار وشري من وﻻد الشارع خط ولوح وروح …اجواء ميلود قنينة
وصل نزار للحوش *
نزار : السﻻم عليكم
خ رقية و سميرة : وعليكم السﻻم
نزار : جبت زﻻبية يمى
خ رقية : ياودي معش اتجيب شي من برا اﻻمراض كاثرة
نزار : ﻻﻻ هدا عمي اسماعيل نظيف
صفاء : نزااااار … نزار روحت
نزار : روحت ايه
صفاء : اركب احنا ف السطح
نزار : باهي شوي تاني
صفاء : باه
نزار : كيف حالك خالتي وشن مدايرة
خ سميرة : اهو الحمدلله كويسة
مروة : يانزاااار اركب
نزار : تي باهي يادعوة انتي وياها اصبروا خلي نهدرز مع خالتي
خ رقية : برا اركبلهم شيطلهم رقيهم نزار : شن بندير يمى فوق … اصﻻ شوي تاني وطالع ماشي للوﻻد
خ رقية : ﻻ قعمز هدرز معانا وانت كل ليلة طالع …
نزار : به شن بندير ف الحوش
خ رقية : زي قبل .. شن جد عليك يعني … وشن هالشنطة هادي
نزار : اه شنو ايه … شريتها قبل شوي …وخديت حوايج حطيتهم فيها … خلي نحطها ف دوﻻب ونركب للبنات فوق
خ رقية : باه
*خشش نزار لدار ودس الشنطة كويس ف الدوﻻب بين الحوايج وركب لخواته لعب معاهم وشلعوا شمع و طربقوا خط ولوح ومفرقعات وطول الوقت نزار متجاهل لبنى … لين نزلوا وتعشوا وهوا مزال متجاهلها *
*وكيف ايوتوا ف العشي مروة وصفاء ومعاهم امهم ف المطبخ مطيبين رشتة كسكاس … وسميرة ضاربتها الكئابة وراقدة ونزار يتفرج على تلفزيون ولبنى مقعمزة بحداه وساكتة … جت مروة لوحت المفرش وقتلهم : هاكم فرشوا ..
لبنى : ﻻ مامبيش
مد ايده نزار بياخد المفرش وعينه ف تلفزيون وفي نفس اللحظة مدت ايدها لبنى … وجت اﻻيد ع اﻻيد …
سرح نزار… اول مرة اتجي ايد بنت فوق ايده بطريقة هادي…
جبد نزار ايده وقالها : تو بش ماتبيش اتفرشيه 
لبنى : كنت انبصر ع مروة
نزار : امان ياربي امان …
لبنى : نزنوز
نزار : نعم
لبنى : امبكري مش قصدي
نزار : باه
لبنى :والله ماقصدي خيرك هكي نزار … نحسابك ماجبتلي شي
نزار : عادي مادوريش
لبنى : ﻻ بندور … بالله عليك ماتزعلش مني
نزار : باهي
لبنى : نزنوز
نزار : باهي خﻻص معش تعاوديها كﻻمك وجعني …نحسب فيك زي خواتي اللي بناخدهولهم بناخدلك منه ﻻ نبي فلوس وﻻ شي
لبنى : باهي خيرك اتكشخ عليا
نزار : مانكشخش نوضحلك بش معش تعاوديها …
لبنى : باه خﻻص … المهم اسفة
*عموما جابوا صفاء ومروة العشاء وتعشوا وضحكوا وهدرزوا زي كل يوم … بعد يومين شري نزار سيارة والكل كان فرحان … طلعوا زردات وتفسحوا وحياتهم تغيرت … خالته اطلقت وعاشت معاهم ولبنى بدت اتشوف في نزار حبها الوحيد برغم انه حب من طرف واحد … نزار كان كل وقته خطط نفذ اسطو بيع
وكل مرة القيافة يعطيه مهمة شكل وحاتم قريب ايموت من غيضه … ولى لنزار شهرة عالية في هالمجال واللي يسمع ب اسم الديناري يتجمد ف مكانه .. يعتبر اصغر مشهور في مجال سرقة واكتساب الصفقات… وفاتوا شهور وخششت سنة 1999 …
ويليها 2000 وولى نزار عمره 26 عام و عنده هلبا فلوس… وصﻻح ولى شخص دا نفوذ و معارف وزاد اتوغل ف الدولة.. .. وكدة مرة يصيرله نزار كمين من قبل مكافحة المخدرات بس مايشدوشي … وحتى لو يشدوه في نفس اللحظة يجيهم تلفون من القيافة فيطلقوه طول وفاتت سنة وراء سنة ونزار قاعد ف نفس مواضيعه لين مل من العداوات والعنترة والتخطيط والخنبة و قرر قرار حاسم في تاريخ
20*5*2007
نزار : القيافة
صﻻح : نعم ..
نزار : نبي … نبي نستقيل
صﻻح : صلي عالنبي
نزار : عليه الصﻻة والسﻻم … نبي نشتغل بشهادتي .. انا مهندس لين نسيت الشي هدا … قعدت غير اخنب … اسطو… بيع … خطط .. نفد .. صفقة بضاعة معش تنفست
بكل
صﻻح : كنت كاتم ع نفسك يعني
نزار : وحق ربي ﻻ بس نبي انعيش شخص طبيعي … خدمة في الصبح ونتريح في الليل حالي حال الكل
صﻻح :صدمتني يانزار … راسك متع خطط مش متع هندسة
نزار : سامحني … سامحني ياالقيافة … نشهد بالله انك احسن شخص قابلته ف حياتي …بس معش نقدر نستمر
صﻻح : متاكد انك بتسيب
نزار : بإذن الله
صﻻح : والله ماعندي مانقول الحق كنت من خيرة رجالي وتاكد … تاكد يانزار بابي ديما مفتوح ليك سواء توا واﻻ حتى بعد اشبح قداش عام .
نزار : اصلي والله عارفك ماتقصر وبجد عطيتني نصيحة قبل … هيا صح لصالحك بس فادتني هلبا
صﻻح : شن هيا
نزار : قتلي رد بالك تاخد منها البضاعة نبي شخص صاحي …فقعدت طول الوقت صاحي وماقربتاش بكل
*وقف صﻻح ووقف نزار وتقدم صﻻح واضبط نزار وقاله :مطلوق سراحك ياطوير وربي يحفظك
نزار : ويحفظك ياطيب … اه قريب نسيت جبتلك معاي … الهدية هادي وان شاء الله تعجبك بس
صﻻح : دامها منك تعجبني ياديناري
نزار : ونتمنى … نتمنى كان فيه في ملفي عند الشرطة كﻻم هكي واﻻ هكي امسحه نبي نبدى حياة جديدة
صﻻح : لك هدا … تم
نزار : شكرا …السﻻم عليكم
صﻻح : وعليكم السﻻم …
*خنقاته العبرة نزار وهو طالع من عند صﻻح … قعد يدكر ف كل عملية ف كل مهمة نفدها لصﻻح
ركب سيارته نزار … وهوا مروح ف طريق سيارته وقفت فنزل يشوف العطل … لقاها سيارته تحتاج اميا … فخش لأقرب سوق بيشري اميا
فخطمت من قدامه بنوتة حس روحه انه يعرفها مﻻمحها شايفها ف مكان ما
{وين شايفها ياديناري وين وين … زعما صاحبة صفاء ومروة … ﻻﻻ… اﻻ مانسئلها }
نزار : عفوا لو سمحتي
تلفتتله البنت وقتله : نعم
نزار : انتي فتحية
البنت : ﻻﻻ اعويشة
ادكر نزار وقالها : العزوزة واﻻه ؟؟
البنت : من انت وشن تبي
نزار : بنت عم حاتم انتي صح
البنت : ايه
نزار : غالية واﻻ غرور تقريبا
البنت : غادة 
نزار : عاشت اﻻسامي … سجلي رقمي عندك … والله بجد نكلم فيك
غادة : ماعنديش تلفون
نزار : به عندكم ارضي
غادة : به هات رقمك اﻻرضي وتو نتصل بيك
نزار : به تمام … خودي هي
02134013**
حفظتيه ؟؟
غادة : اي حفظته … لكن نخاف اتقول لحاتم اني كلمتك
نزار : ماتخافيش …قدامك تريس
غادة : امممبه ياتريس
نزار : استني
غادة : نعم
نزار : تره قوليه الرقم
غادة : حفظته خﻻص اطمن تو نكلمك يﻻ باي …
نزار : بايات ياغزيلة
{والله كبرت واحلوت الفرخة طول وعرض هيواه هيواه وين ماشية بيه ماتقول اﻻ عارضة ازياء خلي انروح توا للحوش ونتمسمر بحدى اﻻرضي بالك تتصل واﻻ حاجة }
طلعت غادة من السوق وروحت للحوش
حاتم : وين كنتي ياهانم ..
غادة : كنت ف السوق
حاتم : هدا كله ف السوق
غادة : ايه … تي ارخيلي شعري ارخي
حاتم : معش اتعطلي نرة تانية
غادة : به غير حول حول …
*ركبت غادة لحوشهم … واتفكر ف نزار … زعما نتصل زعما ﻻ ..وخلت بوها يطلع وانتهزت الفرصة واتصلت *
غادة : الو …
نزار : اهلين ..
*كيف بتكون حياة نزار الجديدة ؟؟ هل حيستمر فيها كويس او ﻻ ؟؟ وشن حتكون ردة فعل حاتم لو عرف ؟؟؟
يتبع ……..
لقراءة الجزء التالي : الجزء السادس من رواية عاصفة الصمت
لقراءة الجزء السابق : الجزء الرابع من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
