الجزء العاشر من رواية عديم الضمير

وفي الجزء العاشر من رواية عديم الضمير دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة ميشو محمد .

الجزء العاشر من رواية عديم الضمير

وسام: باهي يامهبوله شن رايك نطلعو توا

رحمه: اكيد هبلت توا قريب يااذن العشي

وسام: ونشالله يااذن الفجر وين المشكله امتى مايعجبنا نطلعو

رحمه ضحكت: الله اكبر قداشك متفهم اي وين بنطلعو؟

وسام يفكر: نديرو لفه بسيارة ونتعشو برا

رحمه: حلوة الفكرة بس اني مزكومه شوية

وسام: نلبسوو كمامات ياكبدي، الاصرار هدا كله عشان نبي نطلعك توسعي خاطرك هيااا عشاني

رحمه: اوكي حبيبي

وسام طلع

رحمه لبسة سروال جينز واسع شوية مع سورية تحت الركبه ووشاح

وسام خش علها وتلبك: رح مه

رحمه تعدل ف وشاحها: ايواه

وسام: رحمه بدون ماتنزعجي عادي تلبسي عباية

رحمه: بس ليش

وسام حك رقبته من الخلف بتوتر: هكي مانحبش

رحمه: بس عادي السورية طويلة السروال واسع وين المشكلة

وسام قرب وحوطها بيديه خلفها: ياقلبي اني مانحبش هكي قصدي انتي مرتي اني واني مانحبش هكي رحمه افهميني البسي عباية

رحمه ابتسمت: اممم الموضوع فيه غيره شن رايك نلبس نقاب

وسام: اي احسن

رحمه: تبصر انت

وسام: العباية البسها عشاني بس النقاب مش رح نضغط عليك

رحمه غيرت ولبسة عباية وطلعوو

وصلو لعند مطعم

رحمه تشوف ف المطعم: وسام حبيبي شن رايك نغيرو

وسام: كيف يعني

رحمه: وسام فكرت المطعم قديمه نبي نديرو شي مميز واحلى

وسام: حلوة الفكرة بس كيف

رحمه: نتعشو ف السيارة

وسام: ف السيارة توا بنسيبو مطعم طويل عريض ونتعشو ف السيارة

رحمه: انت مجرب تاكل ف السيارة؟

وسام: اني نحب النظام ومستحيل نجربها ممكن نشرب كافي نشرب شي ف السيارة بس اكل لا

رحمه: اني مش مجربه بس حبيت نجرب بلييز

وسام سكت

رحمه بترجي: بليز وسام

وسام: انتي تبي فكرة مميزة شن رايك ناخدو عشي من المطعم هدا ويكون خفيف ونصفو السيارة قدام البحر ونتفرجو ع الموجه

رحمه: يلا

وسام نزل خدي وجبات سريعه مشروب بطاطا شاورما واميه وكريب

وصفو السيارة قدام البحر

وتعشو ف السيارة

وسام: توا تعشينا شن رايك نتمشو ع الرمل البارد

رحمه: بس وسام ماتشوفش الشط فيه ولاد مختلط

وسام: انتي معاي

رحمه: ممكن يكونو سكرانين

وسام: بصفتي فاسد ومتع سكير نقولك انه مش توا الناس تسكر ف اخر اليل

رحمه: يخوفو وسام انسى الفكرة

وسام: رحمه ليش خايفه الشط فيه عائلات يتمشو

واقنعها ونزلو

ويتمشو مع بعض

رحمه: بارده

وسام: بس حلو اجو

ف شباب مقعمزين ع الشط مع بعض حوالي 3او4 شباب وتنين يشوفو ف رحمه وهي تضحك وتهدرز مع وسام

وسام شافلهم: الشمس زارق علينا؟

واحد منهم بصوت واطي مكانش يبي وسام يسمع:القمر ضو جنبك مش غير الشمس

وسام سمعه ودار روحه مسمعش :رحمه نرجو لـ سيارة؟

رحمه ابتسمت:اوكى يلا

وركبت رحمه وجها وسام من بابها

وسام باين عليه متعصب لكن هو يحاول مايخوفهاش: دقيقه ونجيك خليك لو تاخرت ماتنزليش..وصكر الباب بدون مايسمع ردها

رحمه خافت عرفت انه ف مشكله

.

.

وسام رجع لـ الشباب نفسهم:سلام

نفس لـ تكلم ع مرته:سلام

واحد تاني:خير ف شي

وسام:لاشي بس ممكن تجي معاي نبيك ف موضوع

الشب لـ تكلم ع رحمه: ليش

وسام:نوض معنديش وقت

الشب متع رحمه ناض ومشي مع وسام ف نهاية الشط:خير

وسام صكر ايده بغل:قلت انه القمر جنبي صح

الشب سكت

وسام:يعني شفتها قمر لـ معاي؟

الشب:اي شفتها سمحه

وسام تعصب:اي المرة هادي شفت والمرة التانيه معادش بتشوف…وضرب بوني ع عيونه

الشب طاح وايده ع عينه:ااااااااه

وسام:عشان تتربى بس لاني نظامي اول مرة نحب انبه وبعدين نبدا ف للجديات …مشي

.

.

رحمه ف السيارة تشوف فيه يقرب

وسام ركب: اني جيت

رحمه:نورت

وسام ولع وطلعو

.

.

عشان ماتملو

#تسريع_الاحداث

ف عرس مرام

رحمه واقف ع مراية غرفة النوم وتشوف ف روحها بفستان عنابي طوويل منفوخ شويه مرشوش بلمحه حلوة وبسيطه مع تسريحه مفتوحه وناعمه مكياج بسيط مع روج عنابي

وسام خش:يلا (وشافلها) اويلي

رحمه ضحكت:يابارد

وطلعو وحضرو العرس وامورهم تمام

ورجعو

#بعد_مرور_شهر

رحمه ع للخط:وسام نحكي جديات

وسام:تمام رح نشوف ونكلمك

رحمه قعمزت وصكرت عليه الخط:ليش مايفهم ليييش

وسام وصل وخش وف ايده كيسه ليم : رحمه

رحمه جاته بلهفه: جبت ليم

وسام مدلها الكيسه: معقولا تتصلي بيا ف نص الطريق تقوليلي نبي ليم ضروري هكي

رحمه: اي عادي

وسام حط الكيسه وتلفت بيطلع: اي عادي تعبك راحه

رحمه: وسام لم ترجع جيب معاك اءااءااذا شن اسمااااه استنى نذكر

وسام وقف

رحمه : امممم استنى نجاس

وسام: تمام تبي شي تاني

رحمه : لااااا شي

وسام طلع

رحمه دخلت كيست الليم وحطتها ع الطاولة بعصبيه: من امس واني نطلب ف الحاجات الحامضه امس فراولة وقدامه كليت فازو زيتون واليوم ليم ونجاس وهووو زي الحمااار مش فاااهم علاش الحوامض بس استنى عليا ياوسام مش رح نقولك ع حملي لعند ماتعرف بروحك

وسام رجع وف ايده كياس نجاس واناناس وتفاح: رحمه

رحمه جاته: نعم

وسام مدلها الكياس: جميع انواع الحوامض حتى التفاح حصلت تفاح اخضر وقالولي حامض شوية

رحمه: يا فرحتي

وسام دخل الكياس ع الطاولة وخش غير ملابسه وصل المغرب وخش الصالة وشاف رحمه متربعه ع الكنبه وقدامها صحنين ليم وسكر وتغطس ف اليمه ف السكر وتاكل

وسام قعمز: صحتين

رحمه خدت الريموت وفتحت ع قناة فيها دكتور نساء يتكلم ع للحوامل

وسام سكت محبش يضايقها تفرج معاها وبعدين ملل من الدكتور يتكلم ع الحوامل: رحمه غيري ع الزفت

رحمه: خيرك وسام فاصل

وسام: هدا يتكلم ع الحوامل تي مالنا ومالهم الحوامل حني غيري ع النم

رحمه: عادي بس نستفيدو منه خيرك ممكن نحمل وبعد نبدا نعرف

وسام اتكه ع الكنبه ويشوفلها ف نظرات : اييححح محلاك تبدي دبه مكركبه بطنك بارزه

رحمه فنصت فيه: شي يقرررف

وسام: بلعكس حلو وخصوصآ تبدي دبه شوية ويبدا الواحد يقدر يقرصك مش ز توا كان انوض نقرص نحصل ف الاعظام وانتي كيف العصا

رحمه تكنطت: برا عصا ع جنابك… وخدت الصحن وناضت

وسام ضحك كيف حرجت

رحمه دخلت المطبخ وحست انها جسمها بـ يفسد بـ الحمل . بدت تبكي

وسام استنها تجيه او يشوفها طالعه من المطبخ لكن معادش شافها ناض للمطبخ: وينك (شافها عطياته بظهرها للمغسله) خيرك ؟

رحمه تبكي بس حاولت تصبغ صوتها انها كويس: مافي شي امشي تو نلحقك

وسام عرف صوتها تبكي لفهاا ومسحلها دموعها: زعلتي لـ درجه هادي

رحمه بصوت واطي ونفعلت ف البكي: انت اخخييي كيف تتكلم قتلي دبه

وسام كان يبي يضححك بس حبسها عشان متزعلش: زعلتي من كلامي ياقلب وسام…

رحمه تبكي وطلعت من فمها: مش ع كلااامك بس رح نصير دبه اانيييي

وسام  قام حاجبه: تصيرييي دبه؟ (وجت ع باله الحوامض لـ تاكل فيهم من اربعه ايام)(بعدها ويشوفلها) انتي حا قصدي متزعليش بس سؤال انتي…. قطعاته

رحمه ابتسمت: حمار وربي واخيرااا وصلاتك المعلومه كيف انت دكتور مافهمتش

وسام: تبصري صح ؟

رحمه ايدها ع بطنها: ليش هكي تحكي انت مفرحتش؟

وسام تلبك وخش ف بعضه: اسف اسف بس اني مانعرفش ف الحوامض والخمر هدا مخطرش ع بالي انك…. وسكت

رحمه: قول حامل

وسام ضحك وتلبك وخش بعض ومسح شعره للخلف والابتسامه ع وجها: متاكده انتي

رحمه ابتسمت حساته فرحان وخايف ومتلبك: اي

وسام معادش عرف كيف يتصرف : ياقلبي

رحمه : توا قريب نصكر شهرين

وسام مبتسم ومتلببببك

رحمه: شنو بنسموه ولدنا

وسام: رحمه بنت

رحمه: اي عادي شنو نسموها

وسام: روان تجمع حرفي مع حرفك نسموها روان

رحمه: رؤى او رولا او رواسي او وردة او ورد او ور… قاطعها

وسام: حور

رحمه: بنت خوي هشام اسمها حور

وسام: اي خلاص معنها لعند ماتوصل بنتي العسل نسموها

رحمه: محلاهاا كلمة بنتي

وسام : حتى انتي بنتي

وسام طلع لخدمته

وفاتو ساعات طويل

لعند الساعه 3.30 تاخر ع الغدي

رحمه تتصل بس رقمه مقفل

ترررن ترررن

رحمه: ايوة اهلين مرام

مرام: رحمه كيف الحال

رحمه: تمام خيره صوتك

مرام: رحمه وسام قاعد ؟

رحمه: لا ليش

مرام بدت تبكي: رحمه عدي مخطوف من امس يارحمه وقالو ف مجرم عنده صور عدي ف الملاهي وخطفوه

رحمه ايدها ع فمها: اهددي مرام ممكن ف غلط ف الموضوع

مرام تبكي: وين الغلط امس ف ليل راجع للحوش من الخدمه ومعادش جي واليوم جاني خوي مراد روح بيا قالي لقو سيارته ف الطريق مفتوحه وصورة وهو ف الملاهي مشرتعات فها

تاخرت

مجدي:خشي شوفها

سماح لحقتها: ليش تاخرتي

رحمه تبكي فوق السرير: مانبيش نطلععع

سماح: تبي تقعدي ف الحوش بروحك

رحمه تبكي بشهقه: وسام بيجييي

سماح:نوضي رحمه نكلللم فييك

رحمه بعيط:انييي مش طااالعه

سماح شدت ايدها وتحاول توقفها بلغصب:نووضي بتقعدي ف الحوش بروحك

رحمه سحبت ايدها وتبكي: وين وساااام

سماح طلعت متعصبه:يامجدي مصكره راسها هادي

مجدي:اتصلي بـ امها تجيها

طق طق

مجدي فتح

فايزة بلهفه:وينها

سماح:داخل قالبه الدنيا

فايزة خشتلها

رحمه ناضت بسرعه حضنت امها:ياماما وينه وسااام

فايزة حضنتها ودموعها نزلو

رحمه بعدت ع امها:اني مش رح نطلع ياماما لعندد مايجي وسااام

فايزة:تعالي اقعدي عندي وغضوا يجي وسام

رحمه تبكي بصوت عالي:توووا يجيييي

فايزة حضنتها وتبكي

رحمه تبكي بشكل يقططططع القلللب

رحمه حضنتها:ياماما وسام ديما يقولي ماتطلعيش من البيت بدوني او بدون اذني مانقدرش نطللع

فايزة:يجيك يلقاك عندي يارحمه ف حوش امك وبوك رجع من السفر

رحمه تبكي تبكي تبكي لعند ماقنعتها امها وخدتها

ووصلو للحوش وشافت بوها

بوها لـ محظرش حتى عرسها عشان متزوج ومسافر

رحمه شافتله ع جنب وخشت وشافت مرت بوها

مرت بوها فادية قربت ومدت ايدها:اهللين

رحمه شافت ايد فادية وكانت معبيه ذهب فاتت من جنبها بدون ماتسلم

ترررن ترررن

رحمه قربت ع الهاتف وشافت رقم وسام

رحمه:وساام

صفوان فتح المايك:محلااااه صوتها ياوسام

وسام مربوط ف الكرسي ووجها دم بصوت عالي : صكررري الخطط

رحمه تبكي:سيبه حرام عليك

وسام يتحرك بلكرسي بعصبيه:صكرررري عللليه

صفوان:ياحلوة لو تصكري الخط نضربه رصاصه ومانبصرش…وسحب الهاتف

رحمه:مش رح نصكر بس وين وسام

وسام نااار ويتحرك بلكرسي وهو مغطي بدمه:صككككري الخططط

صفوان:لو تصكري تخسري حبيب القلب

وسام مغطي بدمه ومربوط ع الكرسي وويتحرك بعصبيه وبصوت عالي: انت صكر الخط ياولد الحرااام

صفوان ضرب رصاصه

رحمه سمعت الصوت ردت فعلاها حدفت الهاتف ع الحيط ونهارت تبكي ع الارض

صفوان ضرب الرصاص ع الحيط

وسام ضحك بااستفزاز:كانك راجل راك ضربتها الرصاص ف مكانها المناسب لكن مششش راااجل

صفوان عاود الاتصال بـ رحمه بس عطاه مقفل

وسام ضحك بصوت عالي يستفز ف صفوان:يامسكين هادي مرتي ومهما صار لو نموووت مستحيل تكسرلي كلمه

صفوان قرب وجها من وجه وسام: قتلي ماتكسرلكش كلمه شن رايك نجيبها ونكسرلها رقبتها

وسام قرب وجها من صفوان ونطحه ع انفه

صفوان انفه ينزف

وسام:لو تفكر فها بس نغرقك ف دمك وصدقني مش رح نرحمك

صفوان ضرب وسام بوني بقوووة لدرجه طاح بلكرسي

صفوان شاف جماعته:قيمووه

وقامو الكرسي

وسام وجها دم ابتسم:ايديك ناعمات ياروحي شن اديرلهم فازلين ولا دووڨ

صفوان تعصب:صكر فمممك متخلينيش نكومك ف مكانك

وسام قام حاجبه بهزوه:تكومني ف مكاني!! لااا راجل ترا جرب تي انت رصاصه وخفت مقدرتش تضربني

خش شاب: الشب التاني فاق

صفوان:اووو هاتوه لـ صاحبه

جماعة صفوان جابو عدي دخلوه بس كان كويس بس دايخ يعني مش مضروب

عدي شاف وسام وضحك:ياحبيبي ياوسام محلاك وانت بـ دمك استاحشتك بلمنظر هدا

وسام ضحك:عقبالك ياحبي

عدي شاف صفوان بهزوه: حني متعودين ع ضرباات قويات بس يلاااا نخلووه البيبي هدا يتعلم الضرب فينا

وسام: معليشي عدي حبيبي خليه عايش الدور مفكر روحه ف مسلسل

صفوان: ز ماقلت عايش الدور اني احسسن ممثل واحسسن منكم

وسام:كان انت ممثل اني المخرج

صفوان تعصصصب بس حباب يكون متمالك اعصابه

عدي: وسام موجوع حبيبي

وسام شافله ع جنب:لالا ايدين صفوان زي البالونات ناعماااات خيتسلمه

عدي شاف صفوان وغير صوته:ياوخيتييي محللاااه

صفوان خلاص فصل بس مش مبين:اي صح معاكم واحد اسمه هشاام

وسام وعدي شافو بعض

صفوان:شن رايكم نجيبوه حتى هو

وسام:ماننصحكش هشام عنده بنت صغيرة ره

صفوان:وكان عنده بنت صغيرة؟

وسام:عمرها تلاته سنوات البنت

صفوان:وباه

وسام:ماهو لو تاخد بوها البنوتة تضربك بشيشه

صفوان وجها احمر طلع مسدسه وسحبها وصوب ع وسام

عدي خاف ع وسام لانه صفوان متعصب: اعصابك ياصفوو سكرك ينزل

وسام يشوف ف صفوان:صفوان خيرك اضرررب

صفوان:سكر رقالي

عدي :ياوخيتي ركبلك السكككر ياروووحي وسااام اسكت عيب تعصب

صفوان نزل مسدسه

وسام ضحك:سكره رقي وسكر لم يرقى ينحرق ولم ينحرق يبدا عسل ياعسل

عدي:حووويته وخميسه ع وليدي صفوان العسل

وسام:عدي ريته قالي السكر راقله

عدي:اي هدا علاش صاير حلو هلصفوان

وسام غمز لصفوان:ايووواه ياطررف

عدي شاف جماعت صفوان:خمسه ف عيونكم والباقي ف سنونكم انتم

وسام: ووووووك كساااااد

عدي:اي جلدك يحك فيك انت

وسام: تي ياراجل جرب ضربات صفوان تحس انه بيبي يدغدغ فيك

عدي:حويته عليييه هو صوبعاته…وابتسم

.

.

رحمه دخلت غرفتها وصكرتها وتبكي

هشام طق طق وخش:معاادش تبكي

رحمه:هشام وينه ؟

هشام: مفقود هو وعدي

رحمه تبكي:توا اتصل بيا وسام سمعت صوته وسمعت صوت رصااااص

هشام قعمز جنبها: صفوان خاطفهم شافو الكاميرا متع الملاهي وشافوني مع عدي جابو سيارة عدي وفيها صوري اني وعدي وسام وزوز شباب تانين اني والباقي يدور علينا صفوان

رحمه حضناتها ع جنب:ماتطلعش برا خليك معاي

حنان خشت:كيف صارت

هشام سكت

فايزة خشت ودخلت حبوب مهدى

حنان:لاياعمتي هادي حامل والحبوب ليهم فترة يعني مش اي حبوب تاخدهم تجهض بعدين

فايزة:حامل

رحمه تسطحت ع سريرها

هشام ابتسم: بما انها حامل وسام تو ينظم اموره ويهرب نعرفه اني…وطلع

هشام نزل وشاف مرت بوه فادية:اسمعي انتي خليك ف حالك وامي واختي ومرتي وبنتي توصلي فيهم راسك نفصله من ع جسمك مشاكل زي المرة لفاتت مانبيش

فادية قالبه وجها وتتفرج ع تلفزيون ويدها معبيات ذهب ولبسة سلسال ذهب

.

.

عدي غرق ف دمه:اااااخ بس

وسام يضحك:عدي خدك انتفخ

عدي شاف صفوان:انتفخ وبدي احمر ع ايدين صفوان

وسام:معليشي عدي متوخداش طبعلك مصاصه ع خدك

عدي:صفوووان

صفوان شافله

عدي:قول مصاصه حبيبي هي

وسام:مايعرفش صغييير وصغيرين يقولولها صاصا

عدي ضحك: صفوان تعرف

صفوان قاطعه ببوني ع فمه

عدي تعصب: شن مفكر روووحك اننتتتت فك الحبل توا نربي

وسام:معقود الحبل مايعرف يفكه

صفوان شاف جماعته:اطلعوو

وطلعووو كلللهم وصفوان طلع وصكر الباب وراه

توا عشان مايشك صفوان ومايتسمع عليهم بيتكلمو انجليزي واني بنترجم

وسام شاف عدي وغمزله: What is the time (كم الساعة)

عدي:مانعرفش

وسام:I want to go back home (لازم نرجع للبيت)

عدي:Thirsty (عطشان)

وسام:I’ve got a headache (عندي صداع)

عدي:اووووف

وسام: نادي عليه عدي

عدي بصوت عالي:صفووووان

وسام راسه بينفجر شافله ع جنب

عدي:اهاا نسيتك تو انقص صوتي

وسام بصووت عااالي وبعصبية صصصصصصففففففوووووواااان

لايك ومتابعة ف صديقات ليا بنصفيهم

تتبع

لقراءة الجزء التالي : الجزء الحادي عشر من رواية عديم الضمير

لقراءة الجزء السابق : الجزء التاسع من رواية عديم الضمير

للإطلاع علي فهرس اجزاء الرواية : رواية عديم الضمير ( جميع الاجزاء كاملة ) للكاتبة ميشو محمد

جميع الحقوق محفوظة للكاتبة ميشو محمد .