الجزء العشرون من رواية محظوظ ولكن

وفي الجزء العشرون من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء العشرون من رواية محظوظ ولكن

رتاج : شوف هاه حتى اني نرسم فيك كل يوم
طلعتله الرسمة ورتهاله وخدتها وطبقتها وحطتهاله عالطاولة ..
على طلعة ليال من الحمام وشافت رتاج واقفة ع عمر
عمر : هيا لو سمحتي تفضلي وخودي ورقتك … قيميها
رتاج : ﻻﻻ خليهالك
خدي عمر الورقة بشوية ولوحها تحت رجله ودفها تحت رجليها .
جت ليال وقعدت تشبح وقتلها : تفضلي
رتاج : ﻻ شي غير كنت نسئل فيه ع حاجة
عمر : ﻻ ماكانتش تسئل فيا ع حاجة كانت اتقول ف كﻻم مايخشش للعقل
رتاج : شن مايخشش العقل انا نحلم بيك كل يوم
ليال : اسمعيني كويس الحركات هادي ماتمشيش عليا امشي من اهنا خير مايصيرش طيب
رتاج : شن صار خيركم انتوا.. يعني ع خاطر قتلكم عاللي صار معاي هكي اديروا

ليال : به تفضلي…هي امشي..
رتاج : عليك اسلوب تتكلمي بيه
عمر : هيا عاد تره من بكري محترمك لكن اطقي ف اسلوب مرتي ﻻ .. اسلوبها خير من اسلوبك واسلوب عشرة زيك

رتاج تلفتت ل ليال وقتلها : ياقعاد
اونه الورقة داسها ف جيب الدجاكة متعه ورقة راسمتهاله انا …
عمر : استغفر الله العلي العظيم
ليال : راجلي و واثقة فيه ولو تحسابي اني بنتلفتله ونقوله حق الدوة… فأنتي غالطة ..
رتاج شبحت شبحة ل ليال وتلفتت عليها ومشت
{ياربي عالقل اللي عندها … سبحان الله اللي يومتها كنت ندعي لربي اتجيني واحدة هكي طيبة وتفهم عليا وتحن عليا ووقتها فرج سمعني وقالي وين تحصلها هادي وقتله الله كبير واللي عند الله مش بعيد وفعﻻ حصلتها }

ليال : شكﻻت مقلبة ..
عمر : درهتلي كبدي بتتبلى عليا عيني عينك
ليال : اي فتانة زابطتها تبي اطيح بينا ..هه مانصدقهاش النوعية هادي
عمر : لكن نقولك حاجة
ليال : قول
عمر : والله كبرتي في عيني ياليال .. كل مرة تصير حاجة تجدبني ليك اكثر ..
ليال : ها يعني لوﻻ الحاجات راك مش مجدوب ليا
عمر :مش هكي بس ايقولك ماتعرفش الشخص لين تعاشره وتخابره
ليال : اي صح ..
بعد شةي جابلهم القرسون اﻻكل..
ليال : اممم شربة عدس محﻻها
عمر : تعرفي اديريها
ليال : ولووو اكيد نعرف هوايتي الطبخ
عمر : حق اي ماسئلتكش عن هواياتك
ليال : الطبخ و لعب الشطرنج وخياطة الدمى والجلوس امام البحر
عمر : كل هواياتك مافيهمش قاسم مشترك بيتا اﻻ اﻻخيرة البحر
ليال : عقلي البحر حتى مانعومش المهم نقعمز قدامه ونسمع صوت الموج … انحس ان كل موجة تحكيلي ف حكاية
عمر : ﻻﻻ اكيد كل موجة تتغزل فيك وفي نظرات عيونك وطلتك الحلوة عليه …
{ولك يؤبرني الخجووول}
ليال : ههه احرجتني بكلماتك
عمر : ههههه مازال ماريتي شي هدا قليل من كثير .
ليال : افتح فمك عموري
عمر : ااااا
ليال : ههههه غشيتك كليتها انا
عمر : هههههه عيب عليك ياهبلة قعدت فاتح فمي للهواء
ليال : ﻻﻻ خﻻص افتح افمك هي
عمر : بالك تلعبي بيا
ليال : ﻻﻻ افتح هي
عمر : ااااا
ليال : همممم
عمر : الله محﻻها احﻻ لقمة
ليال : صحتين ابن عمي …
عمر : حق نمشوا ناخدوا شفرة بش نكلموا عيلتي وعيلتك
ليال : اي بنقولك امبكري ونسيت .

وتغدوا وهدرزوا وبصروا ومشي للمحل وخدوا شفرة و وروحوا
عمر : خلي نتصل ب امي … اممم ماتردش ..
ليال : اكيدة ع خاطر رقم غريب كلم نازك
عمر : اي اهو نتصل بيها … الووو اهلين نازك شن اﻻخبار
نازك : الحمدلله شن امورك وصلتوا ؟؟
عمر : اي الحمدلله وصلت
نازك : حمدلله على سﻻمتكم
عمر : الله يسلمك … وين امي اماﻻ
نازك : هي استنى نرفعلها تلفون
عمر : به
مشت نازك ل امها و وشوشتلها : عمر عالخط وصل ويبي يكلمك
خ وداد اشرتلها بري
نازك : كلميه يام … هاك
خدت منها النقال ومش خاطرها وردت
خ وداد : هاه
عمر : كيف حالك يمى
خ وداد : باهية .. طيب ع سﻻمتك
عمر : الله يسلمك
خ وداد : معاك نازك تعبانة بنرقد
عمر : سﻻمتك شن عندك يمى
نازك : ﻻﻻ انا نازك مدتلي النقال راه
عمر : به شن عندها
نازك : توا كانت باهية ماعندها شي بترقد بس
تنهد عمر وقالها : باهي به بالسﻻمة نازك
نازك : رد بالك ع روحك سﻻم .

نزل التلفون عمر وحس بالحزن ان امه تعامل فيه بالطريقة هادي لدرجة قريب تخنقه العبرة
{اﻻم حنان وعطف باهي عﻻش مش حانة عليا وماتعطفش عليا .. عﻻش المعاملة هادي يشهد الله اني نحبك يمى ..ومانرضى فيك شي ولو تطلبي عيوني نعطيك وشوية فيك … بس ليش تعامليني هكي تعبت انا }
ليال : عموري خيرك
تكى راسه عمر ف حجر ليال وقالها : تعبان .. ومضايق هلبا
ليال : سﻻمتك …
غمراته لحظنها وطبطبت عليه لحد ماخداه النوم و راسه ف حجرها
بعد ساعتين فاق ولقاها قلعدة مقعمزة
عمر : ساعة كم
ليال : 6
عمر : قصدك ليك ساعتين مقعمزة هكي على خاطري
ليال : اي
عمر : بالك وجعك ظهرك ؟؟
ليال : وجعني شوي لكن معليش فداك
{شن الحنية هادي معقولة ساعتين مقعمزة ع خاطري والله مصدوم انا }
عمر : فظيعة انتي ليال… الحق كنت تعبان ومضايق بس لما اتكيت عليك وطبطبتي عليا حسيت براحة
ليال : ان شاء الله تكون ديما مرتاح …
تم باقي يومهم عادي
وعلى تاني يوم الصبح ..

ليال : عموري اممموه فيق حبيبي اليوم اول يوم ليك ف الكورس
جبدها عمر على غفلة وقالها : صباحك سكر وعسل يقطر
ليال : صباحك كل حاجة حلوة
عمر عطاها قبلة جميلة على شفتيها : اممموه … قتلك معش تناشبي
ليال : نوووض هيا عندك كوورس
عمر : ينحرق الكورس ع اﻻساتدة اللي فيه …انا جعان وصراحة نشوف فيك بريوشة بالعسل اممم خلي ناكلك تعالي اهنا هم هم هم
ليال : هههههه ﻻﻻﻻ هههههه عمموووررري ههههه بطل هههه عموووري .. وتوقفت عن المقاومة وانسدلت في شباك عموري …
هئ حم مالنا شغل بيهم المهم شن جوكم انتوا …
بعد ربع ساعة ناض جري عمر خدي دوش ولبس وطلع يجججري للقاعة الفندق اللي فيها الكورس …
حضر وتم وروح
وقضوا احﻻ ايامهم لعبوا وطلعوا وتنزهوا ومشوا للمحﻻت شروا هداية وصوروا ودارو الهبال ويتجارو ورا بعضهم على خاطر حلوة وكل اللي خاطرهم فيه داروه كان بمتابة شهر عسل ليهم و حب عمر ليال وعقله طار بيها وحس انه لقي حبه اللي يدور عليه من زمان.. وفي اليوم اللي ماقبل اﻻخير ليهم ف تركيا طالعين شادة فيه ليال ف ايده ويتمشوا
عمر : للوش
ليال : نعم
عمر : مش جاي على بالي انروح مانبيش نشوف حد … نبي نقعد معاك انتي بس
ليال : حتى انا نتمنى مانروحوش
عمر : به كيف الراي
ليال : امممم مش عارفةف خسارة والله غدوة اخر يوم بديروا اجتماع وبنطلعوا طول للمطار ماباليد حيلة
عمر : يﻻ معليش خلي نروحوا وان شاء الله في الربيع نمشوا ل مكان تاني حتى ماسافرناش لبﻻد تانية نمشوا سبوعين ياخمس ياصبراتة المهم نشموا هواء
ليال : باهي حتى هدا راي يﻻ يﻻ خلي نرقدوا بكري بش غدوة تفيق بكري
عمر :بالك تناشبيني عالصبح
ليال : ﻻ حبيبي حناشبك توا
{الله محﻻها كلمة حبيبي كيف تقول فيها عسل عسللللل}
عمر : اممموه حبيبي
ليال : اممموه
عمر : مديلي النقال خلي نكلم فرج بش غدوة يستقبلنا ف المطار
ليال : به هي
عمر : تمام … اممم مايشدش الخط ليال : عاود ثاني
عمر : اي اهو نعاود … اهو شد … ها فروجة شن الجو
فرج : اهو مصلح شن جوك انت
عمر : حلوووو
فرج : ياعيني عاد زايط ياعافن
عمر : والله مانحكيلك هههههه اسمع غدوة مروح ان شاء الله
فرج : عالخير ساعة كم
عمر : ساعة 1 الظهر بإذن الله نوصل مطار
فرج : خﻻص تﻻقاني نستنى فيك
عمر : تم تم … سﻻمات

فرج ل خ وداد : عمر مروح غدوة
خ وداد : باهي
فرج : اللطف ماستاحشتيشي
خ وداد : تره مدلي اليبرة والخيط
فرج : >_>
خ وداد : شن تشبحلي مدلي اليبرة والخيط خلي نخيط المخاد

ليال : كيف حاله
عمر : منو فرج .. ﻻ حاله كويس اسئلي ع حالي
ليال :كيف حالك انت
عمر : مشتاق لشفايف الحلوة مشتاق للوش نور العين
ليال : هههههه استنى استنى انطفي الضي
عمر : به هي
وناموا وعالصبح عمر مشي للاجتماع وليال ضمت الحاجات وكل شي ف الشنطة ع طلعت عمر من اﻻجتماع كانت واتية ..
طلعوا للمطار وروحوا ل ليبيا واستقبلهن فرج
فرج : عمررررر باﻻحضان باﻻحضان والله ليك وحشة عشرة ايام مروا عليا عشرة سنين
عمر : والله انا اكثر يافروجة احبييي انت
فرج : حمد لله ع سﻻمتك
ليال : الله يسلمك
فرج : والله خليت مكانك ياعافن
عمر : ههههه حتى انت ياغالي
فرج : نحلف عليك مافكرت فيا
عمر : ههههه صح اي
فرج : زابطك شن تبي فيه فرج تركيا وجو مليح . . هيا الحقني خلي نمشوا سيارة
عمر : اوكي … هيا ليال
ليال : هيا هي
عمر : كيف حال امي اماﻻ
فرج : باهية تبرز
عمر : شنو مافيش جديد
فرج : ﻻ جديد .. اركب اركب تو نحطهم الشناطي
عمر : اوكي … قتلها امروح واﻻه
فرج : ايه
عمر :وشن قالت
فرج : فرحت وقالت ان شاء الله عالخير
عمر : اه باهي مدامها فرحت نحسابها كشرت لما سمعت بيا مروح
فرج يفكر فباله …اياح كان تندري دارت روحها ماسمعتنيش بكل ..
وروح بيهم فرج للحوش …
خ وداد بمجرد سمعت صواتهم برا عكرشت وجها وطارتلها …

يتبع……..

لقراءة الجزء التالي : الجزء الحادي والعشرون من رواية محظوظ ولكن

لقراءة الجزء السابق : الجزء التاسع عشر من رواية محظوظ ولكن

للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .