الجزء الرابع من رواية محظوظ ولكن

وفي الجزء الرابع من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الرابع من رواية محظوظ ولكن

فرج:المهم ياندى عندي ليك شاب من اﻻخير ان شاء الله مارتبطيش عاد 
ندى : والله شن بنقولك انا مش مفكرة في اﻻرتباط حاليا
فرج : غير زيدي فكري
عمر سمع كلمة زيدي فكري عرفه ان ندى رفضت…
ندى : ماعنديش خلوق للعﻻقات
فرج : يادرويشة ايضيع عليك راهو
ندى : ههههه مانبيش نرتبط الحق خليني هكي اريحلي ^^
فرج : انا مانصرش عليك وقت ماتلقي روحك مستعدة كلميني راهو الشاب مش متع لعب موضوعه رسمي
ندى : ان شاء الله خير ان شاء الله خير.. هي فرج عندي شوي حاجات بنديرهم تو نهدرزوا وقت تاني
فرج : اووكي تفضلي سﻻمات ندوو
ندى : سﻻمات .
سكر الخط فرج وتلفت ل عمر
فرج:هدا ياسيدي …
قاطعه عمر : مافيش داعي تكمل عارف حظي من قبل مانقولك كلمها
فرج : الله غالب معليشي نصيبات
عمر : عندك سبسي
فرج : من امتى ادخن انت ؟؟؟
عمر : اهو بندخن
فرج : ﻻﻻ فكك منه انا نستنى غير امتى نبطله
عمر : تي هات ياسحنة طايرتلي للمليون
فرج : باهي هاك هي …
خداه عمر وخدي منه وﻻعة ومشي وقف ع البحر..
الصبر ياربي الصبر تعبت انا شن هالحظ ياربي … كم واحدة مشت وخلتني واﻻ صارت حاجة بينا فرقتنا
فاطمة : سامحني عمر طلبني ولد عمي قبلك
نهى : انا مانبيش نسكن ف شقة فوق حوش العيلة ديرلي حوش بروحي
لمياء : انا عرسي السبوع هدا ..
هههه هادو عﻻقة … ووقت وافقت اني نتجوز عن طريق العيﻻت اتسكرت ف وجهي
يارب يارب نترجاك ياموﻻي العالي تقرب المسافات بيني وبين النصيب
>>>اه من ظلم اﻻيام >>>>
عمر : ايوه السﻻم عليكم
خ وداد : وعليكم السﻻم ..كيف حالك عموري
عمر:الحمد لله بخير شن حالك يمى
خ وداد : باهية … عموري وليدي
عمر : نعم
خ وداد : جايبتلك موضوع وان شاء الله ماتقولش ﻻ
عمر : كان موضوع زواج فكينا يمى
خ وداد : يهديك سلم ولدي عﻻش هكي؟؟و ﻻمتى بتقعد عزري حويل
عمر : شن حويل هادي قاعد صغير 32 عام راني مش 49
خ وداد : السنين تجري معش تدري ع روحك
عمر : مش وقته موضوع توا يمى مش وقته
خ وداد : غير اسمعني ياولد …البنت ماتتعوضش وعيلة متسمية
عمر : الصبر ياربي
خ وداد : امشي ياكرعوت امشي تبي تتجوز واحدة تعرفها بتلفون مش خرجك تاخد واحدة عاقلة اصﻻ ….زيد اجري ورا بنات متع تلفون زيد تو ينفعوك
عمر : ﻻ اله اﻻ الله
خ وداد : محمد رسول الله … هيا هي بسليمة
عمر : باهي بسﻻمة

تو والنبي انا ناقصني ! اهانات وكفوف …ماحد يبي يفهمني … احيييه لين ﻻدت عليا دوخة…

بعد شوي جي فرج لعمر وقف بحداه
فرج :ها شنو منو
عمر :شي اهو مكسد
فرج : ماتكدرش روحك تو تحصل واحدة خير منها هالندى
عمر : ان شاء الله …اتصلت بيا امي توا قتلي لقيتلك واحدة وكويسة ومش عارف شنو

خ وداد ل نازك : يبي واﻻ مايبيش بنمشي نخطبله ساده من اطوطيح
نازك : كيف بتخطبيله من غير علمه !
خ وداد : تو لما يشوفها في الرؤية الشرعية تو تعجبه ماينفعش فيه هدا اﻻ تحت امر الواقع …سايرته هلبا

فرج ل عمر : باهي شوفها بالك تعجبك
عمر : ماناخدش بالشكل يافرج… نبي نعرف طبعها افهمني مش شكلها … بالك تمشيش معاي
فرج : والنبي تجوز وخﻻص انت شكله مايمشيش معاك العﻻقات ريحنا تره
عمر : هكي تقول…
فرج : ايه بجديات خلي امك اتم الموضوع
عمر : ياودي مش عارف الحق
فرج : خلي امك تتوكل واتم الموضوع
عمر : وكان نكدت عليا ف القدام وطلع طبعها احرف
فرج : ووووه نرقعوها من جيها تفلقها من جيهة فوتني يا عمر تره درهتلي كبدي تي كلهم اينكدو هما خودلك واحدة والسﻻم
عمر : شن ناخد واحدة والسﻻم هدا زواج مش لعب واﻻ تحسلبه زواج يوم
فرج : اتزوج وخﻻص المهم بنية كويسة وفهمها شن تبي وشن ماتبيش
عمر نفخ الدخان و لوح السبسي وعفس عليه مع نظرة على الجنب وقال : انت توا قاعد اتقنع فيا نتجوز قطوس ف شكارة واﻻه ؟
فرج : مش قطوس ف شكارة ماك بتشوفها في الرؤية الشرعية
عمر : مكلماتك امي فرج ؟؟؟
فرج : ﻻﻻ عﻻش بتكلمني
عمر : هكي ﻻنك جاي تقنع فيا من بعد ماامي سكرت الخط
فرج : تبي الحق ايه كلمتني بش نقنعك
تنرفز عمر من هالكﻻم وقال:هوا هدا اقعدو غير ديرو ف الخطط عليا وكأني عيل
فرج : برا
عمر : احيييه… انحس ب دوخة احيييه الدنيا ﻻيدة بيا معش نفرز ف شي
فرج : بالك هبوط !
عمر : مش عارف …
شد راسه عمر وطاح طول وعرض
فرج : عمر … عمر خيرك ! شنو فيه
وبعد محاوﻻت فاشلة من انه يفيقه رفعه فرج للعيادة وبعد شوي طلع الدكتور
فرج : اه شنو يادكتور
الدكتور : ﻻحظت عليه من قبل دوخة زي هادي
فرج : مش عارف انا اول مرة نشوفه دايخ…
الدكتور : به ويمشي للحمام بصفة مستمرة
فرج : ايه
الدكتور : عموما انا شاك انه عنده السكري بس لين تطلع نتيجة التحليل ونزيدوا نتأكدو
فرج : ﻻ حول وﻻ قوة اﻻ بالله
الدكتور : عندكم حد ف العيلة عنده السكري ؟؟؟
فرج : ايه بوه وجده
الدكتور : معناها وراثة واحتمال شكي ف محله…وان شاء الله ﻻ باس عليه
فرج : الله ﻻ ايوريك باس
ااتكى فرج ع الحيط ووجعه تمر وحظه ….
ياناري ياعمر انحس فيك متخد من حاجة ل حاجة ربي ايكون ف عونك بجديات
“ترن ترن “” رسالة
فتحها فرج ولقاها من ندى مضمونها  فرج بالنسبة لموضوع صاحبك حنوافق لو انه زي ماقلت موضوعه رسمي ونيته شريفة ويبي يجي من الباب 
فرج يتمتم …تي قلتيها المعلومة هادي من بكري ياقردة اهو لين الولد جاه السكر من الهم …

خلي نتصل ب حاتم انقوله >>>الو السﻻم عليكم
حاتم : وعليكم السﻻم
فرج : راقد
حاتم : ﻻﻻ ساعة 12 شن راقد هادي
فرج : باهي اسمع عمر ف العيادة ..
حاتم : عﻻش خيره شن فيه ؟؟
فرج : داخ في العمل فجأة مشي رفعته للعيادة المهم الدكتور قالي احتمال جاه السكر
حاتم : ﻻ حول وﻻ قوة الا بالله …اما عيادة ؟؟
فرج : عيادة تشافين
حاتم : اهو جاي هي … سﻻم

سماح : خيرك شنو فيه
حاتم وقف وفتح الدوﻻب ويبربش يدور ف حوايج محددات
سماح : تي خيرك شنو فيه
حاتم : عمر ف العيادة
سماح : خيره
حاتم : قالي فرج جاه السكر
سماح : يانااااري يوخيتي يوجع
حاتم : اهو بنمشيله توا … راك اتقولي ل امي غير ترعش ف هاليل
سماح : باهي به

بعد شوي فاق عمر ولقي فرج جنبه
عمر : شن صار؟؟ شنو جبتني للمستشفى ؟؟
فرج : ايه…
عمر : تي هيا دوخة مقلقلني اهنا
فرج : ماهو معش فقت
عمر : به هيا بنطلع انا
فرج : غير استنى شوية حاتم جاي
عمر : وقلت حتى لحاتم !
فرج :ايه ﻻزم يعرف
عمر :ب شنو يعرف
فرج : كان … كان ايكلم فيا الدكتور واحتمال …. وقال احتمال فيك السكر
عمر : برا برا بﻻ تسهويك زايد …
…على خشت حاتم
حاتم : اه عمر شن حالك توا
عمر : مافيا شي حالي باهي
حاتم : به شن تقولي يافرج عمر فيه السكر ؟؟
فرج : الدكتور هكي قالي ويستنى ف نتيجة التحليل بش يتأكد وقالي احتمال يكون وراثة من بوه وجده
عمر : بجديات تتكلم فرج ! فكنا من تسهويك
فرج : وحق ربي يا عمر زي مانقولك تو
سكت عمر صمت تام ….
حاتم : ان شاء الله الدكتور غالط
عمر : ان شاء الله خير غير نبي نطلع من اهنا اتغملي من مستشفيات
فرج : به تمام روح انت للحوش مع حاتم وانا غدوة الصبح وقت نطلع من العمل حنخطم ع العيادة وناخد نتيجة تحليل ونراجع الدكتور
حاتم : باه تمام

وروح حاتم ب عمر وهما ف الطريق
عمر : حاتم ..ماتقولش ﻻمي لين نتاكدو …مافيش داعي نرعشوها
حاتم : ان شاء الله

ﻻحول وﻻقوة اﻻ بالله سكري ! الحمد لله على كل حال… اي شئ من ربي راضي بيه الحمدلله …
مكتوبلي هكي
حاتم : مااضايقش روحك ياعمر … قضاء وقدر
عمر : ﻻ مش مضايق الحمدلله … كل شي في هالدنيا نصيب ..
حاتم : ربي يحفظك

وروحوا عمر و حاتم للحوش
عمر : تصبح ع خير
حاتم : تﻻقي الخير رد بالك ع روحك
عمر : ان شاء الله …
خش عمر وسكر الباب … لقي الضي مطفي وامه واخته راقدين
مشي لداره وقعمز ع سريره
فكر لين خداه النووم
وعلى الصبح … اتجه فرج من عمله للعيادة خدي التحاليل و طلع عمر فعﻻ عنده بداية سكر …حزن فرج لنتيجة التحليل ومعش عرف كيف يدير….
وهو ف سيارة كلماته ندى…
ندى : صباح الخير
فرج : صباح النور كيف الحال
ندى : الحمدلله بخير … فرج نبي نطلب منك طلب ههه ولأول مرة وان شاء الله ماتردنيش
فرج : ولووو تفضلي ندوو
ندى : تسلم …بالك تلقالي عمل ف شركتكم ؟؟
فرج : والله ماعارف انا سكيروتي لكن تو نشوفلك …
ندى : اوكي تمام..
فرج :نعطيه رقمك الشبوب ؟؟
ندى : ﻻﻻ اعطيني انت رقمه مرات وقت يتصل بيا نكون مش فاضية
فرج : به تمام **09250614
ندى : تمام المهم مايكونش يلعب
فرج : ﻻﻻ مايلعبش ولد اختي هوا راه ندى:برا برا معناها فرخ !
فرج : تي ﻻ …اكبر مني بتﻻتة شهور
ندى : ههههه بجديات ؟
فرج : والله بجد
ندى : باهي كويس … اوكي تو باي
فرج : ندى ندى
ندى : نعم
فرج : شن خﻻك اتغيري رايك
ندى :امس فكرت ف الليل قلت بما انه شاب من طرف فرج اكيدة كويس فقلت خلي نكلمه
فرج : اها تمام ..يﻻ سﻻمات
ندى : سﻻمات
كيف بنديرله تو هي ! انحس ان ندى كان عرفت ب ان عمر عنده السكر مش حتوافق اتكلمه … مسكين عمر وجعني الحق… وانتو وجعكم واﻻ ﻻ ؟؟
رجع فرج ل حوش اخته وطقطق فتحتله خ وداد
فرج : صباح الخير
خ وداد : صباح النور …خش خش
فرج : عمر فايق ؟؟
خ وداد : قاعد راقد
فرج : باهي تو نخشله ..
خ وداد : ئه شن فيه امس مروح بكري حسيته
فرج:ﻻ مافي شي غير هكي مافيش عمل امس
خ وداد :اه به …
خشت خ وداد للمطبخ بطيب القهوة و فرج خش لعمر وسكر الباب
فرج : عمر …انت ياحوت
عمر : همممم
فرج : تي نوض يابلي
عمر : هاه يافرج شن فيه 
فرج : عندي ليك خبرين واحد مش كويس و واحد كويس
عمر : المش كويس طلعت نتيجة التحليل وطلع عندي السكر …
هات الخبر التاني
فرج : صح ايه وان شاء الله ﻻ باس عليك …الخبر الثاني ندى وافقت اتكلمك وتتعرف عليك
عمر : مش مهم
فرج : عﻻش
عمر تلفت لجيهة التانية وتكمكم ف اليرغان وقال : مش ناقص جروح وقت حتعرف فيا سكر حتفوتني
فرج:جرب حظك
عمر : ههههه كان ع حظي نعرفه
فرج : بجديات ربي يحفظك ياعمر برغم السكر لكن ربي عاطيك الصبر توقعت لما نقولك نتيجة التحليل تتضايق وتخبط وتكسر
عمر : عﻻش ؟ عﻻش بنضايق ربي هكي كاتب وﻻ اعتراض على حكم الله …سواء اضايقت او ماضايقتش النتيجة سوا سوا فلهدا مانضايقش والحمد لله ع كل حال
فرج : الحمد لله … المهم عطيتها رقمك ندى وتو اتكلمك هيا
عمر : ياودي فكني معش نبي ﻻ نحب وﻻ نتجوز وﻻ نتنيل ع ايامي
فرج : كلمها ياعمر وقوللها فقش فيا وفيا ماتستناش لين تتعلق بيها … يابيها قالت باهي مرحبتين قالت ﻻ تمشي ع حالها
عمر : اكيدة مليون ف المليون حتقول ﻻ… حظي المنيل زابطه
فرج : ماندري عليك دير رايك … شنو قلت ﻻمك ع ه ؟؟
عمر : ﻻﻻ شن قتلها انت ؟؟؟
فرج : ﻻ قلت بالك ماتبيش اتقولها
عمر : اي لين نمهدهالها بشوي بشوي خير ماترعش
فرج : به تمام برا عاين تاني بش يعطوك دواء وهي بنمشي توا للعمل ف الشركة ارتاح انت تو ناخدلك اذن ..
عمر : تمام

طلع فرج وقعد عمر ف الحوش ماطلعش …. وفات الوقت ساعة وراء ساعة لين جت العشية

خ وداد : هيا يانازك
نازك : اهو واتية …والله بايخة يمى نخطبوله من غير علمه
خ وداد : هيا اطلعي وراك تفتحي فمك قدام حاتم ان ماشيين نخطبوا غير يقول ل مرته
نازك : ﻻﻻ مانيش داوية
حاتم : هيا شنو يمى مستعجل عندي مشوار
خ وداد : اهو واتيين خﻻص … بسﻻمة ياعمر
عمر : سﻻم سﻻم …
طلعت خ وداد وسكرت الباب …
مشي عمر للمطبخ فتح تﻻجة طلع تست و جبنة وتن وهريسة
كيف وتاهم فتح الة التوست ويهرب عليه الضي
الله يقطعهم هما وضيهم خزيه عليهم وعلى وجهم مالقوش يهربوه اﻻ وقت انا درت التوسط ! برو تو ناكله حتى مصقع برو روحوا انتوا وضيكم
نقاله >>> اه من ظلم ليام
طلع عمر هوا وصونيته قعمز وخدي نقاله …
منوا هالرقم الغريب ! !
ايوه السﻻم عليكم
ندى : وعليكم السﻻم … مساء الخير
عمر : امساء النور تفضلي وخيتي
ندى : احم …انا ندى من طرف فرج…
{ عمر …فرحت انها كلمتني مانكدبش عليكم لكن مشكلة في السكر ياريتها كلمتني قبل شهر فات اقلها كبدت عليا ووقت نقولها مش حتصندم وتفوتني وتوا كان بنقولها تو تهرب مني البنت امممم شن بنقولها .. فيا السكر ﻻﻻ… عندي السكر ﻻﻻ سامحيني مانقدرش نتعرف عليك فيا السكر …ﻻﻻ …ماصارش من التعارف والا نقولها راك غالطة ف الرقم ! }
ندى : الوو
عمر : نعم نعم معك اهلين بيك انسة ندى
ندى : وبيك اهلين … عمر واﻻ غالطة ؟؟
عمر : اي وصلتي .
ندى : كيف حالك وشن اخبارك
عمر : الحمد لله كويس وانتي ؟
ندى : بخير الله يسلمك …. نعرفك بنفسي … ندى من مواليد 92 متخرجة من معهد حاسوب وحيدة امي … اصلي من صبراتة وساكنة ف طرابلس من يوم يومي
عمر : عاشت اﻻسامي والعمر كله وبالجودة معاك عمر مواليد 81 نشتغل ف خفر السواحل و امن سكيروتي لشركة… اصلي طرابلسي
ندى : عاشت اﻻسامي والعمر كله وبالجودة
عمر :تسلمي الله يخليك …. بس بنقولك حاجة …
ندى : تفضل

يتبع………..

لقراءة الجزء التالي : الجزء الخامس من رواية محظوظ ولكن

لقراءة الجزء السابق : الجزء الثالث من رواية محظوظ ولكن

للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .