وفي الجزء الرابع عشر من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء الرابع عشر من رواية قد كفاني
قولتا لي مثاني الليلة بمشي لي ناس خالتو اميمة لانو ياسر قال لي امي وجمان عيانين خلي بالك لي الأولاد انا بإذن الله ما بتاخر لانو ماشة المقابلة بعد ياسر يجي من صلاة الظهر قالت لي خلاص تمام طلعتا ومشيت ناس خالتو اميمة وكانت عندها ملاريا كفرت ليها وقالت لي امشي لي الصيدلية جيبي لي الدواء جمان قالت ليها انا بمشي قولتا ليها يا خالتي ما تشتغلي بيها انا بمشي اجيبو لك وبالفعل طلعتا وصلتا الصيدلية وكانت مزدحمة شديد قعدتا منتظرة وبعدو ياسر اتصل علي انتي وين؟ قولتا ليهو في الصيدلية عاوزة اجيب لي خالتي الدواء قال لي خلاص انا جاي عليك قولتا ليهو خلاص تمام بعد دقايق وصل وقال لي انتي بتكوني تعبتي من قبيل منتظرة الصف ارح انتظري في العربية انا بجيبو وبجيك قولتا ليهو ما تعبتا اصلا جيت هسي قال لي ما تعاندي عشان نستعجل نصل الدكتور قولتا ليهو خلاص تمام وطلعتا على العربية ياسر اشترا الدواء ورجعنا ناس خالتي لقيتا لسه محمومة عملت ليها مكمدات وجهزت ليها مديدة دخن وبعدو طلعنا مشينا الدكتورة بعد دخلتا عليها قالت لي احتمال كبير توضعي بعملية ياسر قال ليها مافي طريقة للولادة الطبيعية قالت ليها مافي طريقة والأسبوع الجاي تجي للعملية ياسر عارف كمية خوفي من العمليات المهم طلعنا وانا طول الطريق ساكتة وقف العربية قولتا ليهو ليه وقفت؟ قال لي ارح انزلي نزلتا وانا ساكتة دخلنا حديقة اشجارها خضرة بطريقة مبالغة فيها وفي الإتجاة الشمالي فيها زرع شكلو جميل شديد وفي اتجاه الجنوب في البحر يعني منظر يرد الروح ياسر قال لي اتفضلي قعدنا في الأرض قال لي يا مهجة انا عارف انك بتخافي من العمليات لكن مافي حل غير كدا لازم تتشجعي وانا ح اكون معاك خطوة بخطوة بس انتي ما تتوتري وما تشيلي هم قال لي دقيقة هسي بجيك ومشى انا قعدتا بتأمل الطبيعة ونسيت كل همومي بعد دقايق جا قال لي اتأخر منك؟ قولتا ليهو ايوه
ضحك وقال لي بعتذر يأخ تكبري تنسي 
اتفضلي يا غالية 
قولتا ليهو دا شنو يا ياسر !؟ قال لي الناس بتقول شكرا يا غالي من غير ما تعرف انا جايب ليهم شنو ضحكتا وقلتا ليهو بس انا ما زي باقي الناس والكلام دا متفق عليه من قبل ياسر صح ولا ما غلط 
ضحك شديد وقال لي يحفظك لي يا سيدة ياسر قولتا ليهو جمعا يارب قال لي ممكن تفتحي الهدية وتديني رايك فيها مع انها ما قدر المقام ؟؟ قولتا ليهو اي شئ منك مهما يكون منك حلو وفتحتو لقيت جايب لي كتاب هدية ودفتر لونو اسود وقلم بكتب باللون الذهبي على الورق الأسود عايت ليهو وقلت ليهو يأخ الهديه جات في وقتها دفتري اتملا تسلم لي يأخ قال لي اصلا عارف انو دفترك اتملا وحاليا قاعد معاي بالجد انا الدفتر دا بحبو شديد لانو مسجله فيهو كل زكريتنا الحلوه وبعدين بتكتبي فيهو خواطر راقية بتدخل القلب 
قولتا ليهو شكرا دا زوقك بعدو رجعنا البيت لقيت الأولاد بقرو مثاني جهزت الغدا مشيت غرفتي استحميت وجينا اكلنا ريتال قالت لي يمه المولود الجديد ح تسميهو منو؟ قولتا ليها وانا بعاين في عيون ياسر إسألي ابوك ياسر قال لي المره دي برضو لك حرية الإختيار رئبال قال ليهو تسمح لي اسمهو انا قولنا ليهو ما عندنا مشكلة قال بإذن الله لو ولد تميم الدار لانو اكمل لينا فرحتا بجيتو لو بت ح اسميها آمال على حبوبتي يأخ انا فرحتا شديد زوقو عجبيني وقلتا ليهو جميل شديد وبقى على تميم لو ولد وآمال لو بت ومر الأسبوع والليلة يوم العملية مهاد ومثاني وخالتي اميمه وجمان كلهم جو سألت من أريج قالو لي مشت تجيب احمد من المدرسة وياسر واحمد وعمو عبدالله وأنس كلهم قاعدين رئبال قال الإ يجي معاي اما ريتال خليتها مع رهف وباقي الأطفال وانا داخله على الغرفة ياسر كان بتطمن فيني بس انا قلبي انقبض مني قولتا ليهو ياسر اعفي لي لو يوم قصرت في حقك وخلي بالك لي اولادي قال لي ما تقولي كدا وما تخافي هسي بتتطلع بإذن الله وتبشريني بمولودي قلتا ليهو ان شاء الله دخلتا الغرفة ………..
من جانب آخر نفذي كلامي بالحرف ومافي زول ح يشك فيك اخدي دي (بتعرفوا لي قدام دا شنو ) وبيها بنتهي شغلك وببدا شغلي
=انا خايفة شديد يأخ انت متأكد مافي طريقة غير كدا
_يا زولة انتي مش وافقتي انك تنفذي تاني ما في طريقة لي التراجع
=خلاص اديني ليهو
(وجات على المستشفى الفيها مهجة )
نرجع لي ناس العملية رئبال قال كنت خايف شديد مع اني ما عارف بحصل شنو بس خايف لانو ابوي كان خايف شديد مرت ساعة وبعدها الدكتورة طلعت وقالت لينا مبرووووك عليكم انا جيتا جاري وقلتا ليها اها امي جابت شنو؟ وابوي وناس خالتي قالوا ليها مهجة كيف؟ردت علينا كلنا وقالت لينا جابت بت وحالتا مستقرة شديد اول حاجة سمعتها زغروتة حبوبة وحمد ابوي شوفتا بكى خالاتي بدموع الفرح كنت حاسي بأمن كدا ما طبيعي فرحه لا توصف بدينا انا وابوي نوزع في الحلاوة انا لفيت المستشفى كلها ووزعت لي كل الناس رجعتا المكان القعدين فيهو ناس ابوي وقلتا ليهو عاوز اشوف امي ابوي قال لي حظك شين هسي انتهى وقت الزيارة ودخلنا عليها كلنا وكانت مبسوطة بالمولودة وسألت منك قلتا ليها بوزع في الحلاوة قولتا ليهو يعني هسي انا ما بقدر ادخل اشوف امي واختي ابوي قال لي الإ تنتظر وقت الزيارة التاني سكتا ساي ومشيت على غرفت امي كان معاها ممرضة منقبة قلتا بعد تتطلع انا بدخل براحه وبسلم على امي واختي وبعد طلعت كانت بتتلفت زي الخايفة انا وقفتها وقلت ليها امي كيف؟ وعاينت ليها ما ردت علي ومشت سريع دخلتا غرفة امي لقيتا نايمه عاينت لي اختي لقيتا بتبكي قولتا ليها آمال الحلوه ليه البكى؟ اسكتي عشان ما تزعجي امي مشيت على امي ومسكتا يدها وقعت مني قلتا بتكون نايمه طلعتا براحه عشان ما اصدر أي إزعاج وطوالي مشيت لي ابوي وكنت فرحان اني قدرت ادخل واشوف امي ابوي قال لي لقيت امك كيف؟ قولتا ليهو كويسة بس لمن رفعتا ليها يدها وقعت مني وما سلمت علي ولا فتحت عيونا ذاتو ابوي قال لي بتكون نايمه بس انا ح ادخل إتأكد اذا الدرب اذا انتهى ابوي دخل غرفة امي بعدو طلع ومشى سريع لي الدكتورة وبعدو الدكتورة جات مسرعة شديد ودخلت الغرفة ونحنا دخلنا وراها عاينت لي الدرب وشوية بقت تتحرك بسرعة مشت على الدرب وطلعتو بسرعة شديدة وقالت طلعو لي الناس ديل سريع ونادو دكتور مبارك والوحدة الطبية قالت لي ابوي استعجل مافي زمن جيب النقالة شويه ونحنا طلعنا من الغرفة ابوي جرى نادى دكتور مبارك الدكتور والوحدة كانوا بتحركوا بطريقة توتر وبتكلموا انجليزي طلبوا من ابوي يتصل بأمن سريع ويمنع دخول أو خروج أي زول من المستشفى ابوي ما كان مستوعب بس عمي احمد وعمي انس عملوا كل حاجة طلبوها منهم الدكاترة اخدوا امي لي غرفة الطوارئ وحالة العائلة اتبدلت من الفرح والزغارد لي توتر ما معروف نهايتو شنو؟ ابوي قال الإ يدخل مع الدكاترة الغرفة الإ مسكوهو واعمامي انا كنت براقب في دا كلو من غير ما افتح خشمي ابوي كان ببكي والله من ما شفتا دموعو ما قدرت اسكت وخالتي مثاني كانت بتشهق من كتر البكى مرة ساعة واتنين وتلاتة ساعات ومافي أي زول طلع من الغرفة بعد الساعة الرابعة طلع دكتور مبارك وقال لينا بعبارة بتحمل حزن حياتنا البركة فيكم البقاء لله وحده انا كنت حاسي نفسي زي البحلم قعدتا في مكاني وبكيت لمن حيلي مات خالتي مثاني ما اتقبلت الكلام وبقت تجري وتقول ليهم زحو لي انا عاوزة اموت عمي احمد قدر ما حاول ما قدر يمسكها قرا ليها قرآن برضو ما في أي استجابة وبقت تقول كلام زاتو ما مفهوم ومرة تضحك ومره تبكي وحالا يحنن العدو عمي احمد وبمساعدة من ابوهو شالوا خالتي ومشوا بيها البيت اما ابوي كان ببكي بصوت عديل كدا كان بصبر فيهو عمي انس بس الدكتور طلب منو يلحقو سريع ابوي وعمي مشو على الدكتور انا كنت ببكي شديد وبعيد عن كل الناس حبوبتي كانت بتكورك وجمان كانت بتبكي بحرقة اما خالتي مهاد كانت اكتر واحدة ثابتة كانت شايلة اختي الصغيرة وبتسكت فيها اليوم دا كان اصعب يوم مره على حياتي امي العمرها ما بعدت منا ولا دقايق الليلة فارقتنا
من جانب ياسر كان اصعب وقت مر علي لمن دكتور مبارك قال لينا البركة فيكم يأخ انا فقدة المنطق بقيت زي الأهبل ببكي وقدر ما حاولت اتمالك نفسي ما قدرتا كنت بتذكر كلامها ابتسامتا حركاتنا ما قادر استوعب الله يصبرني ويديني القوة البقدر اتحمل بيها فراقها الدكتور بعد ناداني عبد الكريم صحبي وصل من السفر وجا دخل معانا انا وأنس لي الدكتور دكتور مبارك قال لينا اتفضلوا وقال لي انس اغفل معاك الباب قال لينا البركة فيكم بس حابي اقول ليكم زوجتك يا ياسر ما ماتت زوجتك للأسف قتلوها انا الدم طار من عيوني وقولتا ليهو وانا ضاغط على اضراسي وفيني خلصت قلتا ليهو انت بتقول في شنو!؟ قال لي والله دا الإتضح لي هي كانت حالتا مستقرة حتى دكتورة نسرين قالت ما عندها أي مشكلة بس بعد زمن معين في زول دخل عليها وكان معاهو سم السم دا عمل على تفريغو في الدرب عشان ينتشر سريع والزول دا عارف انو اذا جزو بسيط منو دخل الجسم مستحيل الزول بعدو يعيش نحنا اجتهدنا مع انو متأكدين انو السم اخد مواقع مختلفة في الجسم وأكد لك كلامي الزول دا ما بعيد منكم لانو ما اخد زمن عشان يتحرك وحاليا جاري البحث عنو انا سكتا منو وقلتا ليهو ما تفتش عنو وألغي موضوع الشرطة دا عبد الكريم وأنس قالو لي انت جنيت ولا شنو ؟ خلينا نعرف ما اتكلمت معاهم وطلعت وقلتا لي الشرطة شكرا لكم الموضوع انتهى امي قالت لي مهجة الحصل عليها شنو ؟ قولتا ليها ماتت قدر الله قولتا لي عبد الكريم وأنس اعملو نفسكم ما عرفتوا أي حاجة وخلو بالكم مهجة ما قتلوها مهجة ماتت انس قال لي يا زول انت ما نصيح ولا شنو؟ قولتا ليهو اعمل البقولوا لك وما تتحقق معاي فاهم انس سكت مني وكان مقدر ظرفي طلعتا منهم وخليتهم في حيرة وانا براي في حالة حيرة وشتات وألم وضياع مشيت غرفة مهجة وكنت منهار شديد قعدتا وحضنتها علي وبكيت وبعدو امي جات حضنتني وكان معاها رئبال وكان وشو متغير من من كترت البكى اخدنا مهجة ومشينا بيها البيت ريتال اول ما دخلت جاتني تبكي وقالت لي ابوي عمي احمد اخد خالتي مثاني وسافر بيها الخرطوم وقال لي اقول لك خالتي محتاجة لي علاج مستعجل اعفي لي يا صحبي ما وقفت معاك ابوي خالتي ليه بقت كدا انا في اللحظة دي حسيت في مصيبتين وقعت في راسي الأولى مثاني وحالتا الماشه في تدهور وريتال اللسه ما عرفت بخبر وفاة امها شوية كدا شافت امها وماشين بيها على الغرفة قعدت تبكي وتقول لينا انا عاوزة امي تميت الغسل وختيناها في العنقريب ورفعناها في العربية رئبال ركب معاي الرجال كلمهم قالوا لي انزولو بس هو كان ثابت ومصر انو يمشي معانا وصلنا المقابر في نفس المكان الإندفنت فيهو خالتي امال وعمي محمد ورهف الليلة الدور جا على حياتي وحبي واكتر انسانة بتفهمني وصلنا وبدينا نحفر انا ما كنت قادر عشان كدا الرجال الباقين حفروا وجات لحظة الفراق بعد ما استوت الحفرة أخدتها وختيتها في القبر لا انا ولا رئبال استحملنا رجعتا ورا ورئبال كان ماسك فيني ومغمض عيونو انا دموعي ابت تقيف تمت مراسم دفنها وناس رجعوا طلب من الرجال يرجعوا رئبال البيت انا قعدتا في قبرها بدعي ليها ومشتاق اسمع صوتها
من جانب رئبال انا قررت اكون قوي لانو عندي اخواتي في مسؤلتي وخالتي ما عارف الحاصل عليها شنو بعد الرجال قالوا عاوزين يمشو بي امي انا ركبت معاهم كلهم كانوا متعجبين وقالوا لي ابوي ما يمشي معانا ابوي ما اشتغل بيهم وصلنا المقابر والرجال بدو يحفرو ابوي عيونو كانوا حمر شديد رجال حموهو يحفر وحفروا عنو عمي انس كان ملازم لي ابوي بس ابوي ما شغال بي زول ولا شايف المعاهو منو والمامعاهو منو تم الحفر وابوي وباقي رجال نزلوا امي في الحفرة انا ضعفتا شديد وما قدرت اعاين لمن كانوا بنزلوا من فوقها التراب حضنتا ابوي ومسكت في جلابتو ودعوعو من شدة ما كتيرة جزو منها كان بنزل لي في راسي بعد فترة من الزمن الرجال قالوا رجعين ابوي وصاهم علي نحنا رجعنا البيت وكان في ضيوف كتار مشيت على المكتبة وبقيت اتذكر امي وقريتا حاسي الكلام دا كلو كذب نفسي امي تتطلع من بين حيطان المكتبة دي وتقول لي انا كويسة مافي داعي لي القلق زي كل مره دموعي مالية خدي شالتني نومه من غير ما احس مرت ايام العزى الأولى والضيوف بقو يخفوا وابوي نهائي ما منو خبر
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء الخامس عشر من رواية قد كفاني
لقراءة الجزء السابق : الجزء الثالث عشر من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
