وفي الجزء الخامس والعشرون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الخامس والعشرون من رواية عاصفة الصمت
نزار وقف وقال : شن فيه شن فيه يامروة
مروة : بو لبنى جي ويصيح في الحوش …. وامي ساخت ……
ﻻﻻﻻﻻ ماتخليشي ياصفااااااء
صفاء : والله ماقدرته ياااا مروة زودي معاي
نزار : تي شنو كملي
مروة : تعال يانزار بو لبنى خداها غصب … خداها معاه وركبها سيارته ومشي
نزار : دار فيكم حاجة
مروة : كشخ ع امي لين ساخت ولبنى ريشها من شعرها لين كمكومة شعر جت في ايده
نزار : حيه ع امه حيه … تو نتصرف ردي بالك ع امي … باهي
مروة : باهي به
غادة : شن فيه يانزار
نزار : نوضي روحي توا … انا مستعجل سﻻم سﻻم
* ركب نزار سيارته …وطلع من الجامعة ماشي لحوش عمك جمعة
{ هالدراه شن جيبه … وشن ذكره فبنته توا ! خطرله يعني والنبي قداش سنة تو هي قريب 12 العام وهيا عندنا ف الحوش …مصح والله وجهه ماناقص غير ياخدلي ضرسي
* نقال نزار ايرن …شافه نزار ولقاه …رامي يتصل بك … مرى واتنين وتﻻتة
{شن يبي هالرامي هدل}
نزار : ايوه رامي مش فاضي توا
رامي : باهي غير شفت اختك معاها راجل واتصيح وتعيط في سيارةقلت بالك مخطوفة
نزار : وين وين ف اما جيهة…
رامي : في شارع المدار
نزار : خليك وراه انا مش بعيد
رامي : باه اوكي
{زحمة البلي هادي … الناس زي السوس وين ماشيين النهار المبارك … }
خ رقية : وووه عليا ياحليلي خدالي بنت وخيتي …. حسبي الله ونعم الوكيل فيك اراك تنكسر ياجمعة وماتشوف يوم امقوم
صفاء : ان شاء الله يجيبها نزار والله تعودنا عليها ماسد امها فارقتنا اتزيد حتى هيا
مروة : ياناري تفرفر علينا اتعيط وبوها ايشح فيها
خ رقية : تو يجيبها نزار… ولدي ونعرفه … مش حيخليها ..غير ايجيها بس … نقوله اتجوزها وخﻻص بش عاد ﻻ يتسبل بوها وﻻ شي
نزار : وين وصلوا ؟؟؟
رامي : خش عشرقية …
نزار : اتوقعته حوشه غادي اصﻻ … رامي : نقعد وراه
نزار : خليك وراه مانزبطاش وين بزبط حوشه ….
رامي : اوكي
نزار : اسمع انا بحدى سوق ابناء الفيتوري انت وين منه
رامي : ها وصلت فينا …امشي عشارع اللي بعده وخود يمين كمل ف الطويل تو تﻻقانا
* تمام هي …
{هالقرد … توا لبنى ادكرها والله نسحن عليه فسحن ياسحن .. }
*وبطريقة او بأخرى خش من زنقة مختصرة وطلع وراء رامي و عمك جمعة …. زاد السرعة نزار وخطم من جنب عمك جمعة
طلعت راسها لبنى وقالت : نزااااااار نزااااااار ….
* وقف نزار بسيارته قدام سيارة عمك جمعة … فوقف عمك جمعة اجباري ونزل … ونزل نزار … ونزل راي ووقف وراء نزار
ع جمعة : تي سيارتك…
* تقدم نزار بعض الخطوات للأمام وقال : بأي وجه حق اتخش حوشي …واتعلي صوتك على امي وخواتي وتاخد لبنى وتطلع
ع جمعة : هادي بنتي وليا كامل الحق انخش وناخدها …
نزار : هههه يعني توا خطرلك بعد 12 العام انك تتدكر بنتك
ع جمعة : امها توفت شن تقعد معاك عزري
نزار : لبنى زي اختي وسومها من سوم خواتي واللي بيصير ع خواتي بيصير عليها …
ع جمعة : كﻻمك هدا ﻻ ايقدم وﻻ ايوخر
نزار : ايقدم هلبا .. بطيب وبﻻ شهدرة بنتك حتقعد عندي … انا اللي كبرتها وحميتها وصنتها
ع جمعة : تي من انت اصﻻ كله كله ولد خالتها انا بوها واحق منك بيها
نزار : انت بوها واﻻه تره شن قدمتلها … تره قولي ماك لوحتها هيا وامها حتى النفقة مافكرتش تعطيهم …وكنت اصغير وقتها كيف متخرج من الجامعة اتحملت مسؤليتهم ومامشيتش شكيت عليك ف المحاكم على النفقة وصرفت عليهم انا … مش بجميلة في النهاية خالتي بحسبة امي وبنتها بحسبة اختي وانت بتطلع منها ماليكش مكان بينا
ع جمعة : مايهمنيش اللي اتقول فيه
نزار : النقاش معاك عقيم جدا … رامي
رامي : حاضر هي
* شد رامي عمك جمعة … ومشي نزار لسيارته وطلع لبنى ونحى جاكيت متعه وحطه ع راسها وخدالها حجاته وخششها ف سيارته
ورامي ينظر لها بكل اعجاب و ود …
ع جمعة : والله اﻻ ماتندم … تو انوريك اﻻ مانحبسك بتهمة خطف بنتي …. احنا ف دولة القانون ماعندك وين بتهرب
نزار بيركب سيارته وقال : اماﻻ سلملي عالقانون …واعلى مافي خيلك اركبه وبنتك حتقعد عندنا وحتعيش زي قبل … برا للمحاكم هي وحوشي وتعرفه
ع جمعة : حسبي الله ونعم الوكيل فيك اﻻ مانوريك
* ركب سيارته نزار وعطاها الشياط … سيب رامي عمك جمعة وركب سيارته ومشي
نزار : خﻻاااص اهو مروحين ﻻش البكي
لبنى : حيمشي يشكي فيك وحياخدوك الشرطة وحيردوني لبوي
نزار : هههههه ماتفكريش فيه الموضوع هدا بكل … نطلع منها زي شعرة من العجينة
لبنى : اكيد ؟؟؟
نزار : وبكل تأكيد … اه واسف جدا بالك حرجتي من كﻻمي اللي قلته لبوك … غير نرفزني الحق
لبنى : ﻻﻻ ماحرجتش صح هوا بوي بس من صغري يعامل فيا معاملة بايخة…ايقولي بش كان جيتي ولد خير …ويقولي امك جاباتك وقامت الصقالة وكل مرة حاجة
نزار : استغفر الله وخﻻص عليك كﻻم
لبنى : ايه وانت اللي سامحني والله متحشمة منك ومن خالتي وصفاء ومروة …
نزار : الله غالب شن بنلومك على تصرفات بوك توا … شي وصار خﻻص
لبنى : والله طلعني بتوتة اللي عليا وشحلي شعري نتفهولي يانزار تنتيييف
نزار : بالله غيري الموضوع والله شاد روحي عليه بسيف
لبنى : امممبه … اول مرة نركب جنبك فسيارة هكي …
نزار : ههههه وبه ؟؟لقطة حلوة قصدك
لبنى : اتهبل … والله مش عادية .. بس نبي اندير حاجة وماتعصبش عليا
نزار : اه شنو
لبنى : عارفة ان الوقت مش وقته بس عارفة ومتاكدة اتي مش حنركب معاك في الكرسي القدامي فمرة تانية
نزار : به شن هيا الحاجة
* حطت ايدها لبنى ع ايد نزار فوق المارشا … نزار جبهته اتعرقت وارتفعت درجة حرارته من هاللقطة
{تي وين شايفتها اللقطة اهياه والله اكيد مسلسل تركي وووك عليا قيمي ايدك ياشفشة }
ولبنى سارحة >> الله ياربي ياريته حﻻلي ركبت من القدام وقالوا حيه هادي المدام وووك عليا بنهبل عليك يانيزوو
نزار : هيا سادك مسلسلات تركية خﻻص
* نحت ايدها لبنى واتحشمت ةدورت موضوع بش اتغطي وقتله : ههههه بس والله قاعدة واجعني اللي صار يانزار …
نزار : خﻻص انسي انسي توا .. المهم بتولي معانا… بصراحة مش متخيل انه بياخدلي ضرسي !
لبنى : هههههه قصدك ماتتحمل الحوش من غيري
نزار : ايه اكيد … هي انزلي هي
لبنى : هههه وصلنا والله مانندري ع روحي
نزار : ماك مريوحة
* نزلت لبنى حفيانة وخشت تجري للحوش اضبط خالتها وقعدت تبكي والخالة تبكي معاها …
صفاء : باهي اللي جبتها يانزار والله من بكري واحنا نسحنوا
نزار : كبست عليه ف جيهتهم …بكل والله غمني بكﻻمه ..
خ رقية : ئه ودار فينا شوي او ايعلي فصوته ويشح في البنت ومروة وصفاء يجبدوا صارت فينا حالة
نزار : ايهدد فيا قالي بنشكي عليك ومش عارف شنو
خ رقية : اللطف
نزار : والله قتله اعلى مافخيلك اركبه
خ رقية : بالك يشكي حق ايديرها راه
نزار : مادوريشي
خ رقية : اخ حالة وخﻻص والله طمسنا … نوضي يالبنى بري اتكي شوية وارتاحي
لبنى : ﻻﻻ بنوض ناخد دوش
خ رقية : به بري …. صفاء ومروة برو طيبوا الغدي امشوا
مروة : مازال بكري
*دارتلها تفنيصة عالجنب وعضة على شاربها فهمت مروة وناضت ومعاها صفاء *
خ رقية : لوح هالخيدة اللي تبربش فيها خلي نقولك كلمتين
نزار : شوية بس بنبعت هالرسالة
…. ايواه تم اﻻرسال .. تمام شن الكلمتين يمى
خ رقية : نبيك تتزوز لبنى
خ عايشة : مكرم بيعطي كلمة فيك ياغادة
نزار : مستحيل
غادة : قالي امس امك بتقولك خبر بس ماحسبتش هوا هدا ..
خ رقية : شن هوا المشتحيل ياولد مافيش حاجة مستحيلة اتجوز البنت
نزار : لبنى زي اختي … مش زي لبنى اختي هكي هاه
خ عايشة : وبه شن قولك
غادة : ابدا ماناخداش
خ رقية : لأمتى اصﻻ بتقعد هكي من غير زواج تره قولي راك اكبرت
نزار : مازال مازال
خ رقية : مش مزال اتزوزها
نزار : يمى رايد واحدة تانية ولبنى مانفكرش فيها زي وخيتي بزبط
غادة : ﻻﻻ مانبيشي
خ عايشة : ئه وين تلقي خير منه دكتور وبخيره وخميره
غادة : ﻻﻻ مانبيشي
خ رقية : غير زيد فكر سلم وليدي.. بوها مش حيخليها تقعد اهنا
نزار : بوها مسئلته محلولة ومعاي انا وماتفكريش فيه الموضوع بكل وﻻ حيقدر ايقرب اهنا وﻻ يعفس عتبة الحوش بكل
خ عايشة : الولد كويس ومايتفوتش
غادة : به وقرايتي
خ عايشة : كمليها ع راحتك وواحدة واحدة .. هوا بيعطي لكلمة لبوك
غادة : مش موافقة يمى …
خ عايشة : به به خليه الموضوع هدا ع جنب تو نتصرف انا … حنقوله يستناك لين تتخرجي بالك وقتها اتغيري رايك ….
غادة : مش حنغيره
* وناضت خشت للدارها مضايقة وتبكي …
خ رقية : باهي به… اصﻻ انت مافيك غير العناد … هدا فاش فالح
نزار : والله ماعناد يمى … غير رايد وحدة تانية ونبيها
خ رقية : به هي نخطبهالك
نزار : ﻻﻻ مازال تو لما نكون واتي تو نقولك
خ رقية : وئه شن ناقص بمكتبك وتخدم عالكيف
نزار : ومع هدا مازال يمى صبرك بالله وان شاء الله يصير ماتبي ونتجوز
قسم الشرطة …ساعة 12:30 مساء
ع جمعة : خطفلي بنتي يااستادي
مﻻزم علي : وين
ع جمعة : في الشرقية … ولد خالتها خطفها مني في الشارع وروح بيها لحوشه
مﻻزم : وين يسكن
ع جمعة : في منطقة كدا
مﻻزم : تمام …شن اسمه
ع جمعة : نزار خليفة
مﻻزم علي : الديناري ؟؟؟
ع جمعة : نزار خليفة ….
علي : باهي به استناني قدام المكتب … بندير اتصاﻻتي بس
ع جمعة : به
مكرم ~اسمعي قتلك امك عالخبر
غادة ~ خبر طياح سعدك مانبيكش وووه منك
مكرم ~ به …بري بري توننفضالك لما اروح … باي ياحبي اموووه
نزار : ايوه نعم
مﻻزم علي : ديناري
نزار : ايه نعم
مﻻزم : جي راجل اشتكي ضدك توا وقالي انك خاطف بنته
نزار : ( حكاله نزار بتفصيل )
مﻻزم : اها
نزار : وكان تبي اتجي للحوش وتتاكد من الوالدة اتفضل …
مﻻزم : ﻻﻻ مافيش داعي عارفك صادق
نزار : وبالله عمم على مراكز االي بجنبك ايجيك جمعة فﻻن ما يدوراش
مﻻزم : تمام ياطيب تمام سﻻمات
نزار : سﻻمات …
{والله زبطه مزال بيلود عالمحاكم توا … احسن شي ندير اتصاﻻتي بكري بكري }
* دار نزار كل اتصاﻻته مع القيافة وبلقاسم وكل معارفه …. وحارب عمك جمعة وماحد جي معاه … فات شهر شهرين وشي ﻻ حصل ﻻ حق و ﻻ باطل ….لين استسلم وفقد اﻻمل …. وخﻻها عند خالتها …
وفاتت سنة 2009 … وجت 2010 …
سالم : نقولك حاجة ياديناري
نزار : قول
سالم : مليت من الخدمة اهياه تعبت نبي نبدى حياة جديدة
نزار : تشبح فيا انا
سالم : ايه
نزار : ليا سنين ومنين وانا نبي انسيب ومش قادر … كل ما نطلع من موضوع يجيني موضوع من سنة 98 ليومنا هدا 25/10/2010
سالم : يعني مش انت اللي تبي هكي
نزار : ﻻ مش انا … مدابيا … مدابيا نفتك …
* على خشت الكوالي فجأة
الكوالي : السﻻم عليكم
نزار : وعليكم السﻻاااام … مرحب مرحب
الكوالي : مرحبا بيك شن امورك
نزار : الحمدلله … شن الريح اللي دفاتك عندنا
الكوالي : والله خاطم من اهنا قلت هيا خلي انخش انسلم
نزار : زارتنا البركة يا c …
الكوالي : الله يبارك فيك
نزار : معليشي ياسالم خلينا توا
سالم : انروح يعني
نزار : ﻻﻻ خليك قريب من المكتب… وقت نبيك انديرلك رنة
سالم : تمام … سلام عليكم
نزار : وعليكم السﻻم … ايه قولي ياكوالي كيف حال بنتك هديكا
كوالي : اهي تبرز الحمدلله … خيرك اتبان مهموم …
نزار : اخ ياكوالي…الشبوب اللي كان اهنا … يبي يعيش حياته ويفتك من هالشغل … ذكرني بنفسي لما نفرفش نبي نتخلص من هالكابوس
واتصور يحسابني انا اللي طالبه وجايبه عندي بش يشتغل بسيف
الكوالي : اها وانت شنو … قاعد معش تبي تشتغل
نزار : ايه مليت مليت … تعرف
كوالي : انعم
نزار : خاطري نكون شخص حر فري بدون قيود ﻻ مهام وﻻ حشيش وﻻ شي …
كوالي : اممم انت تحت بلقاسم الحبيب واﻻه
نزار : كيف عرفت
كوالي : ايه نعرف هلبا حاجات انا نزار : زي شنو
كوالي : هلبا وخﻻص … وقبل انت درتلي معروف … ونردلك هالمعروف
نزار : كيف
كوالي : خليها عليا ياديناري
نزار : غير فهمني بالك ادير شي انا مش راضي بيه
كوالي : صدقني اﻻ يرضيك… هي سﻻم عليكم توا … مستعجل
نزار : باهي وعليكم السﻻم
{زعما شن بيديرله … نتوقع شاد عليه ملفات وجو اهواه ايه ايه اكيدة هكي … باهي مليح كان بنحبس بلقاسم الحبيب معناها انا نعيش مرتاح هههه ياريت والله ياريت… اليوم نفاتح غادة في الموضوع ونقولها بنكلم بوك … هههه ونخلي بلقاسم الحبيب يكام بوها وتو يخاف ويعطوهالي ايه صح اقلها نستفيد منه قبل ماينحبس }
رامي : السﻻم عليكم
نزار : وعليكم السﻻم
رامي : فاضي ديناري ؟؟؟
نزار : ماتقوليش مهمة واﻻ مش عارف شنو راسي مصدع
رامي : ﻻﻻ مش مهمة
نزار : قعمز قعمز …
رامي : به
نزار : ايه شنو بتقول
رامي : انت تعرفني انا ﻻ متع حشيش وﻻ سكير … حتى الدخان ماندخنش
نزار : ايه عارف
رامي : ونصلي الحمدلله غير الوقت جابني للخدمة تحت اﻻستاد بلقاسم الحبيب بسبب ظروف العيلة …
نزار : به
رامي : وانا عيلة معروفة
نزار : ايه عيلتكم ماشاء الله الحق
رامي : المهم نخش في الموضوع طول
نزار : تمام
رامي : انا … نبي اااا …. نبي نتقدم ل وخيتك …قصدي بنت خالك ..بنت خالتك ايواه
نزار بصدمة : ضرسي !
رامي : نعم ؟؟
نزار : ﻻﻻ شي …
{ماكنتش حاط هالشي فبالي بس والله رامي شاب كويس الحق ونعتبر فيه زي نفسي }
رامي : بالله عليك ماترفضش انا برغم ماشفتهاش اﻻ مرتين يوم فتحتلي الباب ويوم متع وقت بوها بياخدها …. ومافكرتش فيها اﻻ بالحﻻل وقداش ليا بنتقدم لكن خفت ترفضني بسبب خدمتي
نزار : شوف يارامي انت شاب ماشاء الله عليك الحق … ادب واخﻻق وفي نفس الوقت امين وتريس ينعبا عليك
رامي : نفهم من كﻻمك ان موافق
نزار : بشرط
رامي : اكيد شنو شرطك
نزار : اتسيب خدمتك عند بلقاسم الحبيب او اي عند شخص اخر … وتبدى تخدم اي خدمة تانية
رامي : والله نتمنى اليوم قبل غدوة لكن حالي حال هالشباب مانقدرش انسيب اﻻ لما هوا يستغنى عليا
نزار : المهم النية واردة انك معش تبي تشتغل
رامي : ايه اكيد
نزار : تمام … وهوا هدا اللب نبي نوصله … وتو انكلم العيلة ونشوف البنت و نرد اعليك
رامي : تمام في انتظار ردك … نستادنك توا
نزار : تفضل
{ضرسي بيتجوز هههههه اكيدة حتفرح بهلخبر العقبة لخواتي يارب خلي نتصل ب امي ونقولها ماشي بنكلم بو البنت}
09287037**
خ رقية : ايوه نزورة
نزار : مساء الخير يمى كيف حالك
خ رقية : باهية …الحمدوله
نزار : شن بنقولك يمى
خ رقية : قول
نزار : انا توا ماشي بنكلم بو البنت اللي نبيها … كان وافق بنبعتك انتي وصفاء يوم تاني
خ رقية : بش النساوين يمشوا قبل
نزار : ماهو يمى نبي نسئله مانبيش تمشي ويردوك
خ رقية : به خﻻص برا وقولي شن يصير
نزار : ان شاء الله … اه حقا
خ رقية : شنو
نزار : عندي موضوع حلو شبوب اتقدم توا ويبي يخطب قتله نكلم العويلة قبل
خ رقية : روروري قولي منو بيخطب
نزار : وقت انروح نحكيلك شاب كويس ومﻻخير
خ رقية : باهي ماتتخرش
نزار : ان شاء الله … هي سﻻمات
خ رقية : ف امان الله
صفاء : شن فيه يمى اتزغرطي
خ رقية : جايينكم خطابة
صفاء : بجديات يمى … تعالي يالبنى يامروة اتعالوووو
* جو مروة ولبنى ويتسائلوا شن فيه شن فيه
صفاء : امي قالت جايينا خطابة
مروة : بجديات بجديات يمى
لبنى : خطابة !
صفاء : ان شاء الله ليا يارب
مروة : عينك ليا انا
خ رقية : ارزنوا بﻻ خفة انتي وياها
صفاء : به منوا قولي وجاي عن طريق منو يمى
خ رقية : جاي عن طريق نزار .. شوره واحد من صحابه
مروة : ان شاء الله طرف ياربي
* الوحيدة اللي مش معدلة عالموضوع هيا لبنى … وقفت على الروشن وقعدت اتفكر في نوار يخطب فيها وعرس وعالم حايس *
نزار : السﻻم عليكم
بلقاسم : وعليكم السﻻم ..
نزار : كيف الحال استادي
بلقاسم : الحمدلله
نزار : استادي نبيك في موضوع شخصي
بلقاسم : وشن هوا
نزار : نبي نخطب …والبنت اللي بنخطبها اماليها مش حيوافقوا … فانبي منك يااتجي معاي ياتبعت حد معرفة يكون يعرفك ويعرف بو البنت
بلقاسم : عيلة منو هما
نزار : مصباح فﻻن
بلقاسم : والله ماغريب عليا الاسم
نزار : بالله عليك على طول هالسنين اللي خدمتهم عندك وكفائتي فيها طلبي بسيط بس هالبنت والله رايدها وماقادر انعيش من غيرها
بلقاسم : تم … كلمة مني وكلمة راجل ماتكون اﻻ ليك هالبنت وليك انت بس مش لغيرك
نزار : والله فرحتني الحق …
بلقاسم : لكن مصباح فﻻن والله مار عليا تقريبا عمت واﻻ خالت مكرم متجوزة هالراجل …
نزار : من مكرم
بلقاسم : مكرم اللي يشتغل تحتك … هوا قال بيجي ..وقت ايجي نزيدوا نسئلوه
نزار : به
*طق طق طق
بلقاسم : ادخل
مكرم : السﻻم عليكم …
بلقاسم ..نزار : وعليكم السﻻم ..
بلقاسم : جيت ف وقتك
مكرم يشوف لنزار بنظرات كره متع شن ايدير هدا اهنا وقال : ان شاء الله خير يااستادي
بلقاسم : تعرف عيلة مصباح فﻻن
مكرم : ايه هدا راجل عمتي عﻻش
بلقاسم : تمام وكويس بكل … معناها محلولة يانزار..مكرم هوا اللي حيمشي معاك
مكرم : وين
بلقاسم : بش يخطب بنتهم
يتبع……
لقراءة الجزء التالي : الجزء السادس والعشرون من رواية عاصفة الصمت
لقراءة الجزء السابق : الجزء الرابع والعشرون من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
