الجزء العشرون من رواية أنت عدوي

. اي وقبل مانمشي نبيك تقولي لكنزي … انه المره هادي كان معاها صادق بالفعل … ولو هيا وافقت فارح تعيش اسعد انسانه … وربي يوفقها يارب … واستأدن منها بدون مايخليها ترد كلمه تانيه … ومشي … ووكيف بتلحقه طلعت كنزي وقالتلها …

كنزي …. بابا سالني عليك خشي شن تديري هنا واقفه بروحك … مع من كنتي تتكلمي ؟؟

غاده …. (( هنا شبحت للمر كان ماشي منه ايهم وقالتلها )) … شخص الباين خلاني نتأكد انك انتي صح .. واني الغلط ….

وخشت وخلت كنزي واقفه ومستغربه في جملة أمها ليها … وبعدين لحقتها …. واول ماخشت شافت زيد عيونه في غاده ويشبحو لبعض باابتسامه كانت تعبر علي هلبااااااا كلام ممكن ينقال … فافهمت المقصود طول وقالت لميرا ولار ..

كنزي … ميرا لار شن رايك تنزلو معاي نشرو تشبس وهلبا حاجات

ميرا … اني اني اني …

لارا …. وحتي اني نبي … نبي ننزل معاكم ماتخلونيش …

وهنا كنزي شبحت لامها وقالتلهم …

كنزي … تمام وراي هيا …

وطلعو من الغرفه ورا بعضهم يتجارو … وهنا غاده وجهها ولي احمر وكأنها رجعت لي اأول مره تلاقو فيها مع بعض .. وقالتله …

غاده …. شن حالك توا … ان شالله بخير ؟؟

زيد …. طالما انتي بجنبي اكيد رح نكون بخير

غاده …. يارب علي طول …

(( وقعدة ساكته شوي بعد هالجمله وهوا يشبحلها ومبتسم …

زيد … اني اليوم بس حسيت اني نولدت من جديد ورجعتلي روحي … اني محتاجك ياغاده في حياتي اكتر من قبل … وماقدرتش ننساك ولا يوم … والا فات من عمري هما مجرد ايام بس كملو مع تيار باش تنكتبلي اني عايش قدام ناس … لكن من بعدك انتي اني موتت والله ..

غاده … (( هنا تعبو عيونها دموع ونزلت عينها وقالتله )) .. واني والله … مانسيتكش لحظه .. لهدا من بعدك انت ماقدرتش نتقبل وجود راجل تاني في حياتي …

زيد …. نتمني ماتبعديش علينا اكتر … اني وصغار في اشد الحاجه ليك … اني مش عارف كيف بنكمل حياتي وبنربي صغار بروحي … نتمني مانضيعوش وقت وتكملي معاي الا باقي من عمري …

غاده …. وناس وصغارك شن يقولو … ورده كيف ميته يازيد .. حتي ناس مش رح ترحمنا …

زيد …. (( بملامح حب )) … اني بسبب ناس وكلامهم وباش نرضيهم دفعت عمري كله بعيد عليك …. ووورده وهيا حيه يعلم ربي ماعمريش خنتها ولافكرة نخونها … لكن الحب ومشاعر عمري ما قدرت نخفيهم عليها ولا رح نمنعهم اكتر من سنين الا ضاعو مننا

غاده …. (( هنا مسحت دموعها وضحكت وقالتله )) .. شكلها نومه الطويله اترت في دماغك انت ورجعاتك لي 23 سنه فاتو ههههه … ربك ينوضك بسلامه بس توا هدا اقصي امنياتي … والباقي خليها علي ربي … ماتعرفش ربي شن كاتبلنا مع بعض بس توا نوض خلاص صغار ضايعين من غيرك … واحد بيسافر وهوا قلبه محروق … وتانيه ضايعه ومش عارفه تقرر قرار صح في حياتها … وصغار مستاحشينك ومستنين يشوفوك تلعب معاهم … واني (( شبحتله ودمعة عيونها )) مستنيه تحكيلي شن درت من بعدي في 23 سنه الا فاتو …. يوم بيوم ساعه بساعه …

زيد … ههههههه معناها رح نقعد نحكيلك ومايكفنيش عمري … ااااااه ياغاده … قداش حاس الا مر بيا خناجر وطعتني وجرح علي جرح معلم في صدري لحد اخر شي صار معاي … كل مانحس اني سبب في موتتها نحس اني مش رح نسامح نفسي اكتر …

غاده …. لا لا ماتقولش هكي حبيبي

(( انطلست من فمها وبعدين سكتت تقول من صب عليها ميه مسقعه …. ولكن هوا ابتسملها وقاللها …

زيد … ((باابتسامة حب )) كملي حديتك … ماتوقفيش ..

غاده … (( حاولت تبان طبيعيه وقالتله )) … كل واحد فينا ربك كاتبله ساعه معينه وللموت لامفر منها … وورده كانت تصارع في موت وفي ايامها الاخيره … وانت لما اسعفتها كانت شبه ميته ونبضها ضعيييف جدااااا ودليل انك ربك كاتبلها تموت … سياره نقلبت بيكم انتم زوز وانت نوضت لان ربك كاتبلك تعيش … وهيا ربك مش كاتبلها حتي ولو كنت مادرتش حادت … كنت رح توصل بيها ميته لا مفر … فا ماتتقلش علي كاهلك اكتر من تحملك وخلي ايمانك بالله وبالقدر قوي وماتخليش شيطان يوسوس في دماغك ويقنعك بالوهم …

وبعدين اني كنزي قالتلي انها شافت التقرير الشرعي واتبت انها توفت قبل ماتدير الحادت بدقائق يعني انت لما درت الحادت كانت هيا ميته مش انت الا قتلتها … فالدلك نحي الاوهام هيا من راسك ونوض وصح باش تكون سند لصغارك …. ووليا♡ ولا انت عجباتك نومة السرير ؟؟ هههههه …

زيد …. لا لا حاسس نفسي كويس صدقيني … نبي نطلب بكرا بعون الله …

غاده … اكيد مش رح يخلوك تتطلع لين يطمنو انك كويس …

زيد … لا لا رح نوقع علي روحي ونطلع … وبعدين اني دكاتره هنا كلهم صاحبي ماتخافيش عليا ولانسيتي اني دكتور ♡

غاده …. لا مانسيتش ههههه خلاص ورينا عضلاتك يادكتور وشن تقدر تدير ♡

وهنا علي خشت كنزي … تضحك هيا وصغار وياكلو …. واول ماخشت شبحت لبوها وامها وشافت كمية طاقه حب باينه من عيونهم مش محتاجه حتي حكي ♡ … فاقالت لي بوها …

كنزي …. ماشالله الدار مليانه طاقه ايجابيه مش عارفه شن مصدرها بزبط هههههههه شكلنا بنحسدو …

غاده … (( وهنا شبحت لبنتها وناضت وقالتلها )) … خلي ميرا ولارا مع بوهم شوي وتعالي نجيبو زوز قهوه … مش رح نعطلو عليك شوي ونجو ..

زيد … تمام …

وهما طلعو علي خشت الممرضه وفي ايدها جهاز ضغط وخشتله ….

بينما هما اول ماطلعو من الغرفه … غاده وقفت وقالت لي بنتها …

غاده …. تعاليلي هنا … وين كنتي اليوم وعلاش قافله تلفونك … بتهبليني انتي معاك … شن قصتك بزبط ؟؟

كنزي …. ماما بشوي عليا … اني كيف وصلت بنحكيلك … قوتيلي بابا ناضت ونسينا كل شي وطلعنا … والله كنت نبي نحكيلك …

غاده …. واحنا فيها اختصري ياشهر زاد …

كنزي …. بصراحه وبااختصار … موسي طلع يحبني وطلب ايدي للزواج بشكل رسمي …

غاده …. اها شن قوتيله انتي ؟؟

كنزي …. اني شخص الا حبيته خطب وعرسه قريب … لدلك تأكدت اني مستحيل رح نتزوج زواج الحب والقلب … وقلبي يقولي ارفضي … بس عقلي يقولي لا ماتفوتيشي هوا فرصه كبيره بكل مقاييس …

غاده .. من امتي تحسبي فيها بالشكل هدا انتي ؟؟ هيا هادي الحريه الا فلقتيني بمطالاباتها لدرجة وقفتي ضد الكل وهربتي … علي فكره مافرقش موسي علي شعبان نهائيا ياخسارة اللفه الطوووويله هيا الا لفتيها وفي الاخير رجعتي لنفس النقطه …

كنزي ….(( بوجه عصبي )) … من يتكلم هكي توا … انتي اكتر وحده كنتي رافضتيه وماتبيشي …

غاده … كنت غبيه وواخدني الغضب والغباء وخديته بدنب امه مع ان حتي ربي قال كل شخص بيتحاسب لوحده … ولما قربت منه حسيت انه قداش انسان طيب وخلوق وشهم … ويحبك وووواضح من عيونه حتي ولو ماقالهاليش بشكل مباشر …

كنزي …. تمام معاك بس هوا خطب من قبل ومش ناوي يسيب … ياماما اني سمعتهم يتمعشو مع بعض كأنهم يموتو في بعض …

غاده …. معناها انتي شيطانك وزك وفهمك غلط فقط … ويكون في علمك … مبكري قالي … انه مسافر لانه معاش عنده شي هنا خلاص هدا دليل انه سيبها … وقالي نقولك موسي كلامه المره هادي بصدق معاك ولو وافقتي رح تعيشي معاه اسعد انسانه …

وهنا انصدمت كنزي وقعدة تشبح لي امها شوي وبعدين قالتلها …

كنزي …. نوافق … والمره هادي … شن عرفه ايهم بي الا دار بيني وبين موسي مبكري …. زعمك مروه اتصلت بيه قالتله … مستحيل هيا ماتعرفاش …

غاده … شوفي معناها كيف عرف … اكيد في شي وهوا الا خلاه مايقولكش انه فسخ …

كنزي … لحظه بس … رح نعرف توا …

وفتحت تلفونها واتصلت بي مروه … واول ماقعد يضبح … فتحت مروه الخط وقالت …

مروه … الو ايوا كنزي .

كنزي …. مروه قوليلي انتي تعرفي ايهم او رقمه ؟؟ او قولتي لحد علي الا صار معاي ومع موسي في مكتب ..

مروه … اصلا اني ماكنتش موجوده باش نسمعكم ونقول … اني مشيت للحمام وجيت لقيت واحد متلصص بايخ واقف قدام الباب وشكله بيطقطق كان يسمع مانعرفش … بمجرد ماقولتله يطلع طلع طول بدون مايقولي شي …

كنزي … كيف شكله ؟؟؟

أمروه …. طويل وعريض وشعره اصفر وعيونه زرق …

كنزي …. تمام سلام …

وسكرت الخط وقالت لامها …

كنزي …. ماتعرفيش هوا وين توا ؟؟

غاده …. خليته في الحوش بيلم شناطيه …

كنزي …. تمام …

ومشت نزلت بسرعه كنزي … وركبت في سياره … وتسقدت للحوش طول … وطول طريق قعدة تفكر … شن بيصير وشن بتقوله وعلاش هكي يصير معاهم …. وبعد محاولات ومحاولات … عرفت تستجمع قواها … لحد ماوصلت للحوش …. ونزلت من سياره … وركبت لحوشهم طول …. وبمجرد مافتحت الباب شبحت أيهم يسكر في شناطيه ويوقف فيهم … فا خشت وسكرت الباب وقالتله …

كنزي …. (( قربت منه وقالتله )) … وين ماشي ؟؟

أيهم … (( حاول يتجاهل عيونها وقاللها )) … مسافر راجع منين ماجيت …

كنزي …. (( قعدة ساكته شوي وبعدين دمعت عيونها وقالتله )) … واني

ايهم … انتي اخترتي شخص الصح … واني متأكد ان رح يعطيك اكتر مني ..

كنزي …. (( هنا انهارت بالبكي وقالتله )) … بس اني رفضته واخترتك انت …

أيهم …. (( وهنا قام عينه في عينها وقاللها )) … حتي ولو اخترتيني … ماينفعش .

كنزي …. (( تبكي وتتكلم بعصبيه )) … علاش ماينفعش ..

انتي من كلامك مع ماما معناها انك سيبت خطيبتك … معناها علاش ماينفعش …

أيهم …. ماينفعش لاني نعرف موسي … موسي باش قدر ينسي الاوله خدي سنين وسنين وجرح كان فيه … وتوا نرجع نخليه يعيش لحظه من تاني ونكون اني سبب … مانقدرش … مش عارف نديرها … لو انه دارها بي انتقام كنت وقفتله بالمرصاد وخديتك منه بالقوه … بس اني سمعت كل حديتكم … والصدق الا في صوته المره هادي ماسمعتاش حتي لما كان مع موده … فامانقدرش نكون السهم الا يرتشق في صدره مرتين … مش قااااااادر والله مش قااااااادر (( وقعمز علي الكتبه وانهار بالبكي ))

وهيا قعمزة قدامه وقعدة تبكي وتشبحله …. وبعدين وقفت وقالتله …

كنزي …. هيا هادي اخر كلمه عندك متأكد ؟؟

ولكن هنا اكتفي بالصمت ورايده علي راسه وماينسمعش من بكاه الا رشفة خشمه فقط ….

وبعد دقايق وكنزي تستني لعل يقول كلمه … فهمت صمته هوا نهاية الكلام بينهم … فاقالتله …

كنزي …. تمام ربي يوفقك …

ومشت بخطوات بطيئه اتجاه الباب وقعدة واقفه تشبحله …. وكانت تتمني تقوله في لحظات هيا …

(( حاسة بيك

عارفة إنك نفسك أبقى بين إيديك

ليه مخبي وإنت بان شوقك عليك

حاسة بيك

حس بيا خلاص هتقتلني الظنون

مش كفاية تقول بحبك بالعيون

بص لي إنت شايف

ولا مش عايز تشوف

لو صحيح بتحبني

إوعى تاني تقول ظروف

حاسة بيك

ليه حنين بس مش باين عليك

لمسة منك وتلاقيني بين إيديك

حاسة بيك

وإنت عارف إني حاسة بكل ده

نفسي أفهم قولي متسبنيش كده

بص لي إنت شايف

ولا مش عايز تشوف

لو صحيح بتحبني

إوعى تاني تقول ظروف

حاسة بيك )) (( نانسي عجرم ))

وطلعت وسكرت الباب وراها بعد النظرات الاخيره …

ونزلت تجري … وركبت في اول سياره وطلعت طول …

وروحت لحوشها طول منهاره وحست انها خسرت اخر امل ممكن يربطها بيه …. لانها كانت عارفه … ان بمجرد مايركب لطياره ويسافر … رح تكون اخر يوم رح تشوفيه فيه للابد …. وهالشي هوا الا زاد حرق قلبها اكتر ….

وبينما هيا روحت ووصلت لحوشها … ومافااتتش نص ساعه علي وصولها للحوش … فاق أيهم من غيبوبته وناض وغسل وجهه وبخدي تحفه الا في حمام ضرب بيها المرش متع الحمام دقدقه …. وخدي مفاتيحه وتلفونه وطلع من شقه بعد ماحس انه مخنوق خلاص ….

ونزل علي دروج لحد مالقي روحه قدام شقة ياسمين … وهنا طق علي الباب وولع دخانه … واول مافتح اب ياسمين الباب شبحله وقاله …

اب ياسمين … تفضل ياولدي …

ايهم …. شكرا ليك …

ولوح دخانه طفاه بكندرته وخش … واول ماقعمز علي صالون … قاله اب ياسمين …

اب ياسمين …. شن تشرب قهوه او شاهي ؟؟

أيهم … لا لا شكرا ياعمي والله شارب قبل مانجي هنا … اني جاي بنقول كلمتين وبنطلع بس …

اب ياسمين … تفضل ان شالله خير ..

ايهم … بصراحه باش نكون معاك صريح … اني بنفسخ الخطوبه ومش قادر نخدم ياسمين ونكمل معاها … ومن غير ماتسأل … والله بنتكم في قمة الاخلاق وماشفتش منها شي .. بس اني زواجي كله كان بسبب امي وهيا الا قرضت عليا ولكن توا امي ماتت ومانبيش نظلم البنت باقي عمرها … وفي نفس الوقت اني مسافر ومقرر هجره معاش بنروح … لدلك مانبيش نربطها معاي … ان شالله يارب تحصل نصيب خير مني ويقدر يصونها ويسعدها بس … وليا شرف اكيد اني حطيت ايدي في ايدكم بس الله غالب نصيب ومكتوب … نستأدن منكم توا ومانبيش منها تردلي اي شي مسامح في كل شي … ونحي دبله حطها علي طاوله وطلع ….

وخدي بعضه وطلع من باب الشقه .. بدون مايتلفت وراها … واول ماطلع من العماره … طلعتله ياسمين من روشن وابتسمتله ابتسامة رضا ومعاها شكرا من بعيد …

وهوا هزلها راسه … وولع دخانه وركب لسيارته وولعها ومشي …. ومافاتتش تواني … لين وصلاته مسج … وهنا فتحها …. لقي ان موعد طيارته تقدم واصبح ساعه 11 صبح … فاشاف لساعته … لقاها ساعه 8 في الليل …. فاخدي بعضه ومشي للمستشفي طول … وهنا لقي بوه في الغرفه مقعمز ويستني فيه … واول ماخشله ايهم قاله …

ايهم …. شن نوضك من سريرك يابوي ؟؟ وخيرك بروحك ؟؟

زيد …. يرحم ولديك خلاص طلعني مافيا شي … وقعت علي روحي ودكتور صديقي ووافق ولو في شي رح يجيني طول …. اني دكتور ونعرف روحي … لو حاسس علي نفسي بالخطر كنت قعدة …

ايهم …. تمام تمام ماتحرقش دمك … هي هات ايدك وهيا … اني عندي الا انت …

زيد … اكيييد انت ماعندكش غيري هههههه بس اني عندي انت وغيرك ها ماتنساش …

أيهم … (( خدي باايده ومشو وقاله )) .. عارف ههههههه لهدا اني موافق …

زيد …. شن تقصد ؟؟

أيهم … ههههههههه اه توا بتلعب دور الميت عليا فاهمك اني … علي عموم … اني امي يعلم ربي موتها كان سكين في قلبي … بس اني كدلك نعرف انك حاليا انت وخوتي محتاجين لزوجه وام ترعاك وترد بالها منك ومن خوتي … واني عارفه ان كنزي بتختار وكل خيار اصعب من تاني … اما تخلي امها بروحها وامها محتاجتلها … او تخليك انت وخوتي بروحكم وهالشي اصعب … لهدا اني موافق انك تحل هالمشكله وترجع ابله غاده لدمتك من تاني وترجعو عيله وحده … هكي حتي نسافر رح نتأكد انكم مرتاحين وعيله سند لبعضكم لبعض …

وهنا شبحله زيد وعيونه تعبو دموع وقاله …

زيد …. خلاص قررت تهرب زي العاده ؟؟

ايهم …. (( ابتسامه حزينه تخفي وراها الم كبير )) … ايهم قرر يهرب ويخلي كل شي وراه … انت عارفني خلاص …

زيد …. امتي طيارتك ؟؟

ايهم … 11 صبح … يعني ساعه تسعه صبح نكون غادي باش نكمل الاجراءات …

زيد … علي خير يارب …. رح نكلم غاده تجيب البنات ونسقدوك للمطار احنا ممكن ؟؟

ايهم … تمام … اكيد انتم اخر ناس نتمني نشوفهم قبل مانرجع …

زيد …. تمام معناها خلينا نوصلو … وخش ارقد طول باش تلحق تفيق بكري تمام ..

ايهم … نعطيك ادويتك ونطمن عليك قبل …

زيد …. ماتخافش عليا مازال بصحتي واصح منك يخي ناخدها بروحي …

أيهم …. اها بشائر كويسه والله هههههههه

وقعدو طول الطريق يحكو ويهدرو وكانهم اخر مره بيحكو مع بعض …. لحد ماوصلو للحوش … واوا ماوصلو ماارتاحش زيد لين خلاه يخش للغرفه الا فيها كنزي وسكر الباب وراه … وخش زيد لغرفته والابتسامه في عيونه لكن الدموع في قلبه ينزفو بدون صوت ….

وفاتت هالليله علي الكل بصعوبه شديده …. وكل واحد يفكر في الا مر بيه والا مازال رح يشوفوه … ومن بين كل فكره وفكره … مشي كل واحد فيهم في نوم ومافاقش أيهم الا علي صوت طقة بوه …

زيد ….. ايهم نووووض ولدي وتي روحك وافطر طيارتك بتفوت …

ايهم …. صباح الخير … تمام نضت …

زيد … امس كلمت غاده باش بتخطم علينا توا …

ايهم …. زيد فكك من جو المراهقين … ومكالمات نص الليل … سقدني اليوم وخودها من ايدها علي اول شيخ ولم صغارك المتشرتعين تمام …

زيد ….. هههههههه انت اول صغاري والله … ولا قادر عليك ولا قادر علي لمك ..

ايهم … اني ماتخافش عليا … بعد اقل من سنه رح تشوف تسمع بي ولدك حضر رسالة دكتورا واصبح دكتور في مجاله باامتياز …

زيد … يارب نسمع عليك كل خير يارب … يالله وقت عليك دير دوش والبس وتعالي افطري معاي في مطبخ اني واتي من قبلك تقول طيارتي …

ايهم …. تمام ربع ساعه ونكون واتي ….

وهنا خش أيهم لدوش … دوش علي سريع وحلق لحيته ولبس حوايجه وطلع …. وبمجرد ماطلع من حمام وخش لبوه في مطبخ لقي بوه يبعت في رساله لي …

زيد …. ماتنسيش الاوراق الا بنقرو بيها الفاتحه متعنا … وجيبي تحليل تلاتي الا درتيه قبل عمليتك .. يعني زي مااتفاهمنا امس في الليل حبيبتي

غاده .. هههههه حاضر …

وقعدة تشبح لرساله بعد ماردت عليها شوب وتتبسم لحد ماقطعت عليها كنزي خبر افكارها وقالتلها …

كنزي … ماما اني عندي مشوار خودي انتي الصغار وبري واني توا نلحقك تمام …

غاده … تمام اصلا وقت خلاص … بالله جيبلي الاوراق الا فوق الانتري والمفاتيح بسرعه … هيا نوضو حبايبي بتمشو نودعو ايهم ونجو تمام …

وهنا كنزي مدتلها الاوراق وقالتلها …

كنزي …. خلاص قررتو اليوم تقرو فاتحتكم …

غاده …. لو عندك اي اعتراض نوقفو كل شي عادي …

كنزي … لا لا بالعكس اصلا بابا وخواتي محتاجينلك هلباااا واني زيهم اكيد … ربي يسعدك ياماما يارب انتي شفتي ايام صعبه هلبا وتستاهلي كل سعاده توا بجدا

غاده …. يارب حبيبتي وحتي انتي … قوليلي مبكري خيرك نضتي مفزوعه وكاني سمعتك عيطتي …

كنزي … ايه والله ياماما … بعد ماحكينا اني وياك علي موضوع بابا … خشيت توضيت وصليت ركعتين استخاره ورقدت … حلمت كأني عروسه … وكنت فرحانه ونرقص … وعريسي كان أيهم … وفجأءه قمت عيوني في عيونه لقيته موسي … قعدة نعيط ونجري ونجري ونجري وفجاءه عترت في حفرة سوووده غارقه … وفقت من طيحتي في الحفره مفزوعه … وكل مانتفكر منظري اني وموسي كيف عرسان لحمي يشوك مع بعض خلاص … وهالشي زاد خلاني ناخد قراري اليوم …

غاده … شن هوا قرارك ؟؟

كنزي …. لو عندي نصيب فيه رح تعرفي …

غاده ….. ساعه تمانيه الا ربع …. اووووووق وقت … خليني نمشي اني توا سلام …

وخدت صغار والاوراق وطلعت تجري لسياره وولعتها ومشت …. بينما كنزي …. رجعت ركبت لدارها دارت دوش في حمامها ولبست حوايجها وخدت شنطتها … وكلمت مروه تخطم عليها …. ومافاتتش نص ساعه لين كانت مروه عندها …. ومشو لشركه مع بعض … وبمجرد ماوصلت لمكتب موسي … خشت وطلبت من مروه ماتدخلالش حد …. وفاتت دقايق ورا دقايق وهما يتكلمو وواضح علي كنزي انها كانت تبكي ومنهاره … وفجأءه وبعد ساعه بزبط سمعت مروه كنزي لي موسي …

كنزي …. نتمني … لو تحب صديقك وتتمناله سعاده توقف معاه … سعادتنا واقفه علي كلمه منك بس … هوا مستحيل يفكر يطعنك او يحس ان ظلمك … واني حتي لو ماخدانيش … مستحيل يكون قلبي الا ليه … او نكون جسد بس ليك … وانت خلي شهماتك ورجولتك تحدد شن تبي بزبط …

وطلعت وسيباته …. ومروه تشبحلها ومصدومه … وطلعت كنزي علي المطار طول …. واول ماوصلت … لقت ايهم كيف واقف خلاص يودع في خواته وامه وبوه وبيخش لممر الا بيوصله لختم الباسبورت وطياره طول …

وللحظه وبينما اتسمرت ووقفت تشبحله من بعيييد … وماكانش هاين عليها تقرب وماتبكيش وتقوله خليك .. لكن كرماتها كانت تمنع فيها دير شي هيا متأكده انه مش رح يحل شي …. ولكن في لحظه الا حاولت فيها تسمع كلام قلبها وتمشيله في اخر لحظه وتشوفه وتشبع من شوفته … ووكيف بتطلع قدامه ….

شافت موسي يجري من بعيد …. وينادي بااعلي صوته …

موسي ….اااااااااااااااايهم …. مااااااشي وين ومخليني مازال ماصفينااااااش حساباتنا …. وووووين …

وهنا تلفت ايهم وشبح لقي موسي يشبحله وواقف ويضحك …. فالوح شنطه لوطه ومشاله بخطوات سريعه وهوا مصدوم وفرحان ويضحك وخداه بالحضن …

أيهم … اني قولت ان الصداقه الا بينا مستحييييييل تمووووت ياكلب …. توا بس قررت نصفو حساباتنا …. جيت في الاخير والله هههههه …

موسي (( حضنه بطيطبه والعيون مليانات دموع وقاله )) … اني جيت في الاخير لكن انت مازال عندك الوقت …

وفي لحظه هادي كانت واقفه من بعيد تشبحلهم وتضحك ودموع ينزلو منها زي المطر … وموسي شبحلها وقالله …

موسي ….. لطالما كنا نلعبو مع بعض وانت تربح …عمري مازعلت منك لان ربح مكسب وخساره … لكن يوم ماخديت منك موقف يوم حسيت انك تنازلت علي لعب بشرف بس …. ودنيا هادي لعبه … وياتربح فيها ياتخسر … بس شوط فيها مايتعوضش … وكنزي اكبر من مجرد شي وتخسره … ولدلك اني ولاني صديق عمرك … رح نكون سعيد وراضي وفرحان طالما انت لعبت بشرف وكسبت الشوط وخليتها تحبك وتختارك … ومش رح نوقف ضد سعادتكم او نمنعكم … نتمني انك زي مابديتها راجل معاها تكملها راجل صح ….

ايهم …. ههههههههههه انت عارفني لطالما كنت هكي …. ومستحيل نكون غير هكي ..

موسي …. تمام ورينا …ساحه قدامك هههههه

وطلعله الباكو الا فيه دبله الا قدمها لكنزي وقاله …

موسي …. هيا ليك اعتبرها هديه من خوك … وماتخليهاش تضيع منك تاني … وبالتوفيق يارب …. كنزي قدامك …. وامها وبوها وراك …. وطيارتك مازال عليها بزبط نص ساعه والخيار ليك … وبالتوفيق ياصديقي …. والا لطالما رح تكون صديقي صدوق ولكن في الملعب دائما انت ♡ عدوي هههههههههههه

وحضنو بعض بحب وطبطبه علي كتاف … ولبس ايهم نظراته ومشي وسيبه وتخطي كنزي بشموخ بدون مايقيم عينه فيها ….

وهنا مالقتش نفسها الا ايهم قدامهم ومافي شي بينهم الا امها وبوها الا قربو منه وجو يسألو فيه وخطواتها الا كانت تقربله شي في شي …. واول ماوصلت جنبه …. شبح أيهم لي غاده وزيد وقاللهم …..

أيهم ….. نتمني ونتشرف نطلب ايد بنتكم كنزي ليا ونلبسها توا دبله قدامكم وهكي نكون خطبتها بشكل رسمي وبعد اقل من سنه نجيكم وفي ايدي رسالة دكتوره ونقرا فاتحتها ونروح بيها ونريحكم ههه

زيد ….. هههه ….. ماعلينا الا بسؤال العروس …. كنزي انتي شن رأيك ؟؟

هنا شبحت كنزي لبوها مع ابتسامة فرح وخجل وقالتله …

كنزي …. اكيد موافقه يابابا …

زيد …. وانتي ياغاده شن رايك …

غاده …. رووووووووووووووووووووووووووووووووووووووي

…. وبعد مرور سنه تحديدا

غاده …. ماشالله ياكنزي لاالله الا الله عليك … ولابدر مكتمل .. بتخليني نبكي وينخربلك مكياجك وبوك يستني فيك برا باش يزفك لراجلك …

كنزي … بتخليني نبكي ياماما معاش تبكي بالله عليك …… طالعه حلوه بجد … وطرحه هكي شني ؟؟

غاده …. ماشالله عليك مش ناقصك شي ههههه ناقصك ميسون تجي تقربعها فوق راسك علي تعطيلك هدا بس …

كنزي ….. اااه ياماما تمنيت نسو الا فاا وجو لعرسي والله كنت فرحت بيهم ….

كنزي …. ميسون ماعندهاش مشكله وتكلم فيا لحد اليوم زي ماتعرفي وفرحانه انك واخيرا خديتي شخص الا تحبيه … بس راجلها انتي عارفتيه معاش يبيها تخش لصالات اساسا سواء انتي او غيرك ….. والباقي مكملين بعقلية جدك …. لدلك خلاص انسيهم كلللللهم اهم شي اني وبوك وخوتك معاك وحبيبك في ايدك وناس الا تحبك كلهم جنبك والباقي كلللله مش مهم …. وهيااااا خلاص معاش في وقت … اها بوك يتصل اكيد يبيك تتطلعي وايهم شدها وراه ….

كنزي ….. ههههههههه خلاص خلاص والله واتيه بس اخر مره نسالك هكي تمام خلاص … في شي غلط …

غاده …. والله تهبببببلي … وعريسك يستني فيك باش تدرجو وطيارتكم بعد تلاته ساعات فا اطلعي توااااا

كنزي …. تمام … و اتيه …. خلينا نطلعو

غاده ….. رووووووووووووووووووووووووووووووووووزززززززي

ياعويلللللله العريس بيخش … المتحجبه تلبس …

ااااااااااااالف مبروك للعريس ايهم والعروسه كنزي … وربي يدوم افراحهم يارب …. زغرطوووووو ياعويله ….

غاده ……

رووووووووووووووووووووووووووووووووووووووووي …. روووووووووووووووووووووووووووووووووووووووووي

{{ لاالله الا الله … لاالله الا الله … الف صلاة والسلام عليك ياحبيب الله محمد … رووووووووووووووووووووي …. لا الله الا الله … الف الصلاة والسلام عليك ياحبيب الله محمد …

ورده وكل الورد يمشي معاها …. ويزف خطواتها وينشد شداها …. والورد الابيض من عدوبة حياها … يحمر لونه لو يلامس ايدها ….

الف الصلاة والسلام عليك ياحبيب الله محمد ….

روووووووووووووووووووووووووووووووووي

روووووووووووووووووووووي

رووووووووي

النهايه

لقراءة الجزء السابق : الجزء التاسع عشر من رواية أنت عدوي

للإطلاع علي فهرس الأجزاء : جميع اجزاء رواية أنت عدوي للكاتبة كيندا

جميع الحقوق محفوظة للكاتبة كيندا .