الجزء العاشر من رواية حبيبتي لا تنسيني

المزيد من الإبداع والتشويق والجمال في رواية حبيبتي لا تنسيني لذلك هيا بنا لنبدأ قراءة الجميل من الأحداث في السطور التالية من الجزء العاشر .

الجزء العاشر من رواية حبيبتي لا تنسيني

وهنا بدى اول حديت جدى واول طوبه حب تبنى حياتهم الجديه ومستقبليه مع بعض … وفاتت ساعه وراء ساعه والحديت شيق الا كان بينهم ماخلهمش يحسو بالوقت … لحد ساعه 3 ونص فى الليل بزبط … لما خش خوها وليد عليها انتظار..
ملاك … اااااه .. احمد بنسكر توا .. خوى خاش عليا انتظار وربك يستر …
احمد .. طمنينى عليك .. سلام ..
وهنا نوضت ملاك فرح وفيقتها بسرعه وقالتلها ..
ملاك .. فرح .. فرح .. نوووووضى .. حى عليا .. وليد يتصل .. نهارى اسود .. قسما بالله لو ماموتش توا مقتوله .. ماعاد تصيرلى حاجه
فرح .. ااااه ظهرى .. ااااص .. اعطينى تلفون انتى واسكتى ..
فرح … الو …
وليد … حيوانه تكلللللللللللللللللللللمى مع منى كنتى شاده تلفون … قسما بالله لما نقتلك … تكلللللللللللللللللللمى ..
فرح .. اهدى وليد خيرك … انى فرح … وانى الا كنت شاده تلفون نكلم فى راجلى ..
وليد … توا تكلمى فى راجلك …
فرح .. مبكرى كلمنى وقالى طمنينى عليك وانى نسيته ورقدت … فاعاودلى من تلفونى وماكانش عندى رنه فاخديت تلفون ملاك رنيتله منه وطمنته عليا ..
وليد … علاش خيرك شن فيك ؟؟
فرح … مبكرى نطلق علينا الكلب واحنا نغسل وفى معايين فا قعدت نجرى وتعبت شوى من جرى ..
وليد .. باهى كلمتينى نجيك ..
فرح .. لا لا سلفى وعزوزتى رفعونى …
وليد … اه نحسابه الحيوانه هديكا شاده تلفون … مهم بوى مبكرى تعب وارتفعله ضغط وسكر .. وانى رفعته للعياده عدلوهوله … فاماتنوضيش امى توا .. بس اول ماتفيق قولها تروح لراجلها طول …
فرح .. باهى باهى خلاص .. مهم طمنى عليه ؟؟
وليد .. باهى الحمد لله لكن مفروض يبى حد جنبه اقلها اليومين هما …
فرح .. ماشى خلاص توا نقوللها صبح ..
وليد .. خلاص وقولى للحيوان هالا جنبك .. نزبطك حتى بالغلط بس شاده تلفون بعد ساعه 10 .. ايديك نقصهم
فرح .. خيرك وليد هكى تتكلم .. اختك ماغلطت فيك فى شى ياسبحان الله … تكلم باهى مع اختك .. برا خلا ص هيا ت ع خ .. << وسكرت فى وجهه >
ملاك .. شفتى تطيح القدر .. هدا على اساس مايندريش انا انى الا شاده تلفون وشوفى كيف ماخلى ماقال .. مش يادوبك كانا يشدو خيط بس …
فرح .. اى عندك الحق .. لما تكونى مستعده للجواز بالفعل كلميه يجيك ويتقدم وبعدها على طول العرس
بس اهلنا مايمشو معاهم الخطوبه …
ملاك … اااااه ياربى .. حتى خطوبه كل بنت تتمناها وانى مانتمناهاش .. لانى بمجرد انى نتخايل كيف نكون مخطوبه وتبدا الاسئله … بيجيك ؟؟ كلمك ؟؟ تلاقيتو ؟؟ ماتشوفيش ؟؟ نقتلك لو نشوفك طالعه معاه .. امتى العرس .. لا امتحاناتك لسو .. احنا ماعندنا فى الخطوبات طويله .. تطويل الخيط يريح اليبره .. وخودلك خودلك لين نكره نفسى واما انى نفسخ خطوبتى او انى نتزوج واشبح ظروفى تساعدنى او لا ..
فرح .. من اى ناحيه ؟؟
ملاك .. فرح انى حاليا فى سنوات الصعبه ونعتبر مازالت فى بداية مشوار .. وقولى انى مانخطبت وتزوجت الا ونكون سنه تالته … بالله عليك .. كيف بنقدر نتحمل مسئولية كل شى وفى نفس الوقت احتمال يكون فى عيل فى طريق وفى نفس الوقت بنمشى للجامعه وبنقرا وبناخد كورسات .. مش عارفه نحس اقل شى نكمل سنه تالته وبعدين اقلها يقعدولى سنه رابعه وخامسه مستشفى .. سهل يبدا خلاص … بس مش عارفه كيف بنفتح معاه موضوع وبنقنعه ..
فرح .. نصيحتى ليك .. انتى غير كملى امتحاناتك وتطلع نتيجتك ووقتها يحلها حلال … بس اهم شى تحسى روحك مرتحتيله ؟؟
ملاك .. هلببببببببببببببببببه  حاسه انا هدا الشخص الا حلمت بيه طول عمرى  وبدات لما تكلمنا اليوم وحكينا مع بعض  حاسه انى رح نكون اسعد انسانه فى دنيا 
فرح … ياررررررب ياوخيتى يكون من نصيبك  ونشوفك سلفتى يارررررب 
ملاك .. ياررررررب 
فرح .. خلاص انى بنرقد توا لانى بجد تعبانه 
ملاك .. حتى انى  خلاص ت ع خ 
فرح وانتى من اهلو 
فاتت الليله على ملاك وفرح زى اى ليله  …. فرح تعب خلها ترقد زى ميت اما ملاك فاكانت احلامها كلها بمبى وسعيده … وكانت طول الليل احلامها مخليتها تبتسم حتى فى عز نومها  وكالعاده مافاقتش الا على صوت امها ..
امها …. ملاك .. نوضى ساعدى اختك انى بنمشى نطمن على بوك ماشى 
ملاك .. ماشى ماشى ماما … وناضت … واول مافتحت تلفونها لقت رساله من احمد تقول …
احمد …. صباح الورد على احلى ورده فى حياتى  اول ماتنوضى كلمينى 
وهنا قعدت تشوف لرساله شوى واتكت وابتسمت وبعدين اتصلت بيه …
ملاك … الو 
احمد … ااااااه صوتك والله على ودانى زى نسمة البحر  صباح الورد حبيبتى 
ملاك … ههههههه ماتحسش انك تسرعت ؟؟
احمد … لا لا .. لانى واتق منها … ومش مهم تصدقى او لا .. لانا مع الوقت اكيد رح نتبتلك 
ملاك .. اوك 
احمد … امتى بنسمعها منك ؟؟
ملاك… يوم مانحس انك بجد تستاهلها وقبل كل شى نكون واتقه انى حسيتها 
احمد … خلاص انى رح نخليك براحتك  واعرفى انى رح نستناها منك زى مانستنى منك كلمة تعالى اخطبنى 
ملاك … هههههههه انت غريب .. فى عاده الولد هوا الا يتهرب من بنت فى هالموضوع ..
احمد … بس انتى مش اى بنت .. وماتستاهليش معاملة اى بنت  انتى بالنسبه ليا ملكه 
ملاك …. هههههههههه ان شالله غير بعد وقت نبدو نحدفو على بعضنا فى شباشب ونطلع حتت كومبرص بالنسبه ليك هههههه
احمد … لا لا بعون الله لا .. طالما فى حب واحترام وتفاهم وتقه متبادله بين طرفين .. معناها رح نعيشو سعداء طول عمرنا 
ملاك .. يارب 
وطبعا هاليوم .. كان اول يوم بجد تحس فيه ملاك انها سعيده .. سعيده لدرجة انها مستعده ترقص وتغنى وتضحك حتى بدون اغانى او نكته  وهالشعور اكيييييد اغلبكم حسه … بس ياترى هل هالعلاقه رح تطور … وهالحب رح يوصل لحد وين … وهل تستمر علاقتهم بنفس السعاده الا مرو بيها من اول يوم تلاقو فيه ؟؟ تعالو مع بعضنا نعرفو شن صار معاهم بعد …

   بعد مرور6 اشهر   
ام ملاك … روووووووووووووووووووووووووووووووووووووووووى صفيتهم والله يابنتى فرحتلك من وسط خاطرى .. رووووووووووووووووووووووى 
ملاك .. اى هادى اخر نتيجة ماده والحمدلله كلهم جبت فيهم تقدير جيد جدااا 
امها .. عقبال مانشوفك فى حوش راجلك دكتوره يارررررب  … خلى نمشى مالا ندير كيكه باش لما تجى اختك العشيه نحتفلو بنجاحك  وانتى نحى حوايجك وتغدى وارتاحى 
ملاك … اوك ماما انى بنخش نرتاح فى دارى 
خشت ملاك لدارها وسكرتها عليها وبعدين قامت تلفونها وهنا لقت مكالمات من احمد فائته وفى نفس الوقت اتصل …
احمد … خلينى بس نبررلك موقف .. والله والله مافى بينا اى شى …
ملاك … مانبيش نسمع منك اى تبرير … خشيت للمكتب متعك باش نفرحك بنتيجتى .. نلاقاك مقعمز انت وهيا وتضحكو ؟؟
احمد … هيا طالبه عندى … ووالله والله ضحكت بحسن نيه على موقف … ملاك خيرك بجد .. معقوله توصل بيك هكى …
ملاك … احمد انى تعبت بجد … تعبت من شكوكى حوليك … انى مش دنبى … انى نشوف فى بنات فى كليه كيف يشوفولك وكيف يتكلمو عليك .. شن متوقع منى .. لما وحده تجى تقول انى نتمنى نكون حتى صديقته ..
احمد .. خلاص قوليلهم شخص هوا خطيبى … قوليلى تعالى اخطبنى … ملاك انتى ماتقدريش تتكلمى فى موضوع هوا … انى قداش مره كلمتك وقتلك نبى نجيب اهلى .. فهمينى .. .. مره انى عندى امتحانات ومره لا خلاص فى رمضان عندنا ظروف .. ومره لا ناس يدو علينا لو ماصارش .. واخر شى تعجزى فيا .. لا ماتخطبنيش الا لما نكمل سنه تالته .. قصدى انى تعبت من الوضع هوا ..
ملاك … انت تبرر لتصرفاتك او كيف … شن دخل خطوبتنا فى انك تقعمز مع البنت فى مكتب وتضحكو وتعطيها وجه …
احمد … ملاك بجد انى تعبت … نبى نسكر …
ملاك .. << وهنا نهارت بالبكى وقالتله >> اوووك .. مربوحه .. بجد بجد هادى احلى مكالمه نسمعها من لما طلعت نتيجتى …
احمد … حبيبتى والله والله مافى فى قلب غيرك وانتى عارفه … يابنتى انى عندى القمر كيف تبينى نشوف للقمر … والله والله نحبك ومافى حد بياخد مكانك .. باهى شن تبينى ندير .. نعيط على طول حسى فى كليه ونقول نحبببببببك … ندير سرير قدام حوش بوك ونقعد غادى لين تقررى نجى نخطبك …
وهنا ملاك دموع ينزلو وساكته وبعدين قالتله …
ملاك … خلاص احمد .. حاسه روحى مضايقه وبنسكر ..
احمد .. حبيبتى … ياروحى انتى امسحى دموعك .. باهى قوليلى شن الا يرضيك وانى رح نفده طول …
ملاك …معاش نبيك توقف على بنات … نهائى … نهائى .. معاش نبيك تضحك او تقيم عينك على حد الا انى بس
احمد … تم خلاص  اى اوامر تانيه 
ملاك .. << مع ابتسامة رضى >> هوا هدا بس خلاص 
احمد … باهى انى مخليك هديتك عند فرح  خوديها منها اول ماتوصل 
ملاك … بجد ؟؟ انت احلى حبيب فى دنيا  والله والله نحبك ياشين 
احمد … وحتى انى ياشفشه  والله نحبك ومانقدرش نتخايل انك تكونى لحد تانى 
ملاك .. حتى انى حبيبى .. انت ملتعرفش لما شفتها كيف هبلت  حسيت انك نخطفت من قلبى 
احمد … ماتخافيش انى مشبط ملبط ليك  ولو ماخديتكش بنعنس فى حوش بوى هههههههههه
ملاك …. هههههههههههه حبيبى … انى بنسكر توا  لانى بجد تعبانه  وفى الليل توا نكلمك ونقولك شن رأي فى هديتك 
احمد … خلاص نستنى فى رنه منك  وارقدى كويس وتغطى  وتدكرينى 
ملاك ..  نحبك 
احمد … حتى انى  سلام حبيبى 
ملاك .. سلام 
سكرت ملاك … وطلعت صورته من نقالها وحضنتها لحد مانعسها نوم … ومشت فى نومه مافاقتش منها الا على صوت شريانه  وبعدها صوت بيبات فرح يبكو 
امها …  اهلين حبيبتى  خشى .. نطفى على قهوه نار ونلحقك ..
فرح … وين ملاك ؟؟
امها .. داخل فى دارها راقده نوضيها 
خشت فرح لدار ملاك … وقعمزة على سرير وقالتلها …
فرح … لولو نوووضى انى جيت  الف الف مبروك حبيبتى 
ملاك .. فروووحتى .. استاحشتك يامعفنه معقوله ليك اسبوع ماتتصليش ولا دورى ؟؟
فرح ….<< تنهيده من غير كلام >>
ملاك … خيرك ؟؟
فرح .. اى هادى هدية احمد قبل ماننسى  سعدودك جايبلك خاتم دهب  انى ماحلمتش نشوف هالهديه حتى بعد ماتزوجت 
ملاك … فرح خيرك شن فى ؟؟ حاستك مش طبيعيه ؟؟
وهنا فرح شافت لاختها ونهارت بالبكى …
ملاك … فرح بجد خيرك شن فى ؟؟
فرح … انى حامل ….
ملاك … بجد انتى هبلتى ؟؟ خيرك تبكى ؟؟ هدا سبب يخليك تبكى ؟؟
فرح … اى … صغارى ماسكروش 8 شهور وانى حامل فى تانى … انى من اول ماعرفت راكبه فيا نار … انتى بجد مش حاسه بنار الا فيا … انى مانبيش العيل هوا توا …
ملاك .. استعودى من شيطان .. غيرك يتمنى يجيه نص عيل وانتى قاعده تتبكى .. حرام عليك فى حد يجحد نعمة ربى … ياسيدى ماتبيشى .. هاتيه .. انتى جيبيه وانى نربيه …
وهنا على خشت امهم باش تنادى عليهم …
امهم … خيركم مت وفى دار اطلعووووو .. فرح خيرك تبكى شن فى ؟؟ تعاركتى انتى وراجلك ؟؟ ضربك ؟؟ هانك ؟؟ شن فى ؟؟
بس فرح منزله عيونها وتبكى بس …
امها .. ملاك خيرها اختك شن فى ؟؟
ملاك .. هيا حامل …
امها .. روووووووووووووووووووووووووووووووووووووى  هدا نهار مبروك .. نوضى يامهبوله نوضى … هدا علاش تبكى … ناس تفرح لما تحمل وربى يرزقها وانتى تبكى ..
فرح … ماما انى حاسه مقعمزه على قلبى ومابيشى عيل …
امها … مهبوله انتى .. استعودى من شيطان واستغفرى ربك .. شن كلام هوا يابنتى .. ماتخليش ربى يعاقبك وياخدهم منك .. نوضى خشى للحمام .. اغسلى وجهك واضحكى وخليها على ربى … هما اتنين .. هما تلاته … وكانك كايده فيهم .. هاتيهم انى نربيهم زى ماربيتك وربيت خوتك …
فرح … انتم مش عارفين انى شن نحس … انى قلبى مطبق من اول ماعرفت انى حامل .. ومانبيشى عيل … ومحمدكشخ عليا وتعاركنا … بس والله والله انتم مش حاسين بيا …
وهنا ملاك خدت اختها فى حضنها وقالتلها …
ملاك .. حاسين بيك حبيبتى  بس هادى كتبت ربى .. شن نعترضو عليها … استغفرى الله وقولى ان شالله يكون ودريه صالحه بس .. ومرات البطن هادى هيا الا تلقى فيها خير …
امها .. نوضو هيا … نوضى يابنتى اغسلى وجهك وتعالى برا معانا وخلى نفرحو بيك وبااختك .. انى قداش عندى بنات نفريح بيه مالا انتم .. فامتخليهاش غصه فى قلبى يابنتى ويقعد عقلى معاك ..
ملاك .. خلاص ماما انتى اطلعى واحنا توا نلحقوك …
طلعت امهم لدار … وهنا ملاك شبحت لاختها وقالتلها …
ملاك .. شن قصتك يابنت ؟؟ مبكرى انى نبكى .. وتوا انتى تبكى ؟؟ شورنا مربوطين ببعض فى كل شى والا داعى علينا بايت يسبح  ههههههه
فرح .. << قامت عيونها على اختها مع ابتسامه>> شن جوك مع احمد انتى …
ملاك .. ماشى ها .. امس بعتلى مجموعة ل صور دار عربيه وستار متعها واخترت دار والالوان ..
فرح … شن مازله باش يكمله ؟؟
ملاك .. مازال دار نوم بس .. بعتلى صور لكن ماعجبونيش .. فاقتله زيد شوف …
فرح .. ربى يهنيكم يارب …
ملاك .. نبى نطلب منك طلب لكن يقعد بينى وبينك .. بس بعدين نقولهولك …
فرح .. شن فى ؟؟ خوفتينى ؟؟
ملاك .. توا نقولك بعدين .. توا هيا نطلعو لا امى تحس بينا ..
فرح … هيا نوضى هي …

يتبع…………

لقراءة الجزء التالي : الجزء الحادي عشر من رواية حبيبتي لا تنسيني

لقراءة الجزء السابق : الجزء التاسع من رواية حبيبتي لا تنسيني

للإطلاع علي فهرس اجزاء الرواية : جميع أجزاء رواية حبيبتي لا تنسيني كاملة للكاتبة كيندا

جميع الحقوق محفوظة للكاتبة كيندا من ليبيا .