وفي الجزء الرابع من رواية اصبحت حياتي للكاتبة زين الشريف يا تري هل سيحدث شيء يقلب موازين الرواية رأساً علي عقب ام ستسير الأمور بشكل طبيعي ؟ دعونا نعرف إجابة هذا السؤال في السطور التالية بإذن الله .
الجزء الرابع من رواية اصبحت حياتي
-نبدو في مراد وهله عشان نشوفو شن صار معاهم
مرت الليله الي من اشد الليالي ع مراد وعيلته جت اختهم تعيط وعزقت أطفالها خذوهم الجارات
ينعلي ياخوووي ينعلي طفل الله لا يسامحهم ربي يوريني فيهم يوم ينعلي مزال طفل ينعلي ربي يصبرنا يا نعلي ياماما ينعلي يشيل في عيالي ويلعب معاهم الله لا يسامحكم ياعيت عمي وعيطت هي وامها لين بطلو ….
الفراق وااعر ….
وفجأه زاد الصوت وبدا رصاص والدنيا شالت :!!!!!
طبعآ اهل ياسر مش ناوويين خير وبياخذو حق وولدهم يلي هو باطل مش حق مكفاهم الارواح البريئه يلي راحت…………
جت الشرطه وخذوهم،*
واب مراد :لمو حوايجكم وهي اطلعوا معش نقعدو هنااااا هياااااا
وامهم مش قادره تلم شي لمو جارات ونهله بنتهم حوايجهم الخاصه وعدو مع بعضهم مراد يسوق بيهمم هو وبوه جنبه وأمه وأدم في الخلف …
اما نهله روحت بغصتها لحوشها وتبكي ع فراق خوها وبعد هلها ….
مراد يسوق ومهمش عارفين وين يمشو امهم من درنه بس ملهاش حد في درنه كانت وحيدة هلها وماتو وباعو الحوش عندها خال واحد بس قاعد في مصر يعالج هو وهله!!!!
مراد وهو ماشي اذكر انه عنده صديق ع نت
من البيضا يعلقو البعض ومرا جا زارهم في طرابلس مراد قام بواجبه وطبعا صاحبه هذا هو نفسه علي صاحبنا٠
مراد: ماشي ومكسوف كيف بيقولها ل علي قال نكلمه لما نهلب نكلمه
____________________
اما أستبرق من يوم عرفت ان أخ نعيمه يبي يخطبها وان نعيمه تبي تحكي لبوها وأكيد بوها مش ح يرفض ل نعيمه طلب
من هذاك اليوم وهي عايشه في عالم اخر
لا تاكل لاتشرب وحيلها مهدود مشت للشغل وهي واصله حدها مش قادره توقف..بس قاومت ومشت …..
___________________
اما علي زي العاده قام لي شغله وهو بادي يتعايش مع الوضع بس معاملته تغيرت مع اي بنت يشوفها وقام يتخزر للبنات ومعش تما علي تاع زمان الحنون
انقلب علي قاسي وجاف لا يدوي لا شي
مشا للعمل وروح وهو تعبان ومعاه صاحبه كان علي ماشي ع رصيف وجنبه صاحبه وكل سياره فيها بنات يقول ل علي: بالله خليني نجي نا ع طرف وراص عليوا والله تخليني
وطبعآ
علي بكُل برود :لالا وانت خفيف متحمل البنات بكل 
صاحبه: يرا مبردك تي يخطمن طروف ويذوبن فيك وانت ولا شي
حظوظ ياCعلي: ميهمنيش
وصبو عند بداية شارعهم وقعدو يسهرو مع بعضهم صاحب علي: شوف شوف في حافله جايه من بعيد..
علي :وباهي عادي ياراجل ديما نشوف فيها تجي وقت ما انا نروح من العمل
صاحبه: ومن تنزل منها
علي: والله ماني عارف منبحتش اصلن..
صاحب علي :توا نشوفو توا وعلي كان قريب بكل من مكان الحافله لما توقف
وكانت في الحافله استبرق تسكن قريب من علي استبرق حاطه يدها ع راسها وتحس الدنيا تبرم بيها
صاحب الحافله: استبرق نكلملك هلك
استبرق؛ للالا …
تمام نقدر ننزل ودرست الحافله وصبت أستبرق وفتحت الباب وفجأه معش شافت شي وبدت تميح
صاحب علي شوف عليك المطرفه 
علي ألتفت يبي يشوف عشان يتهزا ع صاحبه
وفجأه اطيح عليه استبرق (علي) مسكها بيديه لثنين ومتفاجئ شن اللي صار وفجأه جت عينه عليها وكيف
هي جمييله وطاح حجابها رفعه لها نزل صاحب الحافله بيكلم بوها مع جيت نعيمه من شغلها شافت اللي في خاطرها!!!
وصورت أستبرق وهو ماسكها علي
التخلف
بعدها جاته هذي بنت جيراني كنها
صاحب علي: مش عارف طاحت توا شكله هبوط …
اما علي كان مصدوم من جماال استبرق وانها كيف الريشه وهو ماسكها وقعد مذهول من اللي صار شالوها لي الحوش وصفتلهم نعيمه المكان كانو يمشو وعلي عيونه ع استبرق وفجأه استبرق بدت تفتح في عيونها شوي شوي هنا علي زاد تعجب اخرى من عيونها االي زي الحُريه وكيف جذابات شال عينه من عليها وقعد يستغفر في ربي
صاحب علي: قاله خششها لجوا لحوش نرجاك برا وهمسله في وذنه يا ولد المحظوظه حظك
علي: تخزر فيه وخش يبي يحط استبرق في مدخل الحوش
نعيمه :لالا سلم وليدي خششها لجوى معندنا من يشيلها الله يربحك نتعبك وكانت مشغله الكامييرا
علي: تفاجأ كيف تحكي هكي وهي جارتهم
وفتحت الباب وهنا علي تفاجأ اخرى
وعلي فعلا خششها وصبت نعيمه جنب الباب وبدون ماينتبه علي نحت الحجاب من راس تستبرق وانسدل شعرها اللي زي خيوط الحرير …
علي شال عيونه بسرعه من ع شعرها وقعد يستغفر في ربي
وشالها وين يعمتي؟؟
نعيمه: فوق الله يربحك في غرفتها
علي قلبه قعد يرجف وهو راقي من دروج نعيمه تصور طبعا
علي خاف لان نعيمه مرقتش في جرتهم قاللها وين دارها ياعمتي قالتله اول وحده هذي وفتح علي الباب وخش يحط استبرق وفعلا خش قرب للسرير وحط استبرفق وشعرها نزل علي سقعم تصبايته عشان يحطها كويس اكتشف انه وقف ع شعرها ‘!!
ياربي شن درت ناا معش قدر يسقم حطتها ولا يحول الشعر من تحت كراعه نزل بصعوبه حاول ينحيي الشعر وفعلا نحاه وحط استبرق وفجاه لقا روحه سارح فيها وفي جمالها طلع يجري ومعش التفت ابدآ طلع لقا نعيمه تحت تبي شي اخرى
نعيمه :لا سلامتك سلم الرجاله وفي ميزان حسناتك
علي: سلمك وهو مستغرب كيف تحكي هكي وتحل الباب وتسكره وهي جارتهم وطلع يجري..
صاحب علي: شكلك لقيتها سمحه كسدت عليها..
علي: بلاش بصاره زفته تي هذي عائله غريبه هيا هيا نمشو نفتكوو منهم
نعيمه: طايره من الفرحه عشان مسكت دليل ع استبرق
وأستبرق مسكينه مافقات وهي مغمى عليها من كثر الارهاق
جا بوها: وين استبرق
نعيمه: راقده في غرفتها
بوها :تمام خلوها راقده
……………………………….
علي طلع من الشارع مشا لحوشهم وهو مشقادر يشيل استبرق من راسه ومستغرب من نعيمه كيف فتحتله الباب وهي جارتهم
خش طوح روحه ع سرير وهو يفكر شن الملاك اللي طاح بين يدي …و قعد يفكر بعدها فجأة جت صورت وسن في راسه…..
كره كل شي وقعد يقول اكيد حتى هي زي وسن اكيد حتى هي بياعه اصلن كلهن زي بعضهن ورد زاد كرها للبنااات وتما جاف 
____________________
مراد : ماشي في الطريق بدون ولا صوت وشهقات امه معبيا السياره اما ادم كان ماسك روحه ومش ويصبر في امه
اما بوهم منهااار مش قادر يصدك اللي صارلهم
ماشيين والهم راكبهم ومراد ماشي في سرعه خياليه ميبيش دموعه يطيحن
ومر يوم كامل وهوم في سياره
لما قرب يوصل رن على علي وهو مكسوف شن بيقوله
علي: ألو اووو مراااد والله لنا زمان ماشفنا رقمك
مراد: معليش ظروف والله معاد فضيت
علي : ولا يهمك ياصاحبي اهم شي تكون بخير
مراد: الله يسلمك وينجيك
ياعليوا نبيك في موضوع وملياش غير الله ثم انت
علي : وهو مستغرب خير انشالله واللي تبيها نا حاضر يسد انك أستقبلتني يوم اللي ملقينا حد نا خوي
مراد: معنديش فيها جميل ويعلم الله بنيتي
وحتى نا جايك على نفس الموضوع
علي: مايهمك بكل غير قولي بس شن في
مراد: صارلنا موضوع نا وهلي وتوفى خوي
علي: لا حول الله الله يرحمه والبركه فيكم
مراد: البركه في سيدنا محمد وامه تسمع وهي منهاااره…
اسمعني ياخيي راه نحنا صارلنا موضوع واضطرينا نطلعو من طرابلس بكل ونحنا منعرفوش حد خطرت علي انت طول والله مكسوف ونا نحكي معاك لاكن ملي غير انت بعد ربي..
علي: أكيد بنخطر عليك نا وقتلك راه نقولك من توا ان الموضيع هذين مش بينا وفكني مالرسميه ومرحبا بيك وبهلك وحوشنا هو حوشكم بدون مانعرف شن صار وعقولت العزوز لما (اطيب النيه البيت يوسع ميا)
مراد: سلمك وانشالله ربي يحفظك ويحفظ العزوز انشالله وربي يقدرني نردلك هالجميل ياطيب..
علي: لا جميل لا شي متقولش هكي ونرجو فيكم انشالله توصلو طيبين
مراد: انشالله وربي يحفظك ياطيب
علي هيا بسلامه وسكر الخط
وعدا الوقت بسرعه ووصلو مراد وعائلته لحوش علي ورحبو بيهم هم والعائله وكأنهم أقارب وعلي كان موصي امه انها تهتم بيهم لانهم صبوله لما بوه مرض ومشو بيه لطرابلس
مراد: حضن علي
علي: الف الحمدالله على السلامه نورت الشرق ياخيي
مراد: الله يسلمك منور بهله وانشالله نكونو خفاف ضراف عليكم وسامحونا على هالجيه
علي: فيش تحكي انت حوشنا واحد والبركه فيكم عزانا واحد وانشالله ربي يسكنه فسيح جناته
مراد: امين يارب البركه في سيدنا محمد
وعلي جا سلم على ام مراد خير ياأمي البركه فيك عقبلك طولت العمر وأعتبريني نا وليدك واللي تبيها غير شاوري عليها
نجمه ام مراد: عيونها تعبو دموع يسلمك ياوليدي ربي يحفظك ويطول في عمرك
علي: سلمك
مراد: شن تبي تسرق امي مني كان يبي امه تبتسم
نجمه: انتو لثلاثه عويلتي وربي يصبرني ع فراق وليدي
مراد وعلي امين ياارب وسلمو باقي العائله على بعضهم
وتعشو مع بعض ..
كل شي ع النيه مراد طلع من حوشهم وهو مش عارف وين يمشي بس ربي رزقه بعلي لان مراد طيب ونيته طيبه ….امشو بنيه طيبه محد واخذ من الدنيا حاجه
وبدت حنان تبي تعرف ع نجمه وفعلا تعرفو وطلعت فيه معرفه قديمه بين الامهات …
وتمن يحضنن في بعضهن لانهن وهن صغار كانن يلعبن مع بعضهن
ومرن الايام وتمو شبه عائله وحده ويساعدو في بعضهم…..
زاهيه اخت علي الكبيرا عندها اربع اولاد بنتين ووليدين سهام واحمد عايشين عند عيت جدهم مع علي
عشان مايسيبو جدهم وجدتهم بروحهم وكبرو عندهم وهم اللي مسؤولين عليهم
وكانو يجهزو ل فرح احمد و فرحانين وقررو يشاركو الفرحه هذي مع عائلة مراد عشان ينسوهم الي عاشو فيه ….
وفعلا تمو يمشو مع بعضهم لسوق ومرن الايام وفاتو أسبوعين…
وجا وقت الفرح وكانت العروسه من درنه
وعلي سلم كل شي في يد مراد وخلاه يحس وكأنه خوه جديات وكأنه الفرح لهم
وجا وقت الفرح ويهيجو ونجمه ربي عطاها الصبر تو تمثل قدام الناس انها صابره وهي كل ليله ع مخدتها تبكي
والكل في قاعة الافراح يجارو وعلي ومراد حايسين يبو يعشو الضيوف بدري عشان يجيبو العروس
العروس كاننت صغيره في العمر
علي: هيا يا أمي نبي نعشي الرجاله ورانا سيارات بنضموهن وحوسة الزفه ونبي نكمل بسرعه قبل يجو أصحاب أحمد عارفهم يمعيلو
حنان امه : حاضر ياعليوا وسع بالك متركبش علي راه ننسى شي حاجه
مراد: خليهن براحتهن وهيا نحنا نبدو نضمو في سيارات عبال ماجا العشا
علي: هيا
حنان: هيا عاونيني يانجمه خلينا نسقدوهم
نجمه: انتي حطي وماعليك في الباقي تريحي من ناحية القاعه وعشا الصبايا
حنان: الله لا يغيبكم والله لولاكم مش عارفه كيف نديرو
نجمه : غير بلا حركات نحنا واحد وانتو اللي ماقصرتو ربي يتمم هالفرح على خير
حنان: انشالله يارب
_____________________
اما سيرين كانت حايسه في الوقت هذا لان العروس تكون بنت خالها وصديقتها وكانت هي الكبيرا في الشله
شيماء: أسو طالعه مشاءالله في الأحمر ماخايل الا عليك ينعلي خايفه عليك
سيرين: نجيني ياربيغير بلا حركات محد مدورني٠
غير بلا حركات محد مدورني٠غاليه بنت خالتها: صاح يا حبيبتي العين حق وكلنا طالعين نهبلوو ولله
شهد بنت خالها: صاح والله
سيرين: غير هيا اطلعن تسحابن روحكن كيم كرداشين وأخواتها
غاليه وشهد: هههههه
شيماء: وأحسن منهن هن فاسقات
ههههههه ونقلبت ضحك٠
جت أسماء ام سيرين طيح سعدكن تسهوكن اصلن نا قلتها قلت لكيد يسهوكن
كلهن خايفات من اسماء كانت واااعره بكل
سيرين: ماما كنك العشا وعشيناهم العرب والصاله نضفناها وبخرنا وكملنا كل شي
شيماء: صاح ياعميمه اسماء كملنا حرام نبحتو لرواحنا
أسماء: مشاءالله على بنياتي مغير نقوللكن عشان تكملن العرب شوي ويطلعو
ربي يحفظكن ارجن نجيبلكن وشق
وجن خوات اسماء كلهن وكانن طالعات ملكات
وصبن مع البنات وطلعن كلهن مرا وحده واسماء وراهن بالوشق خايفه عليهن
وماشيات الله اكبر والقاعه كلها تفرج عليهن وع جمالهن هن والبنات اللي هن غاليه شهد سيرين شيماء
وهن ماشيات فجأه طيح سيرين ودير صوت يضحك
وتنقلب المشيا هذيك كلها ضحككك
وطبعا هن لما يضحكن معش يسكتن
اسماء: يالمرعوشه نقول فيها لكن بلا عرض الناس مش كلهم يذكرو في الله..
سيرين مستمره تضحك هي والبنات
غاده اخت أسماء: صبي يادرويشه العرب تبحت فينا
وصبت وعدن كلهن ودارن جو للعروسه مش عادي بكل
العروس اسمها مريم وهذي اهبل وحده في الشله
لدرجة كل شوي يجنها يفهمنها ماتضحكش وتسهوك
ومديرش حركات الهبال وهي تقول انشاءالله
وطلعو علي ومراد وهلهم في الزفه وكانت زفه ملكيه مراد وعلي دارو جو مش عادي
وطبعآ علي على أعصابه من اصحاب احمد وكل شوي موقف السياره وداير مشكله
ووصلو ل درنه بصعوبه من علي
ولما وصلو نزلو البنات وعلي طبعآ يكره جنس حواء كانت اللي تمر من قدامه يسب قبيلت الي خلفوها وهو عدلي مشيتك يا….
ومراد يهدي فيه …
مراد : علي كنك انت مش هكي راه بشوي بشوي مالكش دخل بيهن
علي: يسقمن مشيت امهن ماشيات في زفتنا معناها يحترمن نفسهن نعرفهن نا الحركات هذين.نعنجد قبيلتهن وخلاص
مراد: باهي وسعلي بالك شوي في الرده نا اللي نسوق وانت تسكره لي فمك هذا مهنيتش العيل ع جوازته كنك انت نكدت عليه وعلى اصحابه بشويش
علي: والله حل انت سوق وانا ملياش دخل ب ام المهزله اللي تسير هذي كلها
مراد: هذا المطلوب
علي: يضحك في ضحكت هزوزه
يتبع……
لقراءة الجزء التالي : الجزء الخامس من رواية اصبحت حياتي
لقراءة الجزء السابق : الجزء الثالث من رواية اصبحت حياتي
للإطلاع علي فهرس اجزاء الرواية : جميع روابط اجزاء رواية أصبحت حياتي للكاتبة زين الشريف
جميع الحقوق محفوظة للكاتبة زين الشريف
